ທ່ານ ຫງວຽນແທງຮົ່ງ ຄະນະສະມາຊິກສະພາແຫ່ງຊາດແຂວງ  ບີງເຢືອງ ພາບ:quochoi.vn

 

ທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 14, ການເຄື່ອນໄຫວຊັກຖາມບໍ່ໄປຕາມໝວດບັນຫາຄືກ່ອນນີ້ ຫາກບັນດາສະມາຊິກສະພາແຫ່ງຊາດ (ສສຊ) ຊັກຖາມໂດຍກົງບັນດາເນື້ອໃນກ່ຽວຂ້ອງເຖິງການປະຕິບັດມະຕິຕົກລົງຂອງສະພາແຫ່ງຊາດ 6 ສະບັບ ກ່ຽວກັບການຕິດຕາມກວດກາຫົວເລື່ອງສະເພາະ ແລະ ການຊັກຖາມ. ເນື້ອໃນຊັກຖາມຂຶ້ນກັບຂົງເຂດໃດ ບັນດາລັດຖະມົນຕີຂຶ້ນກັບຂົງເຂດນັ້ນແມ່ນຜູ້ຕອບ. ບັນດາບັນຫາກ່ຽວຂ້ອງເຖິງການບໍລິຫານລວມຂອງລັດຖະບານ ໂດຍແມ່ນບັນດາທ່ານຮອງນາຍົກລັດຖະມົນຕີເປັນຜູ້ຕອບ. ພາຍຫລັງຕອບຄຳຊັກຖາມຂອງບັນດາສະມາຊິກລັດຖະບານທີ່ແຕ່ລະວາລະຊັກຖາມ, ທ່ານນາຍົກລັດຖະມົນຕີ ລາຍງານເຮັດແຈ້ງບັນດາເນື້ອໃນກ່ຽວຂ້ອງທີ່ຂຶ້ນກັບຄວາມຮັບຜິດຊອບຂອງລັດຖະບານຕື່ມອີກ. ໃນວາລະຊັກຖາມຄັ້ງນີ້ ບັນດາຄຳຖາມຂອງ ສສຊ ແມ່ນມີຄວາມກະທັດລັດ, ບັນຫາຈະແຈ້ງ ແລະ ຜູ້ຕອບກໍ່ຕອບຖືກກັບເນື້ອໃນຂອງຄຳຖາມຊື່ງ ສສຊ ມີຄວາມສົນໃຈ ພອ້ມທັງເຮັດແຈ້ງຄວາມຮັບຜິດຊອບ, ຊີ້ແຈ້ງທິດທາງແກ້ໄຂໃນໄລຍະຈະມາເຖິງ.

ຈຸດປ່ຽນໃຫມ່ໄດ້ເສີມຂະຫຍາຍປະສິດທິຜົນຂອງການຊັກຖາມ

 ການຊັກຖາມດຳເນີນໃນເວລາ 3 ວັນ, ມີຄຳຖາມນັບຮ້ອຍໆຄຳໂດຍ ສສຊ ໄດ້ຍົກອອກມາຕໍ່ບັນດາສະມາຊິກລັດຖະບານ. ບັນດາ ສສຊ ຕີລາຄາວ່າ ວາລະຊັກຖາມແມ່ນດຳເນີນໃນບັນຍາກາດປະຊາທິປະໄຕ ແລະ ກົງໄປກົງມາ, ເນື້ອໃນຊັກຖາມແມ່ນຕອບສະຫນອງໄດ້ບັນດາບັນຫາຊື່ງຜູ້ມີສິດເລືອກຕັ້ງໃນທົ່ວປະເທດມີຄວາມສົນໃຈ. ທ່ານ ຫງວຽນແທງຮົ່ງ ສສຊ ແຂວງ ບີງເຢືອງ ຖືວ່າ:

“ຂ້າພະເຈົ້າຕີລາຄາສູງ ເລື່ອງສະພາແຫ່ງຊາດ ຈັດຕັ້ງວາລະຊັກຖາມຕາມຮູບການນີ້. ການຊັກຖາມນີ້ແມ່ນສະແດງໃຫ້ເຫັນວ່າ ບັນດາທ່ານລັດຖະມົນຕີກຳແຫນ້ນໄດ້ບັນດາບັນຫາທີ່ຂຶ້ນກັບຄວາມຮັບຜິດຊອບ ແລະ ຂົງເຂດຕົນຮັບຜິດຊອບຫລືບໍ່. ຜ່ານບັນດາວາລະຊັກຖາມ ຂ້າພະເຈົ້າເຫັນວ່າ ບັນດາທ່ານລັດຖະມົນຕີ ກຳແຫນ້ນບັນຫາ ແລະ ຕອບບັນຫາຖືກກັບເນື້ອໃນຊັກຖາມ. ໄລຍະຈະມາເຖິງ ສະພາແຫ່ງຊາດຄວນຕີລາຄາ, ຖອດຖອນບົດຮຽນເພື່ອສືບຕໍ່ຮັກສາບັນດາວາລະຊັກຖາມຕາມຮູບການໃຫມ່ນີ້.”

ທີ່ກອງປະຊຸມເທື່ອນີ້ ບັນດາ ສສຊ ຕີລາຄາສູງການບໍລິຫານຂອງທ່ານນາງປະທານສະພາແຫ່ງຊາດ ຫງວຽນທິກີມເງິນ ໃນບັນດາວາລະຊັກຖາມແມ່ນມີໄຫວພິບ, ກົມກຽວ, ພາວະວິໄສ. ທ່ານ ຟານວຽດເລື້ອງ ສສຊ ແຂວງ ບີ່ງເຟືອກ ເນັ້ນຫນັກວ່າ:

“ຂ້າພະເຈົ້າຕີລາຄາສູງຄວາມສາມາດບໍລິຫານຂອງທ່ານນາງປະທານສະພາແຫ່ງຊາດ, ເຖິງວ່າ ໃນກອງປະຊຸມເທື່ອນີ້ ບໍ່ຮູ້ວ່າ ສສຊ ຈະຊັກຖາມສະມາຊິກລັດຖະບານທ່ານໃດ ແຕ່ທ່ານນາງປະທານສະພາແຫ່ງຊາດ ລວບລວມບັນຫາຢ່າງວ່ອງໄວ ແລະ ທັນການ, ຈັດແບ່ງໝວດບັນຫາໃດ ເນື້ອໃນໃດ ແມ່ນຂຶ້ນກັບສະມາຊິກລັດຖະບານທ່ານໃດ. ທ່ານນາງປະທານສະພາແຫ່ງຊາດ ບໍລິຫານວາລະຊັກຖາມເຮັດໃຫ້ ສສຊ ມີຄວາມເພິ່ງພໍໃຈ, ບໍ່ມີຜູ້ໃດຜິດຫວັງ.”

ເສີມຂະຫຍາຍບົດບາດ, ຄວາມຮັບຜິດຊອບຂອງຜູ້ນຳຫນ້າໃນການແກ້ໄຂບັນດາຄຳສະເຫນີແນະຂອງຜູ້ມີສິດເລືອກຕັ້ງ

ບັນດາວາລະຊັກຖາມ ແລະ ຕອບຄຳຊັກຖາມ ທີ່ກອງປະຊຸມຂອງສະພາແຫ່ງຊາດໃນຊຸມມື້ຜ່ານມາ ໄດ້ສ້າງບັນຍາການຟົດຟື້ນ ເພາະມີການໂຕ້ວາທີລະຫວ່າງບັນດາ ສສຊ. ສຳລັບບັນດາທ່ານລັດຖະມົນຕີ ກໍ່ສະແດງໃຫ້ເຫັນຄວາມຮັບຜິດຊອບສູງເມື່ອຕອບບັນດາບັນຫາຊື່ງ ຜູ້ມີສິດເລືອກຕັ້ງພວມສົນໃຈຕິດຕາມຢູ່ຂະແຫນງຕົນ. ທ່ານ ຫງວຽນວັນຈຽນ ສສຊ ນະຄອນ ຮ່າໂນ້ຍ ຖືວ່າ:

“ການຊັກຖາມກ່ຽວຂ້ອງເຖິງກະຊວງ, ຂະແຫນງໃດ ການນຳຂະແຫນງນັ້ນ ມີຄວາມຮັບຜິດຊອບຕອບຄຳຊັກຖາມ. ນີ້ແມ່ນການເຄື່ອນໄຫວປ່ຽນໃຫມ່ຂອງສະພາແຫ່ງຊາດ ເພື່ອຮັບປະກັນໃຫ້ບັນດາ ສສຊ ປະຕິບັດບົດບາດເປັນຕົວແທນໃຫ້ແກ່ບັນດາຜູ້ມີສິດເລືອກຕັ້ງຂອງຕົນເມື່ອຍົກອອກບັນດາບັນຫາຮ້ອນເຮັ່ງ, ບັນຫາສັງຄົມມີຄວາມສົນໃຈ, ບັນຫາຊື່ງການນຳຂະແຫນງ, ບັນດາສະມາຊິກລັດຖະບານ ໄດ້ໃຫ້ຄຳໝັ້ນສັນຍາ, ໄດ້ປະຕິບັດຄຳໝັ້ນໝາຍຂອງຕົນທີ່ບັນດາກອງປະຊຸມກ່ອນນີ້ ແລະ ມາຮອດເທື່ອນີ້ ຕ້ອງມີຄວາມຮັບຜິດຊອບປະຕິບັດຄຳຕອບການເຄື່ອນໄຫວຂອງຕົນຢ່າງມີປະສິດທິຜົນ.”

ການເຄື່ອນໄຫວຊັກຖາມ ແລະ ຕອບຄຳຊັກຖາມ ທີ່ກອງປະຊຸມຂອງສະພາແຫ່ງຊາດເທື່ອນີ້ ແມ່ນຮູບການໂອ້ລົມສົນທະນາເພື່ອຊອກໄດ້ບັນຫາຍັງຄົງຄ້າງ, ອ່ອນດ້ອຍ ແລະ ຊອກວິທີແກ້ໄຂໃນການພັດທະນາເສດຖະກິດສັງຄົມຂອງປະເທດຊາດ. ທ່ານ ຫງວຽນງອກເຟືອງ ສສຊ ແຂວງ ກວ໋າງບີ່ງ ຖືວ່າ: ວາລະຊັກຖາມທີ່ກອງປະຊຸມເທື່ອນີ້ ສືບຕໍ່ເສີມຂະຫຍາຍບົດບາດ, ຄວາມຮັບຜິດຊອບຂອງການນຳບັນດາກະຊວງ, ຂະແຫນງການໃນການຊີ້ນຳບໍລິຫານປະຕິບັດຫນ້າທີ່ສ້າງສາ ແລະ ພັດທະນາປະເທດຊາດ.

“ເມື່ອທຽບໃສ່ກອງປະຊຸມສະໄຫມຜ່ານມາ ກອງປະຊຸມເທື່ອນີ້ ບັນດາທ່ານລັດຖະມົນຕີ ໄດ້ຍົກອອກບັນດາມາດຕະການປະຕິບັດຄຳໝັ້ນໝາຍຂອງຕົນຢ່າງມີປະສິດທິຜົນກວ່າ. ຈາກຂົງເຂດກະສິກຳຕະຫລອດຮອດຂົງເຂດສິ່ງແວດລ້ອມ ການລົງທຶນ ລ້ວນແຕ່ມີບັນດາມາດຕະການແກ້ໄຂຢ່າງລະອຽດ, ຕັ້ງຫນ້າກວ່າ ແລະ ມີປະສິດທິຜົນກວ່າໃນການປະຕິບັດຄຳໝັ້ນໝາຍຂອງບັນດາທ່ານລັດຖະມົນຕີ.”

 ຄວາເປີດອົກເປີດໃຈ, ປະຊາທິປະໄຕ ແລະ ຄວາມຮັບຜິດຊອບ ແມ່ນການຕີລາຄາຈາກ ສສຊ ແລະ ຜູ້ມີສິດເລືອກຕັ້ງໃນທົ່ວປະເທດກ່ຽວກັບການເຄື່ອນໄຫວຊັກຖາມ ແລະຕອບຄຳຊັກຖາມ ທີ່ກອງປະຊຸມຂອງສະພາແຫ່ງຊາດເທື່ອນີ້. ຄວາມຮັບຜິດຊອບຂອງບັນດາການນຳບັນດາກະຊວງ, ຂະແຫນງການ ໃນການແກ້ໄຂຄວາມຫຍຸ້ງຍາກ, ຂໍ້ຕິດຂັດ ເມື່ອຜັນຂະຫຍາຍປະຕິບັດບັນດາຫນ້າທີ່ພັດທະນາເສດຖະກິດສັງຄົມ ໄດ້ສ້າງຄວາມໄວ້ເນື້ອເຊື່ອໃຈຢ່າງທັນການໃຫ້ແກ່ຜູ້ມີສິດເລືອກຕັ້ງ, ປະຊາຊົນ ແລະ ສ້າງກຳລັງຫນູນໃນການພັດທະນາປະເທດຊາດ.