ທ່ານຜູ້ອຳນວຍການໃຫຍ່ VOV ໂດ໋ຕຽນສີ

ຮຽນທ່ານຜູ້ຟັງຂອງ VOV!

ຮຽນພໍ່ແມ່ພີ່ນ້ອງຊາວ ຫວຽດນາມ ທີ່ພວມດຳລົງຊີວິດ ແລະ ເຮັດວຽກຢູ່ ຕ່າງປະເທດ!

ປະເທດ ຫວຽດນາມ, ໃນນັ້ນມີພາກສ່ວນໜຶ່ງແມ່ນພໍ່ແມ່ພີ່ນ້ອງຊາວ ຫວຽດນາມ ພວມດຳລົງຊີວິດ, ເຮັດວຽກ, ຮ່ຳຮຽນຢູ່ຕ່າງປະເທດ, ພວມພ້ອມກັບທົ່ວປວງຊົນທັງຊາດ ຫວຽດນາມ ອຳລາຈາກປີຂານ 2022 ແລະ ກ້າວເຂົ້າສູ່ປີໃໝ່ປີແມວ 2023 ດ້ວຍຄວາມເບີກບານມ່ວນຊື່ນ ແລະ ຮູ້ສຶກວ່າຈະໄດ້ຮັບສິ່ງໂຊກດີໃນປີໃໝ່.

ຂ້າພະເຈົ້າຂໍສະແດງຄວາມຮັກແພງ, ສົ່ງຄຳຢື້ຢາມຖາມຂ່າວທີ່ຈິງໃຈ ແລະ ຄຳອວຍພອນປີໃໝ່ທີ່ດີງາມມາຍັງປະຊາຊົນ ຫວຽດນາມ ໝົດທຸກຄົນທີ່ພວມດຳລົງຊີວິດ, ເຮັດວຽກ ແລະ ຮ່ຳຮຽນຢູ່ຫ່າງໄກກັບບ້ານເກີດເມືອງນອນ… ສຳລັບປະເທດຊາດ ແລະ ປະຊາຊົນ ຫວຽດນາມ, ພໍ່ແມ່ພີ່ນ້ອງຊາວ ຫວຽດນາມ ອາໄສຢູ່ບໍ່ວ່າປະເທດໃດກໍ່ຕາມກໍ່ລ້ວນແຕ່ແມ່ນເປັນພາກສ່ວນໜຶ່ງທີ່ບໍ່ອາດຕັດແຍກ ອອກຈາກປະເທດ ຫວຽດນາມ ທີ່ຮັກແພງໄດ້.

        ຂ້າພະເຈົ້າຂໍຝາກເຖິງທ່ານຜູ້ຟັງຂອງ VOV ທັງຢູ່ພາຍໃນ ແລະ ຕ່າງປະເທດຄຳອວຍພອນທີ່ດີງາມທີ່ສຸດໃນໂອກາດປີໃໝ່ປີແມວ 2023. ຫວັງວ່າ, ທຸກໆທ່ານຈະປະສົບຜົນສຳເລັດ ແລະ ມີຄວາມຜາສຸກໃນປີໃໝ່ 2023.

        ຮຽນພໍ່ແມ່ພີ່ນ້ອງ ແລະ ທ່ານຜູ້ຟັງ!

        ເມື່ອຫວນຄືນປີ 2022, ເຖິງວ່າສະພາບການສາກົນ ແລະ ພາຍໃນປະເທດປະສົບກັບຄວາມຫຍຸ້ງຍາກ, ສິ່ງທ້າທາຍ, ກໍຕາມແຕ່ພາຍໃຕ້ການຊີ້ນຳຢ່າງຖືກຕ້ອງຂອງພັກ ແລະ ລັດ, ປະເທດ ຫວຽດນາມ ສືບຕໍ່ມີທ່າພັດທະນາ, ຜ່ານຜ່າທຸກຄວາມຫຍຸ້ງຍາກ ແລະ ບັນລຸໄດ້ຫຼາຍຜົນງານຮອບດ້ານທີ່ໜ້າຊື່ນຊົມ ໃນເກືອບທຸກຂົງເຂດ. ເສດຖະກິດມະຫາພາກຂອງ ຫວຽດນາມ ໄດ້ຮັກສາ, GDP ບັນລຸ 8,02%, ແມ່ນລະດັບເຕີບໂຕສູງສຸດເມື່ອທຽບໃສ່ຫຼາຍປະເທດໃນພາກພື້ນ ແລະ ໃນໂລກ. ໃນປີ 2022, ວົງເງິນການຄ້າຂອງ ຫວຽດນາມ ສືບຕໍ່ບັນລຸລະດັບສະຖິຕິ, ປະມານ 732 ຕື້ USD; ການເຕີບໂຕເສດຖະກິດຟື້ນຟູຕັ້ງໜ້າ, ບັນດານະໂຍບາຍຮັບປະກັນຊີວິດສັງຄົມໄດ້ຮັບປະກັນ, ການປ້ອງກັນຊາດ - ປ້ອງກັນຄວາມສະຫງົບໄດ້ຮັບການຮັກສາ. ການພົວພັນຕ່າງປະເທດຂອງ ຫວຽດນາມ ສືບຕໍ່ໄດ້ຮັບການປັບປຸງ ແລະ ເພີ່ມທະວີຢ່າງແຮງນັບທັງການພົວພັນສອງຝ່າຍ ແລະ ຫຼາຍຝ່າຍ. ຖານະບົດບາດ ແລະ ອິດທິພົນຊື່ສຽງຂອງ ຫວຽດນາມ ຢູ່ເວທີສາກົນນັບມື້ນັບໄດ້ຮັບການຍົກສູງຂຶ້ນ.

ສຳລັບ ວິທະຍຸກະຈາຍສຽງ ຫວຽດນາມ ແລ້ວ, ປີ 2022 ກໍແມ່ນປີໜຶ່ງທີ່ມີຄວາມໝາຍຫຼາຍຢ່າງ.

ວິທະຍຸກະຈາຍສຽງ ຫວຽດນາມ ສືບຕໍ່ຢັ້ງຢືນວ່າ ເປັນອົງການສື່ມວນຊົນຫຼັກແຫຼ່ງ ແລະ ຢູ່ອັນດັບຕົ້ນໆຂອງ ຫວຽດນາມ, ດ້ວຍຫຼາຍພາຫະນະສື່ສານ ຫຼາຍພາສາທີ່ໄດ້ຖະແຫຼງຂ່າວກ່ຽວກັບບັນຫາສຳຄັນຕ່າງໆຂອງປະເທດຊາດໃນທຸກຂົງເຂດການເມືອງ, ເສດຖະກິດ, ການຕ່າງປະເທດ, ການປ້ອງກັນຊາດ - ປ້ອງກັນຄວາມສະຫງົບ, ວັດທະນະທຳ - ກິລາ ແລະ ສັງຄົມ ໃຫ້ສູ່ມວນຊົນທັງຢູ່ພາຍໃນ ແລະ ຕ່າງປະເທດຢ່າງຄົບຖ້ວນ, ມີຊີວິດຊີວາ ແລະ ເປັນຂົວເຊື່ອມຕໍ່ລະຫວ່າງ ຫວຽດນາມ ກັບເພື່ອນມິດສາກົນ ແລະ ພໍ່ແມ່ພີ່ນ້ອງຊາວ ຫວຽດນາມ ອາໄສຢູ່ຕ່າງປະເທດ.

ກ້າວເຂົ້າສູ່ປີແມວ 2023, ພວກຂ້າພະເຈົ້າປາດຖະໜາວ່າ ຈະສືບຕໍ່ໄດ້ຮັບຄວາມສົນໃຈ, ຄຳແບ່ງປັນ ແລະ ຄຳເຫັນປະກອບ, ຂໍ້ສະເໜີອັນລ້ຳຄ່າຂອງທ່ານຜູ້ຟັງ, ຜູ້ອ່ານຢູ່ທຸກແຖບຖິ່ນທົ່ວປະເທດ ຫວຽດນາມ ແລະ ໃນໂລກ ຊ່ວຍໃຫ້ລາຍການຂອງ VOV ນັບມື້ນັບມ່ວນກວ່າ ແລະ ໃກ້ຊິດກັບມວນຊົນຫຼາຍກວ່າ. ວິທະຍຸກະຈາຍສຽງ ຫວຽດນາມ ຈະປ່ຽນແປງໃໝ່ວິທີສື່ສານຂໍ້ມູນຂ່າວສານຢ່າງບໍ່ຢຸດຢັ້ງ ເພື່ອສືບຕໍ່ສົມກັບຄວາມໄວ້ເນື້ອເຊື່ອໃຈ, ຄວາມຮັກແພງຂອງທ່ານຜູ້ຟັງ, ຜູ້ອ່ານທັງຫຼາຍ.

ເນື່ອງໃນໂອກາດບຸນປີໃໝ່ປະຈຳ ຊາດ ປີແມວ 2023, VOV ຂໍອວຍພອນໄຊອັນປະເສີດແດ່ທ່ານຜູ້ຟັງທຸກໆທ່ານ ປີໃໝ່ຈົ່ງມີສຸຂະພາບເຂັ້ມແຂງ, ພະລານາໄມສົມບູນ, ມີແຕ່ຄວາມສຸກ, ຄວາມຈະເລີນ./.