(vovworld) - 1 ປີ ເທົ່າກັບ 365 ວັນ ແມ່ນໄລຍະເວລາ ພໍດີເພື່ອຕົກລົງ ແລະ ປະຕິບັດສຳເລັດຄວາມໄຝ່ຝັນຂອງຕົນ. ແຕ່ສຳຫຼັບວິວັດທະນາການສັນຕິພາບຢູ່ຕາເວັນອອກກາງແລ້ວ, ປີຜ່ານມາພັດແມ່ນໄລຍະເວລາສັ້ນທີ່ສຸດ. ມີກາລະໂອກາດຫຼາຍຢ່າງຖືກພາດໂອກາດຍ້ອນທັດສະນະຂອງຝ່າຍຕ່າງໆມີຄວາມແຕກຕ່າງກັນ. ສິ່ງດັ່ງກ່າວໄດ້ກີດຂວາງວິວັດທະນາການສັນຕິພາບຢູ່ຕາເວັນອອກກາງ. ປະຈຸບັນ, ຄວາມມານະພະຍາຍາມຂອງປະຊາຄົມໂລກຖືກຢຸດໄວ້ ແລະ ມາດຕະການສັນຕິພາບ ດ້ວຍ 2 ລັດຄົງຕົວພ້ອມກັນ ຍັງຄົງປະສົບກັບຄວາມຫຍຸ້ງຍາກຫຼາຍ.
ສະພາບການຢູ່ຕາເວັນອອກກາງ
(ພາບອິນເຕີແນດ)
ຄວາມຈິງແລ້ວ, ຖ້າສັງເກດການຜັນແປສັນຕິພາບຢູ່ຕາເວັນອອກກາງກໍ່ເຫັນວ່າ. ສິ່ງກີດຂວາງຍັງບໍ່ທັນແກ້ໄຂໄດ້ນັບແຕ່ປີ 2008, ນັ້ນແມ່ນຄວາມບໍ່ລົງລອຍກັນທີ່ກ່ຽວຂ້ອງເຖິງເຂດຕັ້ງຖີ່ນຖານຄົງທີ່ຂອງຊາວຢີວ. ໃນຂະນະທີ່ຊາວ ປາແລດສະຕີນ ຢາກໃຫ້ອິດສະລາແອນ ຢຸດຕິການກໍ່ສ້າງບັນດາເຂດຖີ່ນຖານຄົງທີ່ໃນແຜ່ນດິນທີ່ຖືກອິດສະລາແອນຢືດຄອງນັ້ນ, ທ່ານນາຍົກລັດຖະມົນຕີອິດສະລາແອນ Benjamin Netanyahu ພັດຢາກເລີ່ມຕົ້ນການເຈລະຈາຕ່າງໆ ແຕ່ບໍ່ມີເງື່ອນໄຂລ່ວງໜ້າ. ຄວາມມຸ້ງຫວັງທີ່ສຸດນັ້ນແມ່ນການຢ້ຽມຢາມຕາເວັນອອກກາງຂອງທ່ານປະທານາທິບໍດີລັດເຊຍ Putin ເມື່ອທ້າຍເດືອນ 6/2012. ເມື່ອພົບປະກັບການນຳ ອິດສະລາແອນ ແລະ ປາແລດສະຕີນ, ການນຳລັດເຊຍ, ເຊິ່ງແມ່ນສະມາຊິກສຳຄັນຂອງກຸ່ມ 4 ຝ່າຍ ໄດ້ຊອກເຫັນສິ່ງທີ່ກີດຂວາງເພື່ອແກ້ໄຂຄວາມຕິດຂັດໃຫ້ແກ່ສັນຕິພາບຢູ່ຕາເວັນອອກກາງ. ມົດສະກູ ພ້ອມແລ້ວທີ່ຈະຮັບຮອງລັດປາແລກສະຕີນ ເອກະລາດ ແລະ ຮຽກຮ້ອງໃຫ້ອິດສະລາແອນ ແລະ ປາແລດສະຕີນ ເຊື່ອມຕໍ່ການເຈລະຈາຕ່າງໆ, ນັ້ນແມ່ນເສັ້ນທາງໜຶ່ງດຽວເພື່ອແກ້ໄຂການປະທະກັນ. ຜູ້ນຳວັງ Kremlin ສະໜັບສະໜູນ ”ທັດສະນະທີ່ມີຄວາມຮັບຜິດຊອບ” ຂອງປະທານາທິບໍດີ ປາແລດສະຕີນ Mahmoud Abbas ແລະ ໃສ່ໃຈວ່າ, ”ບັນດາການກະທຳແຕ່ພຽງຝ່າຍດຽວກ່ອນທີ່ບັນລຸໄດ້ມາດຕະການສັນຕິພາບສຸດທ້າຍ ລ້ວນແຕ່ບໍ່ມີຄຸນປະໂຫຍດ”.
ສະພາບການຢູ່ຕາເວັນອອກກາງ
(ພາບອິນເຕີແນດ) ພາຍຫຼັງການຢ້ຽມຢາມຂອງປະທານາທິບໍດີລັດເຊຍ V. Putin, ໄດ້ສົ່ງສານຢ່າງແຮງເຖິງຝ່າຍຕ່າງໆຢູ່ ອິດສະລາແອນ ແລະ ປາແລດສະຕີນ ກ່ຽວກັບມາດຕະການແກ້ໄຂສັນຕິພາບຢູ່ຕາເວັນອອກກາງ, ແຕ່ມັນພັດຖືກພາດໂອກາດອີກເທື່ອໜຶ່ງ. ສາຍເຫດຕົ້ນຕໍນັ້ນແມ່ນບັນດາຝ່າຍບໍ່ທັນມີຄວາມເຊື່ອໝັ້ນກັນ. ພ້ອມກັນນັ້ນແມ່ນຄວາມຕັດສິນໃຈຂອງອຳນາດການປົກຄອງ Tel Aviv ໃນການກໍ່ສ້າງເຂດເຮືອນຢູ່ ທີ່ Jerusalem ຕາເວັນອອກ, ເຊິ່ງແມ່ນເຂດດິນທີ່ຝ່າຍ ປາແລດສະຕີນ ໄດ້ເວົ້າຫຼາຍເທື່ອແລ້ວວ່າ ຈະເລືອກເຟັ້ນເພື່ອກໍ່ສ້າງນະຄອນຫຼວງຂອງຕົນ. ຂໍ້ຕົກລົງດັ່ງກ່າວບໍ່ພຽງແຕ່ເຮັດໃຫ້ການເຈລະຈາຖືກຢຸດໄວ້ເທົ່ານັ້ນ, ຫາກຍັງເປັນສິ່ງກີດຂວາງສາຍພົວພັນລະຫວ່າງອາເມລິກາ ແລະ ປາແລດສະຕີນ ອີກດ້ວຍ. ການບຸກໂຈມຕີທີ່ແກ່ຍາວເປັນເວລາ 8 ວັນ ຢູ່ເຂດກາຊາ (14-22/11) ລະຫວ່າງຂະບວນການອິດສະລາມ Hamas ແລະ ອິດສະລາແອນ ໄດ້ເຮັດໃຫ້ ຊາວ ປາແລດສະຕີນ 158 ຄົນ ແລະ ຊາວອິດສະລາແອນ 6 ຄົນເສຍຊີວິດ ກໍ່ແມ່ນສິ່ງທີ່ກີດຂວາງວິວັດທະນາການສັນຕິພາບ. ແຕ່, ຊາວປາແລດສະຕີນ ຍັງມີຄວາມມຸ້ງຫວັງໜຶ່ງອີກ, ນັ້ນແມ່ນໃນຊຸມວັນທ້າຍເດືອນ 11/2012, ສະມັດຊາໃຫຍ່ສະຫະປະຊາຊາດ ໄດ້ຕົກລົງປ່ອນບັດຮັບຮອງເອົາເລື່ອງມອບກົດລະບຽບລັດສັງເກດການ - ບໍ່ເປັນພາຄີໃຫ້ແກ່ ປາແລດສະຕີນ, ຢືນຢັນບົດບາດຂອງ ປາແລດສະຕີນ ໃນປະຊາຄົມໂລກ, ເພີ່ມກຳລັງແຮງຕື່ມອີກໃຫ້ແກ່ຄະນະນຳ ປາແລດສະຕີນ ໃນວິວັດການຊອກຫາການສະໜັບສະໜູນລັດສະເພາະໃຫ້ແກ່ຕົນ.
ສ່ວນສະພາບການຢູ່ປະເທດອື່ນໆຢູ່ພາກພື້ນນີ້ ໃນປີທີ່ຜ່ານມາກໍ່ບໍ່ໄດ້ດີປານໃດຂະບວນການ ”ລະດູບານໃໝ່ ອາຮັບ” ຍັງເປັນຄວາມຂົ່ມຂູ່ຢູ່, ອັນໄດ້ສົ່ງຜົນສະທ້ອນຢ່າງແຮງເຖິງອຳນາດການປົກຄອງຂອງປະທານາທິບໍດີ ຊີຮີ Bashar – assad. ຄວາມກົດດັນຂອງກຳລັງຄັດຄ້ານ ແລະ ຄວາມກົດດັນຈາກພາຍນອກນັບມື້ນັບຫຼາຍ ເຮັດໃຫ້ສະພາບການຢູ່ ຊີຮີ ຂາດສະຖຽນລະພາບຕື່ມອີກ. ຝາຍລຸກຮື້ຂຶ້ນພວມນຳໃຊ້ວິທີການຄືຢູ່ ລີບີ ດ້ວຍຄວາມຫວັງດຶງດູດຄວາມສົນໃຈ ແລະ ການເຂົ້າຮ່ວມຂອງຝ່າຍຕາເວັນຕົກ. ແຕ່ທີ່ຕັ້ງດ້ານການເມືອງຂອງ ຊີຮີ ໃນພາກພື້ນ ແລະ ໃນໂລກ, ສາຍພົວພັນລະຫວ່າງຊີຮີ ກັບໂລກ ອິດສະລາມ, ການເຂົ້າຮ່ວມຂອງອາເມລິກາ ແລະ ຝ່າຍຕາເວັນຕົກ ພວມແມ່ນບັນດາປັດໃຈທີ່ພາໃຫ້ວິວັດທະນາການຊອກຫາສັນຕິພາບຢູ່ ຊີຮີ ຖືກຕົກຢູ່ສະພາບບໍ່ມີທາງອອກ, ແລະ ຍູ້ໃຫ້ປະເທດນີ້ຕົກເຂົ້າສູ່ເສິກກາງເມືອງຮອບດ້ານ.
ສະພາບການຢູ່ລີບີ
(ພາບອິນເຕີແນດ) ຢູ່ອີຮານ. ປີ 2012, ການເຈລະຈາຕ່າງໆກ່ຽວກັບບັນຫານິວຄະເລຍ ທີ່ກໍ່ຄວາມໂຕ້ຖຽງກັນຂອງ Tehran ລ້ວນແຕ່ບໍ່ໄດ້ຮັບຜົນ. ຄວາມຈິງແລ້ວ, ໂລກຍັງບໍ່ທັນຊອກເຫັນວິທີການແກ້ໄຂໃດໆໃຫ້ແກ່ບັນຫາອີຮານ, ໃນເມື່ອທັດສະນະຂອງຝ່າຍຕ່າງໆແມ່ນແຕກຕ່າງກັນຫຼາຍ. ສາຍເຫດທີ່ພາໃຫ້ການເຈລະຈາຕ່າງໆບໍ່ໄດ້ຮັບຜົນຍ້ອນບໍ່ສຸມໃສ່ປຶກສາຫາລືສະເພາະບັນຫານິວຄະເລຍ, ຫາກຍັງນຳເອົາບັນຫາຜົນປະໂຫຍດທາງດ້ານການເມືອງ, ເສດຖະກິດ ແລະ ຄວາມສະຫງົບຂອງຝ່າຍຕ່າງໆມາປຶກສາຫາລືນຳກັນ. ຍ້ອນເຫດນັ້ນ, ວິທີການແກ້ໄຂບັນຫານິວຄະເລຍຂອງອີຮານ ຍັງຄົງແມ່ນການທ້າທາຍໃຫຍ່ສຳຫຼັບໂລກໃນປີ 2013.
ປີທີ່ຜ່ານມາ, ຕາເວັນອອກກາງບໍ່ມີການປ່ຽນແປງຢ່າງຕັ້ງໜ້າ. ພ້ອມກັບຄວາມຫຍຸ້ງຍາກທາງດ້ານເສດຖະກິດ, ການໃຊ້ຄວາມຮຸນແຮງ, ການປະທະກັນທີ່ນອງເລືອດເກີດຂື້ນທຸກວັນ ແລະ ໃນເບື້ອງໜ້າຍັງຄົງແມ່ນອະນາຄົດບໍ່ເປັນປົກກະຕິ, ອັນໄດ້ເຮັດໃຫ້ສະພາບການຢູ່ຕາເວັນອອກກາງໃນຊຸມມື້ຕົ້ນປີໃໝ່ 2013 ມີຄວາມມືດມົວໃນສະພາບການລວມຂອງໂລກ.