ໃນຊຸມວັນມໍ່ໆມານີ້, ບັນດາສັນຍານຕັ້ງໜ້າສືບຕໍ່ໄດ້ປະກົດມີໃນແຫຼມ ເກົາຫຼີ ຢ່າງຕໍ່ເນື່ອງ, ສະແດງໃຫ້ເຫັນການພົວພັນລະຫວ່າງ 2 ພາກ ເກົາຫຼີ ພວມດີຂຶ້ນ. ບັນດາຄຳກ່າວປາໄສ, ການເຄື່ອນໄຫວດ້ານການທູດຈາກບັນດາເຈົ້າໜ້າທີ່ 2 ພາກ ເກົາຫຼີ, ພວມນຳມາເຊິ່ງຄວາມຫວັງ ຈະກາຍເປັນປະຖົມປັດໄຈໃຫ້ວິວັດທະນາການແກ້ໄຂວິກິດການໃນແຫຼມ ເກົາຫຼີ.

ການເຈລະຈາລະຫວ່າງ ສ.ເກົາຫຼີ ແລະ ສປປ.ເກົາຫຼີ (ພາບ: THX/TTXVN)

        ຄວາມເຄັ່ງຕຶງໃນແຫຼມ ເກົາຫຼີ ໄດ້ແກ່ຍາວໃນຕະຫລອດປີ 2017, ຊ້ຳບໍ່ໜຳ ມີບາງໄລຍະ ປະຊາຄົມສາກົນໄດ້ຄິດເຖິງສະຖານະການທີ່ໂຫດຮ້າຍທີ່ສຸດ ນັ້ນແມ່ນສົງຄາມ. ສະນັ້ນ, ໂດຍບໍ່ວ່າສັນຍານຕັ້ງໜ້າໃດໆໃນແຫຼມ ເກົາຫຼີ ກໍ່ໄດ້ຮັບຄວາມສົນໃຈຢ່າງໃຫຍ່ຫລວງ.

ປະກົດມີຂ່າວດີຢ່າງຕໍ່ເນື່ອງ

        ໃນບົດກ່າວປາໄສຕົ້ນປີໃໝ່ 2018, ການນຳ ສປປ.ເກົາຫຼີ ໄດ້ມີບັນດາຄຳເວົ້າທີ່ນິ້ມນວນຕ່າງຈາກປົກກະຕິໃຫ້ຝ່າຍ ສ.ເກົາຫຼີ ຢ່າງປະຫລາດໃຈ, ໂດຍໃຫ້ຮູ້ວ່າ: ຈະສົ່ງຄະນະນັກກິລາເຂົ້າຮ່ວມງານມະຫາກຳກິລາລະດູໜາວ Pyeongchang ຢູ່ ສ.ເກົາຫຼີ ໃນເດືອນ ກຸມພາ 2018, ພ້ອມທັງ ຈະມີການເຈລະຈາໂດຍກົງກັບຝ່າຍ ສ.ເກົາຫຼີ ກ່ຽວກັບບັນຫານີ້. ຫລັງຈາກນັ້ນ ພຽງ 2 ວັນ, ທ່ານ Kim ໄດ້ອອກຄຳສັ່ງ “ເຊື່ອມຕໍ່ຄືນໃໝ່” ໂທລະສັບສາຍດ່ວນກັບ ສ.ເກົາຫຼີ ຊຶ່ງຖືກຕັດຕອນໃນຕະຫລອດເກືອບ 2 ປີຜ່ານມາ. ນີ້ແມ່ນຄວາມຕ່າວປີ້ນຢ່າງສິ້ນເຊີງຂອງ ສປປ.ເກົາຫຼີ ພາຍຫລັງເກືອບ 1 ປີຂອງຄວາມເຄັ່ງຕຶງ ແລະ ເປັນປໍລະປັກກັບ ອາເມລິກາ, ສ.ເກົາຫຼີ ແລະ ຍີ່ປຸ່ນ . ຂໍ້ສະເໜີຂອງການນຳ ສປປ.ເກົາຫຼີ Kim Jong-un ໄດ້ຮັບການສະໜັບສະໜູນຈາກທ່ານປະທານາທິບໍດີ ສ.ເກົາຫຼີ Moon Jae-in ຢ່າງໄວວາ. ໂດຍການຕອບຄືນການກະທຳທີ່ຕັ້ງໜ້າຈາກ ພຽງຢາງ, ວໍຊິງຕັນ ແລະ ເຊີອູນ ກໍ່ຖະແຫຼງວ່າ ຈະບໍ່ດຳເນີນການຊ້ອມຮົບຮ່ວມໃນໄລຍະເວລາຈັດຕັ້ງງານມະຫາກຳກິລາລະດູໜາວ.

        ພາຍຫລັງ 3 ຮອບເຈລະຈາລະຫວ່າງ ສ.ເກົາຫຼີ ແລະ ສປປ.ເກົາຫຼີ ຢູ່ບ້ານຢຸດຮົບ Panmunjom, ສປປ.ເກົາຫຼີ ໄດ້ເຫັນດີເປັນເອກະພາບ ແຕ່ງຕັ້ງຄະນະນັກສິລະປະລວມມີ 140 ຄົນ ເພື່ອເຂົ້າຮ່ວມລາຍການສະແດງຢູ່ Olympic PyeongChang 2018, ແຕ່ງຕັ້ງຄະນະນັກກວດກາໄປຍັງ ສ.ເກົາຫຼີ ເພື່ອກວດກາບັນດາສະຖານທີ່ສະແດງສິລະປະຢູ່ງານມະຫາກຳກິລາລະດູໜາວ Olympic PyeongChang, ເຫັນດີເປັນເອກະສັນແຕ່ງຕັ້ງທິມ ຮ໋ອກກີ ໄປຮ່ວມແຂ່ງຂັນ ເພື່ອເຂົ້າຮ່ວມ Olympic ແລະ ເດີນຂະບວນຮ່ວມພາຍໃຕ້ຄັນທຸງແຫຼມ ເກົາຫຼີ ເອກະພາບ. 2 ຝ່າຍກໍ່ປຶກສາຫາລືກ່ຽວກັບເລື່ອງຈັດຕັ້ງ “ເຫດການວັດທະນະທຳຮ່ວມ” ຢູ່ພູ Kumgang ແລະ ນຳໃຊ້ເຂດກິລາແລ່ນເທິງຫິມະ Masikryong, ສວນສາທາລະນະລະດູໜາວຢູ່ ສປປ.ເກົາຫຼີ.

        ບັນດາໝາກຜົນນີ້ ໄດ້ຮັບຖືວ່າ: ແມ່ນບາດກ້າວບຸກທະລຸທີ່ບໍ່ເຄີຍມີມາກ່ອນໃນປະຫວັດສາດແຫ່ງການພົວພັນແລກປ່ຽນແຂ່ງຂັນກິລາລະຫວ່າງ ສປປ.ເກົາຫຼີ ແລະ ສ.ເກົາຫຼີ, ພ້ອມທັງ ແມ່ນສັນຍານຫຼ້າສຸດ ສະແດງໃຫ້ເຫັນ “ສັນຍານທີ່ດີ” ໃນການພົວພັນລະຫວ່າງ 2 ພາກ ເກົາຫຼີ ນັບແຕ່ພາຍຫລັງການນຳ ສປປ.ເກົາຫຼີ Kim Jong-un ເປີດກໍລະນີເຈລະຈາກັບ ສ.ເກົາຫຼີ. ສິ່ງດັ່ງກ່າວ ກໍ່ນຳມາໃຫ້ຄວາມຫວັງ ພຽງຢາງ ອາດຈະເປີດອົກເປີດໃຈກ່ວາຕໍ່ການເຈລະຈາແກ້ໄຂບັນດາບັນຫານິວເຄຼຍໃນແຫຼມ ເກົາຫຼີ.

ຈາກກາລະໂອກາດເຖິງການກະທຳໂດຍເຈດຕະນາດີຂອງທຸກຝ່າຍ

        ຕໍ່ໜ້າບັນດາການກະທຳຕັ້ງໜ້ານີ້, ປະຊາຄົມສາກົນລ້ວນແຕ່ສະແດງຄວາມຊົມເຊີຍ, ຮຽກຮ້ອງທຸກຝ່າຍຮັບຮູ້ສັນຍານຕັ້ງໜ້າຢູ່ແຫຼມ ເກົາຫຼີ, ນຳສະພາບການເຂົ້າສູ່ຖືກທິດ ແມ່ນຊອກຫາທິດທາງແກ້ໄຂສັນຕິພາບຜ່ານການເຈລະຈາ.

        ຕໍ່ໜ້າບັນດາສັນຍານ “ສັນຕິພາບ” ຈາກ ພຽງຢາງ, ອາເມລິກາ ພັດສະແດງໃຫ້ເຫັນຄວາມບໍ່ສົນໃຈ. ຫວ່າງແລ້ວນີ້ ທ່ານນາງເອກອັກຄະລັດຖະທູດ ອາເມລິກາ ປະຈຳຊະຫະປະຊາຊາດ Nikko Haley ຖະແຫຼງວ່າ ອາເມລິກາ ບໍ່ຖືຂໍ້ສະເໜີຂອງ ສປປ.ເກົາຫຼີ ເຈລະຈາກັບ ສ.ເກົາຫຼີ ແມ່ນເຂັ້ມງວດ ຖ້າຫາກ ພຽງຢາງ ບໍ່ມີບັນດາບາດກ້າວເດີນມຸ່ງໄປເຖິງການຫລຸດຜ່ອນອາວຸດນິວເຄຼຍ. ອາເມລິກາ ຖືວ່າ: ແຕ່ດົນມາແລ້ວ ສປປ.ເກົາຫຼີ ເຄີຍນຳໃຊ້ບັນດາວິກິດການດ້ານນິວເຄຼຍ ເພື່ອບັນລຸໄດ້ຄວາມຜ່ອນສັ້ນຜ່ອນຍາວດ້ານເສດຖະກິດຈາກພາຍນອກ ແລະ ນີ້ອາດຈະແມ່ນບາດກ້າວເດີນທີ່ນອນໃນການຄິດໄລ່ດັ່ງກ່າວ. ຕາມຕົວຈິງແລ້ວ, ນະໂຍບາຍຂອງອຳນາດການປົກຄອງ ອາເມລິກາ ຂອງທ່ານ Domald Trump ສຳລັບບັນຫານິວເຄຼຍຂອງ ສປປ.ເກົາຫຼີ ໃນກ່ວາ 1 ປີຜ່ານມາ ຍັງບໍ່ທັນຈະແຈ້ງເທື່ອ.

        ເປັນທີ່ຈະແຈ້ງແລ້ວວ່າ, ວິວັດທະນາການສ້າງແຫຼມ ເກົາຫຼີ ປອດນິວເຄຼຍ ຍັງປະສົບກັບຄວາມຫຍຸ້ງຍາກຫລາຍຢ່າງ. ແຕ່ຕໍ່ໜ້າບັນດາສັນຍານດີຂຶ້ນໃນການພົວພັນລະຫວ່າງ 2 ພາກ ເກົາຫຼີ, ຫາງສຽງຍັງຄົງມີຄວາມຫວັງກ່ຽວກັບການເຈລະຈາຢ່າງເຂັ້ມງວດຂອງບັນດາຝ່າຍໃນໄລຍະຈະມາເຖິງ, ແນໃສ່ຕອບສະໜອງຄວາມມຸ່ງມາດປາດຖະໜາຂອງປະຊາຊົນໃນແຫຼມ ເກົາຫຼີ ພ້ອມກັນດຳລົງຊີວິດໃນສັນຕິພາບ./.