ຄວາມເຄັ່ງຕຶງປີນຂັ້ນໄດໃນການພົວພັນລະຫວ່າງ ອາເມລິກາ ແລະ ສາທາລະນະລັດປະຊາຊົນປະຊາທິປະໄຕ ເກົາຫລີ

Hong Van -

ວັນພະຫັດ ທີ 13 ເມສາ ຄ.ສ. 2017 | 14:00:00

(vovworld)- ສອງສາມມື້ພາຍຫລັງປະທານາທິບໍດີ ອາເມລິກາ Donald Trump ອອກຄຳສັ່ງບຸກໂຈມຕີສະຫນາມບິນການທະຫານຢູ່ ຊີຣີ ດ້ວຍລູກສອນໄຟນຳວິຖີ Tomahawh, ກອງທັບ ອາເມລິກາ ກໍ່ເລີ່ມຕົ້ນການກະທຳທາງການທະຫານຈຳນວນຫນຶ່ງ ສົ່ງເຖິງ ສປປ ເກົາຫລີ. ນີ້ໄດ້ຮັບຖືວ່າແມ່ນຄຳກ່າວເຕືອນຂອງ ວໍຊິງຕັນ ຕໍ່ເລື່ອງ ພຽງຢາງ ສືບຕໍ່ເລື່ອງພັດທະນາອາວຸດນິວເຄຼຍ. ການກະທຳຂອງ ອາເມລິກາ ໄດ້ສ້າງຄວາມວິຕົກກັງວົນໃນປະຊາຄົມສາກົນກ່ຽວກັບອາດຈະເກີດການປະທະກັນບົນທະເລຫລືທາງອາກາດລະຫວ່າງ ອາເມລິກາ ແລະ ສປປເກົາຫລີ.

ຄວາມເຄັ່ງຕຶງປີນຂັ້ນໄດໃນການພົວພັນລະຫວ່າງ ອາເມລິກາ ແລະ ສາທາລະນະລັດປະຊາຊົນປະຊາທິປະໄຕ ເກົາຫລີ - ảnh 1

ກຳປັ່ນສະຫນາມບິນຂອງອາເມລິກາ
ພາບ:TTXVN

ສາຍເຫດທີ່ອາເມລິກາ ສົ່ງກຳປັ່ນຮົບຂະຫນາດໃຫຍ່ເຖິງແຫລມເກົາຫລີ ຍ້ອນພຽງຢາງ ມີການກະທຳຍິງທົດລອງລູກສອນໄຟ, ນິວເຄຼຍ ໃນໄລຍະມໍ່ໆມານີ້. ເມື່ອທ່ານນາຍົກລັດຖະມົນຕີ ຍີ່ປຸ່ນ Shinzo Abe ພົບປະກັບປະທານາທິບໍດີ ອາເມລິກາ Donald Trump ເມື່ອວັນທີ 12/2, ສປປ ເກົາຫລີ ໄດ້ຍິງລູກສອນໄຟຫລາຍລູກຕົກໃສ່ເຂດເສດຖະກິດພິເສດຂອງ ຍີ່ປຸ່ນ. ກ່ອນທີ່ທ່ານປະທານປະເທດຈີນ ສີຈິ້ນຜິງ ພົບປະກັບປະທານາທິບໍດີ ອາເມລິກາ Donald Trump, ສປປ ເກົາຫລີ ກໍ່ໄດ້ຍິງທົດລອງລູກສອນໄຟໃນວັນທີ 5/4. ສະນັ້ນ ທ່ານ Donald Trump ໄດ້ສົ່ງກຳປັ່ນຮົບຂະຫນາດໃຫຍ່ຫລາຍລຳ, ໃນນັ້ນ ມີກຳປັ່ນສະຫນາມບິນ ເຖິງບໍລິເວນແຫລມເກົາຫລີ.

ສົ່ງກຳປັ່ນຮົບຂະຫນາດໃຫຍ່ເຖິງບໍລິເວນແຫລມເກົາຫລີຢ່າງລຽນຕິດ

ອາເມລິກາ ພວມສະແດງຄວາມແຂງກະດ້າງໃນນະໂຍບາຍສຳລັບ ສປປ ເກົາຫລີ, ວັນທີ 8/4, ທະຫານເຮືອ ອາເມລິກາ ໄດ້ສົ່ງກຳປັ່ນບຸກໂຈມຕີ ຫລາຍລຳ ໂດຍກຳປັ່ນສະຫນາມບິນນຳຫນ້າ ເຖິງ ແຫລມເກົາຫລີ. ໂຄສົກຂອງກອງບັນຊາ ປາຊີຟີກ ຂອງ ອາເມລິກາ (USPC), ພັນໂທ Dave Benham ໃຫ້ຮູ້ວ່າ: ນີ້ແມ່ນມາດຕະການລະມັດລະວັງ ເພື່ອແນໃສ່ຮັກສາການມີຫນ້າ ແລະ ການກຽມພ້ອມຂອງອາເມລິກາ ຢູ່ທາງທິດຕາເວັນຕົກ ປາຊີຟີກ ໃນສະພາວະທີ່ ສປປ ເກົາຫລີ ສືບຕໍ່ແມ່ນໄພນາບຂູ່ໃນພາກພື້ນນີ້ ຍ້ອນບັນດາເຫດທົດລອງລູກສອນໄຟໄດ້ກໍ່ຄວາມຂາດ ສະຖຽນລະພາບຂອງປະເທດນີ້ ກໍຄື ການກະທຳສືບຕໍ່ສືບຕາມກຳລັງຄວາມສາມາດກ່ຽວກັບອາວຸດນິວເຄຼຍຂອງພຽງຢາງ. ຕໍ່ຫນ້າຄວາມສາມາດຂອງ ສປປ ເກົາຫລີ ອາດຈະດຳເນີນເຫດຍິງທົດລອງລູກສອນໄຟ ໃນວັນທີ 15/4 (ແມ່ນໂອກາດສະເຫລີມສະຫລອງ 105 ປີແຫ່ງວັນຄ້າຍວັນເກີດຂອງອະດີດການນຳ ສປປ ເກົາຫລີ …), ກອງທັບ ອາກາດຂອງອາເມລິກາ ໄດ້ສົ່ງ “ເຮືອບິນລ່ານິວເຄຼຍ” WC-135 Constant Phoenix ເຖິງຖານທີ່ໝັ້ນກອງທັບອາກາດ Kadena (ແຂວງ Okinawa).

ພ້ອມກັບບັນດາການກະທຳສົ່ງກຳປັ່ນສະຫນາມບິນ, ກຳປັ່ນບຸກໂຈມຕີ ສົ່ງເຖິງແຫລມເກົາຫລີ, ຫລັກໝັ້ນຂອງ ວໍຊິງຕັນ ໂດຍແມ່ນທ່ານ Donald Trump ຖະແຫລງຢ່າງແຈ້ງໃນຫນ້າເວັບ Twitter ໃນວັນທີ 11/4 ດ້ວຍຄຳຢືນຢັນວ່າ ວໍຊິງຕັນ ພ້ອມແລ້ວທີ່ຈະການແກ້ໄຂບັນຫາ ສປປ ເກົາຫລີ ດ້ວຍຕົນເອງ. ທ່ານ Sean Spicer, ເລຂາການຂ່າວຂອງ ທຳນຽບຂາວ ໃຫ້ຮູ້ວ່າ: ບັນດາມາດຕະການການທະຫານອາດຈະໄດ້ຮັບການຜັນຂະຫຍາຍນັ້ນຄືເປັນການນາບຂູ່ຕໍ່ການກະທຳຂອງ ພຽງຢາງ ເພີ່ມທະວີການເຄື່ອນໄຫວຍິງລູກສອນໄຟຫລືການຍິງທົດລອງລູກສອນໄຟ.

ປະຕິກິລິຍາຕໍ່ບັນດາການກະທຳຈາກ ອາເມລິກາ, ພຽງຢາງ ຖະແຫລງວ່າໄດ້ກຽມພ້ອມສະພາບການເກີດສົງຄາມ. ສປປ ເກົາຫລີ ເອີ້ນການກະທຳສົ່ງກຳປັ່ນສະຫນາມຮົບຂອງ ອາເມລິກາ ແມ່ນ “ການກະທຳເກາະຜິດ” ແລະ ກ່າວເຕືອນວ່າ ຈະ “ນຳໃຊ້ບັນດາອາວຸດຫນັກ” ເພື່ອປົກປັກຮັກສາປະເທດຊາດ. ຊ້ຳບໍ່ໜຳ ວັນທີ 11/4 ສື່ມວນຊົນ ສປປ ເກົາຫລີ, ຍັງຖະແຫລງວ່າ ປະເທດນີ້ ຈະດຳເນີນການບຸກໂຈມຕີນິວເຄຼຍ

ເພື່ອແນໃສ່ ອາເມລິກາ ຖ້າຫາກມີບໍ່ວ່າສັນຍານໃດ ກ່ຽວກັບການກະທຳເກາະຜິດ; ກອງທັບ ສປປ ເກົາຫຼີ ພວມຕິດຕາມກວດກາທຸກໆການກະທຳຈາກຝ່າຍກົງກັນຂ້າມຢ່າງແໜ້ນແຟ້ນ ແລະ ກຳລັງນິວເຄຼຍຂອງ ສປປ ເກົາຫຼີ ແມ່ນສຸມໃສ່ເຂົ້າບັນດາຖານທີ່ໝັ້ນ ອາເມລິກາ ບໍ່ພຽງແຕ່ຢູ່ ສ. ເກົາຫຼີ ແລະ ປາຊີຟິກ ເທົ່ານັ້ນ ຫາກຍັງຢູ່ທັງທະວີບ ອາເມລິກາ ອີກດ້ວຍ.

ການປະທະກັນອາດຈະເກີດຂຶ້ນຫຼືບໍ່?

ເຖິງວ່າການບຸກໂຈມຕີຢູ່ ຊີຣີ ແມ່ນຄຳກ່າວເຕືອນທາງອ້ອມສຳລັບ ພຽງຢາງ ບໍ່ຄວນລື່ນກາຍການກຳນົດ ແຕ່ໃນສະພາບການຕົວຈິງ ຍາກທີ່ຈະມີເລື່ອງ ອາເມລິກາ ບຸກໂຈມຕີ ສປປ ເກົາຫຼີ ຄືບຸກໂຈມຕີ ຊີຣີ. ຕາມວົງການນັກໄຈ້ແຍກແລ້ວ, ສປປ ເກົາຫຼີ ບໍ່ແມ່ນປະເທດ ອີຣັກ ໃນປີ 2003 ແລະ ກໍ່ບໍ່ແມ່ນ ຊີຣີ ໃນປະຈຸບັນ. ຖ້າຫາກບັນດາການນຳຂອງທຳນຽບຂາວ ແລະ ທຳນຽບ 5 ແຈເປີດໄພຂຽວໃຫ້ແກ່ການປະທະກັນ, ຍູ້ອຳນາດການປົກຄອງ ພຽງຢາງ ໃຫ້ຕົກເຂົ້າສູ່ສະພາບບໍ່ມີທາງອອກ, ທ່ານ Kim Jong un ອາດຈະນຳໃຊ້ອາວຸດນິວເຄຼຍ. ດັ່ງນັ້ນ, ແນ່ນອນວ່າວົງການເຈົ້າໜ້າທ່ີ ອາເມລິກາ ຈະຕ້ອງຄິດໄລ່ຊັ່ງຊາເພື່ອຫຼີກລ້ຽງການປະທະກັນ.

ນອກຈາກນັ້ນແລ້ວ, ອາເມລິກາ ຕ້ອງຄິດໄລ່ເຖິງປະຕິກິລິຍາຂອງຫາງສຽງໂລກ. ໃນການໂອ້ລົມທາງໂທລະສັບກ່ຽວກັບສະພາບການຢູ່ ສປປ ເກົາຫຼີ ກັບທ່ານປະທານາທິບໍດີ ອາເມລິກາ Donald Trump ໃນວັນທີ 12/4, ທ່ານປະທານປະເທດ ຈີນ ສີຈີ້ນຜິງ ໄດ້ຊີ້ແຈ້ງວ່າ: ຈີນ ຢຶດໝັ້ນເດີນຕາມສັນຕິພາບ ແລະ ສະຖຽນລະພາບໃນແຫຼມ ເກົາຫຼີ, ຕາມນັ້ນແລ້ວ, ໄດ້ເນັ້ນໜັກວ່າ: ຄວາມເຄັ່ງຕຶງໃນແຫຼມດັ່ງກ່າວຕ້ອງໄດ້ຮັບການແກ້ໄຂໂດຍສັນຕິວິທີ. ໃນຂະນະນັ້ນ, ໃນວັນທີ 9/4, ທ່ານລັດຖະມົນຕີການຕ່າງປະເທດ ອາເມລິກາ Rex Tillerson ໄດ້ຖະແຫຼງວ່າ: ປະເທດນີ້ ອາດຈະຄິດເຖິງເລື່ອງເປີດການເຈລະຈາຄືນໃໝ່ ຖ້າຫາກ ພຽງຢາງ ຢຸດຕິບັນດາການເຄື່ອນໄຫວທົດລອງລູກສອນໄຟ ແລະ ນິວເຄຼຍ. ເປົ້າໝາຍຂອງ ອາເມລິກາ ແມ່ນປອດນິວເຄຼຍໃນແຫຼມ ເກົາຫຼີ ຫາກບໍ່ແມ່ນວ່າປ່ຽນແປງອຳນາດການປົກຄອງ ພຽງຢາງ.

ການພົວພັນລະຫວ່າງ ອາເມລິກາ ແລະ ສປປ ເກົາຫຼີ ນັບມື້ນັບເຄັ່ງຕຶງ ພາຍຫຼັງທີ່ 2 ຝ່າຍມີບັນດາການກະທຳເພີ່ມທະວີອາດຈະເກີດການປະທະກັນບົນທະເລ ຫຼື ທາງອາກາດ. ແຕ່ເຖິງຢ່າງໃດກໍ່ຕາມ, ຫາງສຽງຍັງມີຄວາມຫວັງ ວ່າ ອາເມລິກາ ແລະ ສປປ ເກົາຫຼີ ບໍ່ລື່ນກາຍການກຳນົດ, ຫຼີກລ້ຽງການປະທະກັນປະກອບອາວຸດທີ່ມີປັດໄຈນິວເຄຼຍ.

Hong Van