(vovworld) – ວັນທີ 3/3, ທີ່ນະຄອນ ໂຮ່ຈີ໋ມິນ, ກະຊວງສາທາລະນະສຸກ ຫວຽດນາມ ຈັດຕັ້ງກອງປະຊຸມສະຫຼຸບໜຶ່ງປີແຫ່ງການປະຕິບັດແຜນຮ່າງຂະຫຍາຍວຽກງານ ສາທາລະນະສຸກເຂດທະເລໝູ່ເກາະ ຫວຽດນາມ ຈົນຮອດປີ 2020. ແຜນຮ່າງດັ່ງກ່າວໄດ້ຮັບການອະນຸມັດຜ່ານຈາກທ່ານນາຍົກລັດທະມົນຕີແຕ່ວັນທີ 7/2/2013. ກອງປະຊຸມຢືນຢັນການປະຕິບັດແຜນຮ່າງດັ່ງກ່າວແມ່ນການປະກອບສ່ວນຢ່າງສຳຄັນເຂົ້າໃນຍຸດທະສາດພັດທະນາພື້ນຖານເສດຖະກິດເຂດທະເລ ແລະ ຮັບປະກັນຄວາມສະຫງົບເຂດຊາຍແດນທາງທະເລຂອງ ຫວຽດນາມ.
ຫວຽດນາມແມ່ນປະເທດຕັ້ງຢູ່ແຄມທະເລ, ດ້ວຍຄວາມຍາວທາງທະເລກວ່າ 3260km ພ້ອມກັບລະບົບໝູ່ເກາະ ແລະ ເກາະຢູ່ແຄມຝັ່ງ. ເພື່ອເສີມຂະຫຍາຍທ່າແຮງຈາກທະເລຢ່າງສູງສຸດ, ກອງປະຊຸມຄັ້ງທີ 4, ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 10 ຮັບຮອງເອົາມະຕິກ່ຽວກັບຍຸດທະສາດທາງທະເລ ຫວຽດນາມ ຈົນຮອດປີ 2020, ສູ້ຊົນນຳ ຫວຽດນາມ ກາຍເປັນປະເທດເຂັ້ມແຂງທາງດ້ານທະເລ, ວາງຈຸດໝາຍຈົນຮອດປີ 2020 ເສດຖະກິດທະເລຈະປະກອບສ່ວນປະມານ 53% - 55% GDP. ເພື່ອປະຕິບັດຈຸດໝາຍຂະຫຍາຍລະບົບສາທາລະນະສຸກທະເລ, ເບີ່ງແຍງດູແລສຸຂະພາບຂອງປະຊາຊົນເຂດທະເລ, ລັດຖະບານ ຫວຽດນາມ ລົງທຶນໃຫ້ແກ່ກຳລັງອອກແຮງງານທາງທະເລແມ່ນບູລິມະສິດຢ່າງໜຶ່ງໃນຍຸດທະສາດທາງທະເລ ຫວຽດນາມ ຈົນຮອດປີ 2020.
ສ້າງເຄືອຂ່າຍສາທາລະນະສຸກເໝາະສົບກັບຈຸດພິເສດສະເພາະຂອງເຂດທະເລໝູ່ເກາະ
ແຜນຮ່າງ “ ຂະຫຍາຍວຽກງານສາທາລະນະສຸກເຂດທະເລໝູ່ເກາະຈົນຮອດປີ 2020” ໄດ້ຜັນຂະຫຍາຍຢູ່ 151 ເມືອງ, ເທດສະບານ, ນະຄອນທີ່ຂຶ້ນກັບ 28 ແຂວງ, ນະຄອນ ຢູ່ແຄມທະເລຂຶ້ນກັບສູນກາງໃນໄລຍະ 2013 – 2020, ດ້ວຍງົບປະມານແມ່ນ 8200 ຕື້ດົງ. ຈຸດໝາຍຂອງແຜນຮ່າງແມ່ນຮັບປະກັນໃຫ້ແກ່ປະຊາຊົນທີ່ດຳລົງຊີວິດ ແລະ ເຮັດວຽກຢູ່ເຂດທະເລໝູ່ເກາະໄດ້ສຳຜັດ ແລະ ນຳໃຊ້ບໍລິການສາທາລະນະສຸກໃຫ້ແກ່ຄວາມຕ້ອງການໃນວຽກງານປ້ອງກັນ, ພະຍາບານສຸກເສີນ, ກວດປິ່ນປົວພະຍາດ ແລະ ຍົກສູງສຸຂະພາບ. ພ້ອມດຽວກັນນັ້ນ, ແຜນຮ່າງແນໃສ່ປັບປຸງເຄືອຂ່າຍສາທາລະນະສຸກໃຫ້ມີຄວາມສາມາດພຽງພໍ ແລະ ເໝາະສົມກັບຈຸດພິເສດສະເພາະການເຄື່ອນໄຫວປ້ອງກັນ, ເບີ່ງແຍງດູແລສຸຂະພາບຂອງປະຊາຊົນເຂດທະເລໝູ່ເກາະ; ຂະຫຍາຍແຫຼ່ງຊັບພະຍາກອນມະນຸດໃນຂົງເຂດສາທາລະນະສຸກມີຈຳນວນ ແລະ ຄຸນນະພາບພຽງພໍ, ຜ່ານນັ້ນ, ເພີ່ມທະວີຄວາມອາດສາມາດໃນວຽກງານພະຍາບານສຸກເສີນ, ການຂົນສົ່ງຄົນເຈັບໄປປິ່ນປົວພະຍາດ, ການປ້ອງກັນດ້ານໂລກລະບາດ ແລະ ບັນຫາພະຍາດສະເພາະຢູ່ເຂດທະເລໝູ່ເກາະ.
ທ່ານຝ້າມຄັກຕ້ວນ, ຜູ້ອຳນວຍການໂຮງໝໍຫຼາຍຂະແໜງ ໂດເລື່ອງ - ກາດຫາຍ ນະຄອນຫາຍຟ່ອງ ໃຫ້ຮູ້ວ່າ :
“ແຜນຮ່າງ “ ຂະຫຍາຍວຽກງານສາທາລະນະສຸກເຂດທະເລໝູ່ເກາະຈົນຮອດປີ 2020” ແມ່ນປະຕິບັດຕາມທັດສະນະເພື່ອຮັບປະກັນຊີວິດສັງຄົມ, ເພື່ອຄວາມເປັນລະບຽບຮຽບຮ້ອຍ, ອະທິປະໄຕເຂດທະເລໝູ່ເກາະ ແລະ ເພື່ອອະທິປະໄຕຂອງປະເທດຊາດ. ອີງຕາມທັດສະນະດັ່ງກ່າວ, ໝາກຜົນທີ່ໄດ້ຮັບຈາກແຜນຮ່າງສຳລັບບັນດາໂຮງໝໍ, ໂດຍສະເພາະແມ່ນບັນດາໂຮງໝໍ ເຂດທະເລໝູ່ເກາະ, ນັ້ນແມ່ນການລົງທຶນດ້ານພື້ນຖານວັດຖຸ ກໍຄືລົງທຶນດ້ານບຸກຄະລາກອນ ແມ່ນເໝາະສົມ ແລະ ມີປະສິດທິຜົນທີ່ສຸດ”
 ຜູ້ຕາງໜ້າກົມເສນາລັກ-ກະຊວງປ້ອງກັນປະເທດ ກ່າວຄຳເຫັນ ທີ່ກອງປະຊຸມ
|
ທີ່ຈິງແລ້ວ, ນັບແຕ່ປີ 1991, ວຽກງານສຸຂາພິບານສຳລັບທະຫານ ແລະ ປະຊາຊົນຢູ່ ເຂດທະເລໝູ່ເກາະຂອງຫວຽດນາມ ໄດ້ຮັບການຜັນຂະຫຍາຍຕາມຮູບແບບສົມທົບກັນລະຫວ່າງເສນາລັກ ແລະແພດພົນລະເຮືອນ, ອັນໄດ້ນຳມາເຊິ່ງປະສິດທິຜົນດີ. ພ້ອມນັ້ນ, ຫວຽດນາມກໍປະຕິບັດແຜນຮ່າງ “ ຂະຫຍາຍວຽກງານສາທາລະນະສຸກເຂດທະເລໝູ່ເກາະຈົນຮອດປີ 2020” ແນໃສ່ພັດທະນາຂະແໜງການແພດທະເລວິທະຍາເວົ້າສະເພາະ ແລະ ເຄືອຂ່າຍສາທາລະນະສຸກເຂດທະເລເວົ້າລວມ, ຕອບສະໜອງຄວາມຮຽກຮ້ອງຕ້ອງການຂອງ ວຽກງານສຸຂາພິບານໃຫ້ແກ່ປະຊາຊົນ. ພື້ນຖານວັດຖຸຂະແໜງສາທາລະນະສຸກໃນ ເຂດທະເລໝູ່ເກາະລວມມີ ໂຮງໝໍປະສົມລະຫວ່າງເສນາລັກ ແລະແພດພົນລະເຮືອນ 9 ແຫ່ງ, ສູນການແພດປະສົມ 3 ແຫ່ງຊຶ່ງຕັ້ງຢູ່ ເກາະກົນດາວ, ຟູ້ກວກ, ຫຼີເຊີນ, ຫ້ອງກວດພະຍາດ 138 ແຫ່ງ, ສຸກສາລາ 83 ແຫ່ງ....
ປະສິທິຜົນໃນເບື້ອງຕົ້ນຂອງ ເຄືອຂ່າຍສາທາລະນະສຸກເຂດທະເລໝູ່ເກາະ
ໄລ່ສະເພາະປີ 2013, ທົ່ວເຂດທະເລໝູ່ເກາະຂອງຫວຽດນາມ, ບັນດາຮາກຖານສາທາລະນະສຸກໄດ້ປະຕິບັດວຽກງານພະຍາຍບານສຸກເສີນໃຫ້ແກ່ຄົນເຈັບ 1.600 ຄົນ, ກວດພະຍາດ ແລະ ສະໜອງຢຸກຢາໃຫ້ຄົນເຈັບ 32.000 ເທື່ອຄົນ, ຜ່າຕັດໃຫ້ຄົນເຈັບກວ່າ 750 ຄົນ, ກວດພະຍາດ ແລະ ສະໜອງຢຸກຢາໂດຍບໍ່ຄິດຄ່າໃຫ້ຄົນເຈັບ 13.000 ເທື່ອຄົນ.... ທ່ານພົນຈັດຕະວາ ວູ້ດຶກບີງ ຫົວໜ້າກົມໆເສນາລັກ- ກະຊວງປ້ອງກັນປະເທດໃຫ້ຮູ້ວ່າ :
“ ບັນດາກົມກອງສາທາລະນະສຸກ- ກະຊວງປ້ອງກັນປະເທດໄດ້ບັນລຸບັນດາໝາກຜົນດີໃນໄລຍະປະຕິບັດແຜນຮ່າງ. ໂດຍຜ່ານໂຄງການສົມທົບລະຫວ່າງເສນາລັກ ແລະແພດພົນລະເຮືອນ, ພວກຂ້າພະເຈົ້າຈະສືບຕໍ່ປັບປຸງລະບົບສາທາລະນະສຸກ ເຂດທະເລໝູ່ເກາະ ເພື່ອນຳມາເຊິ່ງການບໍລິການການແພດທີ່ດີທີ່ສຸດໃຫ້ແກ່ວົງຄະນະຍາດ ”
ເພື່ອສືບຕໍ່ຜັນຂະຫຍາຍແຜນຮ່າງ “ ຂະຫຍາຍວຽກງານສາທາລະນະສຸກເຂດທະເລໝູ່ເກາະຈົນຮອດປີ 2020” ເປັນຢ່າງດີນັ້ນ, ໃນປີ 2014, ບັນດາກະຊວງ, ຂະແໜງການ, ທ້ອງຖິ່ນຕ່າງໆຕັ້ງຢູ່ແຄມທະເລຈົ່ງສຸມໃສ່ຈັດຕັ້ງ, ສ້າງໂຄງການຍ່ອຍ, ໃນນັ້ນ, ກະຊວງສາທາລະນະສຸກແມ່ນຫົວໜ່ວຍມີບົດບາດສຳຄັນໃນການຈັດຕັ້ງ, ແນະນຳບັນດາຫົວໜ່ວຍກໍ່ສ້າງສູນປິ່ນປົວພະຍາດສະເພາະຢູ່ ເຂດທະເລໝູ່ເກາະໃນບັນດາແຂວງ, ນະຄອນຕ່າງໆ.