ທຳລາຍສາງອາວຸດເຄມີຢູ່ຊີຣີ-ໜ້າທີ່ບໍ່ງ່າຍດາຍ
Hồng Vân -
(vovworld)- ບັນດາຜູ້ຊ່ຽວຊານຫລຸດຜ່ອນອາວຸດຂອງ ສປຊ ແລະ ອົງການຫ້າມອາວຸດເຄມີ (OPCW) ໄດ້ເລິ່ມຕົ້ນການທຳລາຍສາງອາວຸດເຄມີນັບ 1000 ໂຕນຢູ່ຊີຣີ. ຫາງສຽງທີ່ຕັ້ງໜ້າໄດ້ຍົກອອກມາກ່ຽວກັບຄວາມຄຶບໜ້າຂອງວຽກງານນີ້ແຕ່ວິວັດການທຳລາຍຈະໄດ້ຮັບຄວາມສະດວກສະບາຍຫຼືບໍ່ ໃນສະຖານະການທີ່ຊີຣີ ຍັງຕົກຢູ່ໃນສະພາບເສິກກາງເມືອງ. ບົດຂຽນຂອງນັກຂ່າວຮົ່ງເວິນ ດ້ວຍຫົວຂໍ້ວ່າ: ທຳລາຍສາງອາວຸດເຄມີຢູ່ຊີຣີ-ໜ້າທີ່ບໍ່ງ່າຍດາຍ.
ອາວຸດເຄມີຢູ່ຊີຣີ
(ພາບ: vov.vn)
ໄພນາບຂູ່ທີ່ອັນຕະລາຍ
ກຸ່ມຜູ້ຊ່ຽວຊານທຳອິດຂອງອົງການຫ້າມອາວຸດເຄມີ (OPCW) ໄດ້ມີໜ້າຢູ່ຊີຣີ ນັບແຕ່ວັນທີ 1/10 ແຕ່ຫຼັງຈາກນັ້ນ 1 ອາທິດ, ຈຶ່ງເລີມດຳເນີນການທຳລາຍອາວຸດທຳອິດຍ້ອນວ່າ ຕ້ອງກະກຽມບັນດາເຄື່ອງອຸປະກອນອັນຈຳເປັນໃຫ້ວິວັດການທຳລາຍ. ທ່ານ Ahmet Uzumcu ຜູ້ອຳນວຍການໃຫ່ຍ OPCW ຍອມຮັບວ່າ: ການທຳລາຍສາງອາວຸດເຄມີຂອງຊີຣີ ແມ່ນວິວັດການຍາວນານ ແລະ ຫຍຸ້ງຍາກຍ້ອນວ່າ ຕາມການຕີລາຄາ, ປະຈຸບັນ, ຊີຣີ ມີອາວຸດເຄມີກ່ວາ 1000 ໂຕນ, ໃນນັ້ນມີທັງອາຍພິດຊາຣິນ ແລະ ອາຍພິດປະເພດອື່ນໆອີກ. ອີກຢ່າງໜຶ່ງ, ນີ້ແມ່ນຄັ້ງທຳອິດໃນປະຫວັດສາດ OPCW, ບັນດາຜູ້ຊ່ຽວຊານຂອງອົງການນີ້ຕ້ອງປະຕິບັດໜ້າທີ່ຢູ່ປະເທດທີ່ພວມຕົກຢູ່ໃນສະພາບເສິກກາງເມືອງທີ່ແກ່ຍາວ. ທ່ານເລຂາທິການໃຫ່ຍ ສປຊ ບານກີມູນ ຖືວ່າ: ຕ້ອງມີຜູ້ຊ່ຽວຊານຕ່າງປະເທດເຖິງ 100 ຄົນເຂົ້າຮ່ວມການກວດກາ ແລະ ທຳລາຍອາວຸດເຄມີຢູ່ຊີຣີ ພ້ອມທັງກ່າວເຕືອນບັນດານັກສັງເກດການກ່ຽວກັບຄວາມອັນຕະລາຍທີ່ບໍ່ເຄີຍມີມາຊື່ງເຂົາເຈົ້າຕ້ອງປະເຊີນໜ້າຢູ່ປະເທດຕາເວັນອອກກາງນີ້.
(ພາບ: thethaovanhoa.vn)
ພາຍຫຼັງການກ່າວເຕືອນດັ່ງກ່າວເປັນເວລາ 1 ວັນ, ກຳລັງລຸກຮຶ້ຂຶ້ນຢູ່ຊີຣີ ໄດ້ເປີດບັ້ນບຸກໂຈມຕີແນ່ໃສ່ຖານທີ່ໝັ້ນ 2 ແຫ່ງຂອງທະຫານລັດຖະບານຢູ່ທາງທິດຕາເວັນຕົກສ່ຽງເໜືອປະເທດນີ້. ບັ້ນບຸກໂຈມຕີຄັ້ງຫຼ້າສຸດນີ້ ໄດ້ກໍ່ຄວາມວິຕົກກັງວົນຕໍ່ໄພນາບຂູ່ທີ່ຊ້ອນແຝງສຳລັບຄະນະນັກກວດກາ ສປຊ ແລະ OPCW ໃນວິວັດການທຳລາຍສາງອາວຸດເຄມີຂອງຊີຣີ.
ການເລີ່ມຕົ້ນຢ່າງສະດວກສະບາຍ
ແຕ່ເຖິງຢ່າງໃດກໍ່ຕາມ, ໂດຍບໍ່ຫົວຊາຕໍ່ຄວາມຫຍຸ້ງຍາກຫຼາຍປະການນັ້ນ, ຄວາມຄຶບໜ້າໃນການທຳລາຍສາງອາວຸດເຄມີຂອງຊີຣີ ຍັງສາມາດເປັນໄປໄດ້. ພາຍຫລັງທີ່ມະຕິຂອງ ສປຊ ໄດ້ຮັບການຮັບຮອງເອົາເປັນເວລາ 1 ອາທິດ, ອາວຸດບາງປະເພດກໍ່ໄດ້ຖືກທຳລາຍ ແລະ ນີ້ແມ່ນໄລຍະເວລາສັ້ນສະຖິຕິ. ອົງການຫ້າມອາວຸດເຄມີ (OPCW) ໄດ້ຊົມເຊີຍເປັນພິເສດນ້ຳໃຈຮ່ວມມື ແລະ ສ້າງສັນດັ່ງກ່າວຂອງລັດຖະບານຊີຣີ.
ຄວາມຄຶບໜ້າໃນການທຳລາຍສາງອາວຸດເຄມີຂອງຊີຣີ ຍັງໄດ້ຮັບການຕີລາຄາສູງຈາກປະຊາຄົມໂລກ. ປະທານາທິບໍດີລັດເຊຍ V.Putin ໃຫ້ຮູ້ວ່າ: ຊີຣີ ມີຄວາມຮ່ວມມືກັບບັນດານັກກວດກາກ່ຽວກັບອາວຸດເຄມີຂອງ ສປຊ ຢ່າງຕັ້ງໜ້າທີ່ສຸດ. ທ່ານຊີ້ແຈ້ງວ່າ: ບັນດາຄວາມລະແວງສົງໃສກ່ຽວກັບເລື່ອງການນຳຊີຣີ ມີການຄັດຄ້ານທີ່ເໝາະສົມສຳລັບຂໍ້ຕົກລົງທີ່ກ່ຽວຂ້ອງເຖິງອາວຸດເຄມີຂອງປະເທດນີ້ຫຼືບໍ່ ແມ່ນບໍ່ມີມູນຄວາມຈິງ. ສ່ວນທ່ານລັດຖະມົນຕີການຕ່າງປະເທດອາເມລິກາ John Kerry ກໍ່ປະກາດວ່າ: ປະທານາທິບໍດີຊີຣີ Bashar al Assad ຄວນໄດ້ຮັບການຊົມເຊີຍຍ້ອນໄດ້ດຳເນີນວິວັດການທຳລາຍສາງອາວຸດເຄມີຂອງອຳນາດການປົກຄອງປະເທດນີ້ໂດຍໄວ. ເປັນທີ່ຈະແຈ້ງແລ້ວວ່າ: ນີ້ແມ່ນການເລິ່ມຕົ້ນທີ່ຈົບງາມໃຫ້ແກ່ວິວັດການທຳລາຍສາງອາວຸດເຄມີຂອງປະເທດຕາເວັນອອກກາງນີ້.
ຄວາມສາມາດປະສົບຜົນສຳເລັດ
ບໍ່ສາມາດປະຕິເສດໄດ້ວ່າບັນດາຜູ້ຊ່ຽວຊານອາວຸດເຄມີຂອງ OPCW ພວມມີບັນດາບາດກ້າວເດີນທີ່ສະດວກສະບາຍເພື່ອປະຕິບັດໜ້າທີ່ອັນໜັກໜ່ວງຢູ່ຊີຣີ ສຳເລັດຜົນ. ແຕ່ເຖິງຢ່າງໃດກໍ່ຕາມ, ຕ້ອງຈື່ຈຳວ່າ, ໄລຍະເວລາທຳລາຍອາວຸກເຄມີກ່ວາ 1000 ໂຕນຍັງຍາວສົມຄວນ (9 ເດືອນນັບແຕ່ນີ້ຮອດກາງປີ 2014). ນັ້ນແມ່ນບໍ່ທັນເຕື້ອງເຖິງບັນດາເງື່ອໄຂພາວະວິໄສ ແລະ ການຜັນແປສະພາບການສູ້ຮົບຢູຊີຣີ ລ້ວນແຕ່ໄດ້ສົ່ງຜົນສະທ້ອນເຖິງວິວັດການທຳລາຍສາງອາວຸດເຄມີນີ້. ພາລະກຳ ທຳລາຍສາງອາວຸດເຄມີຂອງຊີຣີ ຈະປະສົບຜົນສຳເລັດໄດ້ຫຼືບໍ່ ຍັງບໍ່ທັນມີຄຳຕອບເທື່ອ./.
Hồng Vân