ທ່ານນາຍົກລັດຖະມົນຕີ ຍີ່ປຸ່ນ Yoshihide Suga (ພາບ: AFP/TTXVN)

ວັນທີ 3 ກັນຍາ, ໃນກອງປະຊຸມຂອງ ພັກເສລີປະຊາທິປະໄຕ (LDP) ກຳອຳນາດ, ທ່ານນາຍົກລັດຖະມົນຕີ ຍີ່ປຸ່ນ Yoshihide Suga ໄດ້ປະກາດຈະບໍ່ເຂົ້າຮ່ວມການຫາສຽງເລືອກຕັ້ງເຂົ້າດຳລົງຕຳແໜ່ງປະທານພັກ LDP ໃນການເລືອກຕັ້ງຄາດວ່າຈະດຳເນີນໃນທ້າຍເດືອນກັນຍານີ້. ຖະແຫຼງການນີ້ ມີຄວາມໝາຍເຊັນດຽວກັນກັບເລື່ອງ ທ່ານນາຍົກລັດຖະມົນຕີ Yoshihide Suga ຈະລາອອກຈາກຕຳແໜ່ງ.

ທ່ານນາຍົກລັດຖະມົນຕີ Yoshihide Suga ປະກາດລາອອກຈາກຕຳແໜ່ງ

ວັນທີ 16 ກັນຍາ ປີ 2020, ທ່ານ Yoshihide Suga (ໃນເວລານັ້ນແມ່ນ ຫົວໜ້າຫ້ອງວ່າການລັດຖະບານ) ຍາດໄດ້ໄຊນະນະໃນການເລືອກຕັ້ງຢູ່ສະພາຕ່ຳຍີ່ປຸ່ນ ແລະ ກາຍເປັນນາຍົກລັດຖະມົນຕີຄົນໃໝ່ສືບທອດຕຳແໜ່ງຈາກທ່ານນາຍົກລັດຖະມົນຕີ Shinzo Abe (ລາອອກຈາກຕຳແໜ່ງຍ້ອນບັນຫາສຸຂະພາບ). ໃນຂະນະທີ່ທ່ານ Suga ຮັບດຳລົງຕຳແໜ່ງນາຍົກລັດຖະມົນຕີ, ດັດຊະນີຄວາມໄວ້ວາງໃຈຂອງລັດຖະບານ ຍີ່ປຸ່ນບັນລຸໄດ້ກ່ວາ 70% ເຊິ່ງສະແດງໃຫ້ເຫັນຄວາມຫວັງຢ່າງໃຫຍ່ຫຼວງຂອງມະຫາຊົນຕໍ່ທ່ານນາຍົກລັດຖະມົນຕີຄົນໃໝ່ນີ້ ໃນການບໍລິຫານປະເທດຊາດ, ເປັນຕົ້ນແມ່ນການຄວບຄຸມໂລກລະບາດໂຄວິດ - 19.

ເຖິງຢ່າງໃດກໍ່ຕາມ, ດ້ວຍການກາຍພັນເປັນເຊື້ອໄວຣັດສາຍພັນ Delta, ຄືກັນກັບປະເທດຕ່າງໆ, ຍີ່ປຸ່ນ ສືບຕໍ່ເກີດມີການແຜ່ລະບາດຮອບຕ່າງໆຢ່າງຮ້າຍແຮງ, ກໍ່ຜົນກະທົບຫຍໍ້ທໍ້ຕໍ່ການເຄື່ອນໄຫວເສດຖະກິດ ແລະ ຊີວິດການເປັນຢູ່ຂອງປະຊາຊົນ. ການຕີລາຄາຕົ້ນເດືອນ ກັນຍາ 2021 ຂອງ Nikkei Asia ສະແດງໃຫ້ເຫັນວ່າ ພື້ນຖານເສດຖະກິດ ໃຫຍ່ອັນດັບທີ 3 ໂລກ ມີດັດຊະນີການຟື້ນຟູພາຍຫຼັງໂລກລະບາດໂຄວິດ - 19 ໃນເດືອນສິງຫາ 2021 ຢືນຢູ່ອັນດັບທີ 72 ໃນຕາລະລາງຈັດອັນດັບທີ່ລວມມີ 121 ປະເທດໄດ້ຮັບການສຳຫຼວດ. ຄວາມຈິງດັ່ງກ່າວ ໄດ້ເຮັດໃຫ້ທ່ານນາຍົກລັດຖະມົນຕີ Yoshihide Suga ແລະ ບັນດາສະມາຊິກລັດຖະບານຕ້ອງປະເຊີນໜ້າກັບຄວາມຫຍຸ້ງຍາກຈາກຫາງສຽງ. ຜົນຕາມມາແມ່ນຫຼັງຈາກນັ້ນ 1 ປີ, ດັດຊະນີຄວາມໄວ້ວາງໃຈຕໍ່ ລັດຖະບານຂອງທ່ານນາຍົກລັດຖະມົນຕີ Yoshihide Suga ໄດ້ຫຼຸດລົງແຮງເຫຼືອພຽງ 30%, ເຊິ່ງເປັນລະດັບຕ່ຳທີ່ຫາຍາກ ສຳລັບຄະນະລັດຖະບານຍີ່ປຸ່ນຊຸດໜຶ່ງໃນຫຼາຍປີມານີ້.

ສິ່ງນີ້ ເປັນສ່ວນໜຶ່ງທີ່ໄດ້ອະທິບາຍໃນການປະກາດຈະບໍ່ເຂົ້າຮ່ວມການຫາສຽງເລືອກຕັ້ງຂອງ ທ່ານນາຍົກລັດຖະມົນຕີ Yoshihide Suga ເມື່ອທ່ານຖືວ່າ ຢາກສະຫງວນເວລາທີ່ຍັງເຫຼືອໃນອາຍຸການ ເພື່ອສຸມໃສ່ໃຫ້ແກ່ວຽກງານຮັບມືກັບໂລກລະບາດໂຄວິດ - 19, ແທນທີ່ຈະມານະພະຍາຍາມຂົນຂວາຍຫາສຽງເລືອກຕັ້ງ.

ສະພາບການທີ່ມີສິ່ງທ້າທາຍຫຼາຍຢ່າງ

ຢູ່ຍີ່ປຸ່ນ, ເລື່ອງລາອອກຈາກຕຳແໜ່ງຂອງບັນດານັກການເມືອງ, ນັບທັງຕຳແໜ່ງນາຍົກລັດຖະມົນຕີ ໄດ້ຮັບຖືວ່າແມ່ນສິ່ງທຳມະດາ. ເລື່ອງທ່ານນາຍົກລັດຖະມົນຕີ Yoshihide Suga ຕັດສິນໃຈຈະລາອອກຈາກຕຳແໜ່ງພາຍຫຼັງການຊີ້ນຳລັດຖະບານມາເປັນເວລາ 1 ປີ, ກໍ່ບໍ່ແມ່ນບັນຫາທີ່ຫາຍາກ. ຍົກຕົວຢ່າງຄື: ໃນໄລຍະ 2006 – 2021, ຍີ່ປຸ່ນ ມີນັກການເມືອງເຖິງ 6 ຄົນ ດຳລົງຕຳແໜ່ງນາຍົກລັດຖະມົນຕີ, ໂດຍສະເພາະ ມີທ່ານໜຶ່ງ ໄດ້ດຳລົງຕຳແໜ່ງນາຍົກລັດຖະມົນຕີໃນໄລຍະເວລາ ພຽງແຕ່ 2 ເດືອນຄື ກໍລະນີຂອງທ່ານນາຍົກລັດຖະມົນຕີ Hata Tsutomu (ນັບແຕ່ເດືອນເມສາ ປີ 1994 ຫາເດືອນ ມິຖຸນາ 1994 ).

ເພາະສະນັ້ນ, ສິ່ງທີ່ຫາງສຽງສົນໃຈເໜືອກ່ວາສິ່ງໃດໝົດໃນບັນຫານີ້ແມ່ນ ຜູ້ໃດຈະປ່ຽນແທນທ່ານ Yoshihide Suga ເພື່ອສືບຕໍ່ນຳພາ LDP ກໍ່ຄືດຳລົງຕຳແໜ່ງນາຍົກລັດຖະມົນຕີ ຍີ່ປຸ່ນ. ປັດຈຸບັນ, ສື່ມວນຊົນ ແລະ ຫາງສຽງຍີ່ປຸ່ນ ພວມເຕື້ອງເຖິງບາງຄົນທີ່ອາດຈະເຂົ້າຮ່ວມການສະໝັກເລືອກຕັ້ງດຳລົງຕຳແໜ່ງ ປະທານ LDP ໃນໄລຍະຈະມາເຖິງຄື ທ່ານ Fumio Kishida ອະດີດລັດຖະມົນຕີກະຊວງການຕ່າງປະເທດ, ທ່ານ Sanae Takaichi ອະດີດລັດຖະມົນຕີກະຊວງພາຍໃນ ແລະ ສື່ສານ, ທ່ານ Taro Kono ລັດຖະມົນຕີກະຊວງການປະຕິຮູບການບໍລິຫານ, ທ່ານ Shigeru Ishiba  ອະດີດ ລັດຖະມົນຕີກະຊວງປ້ອງກັນປະເທດ ແລະ ນັບທັງ ທ່ານ Shinzo Abe ອະດີດນາຍົກລັດຖະມົນຕີ ຍີ່ປຸ່ນ.

ຕາມວົງການນັກໄຈແຍກແລ້ວ, ເຖິງວ່ານັກການເມືອງຜູ້ໃດກາຍເປັນການນຳຄົນໃໝ່ຂອງ LDP ພາຍຫຼັງການເລືອກຕັ້ງ ກໍ່ຄາດວ່າໃນເດືອນກັນຍານີ້, ກໍ່ຈະຕ້ອງປະເຊີນໜ້າກັບກຳລັງກົດດັນ ແລະ ສິ່ງທ້າທາຍໃຫຍ່ຫຼາຍຢ່າງ. ທຳອິດແມ່ນ ໜ້າທີ່ຮັບປະກັນໄຊຊະນະຂອງພັກ LDP ໃນການເລືອກຕັ້ງທົ່ວປະເທດທີ່ຈະມາເຖິງ ໃນສະພາບການອິດທິພົນຊື່ສຽງຂອງພັກ LDP ພວມຫຼຸດລົງ. ຖັດຈາກນັ້ນ ແມ່ນບັນດາໜ້າທີ່ລວມມີການຄວບຄຸມໂລກລະບາດໂຄວິດ - 19, ຟື້ນຟູການເຕີບໂຕເສດຖະກິດ ແລະ ສຸດທ້າຍແມ່ນຮັບປະກັນທີ່ຖານະບົດບາດ ຂອງປະເທດມະຫາອຳນາດເສດຖະກິດແຖວໜ້າໂລກໃນເວທີສາກົນ.