ຕາມຕາຕະລາງຈັດອັນດັບ ລັດຖະບານເອເລັກໂຕນິກ ຂອງ ສະຫະປະຊາຊາດປີ 2018 ແລ້ວ, ຫວຽດນາມ ພວມຢືນຢູ່ອັນດັບທີ 88 ໃນຈໍານວນ 193 ປະເທດ, ເຂດແຂວ້ນ ແລະ ຢືນຢູ່ອັນດັບທີ 6 ໃນພາກພື້ນອາຊຽນ. ໂດຍປະຕິບັດຕາມກອບລັດຖະບານເອເລັກໂຕນິກ (ສະບັບ 1.0) ປີ 2015, ມາຮອດປັດຈຸບັນ ໄດ້ມີຫຼາຍກວ່າ 50 ກະຊວງ, ຂະແໜງການ, ທ້ອງຖິ່ນຜັນຂະຫຍາຍການສຶກສາຄົ້ນຄວ້າ ແລະ ກໍ່ສ້າງລັດຖະບານ ຫຼືອໍານາດການປົກຄອງເອເລັກໂຕນິກ ແລະ ມາຮອດປັດຈຸບັນ ໄດ້ກໍ່ສ້າງ ແລະ ນໍາເຂົ້າໃຊ້ງານ ຖານຂໍ້ມູນແຫ່ງຊາດ ກ່ຽວກັບການຈົດທະບຽນວິສາຫະກິດ ແຕ່ຍັງຄົງມີຂໍ້ຄົງຄ້າງຫຼາຍຢ່າງໃນການກໍ່ສ້າງລັດຖະບານເອເລັກໂຕນິກ.

ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກ່າວຄໍາເຫັນທີ່ກອງປະຊຸມ

        ເລື່ອງຍູ້ແຮງການຜັນຂະຫຍາຍລັດຖະບານເອເລັກໂຕນິກ ແມ່ນ ທ່າອ່ຽງທີ່ຈໍາເປັນ

        ນັບແຕ່ປີ 2000, ພັກ, ລັດ ໄດ້ຖືເປັນສໍາຄັນການພັດທະນາການໝູນໃຊ້ເຕັກໂນໂລຢີຂໍ້ມູນຂ່າວສານ ເຂົ້າໃນການເຄື່ອນໄຫວຂອງບັນດາອົງການຈັດຕັ້ງພາກລັດ, ເຊິ່ງໄດ້ກໍານົດວ່າ ນີ້ແມ່ນກໍາລັງໜູນ ປະກອບສ່ວນເຂົ້າໃນພາລະກິດປ່ຽນແປງໃໝ່ ສ້າງກໍາລັງຄວາມສາມາດໃນການເຄື່ອນໄຫວໄວ, ກະທັດລັດ ແລະ ອັບເດດຂໍ້ມູນໄດ້ຢ່າງທັນການ ເພື່ອປະຕິບັດການຫັນເປັນປະເທດອຸດສາຫະກໍາ ແລະ ທັນສະໄໝ ໄດ້ຢ່າງມີໄຊ.

        ກົມການເມືອງ ກໍໄດ້ປະກາດໃຊ້ມະຕິສະບັບເລກທີ 36 ວ່່າດ້ວຍການຍູ້ແຮງການໝູນໃຊ້, ພັດທະນາເຕັກໂນໂລຢີຂໍ້ມູນຂ່າວສານ ເພື່ອຕອບສະໜອງຕາມຄວາມຮຽກຮ້ອງຕ້ອງຂອງການພັດທະນາ ແລະ ເຊື່ອມໂຍງເຂົ້າກັບສາກົນ. ມະຕິສະບັບດັ່ງກ່າວ ໄດ້ກໍານົດເປົ້າໝາຍລະອຽດຮອດປີ 2020 “ຜັນຂະຫຍາຍໂຄງການປະຕິຮູບການບໍລິຫານຢ່າງມີປະສິດທິຜົນ, ຕິດພັນກັບການກໍ່ສ້າງລັດຖະບານເອເລັກໂຕນິກ ແລະ ສະໜອງການບໍລິການສາທາລະນະອອນໄລຢູ່ລະດັບສູງ ແລະ ໃນຫຼາຍຂົງເຂດ ຢ່າງແໜ້ນແຟ້ນ”. ປີ 2015, ລັດຖະບານໄດ້ປະກາດໃຊ້ມະຕິສະບັບທໍາອິດ ທີ່ສຸມໃສ່ລັດຖະບານເອເລັກໂຕນິກ.

        ນັບແຕ່ນັ້ນມາຮອດປັດຈຸບັນ, ການກໍ່ສ້າງລັດຖະບານເອເລັກໂຕນິກ ໄດ້ຮັບການຜັນຂະຫຍາຍຈາກບັນດາກະຊວງ, ຂະແໜງການ, ທ້ອງຖິ່ນ ໃນຫຼາຍຂົງເຂດ ເພື່ອແນໃສ່ເປີດເຜີຍການເຄື່ອນໄຫວຂອງອົງການຈັດຕັ້ງພາກລັດ. ຄວາມພະຍາຍາມເຫຼົ່ານັ້ນ ໄດ້ຊ່ວຍໃຫ້ຫວຽດນາມ ປັບປຸງທີ່ຕັ້ງໃນຕາຕະລາງຈັດອັນດັບກ່ຽວກັບລັດຖະບານເອເລັກໂຕນິກ ຂອງສະຫະປະຊາຊາດ. ປີ 2018 ເລື່ອນຂັ້ນ 1 ຂັ້ນ ເມື່ອທຽບໃສປີ 2016, ຢືນຢູ່ອັນດັບທີ 88/193 ປະເທດໃນໂລກ ແລະ ຢືນອັນດັບທີ 6 ໃນພາກພື້ນ ອາຊຽນ (ຖັດຈາກ ສິງກະໂປ, ມາເລເຊຍ, ບຣູໄນ, ໄທ ແລະ ຟີລິບປິນ).

        ເຖິງຢ່າງໃດກໍຕາມ, ຕ້ອງຮັບຮູ້ເຫັນໄດ້ວ່າ ລະດັບຈັດອັນດັບດັ່ງກ່າວ ແມ່ນຍັງຕໍ່າຢູ່ ເມື່ອທຽບໃສ່ພາກພື້ນ ແລະ ໃນໂລກ. ເມື່ອສັງເກດຜົນງານຂອງບັນດາປະເທດໃນໂລກ, ອາດເວົ້າໄດ້ວ່າ ເລື່ອງຜັນຂະຫຍາຍລັດຖະບານເອເລັກໂຕນິກ ແມ່ນທ່າອ່ຽງທີ່ຈໍາເປັນ, ຍົກສູງລັກສະນະໂປ່ງໃສໃນການເຄື່ອນໄຫວຂອງລັດຖະບານ, ຍູ້ຖອຍໄພສໍ້ລາດບັງຫຼວງ, ປະກອບສ່ວນເຂົ້າໃນການພັດທະນາເສດຖະກິດ ແລະ ແມ່ນເສັ້ນທາງເພື່ອສ້າງຄວາມຈະເລີນຮຸ່ງເຮືອງໃຫ້ແກ່ປະເທດຊາດ, ພິເສດແມ່ນໃນສະພາບທີ່ການປະຕິວັດອຸດສາຫະກໍາ 4.0 ພວມດໍາເນີນຢ່າງແຮງໃນທົ່ວໂລກ. ທ່ານ ມາຍຕ໋ຽນຢຸງ, ລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ໃຫ້ຂໍ້ສັງເກດວ່າ:

“ປະຈຸບັນ, ເລື່ອງສ້າງລັດຖະບານເອເລັກໂຕນິກແມ່ນຄວາມຕ້ອງການທີ່ຈຳເປັນຂອງບັນດາປະເທດໃນວິວັດການປະຕິຮູບ, ມັນໄດ້ຕິດພັນກັບການພັດທະນາຂອງລັດຖະບານ. ຢູ່ ຫວຽດນາມ ກໍ່ຄືກັນ. ເມື່ອພວກເຮົາຄ່ອຍໆຫັນປ່ຽນຈາກອັດຕະໂນມັດໄປເປັນດີຈີຕອນ ແມ່ນຄວາມຕ້ອງການພາວະວິໄສ. ຫວຽດນາມ ສ້າງລັດຖະບານເອເລັກໂຕນິກໄດ້ເກືອບ 20 ປີແລ້ວ, ແລະກໍ່ບັນລຸໄດ້ບັນດາຜົນງານໃນເບື້ອງຕົ້ນແຕ່ບັນດາຜົນງານທີ່ບັນລຸໄດ້ນັ້ນຍັງຈຳກັດຢູ່”

ຮ່ວມແຮງຮ່ວມໃຈຜັນຂະຫຍາຍວຽກງານໃນໄລຍະຈະມາເຖິງ

       ລັດຖະບານ ຫວຽດນາມ ພວມສະແດງໃຫ້ເຫັນຄວາມຕັດສິນໃຈຢ່າງແຮງກ່ຽວກັບການສ້າງລັດຖະບານເອເລັກໂຕນິກ ແລະ ຫວັງວ່າ, ໃນໄລຍະຈະມາເຖິງ, ຈະມີການຫັນປ່ຽນຕັ້ງໜ້າ. ທີ່ກອງປະຊຸມຂອງຄະນະກຳມະການແຫ່ງຊາດກ່ຽວກັບລັດຖະບານເອເລັກໂຕນິກ ທີ່ໄດ້ຈັດຕັ້ງໃນວັນທີ 20 ກັນຍາ, ທ່ານ ຫງວຽນແມ້ງຮູ່ງ, ຮັກສາການລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫວຽດນາມ ໃຫ້ຮູ້ວ່າ: ກະຊວງພວມສ້າງ ແລະ ປັບປຸງໂຄງປະກອບລັດຖະບານເອເລັກໂຕນິກ ໃຫ້ສົມບູນແບບເພື່ອຍື່ນສະເໜີຕໍ່ລັດຖະບານຮັບຮອງເອົາໃນປີ 2018 ບົນພື້ນຖານຫັນເປັນລະອຽດຢ່າງວ່ອງໄວ ເພື່ອໃຫ້ບັນດາກະຊວງ, ຂະແໜງການລ້ວນແຕ່ຜັນຂະຫຍາຍໄດ້. ຕາມທ່ານຮອງນາຍົກລັດຖະມົນຕີ ຫວູດຶກດາມ ແລ້ວ, ພັດທະນາລັດຖະບານເອເລັກໂຕນິກຄວນສຳຜັດຕາມທິດຮອບດ້ານ, ທັງດ້ານບໍລິການສາທາລະນະ, ຊັບພະຍາກອນມະນຸດ ແລະ ພື້ນຖານໂຄງລ່າງ. ຄວນຍູ້ແຮງການສ້າງຖານຂໍ້ມູນຂ່າວສານແຫ່ງຊາດ, ພິເສດແມ່ນກ່ຽວກັບປະຊາກອນ. ໃນຂະນະນັ້ນ, ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ:

        “ພວກເຮົາຢາກສະແດງໃຫ້ເຫັນຈິດໃຈ, ຄວາມຕັດສິນໃຈດ້ານການເມືອງສູງ ແລະ ແກ້ໄຂສິ່ງກີດຂວາງຢ່າງຂ້ຽວຂາດ ເພື່ອມຸ່ງໄປເຖິງການສ້າງລັດຖະບານເອເລັກໂຕນິກຢູ່ ຫວຽດນາມ ໃຫ້ສຳເລັດ, ຍົກລະດັບລັດຖະບານເອເລັກໂຕນິກ ຢູ່ ຫວຽດນາມ ເພື່ອຮັບໃຊ້ປະຊາຊົນ, ຮັບໃຊ້ພາລະກິດແຫ່ງການສ້າງສາ ແລະ ປົກປັກຮັກສາປະເທດຊາດໃຫ້ດີທີ່ສຸດ. ຍ້ອນເຫດນັ້ນ, ຕ້ອງຮູ້ວິທີການຈັດຕັ້ງ, ຈັດແບ່ງວຽກງານ, ເລັ່ງລັດການຜັນຂະຫຍາຍວຽກງານຢ່າງເໝາະສົມ. ຕ້ອງມີກົດລະບຽບຢ່າງເຂັ້ມງວດໃນການຈັດຕັ້ງປະຕິບັດ, ບໍ່ປະໃຫ້ມີຜົນສະທ້ອນເຖິງຄວາມກ້າວໜ້າໃນວິວັດການສ້າງລັດຖະບານເອເລັກໂຕນິກ”

        ທ່ານນາຍົກລັດຖະມົນຕີ ກໍ່ມອບໝາຍໃຫ້ບັນດາລັດຖະມົນຕີ, ປະທານຄະນະກຳມະການປະຊາຊົນແຂວງ, ນະຄອນຕ່າງໆ ຕ້ອງຮັບຜິດຊອບການຜັນຂະຫຍາຍລັດຖະບານເອເລັກໂຕນິກໃນຂອບເຂດຂອງກະຊວງ, ຂະແໜງການ, ທ້ອງຖິ່ນຂອງຕົນຄຸ້ມຄອງ. ໃນເດືອນ ຕຸລາ 2018, ກະຊວງຖະແຫຼງການ ແລະ ສື່ສານ ຫວຽດນາມ ຈະສົມທົບກັບຫ້ອງວ່າການລັດຖະບານສ້າງກອບເອກະສານດ້ານຄວາມຮູ້ກ່ຽວກັບລັດຖະບານເອເລັກໂຕນິກ ຫວຽດນາມ ສະບັບ 2.0, ເໝາະສົມກັບທ່າອ່ຽງແຫ່ງການພັດທະນາລັດຖະບານເອເລັກໂຕນິກໃນໂລກ ແລະ ສະພາບການປະຕິວັດອຸດສາຫະກຳ 4.0, ເພື່ອຍື່ນສະເໜີຕໍ່ນາຍົກລັດຖະມົນຕີ ຮັບຮອງເອົາ ແລະ ປະກາດໃຊ້…

        ລັດຖະບານ ຫວຽດນາມ ພວມສະແດງຄວາມຕັດສິນໃຈຢ່າງແຮງກ່ຽວກັບການສ້າງສ້າງລັດຖະບານເອເລັກໂຕນິກຢູ່ແຕ່ລະຂັ້ນ, ແຕ່ລະຂະແໜງການ. ດ້ວຍບັນດາຄວາມມານະພະຍາຍາມເຫຼົ່ານີ້, ໃນໄລຍະຈະມາເຖິງ, ຈະມີການຫັນປ່ຽນຢ່າງຕັ້ງໜ້າໃນການສ້າງລັດຖະບານເອເລັກໂຕນິກຢູ່ ຫວຽດນາມ, ປະກອບສ່ວນປັບຕົວໃຫ້ແທດເໝາະກັບການປະຕິວັດອຸດສາຫະກຳ 4.0 ທີ່ພວມເກີດຂຶ້ນຢ່າງແຮງໃນທົ່ວໂລກ.