ຕັດສິນໃຈນຳເສດຖະກິດພັດທະນາເປັນປົກກະຕິ ແລະ ໝັ້ນຄົງ

ວັນຈັນ ທີ 21 ພຶດສະພາ ຄ.ສ. 2012 | 14:59:38

(vovworld) - ວັນທີ 21/5 ໃນມື້ເຮັດວຽກທຳອິດ, ສະພາແຫ່ງຊາດຫວຽດນາມ ໄດ້ຮັບຟັງທ່ານ ຮອງນາຍົກລັດຖະມົນຕີຫວຽດນາມ Nguyen Xuan Phuc ສະເຫນີບົດລາຍງານເພີ່ມເຕີມກ່ຽວກັບສະພາບການເສດຖະກິດສັງຄົມປີ 2011, ແຜນການຜັນຂະຫຍາຍການປະຕິບັດແຜນການພັດທະນາເສດຖະກິດສັງຄົມໃນຊຸມເດືອນຕົ້ນປີ 2012, ໝາກຜົນແຫ່ງການປະຕິບັດງົບປະມານແຫ່ງລັດ ປີ 2011 ແລະ ສະພາບການຜັນຂະຫຍາຍ ປະຕິບັດແຜນງົບປະມານແຫ່ງລັດປີ 2012

ຕັດສິນໃຈນຳເສດຖະກິດພັດທະນາເປັນປົກກະຕິ ແລະ ໝັ້ນຄົງ - ảnh 1

ທ່ານຮອງນາຍົກລັດຖະມົນຕີ Nguyen Xuan Phuc ສະເຫນີບົດລາຍງານທີ່ກອງປະຊຸມເທື່ອທີ່ 3 ສະພາແຫ່ງຊາດ ຊຸດທີ 13
ພາບ:internet

ທ່ານຮອງນາຍົກລັດຖະມົນຕີ Nguyen Xuan Phuc ຊີ້ແຈງວ່າ: ກ້າວເຂົ້າສູ່ປີ 2012, ໃນສະພາບການເສດຖະກິດໂລກ ສືບຕໍ່ຜັນແປໄປຢ່າງສັບສົນ ແລະ ຍາກທີ່ຄາດຄະເນໄດ້, ເສດຖະກິດມະຫາພາກຢູ່ພາຍໃນປະເທດປະສົບກັບຄວາມຫຍຸ້ງຍາກຫລາຍຢ່າງ, ລັດຖະບານ ຫວຽດນາມ ໄດ້ປະກາດໃຊ້ມະຕິກ່ຽວກັບບັນດາມາດຕະການຕົ້ນຕໍເພື່ອຊີ້ນຳການປະຕິບັດແຜນການພັດທະນາເສດຖະກິດ ສັງຄົມ ແລະ ແຜນງົບປະມານແຫ່ງລັດປີ 2012 ດ້ວຍຈຸດໝາຍສັງລວມແມ່ນໃຫ້ບຸລິມະສິດຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັກສາການເຕີບໂຕຢູ່ໃນລະດັບເໝາະສົມຕິດພັນກັບການປ່ຽນໃຫມ່ຮູບແບບການເຕີບໂຕ ແລະ ສ້າງໂຄງປະກອບພື້ນຖານເສດຖະກິດຄືນໃຫມ່, ຮັບປະກັນສະຫວັດດີການສັງຄົມ, ຮັບປະກັນຊີວິດສັງຄົມ ແລະ ປົວແປງຊີວິດການເປັນຢູ່ຂອງປະຊາຊົນ. ທ່ານຮອງນາຍົກລັດຖະມົນຕີ Nguyen Xuan Phuc ຊີ້ແຈງວ່າ:

“ເສດຖະກິດສັງຄົມ ຂອງຫວຽດນາມ ໃນ 4 ເດືອນຕົ້ນປີ 2012 ໄດ້ມີບາດກ້າວຫັນປ່ຽນຢ່າງຕັ້ງຫນ້າ ແລະ ບັນລຸໄດ້ບັນດາໝາກຜົນໃນເບື້ອງຕົ້ນ. ໄພເງິນເຟີ້ໄດ້ຮັບການຄວບຄຸມໄວ້. ລະດັບເພີ່ມລາຄາໃຊ້ສອຍ (CPI) ຖືກຫລຸດລົງໃນກາງປີ 2011 ແລະ ຫລຸດລົງຢ່າງແຮງໃນຊຸມເດືອນມໍ່ໆມານີ້. ອັດຕາດອກເບ້ຍຄອ່ຍໆຫລຸດລົງ, ອັດຕາແລກປ່ຽນເງິນຕາໄດ້ຮັກສາເປັນປົກກະຕິ, ດຸນຊຳລະໄດ້ຮັບການປັບປຸງ. ການສົ່ງອອກສິນຄ້າເພີ່ມຂຶ້ນສູງ, ມູນຄ່າການນຳເຂົ້າເກີນດຸນຫລຸດລົງຢ່າງແຮງ. ການຜະລິດອຸດສາຫະກຳມີທ່າອ່ຽງເພີ່ມຂຶ້ນຄືນໃຫມ່. ການຜະລິດກະສິກຳສືບຕໍ່ພັດທະນາເປັນປົກກະຕິ. ”

ໄພເງິນເຟີ້ຖືກຄວບຄຸມໃນຊຸມເດືອນຕົ້ນປີ 2012

ພາບປະກອບ:internet

ທ່ານຮອງນາຍົກລັດຖະມົນຕີ Nguyen Xuan Phuc ຍົກໃຫ້ເຫັນບັນດາຂໍ້ຄົງຄ້າງປະຈຸບັນຂອງພື້ນຖານເສດຖະກິດ. ນັ້ນແມ່ນສັນຍານຫລຸດຜ່ອນການເຕີບໂຕເສດຖະກິດ. ການປະຕິບັດນະໂຍບາຍຮັດແຫນ້ນງົບປະມານ, ນະໂຍບາຍເງິນຕາ ໄດ້ປະກອບສ່ວນຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແຕ່ກໍເຮັດໃຫ້ວິສາຫະກິດຫລາຍແຫ່ງປະສົບກັບຄວາມຫຍຸ້ງຍາກ, ເປັນຕົ້ນແມ່ນວິສາຫະກິດຂະຫນາດກາງ ແລະ ນ້ອຍ. ຊີວິດການເປັນຢູ່ຂອງປະຊາຊົນຢູ່ຫລາຍເຂດຍັງປະສົບກັບຄວາມຫຍຸ້ງຍາກ, ສະພາບຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມຢູ່ຫລາຍແຫ່ງຍັງມີປັດໄຈສັບສົນ. ບົນພື້ນຖານນັ້ນ, ລັດຖະບານໄດ້ກຳນົດຫນ້າທີ່ຈຸດສຸມໃນໄລຍະຈະມາເຖິງ ແມ່ນສຸມໃສ່ແກ້ໄຂຄວາມຫຍຸ້ງຍາກ, ຊຸກຍູ້ການຜະລິດດຳເນີນທຸລະກິດພັດທະນາ ພ້ອມທັງສືບຕໍ່ປະຕິບັດແຜນນະໂຍບາຍຄວບຄຸມໄພເງິນເຟີ້ຢ່າງສະເຫມີຕົ້ນສະເຫມີປາຍ, ຮັກສາເສດຖະກິດມະຫາພາກເປັນປົກກະຕິເພື່ອສ້າງພື້ນຖານໃຫ້ແກ່ການເຕີບໂຕແບບຍືນຍົງ, ປະຕິບັດແຜນນະໂຍບາຍສ້າງໂຄງປະກອບເສດຖະກິດຢ່າງມີປະສິດທິຜົນເທື່ອລະກ້າວ ຕາມທິດຍົກສູງຄຸນນະພາບ, ປະສິດທິຜົນ ແລະ ກຳລັງແກ້ງແຍ້ງ. ທ່ານຮອງນາຍົກລັດຖະມົນຕີ Nguyen Xuan Phuc ເນັ້ນຫນັກວ່າ:

“ພວກເຮົາຕ້ອງສືບຕໍ່ປະຕິບັດແຜນນະໂຍບາຍຄວບຄຸມໄພເງິນເຟີ້ຢ່າງສະເໝີຕົ້ນສະເຫມີປາຍ, ປະຕິບັດນະໂຍບາຍເງິນຕາຢ່າງເຂັ້ມງວດ ແລະ ລະມັດລະວັງ, ປະສານສົມທົບຢ່າງກົມກ່ຽວລະຫວ່າງນະໂຍບາຍເງິນຕາ ແລະ ນະໂຍບາຍງົບປະມານ ເພື່ອຮັບປະກັນຈຸດໝາຍອັດຕາເງິນເຟີ້ໃນປີ 2012 ແມ່ນພຽງຢູ່ໃນລະດັບ 8 - 9%, ສ້າງປະຖົມປັດໃຈໃຫ້ແກ່ການຄວບຄຸມໄພເງິນເຟີ້ໃຫ້ຫລຸດລົງຕຳ່ກວ່າໃນຊຸມປີຕໍ່ໄປ, ຮັບປະກັນການຮັກສາເສດຖະກິດມະຫາພາກເປັນປົກກະຕິ, ໝັ້ນຄົງ ແລະ ພັດທະນາຢ່າງວ່ອງໄວ.”

ກ່ຽວກັບຫນ້າທີ່ສ້າງໂຄງປະກອບພື້ນຖານເສດຖະກິດຄືນໃຫມ່, ປ່ຽນໃຫມ່ຮູບແບບການເຕີບໂຕຕາມທິດຍົກສູງຄຸນນະພາບ, ປະສິດທິຜົນ ແລະ ຄວາມສາມາດແກ້ງແຍ້ງ, ຈຸດສຸມແມ່ນປະຕິບັດການສ້າງໂຄງປະກອບການລົງທຶນຄືນໃຫມ່, ການລົງທຶນຂອງລັດ, ປະຕິບັດວິວັດທະນາການສ້າງລະບົບການເງິນ, ທະນາຄານ, ຍູ້ແຮງການປະຕິບັດການສ້າງລັດວິສາຫະກິດຄືນໃຫມ່. ເພື່ອປະຕິບັດການຮັບປະກັນຊີວິດສັງຄົມ ແລະ ສະຫວັດດີການສັງຄົມ, ການປົກປັກຮັກສາສິ່ງແວດລ້ອມໃຫ້ດີກວ່າເກົ່າ, ລັດຖະບານ ພວມຮີບເຮັ່ງສ້າງໂຄງການດຳເນີນງານເພື່ອຜັນຂະຫຍາຍມະຕິກອງປະຊຸມສູນກາງພັກກອມມູນິດ ຫວຽດນາມ ຄັ້ງທີ 5 ຊຸດທີ 11 ກ່ຽວກັບບາງບັນຫານະໂຍບາຍສັງຄົມໄລຍະ 2012- 2020 ຢ່າງມີປະສິດທິຜົນ. ສຸມແຫລ່ງກຳລັງເພື່ອປະຕິບັບັນດາໂຄງການຈຸດໝາຍແຫ່ງຊາດໃນບັນດາຂົງເຂດສັງຄົມຢ່າງມີປະສິດທິຜົນ. ຄຽງຄູ່ກັນນັ້ນ ສ້າງລະບົບກົດໝາຍໃຫ້ສົມບູນແບບ, ປະຕິບັດໂຄງການປະຕິຮູບດ້ານບໍລິຫານຢ່າງຄົບຊຸດ, ຍົກສູງປະສິດທິຜົນການຄຸ້ມຄອງລັດ, ຍູ້ແຮງວຽກງານປ້ອງກັນ ແລະ ຕ້ານການສໍ້ລາດບັງຫລວງ, ການຟຸມເຟືອຍ, ຍົກສູງປະສິດທິຜົນວຽກງານພົວພັນຕ່າງປະເທດ, ວຽກງານຖະແຫລງຂ່າວ, ໂຄສະນາ, ສ້າງຄວາມເຫັນດີເຫັນພ້ອມໃນສັງຄົມ, ພິເສດ ແມ່ນການເພີ່ມທະວີວຽກງານປ້ອງກັນຊາດ ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ. ທ່ານຮອງນາຍົກລັດຖະມົນຕີ Nguyen Xuan Phuc ກ່າວວ່າ:

“ຕ້ອງເພີ່ມທະວີກຳລັງຄວາມສາມາດປ້ອງກັນຊາດປ້ອງກັນຄວາມສະຫງົບ, ຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຢ່າງໝັ້ນຄົງ, ພິເສດຢູ່ບັນດາເຂດທະເລ ແລະ ໝູ່ເກາະ. ສືບຕໍ່ຮ່ວມມື ແລະ ຕໍ່ສູ້, ແກ້ໄຂຄວາມແຕກຕ່າງ, ການພິພາດບົນທະເລ ໂດຍສັນຕິວິທີ ຕາມກົດໝາຍສາກົນ. ຮ່ວມມືກໍ່ສ້າງເຂດຊາຍແດນສັນຕິພາບ, ມິດຕະພາບ ກັບບັນດາປະເທດເພື່ອນບ້ານໃກ້ຄຽງ, ຕິດພັນກັບການແບ່ງກຳນົດ ປັກຫລັກໝາຍຊາຍແດນ.”

ບົດລາຍງານຂອງລັດຖະບານ ໂດຍທ່ານຮອງນາຍົກລັດຖະມົນຕີ Nguyen Xuan Phuc ສະເຫນີ ໄດ້ຢັ້ງຢືນຄວາມຕັດສິນໃຈສູງ, ຄວາມສາມັກຄີ ເຫັນດີເຫັນພ້ອມໃນຄວາມຮັບຮູ້ ແລະ ການກະທຳຂອງທັງລະບົບການເມືອງ, ປະຊາຄົມວິສາຫະກິດ ແລະ ປະຊາຊົນ ພາຍໃຕ້ການນຳພາຂອງພັກ, ບັນດາຄາດໝາຍ, ຫນ້າທີ່ໃນປີ 2012 ຊຶ່ງສະພາແຫ່ງຊາດໄດ້ວາງອອກ, ຕິດພັນກັບການຜັນຂະຫຍາຍປະຕິບັດບັນດາມະຕິຂອງກອງປະຊຸມຄັ້ງທີ 4, ຄັ້ງທີ 5 ຂອງສູນກາງພັກກອມມູນິດ ຫວຽດນາມຊຸດທີ 11, ແນ່ນອນວ່າ ຈະປະຕິບັດຢ່າງສຳເລັດຜົນ, ສ້າງປະຖົມປັດໄຈເພື່ອພັດທະນາຢ່າງວ່ອງໄວກວ່າ, ໝັ້ນຄົງກວ່າໃນຊຸມປີຕໍ່ໄປ.

ນັກຂ່າວ Anh Huyen