ດ້ວຍຈໍານວນບັດສະໜັບສະໜູນ 192/193 ບັດ ເຊິ່ງເປັນຕົວເລກສູງບັນລຸລະດັບສະຖິຕິ ໃນປະຫວັດສາດແຫ່ງການເລືອກຕັ້ງບັນດາສະມາຊິກຂອງ ສປຊ. ວັນທີ 7 ມິຖຸນາ 2019 ໄດ້ສ້າງຂີດໝາຍແຫ່ງການກັບຄືນສູ່ສະພາຄວາມໝັ້ນຄົງ ສປຊ ທີ່ເຕັມໄປດ້ວຍຄວາມເຫັນດີເຫັນພ້ອມຈາກປະຊາຄົມ. ເປັນຄັ້ງທີສອງ ເມື່ອໄດ້ກາຍເປັນກໍາມະການບໍ່ປະຈໍາການສະພາຄວາມໝັ້ນຄົງ ສປຊ ອາຍຸການ  2020 – 2021. ໝາກຜົນນີ້ ໄດ້ສ່ອງແສງໃຫ້ເຫັນເຖິງຄວາມໄວ້ວາງໃຈຂອງປະຊາຄົມສາກົນ ທີ່ມີຕໍ່ ຫວຽດນາມ ແລະ ກົງກັນຂ້າມ ນີ້ກໍແມ່ນໝາກຜົນທີ່ເໝາະສົມສໍາລັບ ຫວຽດນາມ ພາຍຫຼັງການຂົນຂວາຍຫາສຽງເລືອກຕັ້ງ ແລະ ການປະກອບສ່ວນເຂົ້າໃນການສ້າງສັນຕິພາບ, ຄວາມໝັ້ນຄົງຂອງໂລກ. ທ່ານນາງ Kersti Kaljulaid ປະທານາທິບໍດີ ແອັດສະໂຕນີ ຖືວ່າ:

        “ຂ້າພະເຈົ້າມີຄວາມປິຕິຊົມຊື່ນ ເມື່ອ ຫວຽດນາມ ໄດ້ຮັບການເລືອກຕັ້ງເປັນກໍາມະການບໍ່ປະຈໍາການສະພາຄວາມໝັ້ນຄົງ ດ້ວຍຈໍານວນບັດເຫັນດີສູງທີ່ສຸດ. ສິ່ງດັ່ງກ່າວ ກໍໝາຍຄວາມວ່າ ຫວຽດນາມ ຕ້ອງແບກຫາບໜ້າທີ່ຄວາມຮັບຜິດຊອບອັນໃຫຍ່ຫຼວງໃນອາຍຸການທີ່ດໍາລົງຕໍ່າແໜ່ງ. ພວກຂ້າພະເຈົ້າພວມລໍຄອຍການປະກອບສ່ວນຂອງ ຫວຽດນາມ ໃນບັນດາບັນຫາ ເຊິ່ງໂລກ ພວມມີຄວາມສົນໃຈ”.

ກອງປະຊຸມສຸດຍອດ ອາເມລິກາ - ສປປ.ເກົາຫຼີ ຢູ່ ຮ່າໂນ້ຍ  (ພາບ: AP)

        ຄວາມຈິງແລ້ວ, ເພື່ອໄດ້ຮັບຄວາມໄວ້ເນື້ອເຊ່ືອໃຈຄືແນວນີ້ ຫວຽດນາມ ໄດ້ຕັ້ງໜ້າປະກອບສ່ວນໃຫ້ແກ່ການເຂົ້າຮ່ວມ ສປຊ ໃນໄລຍະ 40 ກວ່າປີມານີ້. ຫວຽດນາມ ໄດ້ດໍາລົງຕໍາແໜ່່ງເປັນກໍາມະການບໍ່ປະຈໍາການສະພາຄວາມໝັ້ນຄົງ ສປຊ ໃນອາຍຸການ 2008 – 2009 ດ້ວຍບັນດາຂີດໝາຍທີ່ໜ້າປະທັບໃຈພໍສົມຄວນ. ນັບທັງເມື່ອສິ້ນສຸດອາຍຸການແລ້ວ, ຫວຽດນາມ ກໍ່ຍັງຄົງສືບຕໍ່ອຸທິດສ່ວນຢ່າງບໍ່ຢຸດຢັ້ງ ດ້ວຍບັນດາບົດບາດຄືເປັນສະມາຊິກ ສະພາສິດທິມະນຸດ ອາຍຸການ 2014 – 2016, ສະພາເສດຖະກິດ ແລະ ສັງຄົມ ສປຊ (2015 – 2019) ແລະ ສະພາບໍລິຫານງານ UNESCO (2017 – 2021). ທ່ານປະລິນຍາເອກ ເລດິ່ງຕິ໊ງ, ສະຖາບັນການຕ່າງປະເທດ ຫວຽດນາມ ຖືວ່າ:

        “ນີ້ແມ່ນຄວາມໝັ້ນໃຈໃໝ່, ທີ່ຕັ້ງບົດບາດໃໝ່ຢູ່ໃນລະດັບສູງກວ່າຂອງຫວຽດນາມໃນການທູດຫຼາຍຝ່າຍ. ຂ້າພະເຈົ້າຄິດວ່າ ຄວາມໝັ້ນໃຈນັ້ນ ຢ່າງໜ້ອຍແມ່ນມີ 3 ພື້ນຖານ: ທີໜຶ່ງແມ່ນພື້ນຖານຄວາມສໍາເລັດຂອງການທູດຫວຽດນາມ, ໃນນັ້ນມີການທູດຫຼາຍຝ່າຍ. ພື້ນຖານທີ 2 ແມ່ນ ບັນດາປະສົບການລະອຽດ ເຊິ່ງ ຫວຽດນາມ ເກັບກໍາມາໄດ້ ເມື່ອເຂົ້າຮ່ວມ ສປຊ ແລະ ພິເສດແມ່ນໃນ ສະພາຄວາມໝັ້ນຄົງ. ພື້ນຖານທີ 3 ແມ່ນການສະໜັບສະໜູນຂອງບັນດາປະເທດໃນພາກພື້ນ ແລະ ບັນດາປະເທດຢູ່ນອກພາກພື້ນ.”

        ມີຂີດໝາຍໜຶ່ງຂອງຫວຽດນາມ ໄດ້ສະແດງໃຫ້ເຫັນຢ່າງຈະແຈ້ງໃນວຽກງານຊຸກຍູ້ ມາດຕະການສ້າງສັນຕິພາບໃນປີ 2019 ນັ້ນແມ່ນການຈັດຕັ້ງສໍາເລັດກອງປະຊຸມສຸດຍອດ ອາເມລິກາ - ສປປ.ເກົາຫຼີ ຢູ່ ຮ່າໂນ້ຍ, ເຊິ່ງໄດ້ເປັນຂົວຕໍ່ເພື່ອໃຫ້ທ່ານປະທານາທິບໍດີ ອາເມລິກາ Donald Trump ແລະ ທ່ານປະທານ ສປປ.ເກົາຫຼີ  Kim Jong Un ເຈລະຈາກັນ ແລະ ຫຍັບເຂົ້າໃກ້ກັບບັນດາບັນຫາທີ່ກ່ຽວຂ້ອງເຖິງສະພາບການປອດນິວເຄຼຍໃນແຫຼມ ເກົາຫຼີ ໄດ້ຫຼາຍກວ່າ. ເຫດການພົວພັນຕ່າງປະເທດນີ້ ໄດ້ຮັບການຕີລາຄາສູງຈາກຫາງສຽງສາກົນ ແລະ ພາກພື້ນ. ທ່ານສາດສະດາຈານ Carl Thayer ນັກຄົ້ນຄວ້າກ່ຽວກັບບັນດາບັນຫາ ສາກົນ ຂອງ ອົດສະຕາລີ ຢັ້ງຢືນວ່າ: 

ປີ 2020, ຫວຽດນາມຈະດຳລົງຕຳແໜ່ງເປັນກຳມະການບໍ່ປະຈຳການຂອງສະພາຄວາມໝັ້ນຄົງ ສປຊ ແລະ ປະທານອາຊຽນ. ອາຊຽນຍາມໃດກໍ່ຢາກປະກອບສ່ວນ ແລະ ໜູນຊ່ວຍວິວັດທະນາການສ້າງສັນຕິພາບຢູ່ແຫຼມເກົາຫຼີ. ສະນັ້ນ, ເລື່ອງການນຳ ອາເມລິກາ ແລະ ສປປ.ເກົາຫຼີ ເລືອກເອົາ ຫວຽດນາມແມ່ນສະຖານທີ່ຈັດຕັ້ງການພົບປະສຸດຍອດຄັ້ງທີ 2 ກ່ອນເວລາ ຫວຽດນາມ ຈະດຳລົງຕຳແໜ່ງເປັນປະທານອາຊຽນ ກໍ່ເປັນການ ຝາກຝັງຕໍ່ ອາຊຽນ ແລະ ຫວຽດນາມ ດ້ວຍຄວາມປາດຖະໜາວ່າ ອາຊຽນ ແລະ ຫວຽດນາມຈະສືບຕໍ່ສວມບົດບາດທີ່ຕັ້ງໜ້າຕໍ່ວິວັດທະນາການສ້າງສັນຕິພາບຢູ່ແຫຼມເກົາຫຼີ.

        ປີ 2019, ຫວຽດນາມກໍ່ສືບຕໍ່ເຂົ້າຮ່ວມ ກຳລັງຮັກສາສັນຕິພາບຂອງ ສປຊ ເມື່ອ ນຳໂຮງໝໍກາງສະໜາມ ຂັ້ນ 2 ເລກ 2 ໄປຍັງ ຊູດັນໃຕ້ ໂດຍເປັນໜຶ່ງໃນບັນດາບໍລິເວນທີ່ຮ້ອນເຮັງທີ່ສຸດໃນໂລກ ປັດຈຸບັນ. ນີ້ແມ່ນບັ້ນຜັນຂະຫຍາຍກຳລັງເຂົ້າຮ່ວມຄະນະປະຕິບັດງານຮັກສາສັນຕິພາບຂອງ ສປຊ ໃຫຍ່ທີ່ສຸດ ເຊິ່ງ ຫວຽດນາມ ໄດ້ເຂົ້າຮ່ວມມາແຕ່ປີ 2013. ທ່ານ ພົນໂທ ຫງວຽນຈີ໊ວິ້ງ, ຮອງລັດຖະມົນຕີ ກະຊວງປ້ອງກັນປະເທດ ຫວຽດນາມ ຢັ້ງຢືນວ່າ

        ໝາກຜົນຍິ່ງໃຫຍ່ທີ່ສຸດ ທີ່ພວກເຮົາບັນລຸໄດ້ນັ້ນແມ່ນສະຕິຄວາມຮັບຮູ້. ເລື່ອງ ຫວຽດນາມນຳສົ່ງກຳລັງຮັກສາສັນຕິພາບໄປຍັງຊູດັງໃຕ້ມີຄວາມໝາຍດ້ານການເມືອງ ແລະ ມີເປົ້າໝາຍທີ່ຈະແຈ້ງທີ່ສຸດ, ສະແດງໃຫ້ເຫັນ ວິໄສທັດຂອງພັກ, ລັດ ນັ້ນແມ່ນປົກປັກຮັກສາປະເທດຊາດແຕ່ທາງໄກ. ພວກເຮົາປົກປັກຮັກສາປະເທດຊາດນັ້ນແມ່ນລວມມີທັງການ ປົກປັກຮັກສາສັນຕິພາບ. ທີ 2 ແມ່ນຄວາມຮັບຮູ້ກ່ຽວກັບ  ຄຸນນະທາດ, ມະນຸດ, ຄວາມສາມາດຂອງກອງທັບ ຫວຽດນາມ. ສິ່ງທີ່ສຳຄັນທີ່ສຸດແມ່ນ ຜ່ານນັ້ນ, ພວກເຮົາຮັບຮູ້ໄດ້ວ່າ ຕ້ອງສຶກສາຮ່ຳຮຽນ, ບຳລຸງກໍ່ສ້າງ, ກະກຽມຫຍັງຕື່ມອີກ ເພື່ອປະຕິບັດໜ້າທີ່ໃນໄລຍະຈະມາເຖິງໃຫ້ເປັນຢ່າງດີ.

        ແລະກໍ່ໃນປີ 2019, ຫວຽດນາມໄດ້ຕ້ອນຮັບຄະນະຜູ້ແທນສາກົນ 570 ຄະນະ, ຜູ້ແທນສາກົນປະມານ 1.700 ທ່ານ ມາເຂົ້າຮ່ວມ ວັນບຸນວິສາຂະບູຊາ ສປຊ 2019 (Vesak 2019). ຜ່ານເຫດການຕ່າງປະເທດ ດ້ານສາສະໜານີ້, ຫວຽດນາມ ໄດ້ສົ່ງສານ ທີ່ວ່າ: Vesak 2019 ແມ່ນໂອກາດເພື່ອໃຫ້ຄິດຫງຳ ກ່ຽວກັບ ສິດຈະທຳສັນຕິພາບ, ຫຼຸດຜ່ອນການປະທະກັນ, ຄວາມທຸກຍາກລຳບາກຂອງ ມະນຸດໃຫ້ຢູ່ໃນລະດັບຕ່ຳສຸດ, ຊຸກຍູ້ນ້ຳໃຈມິດຕະພາບການຮ່ວມມືລະຫວ່າງ ບັນດາປະເທດ… ຫວຽດນາມຍາມໃດກໍ່ພ້ອມແລ້ວທີ່ຈະເປັນສະມາຊິກທີ່ຕັ້ງໜ້າຊຸກຍູ້ບັນດາຄຸນຄ່າມະນຸດສະທຳໃນຫຼັກພະທຳຄຳສັ່ງສອນແລະ  ຄຸນສົມບັດຂອງພະເຈົ້າໃຫ້ປະກົດຜົນເປັນຈິງ, ປະກອບສ່ວນນຳມາເຊິ່ງຄວາມສະຫງົບ, ຜາສຸກໃຫ້ແກ່ ມວນມະນຸດ.

        ເປີດສາກໃຫ້ແກ່ເສັ້ນທາງເດີນໃໝ່ໃນ 2020, ດ້ວຍການດຳລົງຕຳແໜ່ງເປັນປະທານສະພາຄວາມໝັ້ນຄົງ ສປຊ ໃນເດືອນ ມັງກອນ ປີ 2020, ຫວຽດນາມ ຈະມີໂອກາດປະກອບສ່ວນອັນໃຫຍ່ຫຼວງເຂົ້າໃນການເຄື່ອນໄຫວຂອງ ສປຊ. ດ້ວຍຖານະຕຳແໜ່ງຂອງຕົນ, ຫວຽດນາມໃຫ້ຄຳໝັ້ນສັນຍາວ່າ ຈະເດີນຕາມບັນດາຄຸນຄ່າເປົ້າໝາຍ ແລະ ຫຼັກການໃນກົດບັດ ສປຊ, ພ້ອມແລ້ວທີ່ຈະເຮັດວຽກກັບບັນດາປະເທດສະມາຊິກທັງໝົດເພື່ອແກ້ໄຂທຸກໆສິ່ງທ້າທາຍທີ່ມີລັກສະນະແບບໃໝ່ ແລະ ແບບເກົ່າໃນທົ່ວໂລກ.