ພິທີມອບປື້ມປະກັນສັງຄົມ, ບັດປະກັນສັງຄົມ (ພາບປະກອບ: baophapluat.vn)

ບຸນປີໃໝ່ປະຈຳຊາດ ຫວຽດນາມ (ບຸນເຕັດ) ໃກ້ຈະມາຮອດແລ້ວ. ນີ້ແມ່ນບຸນເຕັດໃຫຍ່ສຸດໃນປີ, ແມ່ນໂອກາດເພື່ອໃຫ້ຄອບຄົວໄດ້ເຕົ້າໂຮມກັນ, ມີຄວາມໝາຍສຳຄັນດ້ານຈິດໃຈໃນການດຳລົງຊີວິດຂອງຊາວ ຫວຽດນາມ. ເພື່ອໃຫ້ທຸກຄົນ, ທຸກຄອບຄົວລ້ວນແຕ່ໄດ້ຮັບບຸນເຕັດ, ໃນຊຸມມື້ນີ້, ຈາກຂັ້ນສູນກາງລົງຮອດທ້ອງຖິ່ນ ໄດ້ດຳເນີນການເຄື່ອນໄຫວຫຼາຍຢ່າງເພື່ອໜູນຊ່ວຍ, ຢື້ຢາມຖາມຂ່າວ, ມອບຂອງຂວັນໃຫ້ບັນດາຄອບຄົວທຸກຍາກ, ຄອບຄົວເປົ້າໝາຍນະໂຍບາຍ.

ຄວາມເອົາໃຈໃສ່ຈາກຂັ້ນສູນກາງລົງຮອດທ້ອງຖິ່ນ

        ໃນຊຸມມື້ຜ່ານມາ, ການນຳລັດ, ລັດຖະບານ, ສະພາແຫ່ງຊາດ, ບັນດາອົງການຂັ້ນສູນກາງ ລ້ວນແຕ່ຈັດຄະນະໄປຢື້ຢາມຖາມຂ່າວ, ລະດົມກຳລັງໃຈບັນດາຄອບຄົວເປົ້າໝາຍນະໂຍບາຍ, ຄອບຄົວປະສົບກັບຄວາມຫຍຸ້ງຍາກຢູ່ຫຼາຍແຂວງ, ນະຄອນໃນທົ່ວປະເທດ. ຢູ່ແຕ່ລະແຫ່ງທີ່ໄປຢ້ຽມຢາມນັ້ນ, ການນຳລ້ວນແຕ່ຮຽກຮ້ອງໃຫ້ອຳນາດການປົກຄອງທ້ອງຖິ່ນ ຈົ່ງເອົາໃຈໃສ່ເຖິງບັນດາຄອບຄົວທຸກຍາກໃຫ້ຫຼາຍກວ່າອີກ, ຜັນຂະຫຍາຍແຜນນະໂຍບາຍຮັບປະກັນຊີວິດສັງຄົມຢ່າງທັນການ ເພື່ອໃຫ້ທຸກຄອບຄົວ, ທຸກຄົນໄດ້ຕ້ອນຮັບບຸນເຕັດ.

        ສ່ວນບັນດາກະຊວງ, ຂະແໜງການ, ອົງການຮັບປະກັນສັງຄົມ ຫວຽດນາມ ໄດ້ຜັນຂະຫຍາຍລາຍການ “ມອບປື້ມປະກັນສັງຄົມ, ບັດປະກັນສັງຄົມ, ມອບຂອງຂວັນ - ນຳເອົາບຸນເຕັດທີ່ເຕັມໄປດ້ວຍຄວາມອົບອຸ່ນມາສູ່ຜູ້ທຸກຍາກ” ຢູ່ 63 ແຂວງ, ນະຄອນ. ສະຫະພັນໃຫຍ່ແຮງງານ ຫວຽດນາມ ໄດ້ໜູນຊ່ວຍເງິນຍາມບຸນເຕັດໃຫ້ກຳມະກອນເກືອບ 2.400 ຕື້ດົ່ງ, ລະດົມເງິນເພື່ອຢື້ຢາມຖາມຂ່າວ, ມອບຂອງຂວັນໃຫ້ກຳມະກອນ, ຊາວຜູ້ອອກແຮງງານທີ່ປະສົບກັບຄວາມຫຍຸ້ງຍາກໄດ້ເກືອບ 18 ຕື້ດົ່ງ. ກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ໄດ້ສະຫງວນເງິນກວ່າ 430 ຕື້ດົ່ງເພື່ອມອບຂອງຂວັນໃຫ້ຜູ້ມີຄຸນງາມຄວາມດີ. ກົມໃຫຍ່ສະສົມແຫ່ງລັດ ໄດ້ຈັດພິທີມອບ-ຮັບເຂົ້າສານເກືອບ 14.000 ໂຕນຈາກແຫຼ່ງສະສົມແຫ່ງຊາດໃຫ້ 9 ແຂວງ, ໃນນັ້ນມີແຂວງ: ກາວບັ່ງ, ເງະອານ, ກວາງບິ່ງ, ກວາງງ້າຍ, ຝູອຽນ.

        ພ້ອມກັບສູນກາງ, ບັນດາທ້ອງຖິ່ນກໍ່ເປັນເຈົ້າການແຫຼ່ງການດ້ານເງິນເພື່ອໜູນຊ່ວຍປະຊາຊົນໃນບໍລິເວນ, ໃນນັ້ນ ນະຄອນ ໂຮ່ຈີມິນ ໄດ້ສະຫງວນແຫຼ່ງເງິນຫຼາຍທີ່ສຸດແມ່ນ 900 ຕື້ດົ່ງ, ຖັດຈາກນັ້ນແມ່ນ ຮ່າໂນ້ຍ, ຫາຍຟ່ອງ, ບິ່ງເຢືອງ…

ຕະຫຼາດກຳມະກອນອອນລາຍ (ພາບ: laodong.vn)

ສະຫະພັນແຮງງານນະຄອນ ໂຮ່ຈີມິນ ຍັງໄດ້ຈັດລາຍການ “ຄອບຄົວກຳມະກອນຜູ້ອອກແຮງງານຕ້ອນຮັບບຸນເຕັດພ້ອມກັບນະຄອນ”, ລາຍການ “ບຸນເຕັດແຫ່ງການເຕົ້າໂຮມ” ໄດ້ເຕົ້າໂຮມ 10.000 ຄອບຄົວສະມາຊິກກຳມະບານ, ກຳມະກອນທີ່ປະສົບກັບຄວາມຫຍຸ້ງຍາກ, ບໍ່ມີເງື່ອນໄຂກັບເມືອຕ້ອນຮັບບຸນເຕັດຢູ່ບ້ານ. ນອກນັ້ນ, ຍັງມີລາຍການ “ຕະຫຼາດກຳມະກອນອອນລາຍ”, “ວັນບຸນກຳມະກອນ - ຕະຫຼາດແຫ່ງນ້ຳໃຈເມດຕາປານີ”, “ປີ້ເມດຕາປານີ” ນຳກຳມະກອນກັບເມືອເຕົ້າໂຮມພ້ອມກັບຄອບຄົວ…

        ໃນການຢ້ຽມຢາມ, ອວຍພອນປີໃໝ່ຢູ່ ດ່ານັ້ງ ຫວ່າງມໍ່ໆມານີ້, ທ່ານປະທານປະເທດ ຫວຽດນາມ ຫງວຽນຊວັນຟຸກ, ໃຫ້ຮູ້ວ່າ:

        “ຈິດໃຈກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງຂອງຊາວ ຫວຽດນາມ ສືບຕໍ່ໄດ້ຮັບການຢັ້ງຢືນໃນໂອກາດຕ້ອນຮັບບຸນເຕັດ, ຕ້ອນຮັບລະດູບານໃໝ່, ພ້ອມກັບການໜູນຊ່ວຍຂອງລັດ. ມີພຽງແຕ່ຈິດໃຈນັ້ນຈຶ່ງຜ່ານຜ່າຄວາມຫຍຸ້ງຍາກ. ບໍ່ພຽງແຕ່ຂັ້ນສູນກາງ ແລະ ນະຄອນ ເທົ່ານັ້ນ, ຫາກຕົ້ນຕໍແມ່ນຂັ້ນເມືອງ, ຂັ້ນຕາແສງ ແລະ ແຕ່ລະຄອບຄົວ, ວົງຕະກຸນລ້ວນແຕ່ມີຄວາມເອົາໃຈໃສ່ເຊິ່ງກັນ ແລະ ກັນ ເພື່ອໃຫ້ທຸກຄອບຄົວລ້ວນແຕ່ໄດ້ຕ້ອນຮັບບຸນເຕັດ”.