(ທ່ານຮອງນາຍົກລັດຖະມົນຕີ ເລມິງຄາຍ)

        ໃນວາລະໄຂກອງປະຊຸມສະໄໝສາມັນເທື່ອທີ 5, ສະພາແຫ່ງຊາດ ຫວຽດນາມ ຊຸດທີ XV, ຈັດຂຶ້ນໃນຕອນເຊົ້າວັນທີ 22 ພຶດສະພາ, ຢູ່ ຮ່າໂນ້ຍ, ໂດຍຕາງໜ້າໃຫ້ລັດຖະບານ, ທ່ານຮອງນາຍົກລັດຖະມົນຕີ ຫວຽດນາມ ເລມິນຄາຍ ໄດ້ສະເໜີບົດລາຍງານເພີ່ມເຕີມກ່ຽວກັບໝາກຜົນການປະຕິບັດແຜນການພັດທະນາເສດຖະກິດ - ສັງຄົມປີ 2022; ສະພາບການປະຕິບັດແຜນການພັດທະນາເສດຖະກິດ - ສັງຄົມໃນຊຸມເດືອນຕົ້ນປີ 2023. ບົດລາຍງານໄດ້ຊີ້ໃຫ້ເຫັນສະພາບການຮອບດ້ານກ່ຽວກັບບັນດາຜົນງານດ້ານເສດຖະກິດ - ສັງຄົມ ທີ່ພົ້ນເດັ່ນຂອງ ຫວຽດນາມ ໃນຊຸມເດືອນຜ່ານມາ, ພ້ອມທັງຍົກອອກມາດຕະການແກ້ໄຂເຊິ່ງລັດຖະບານຈະຜັນຂະຫຍາຍໃນໄລຍະຈະມາເຖິງ ເພື່ອປະຕິບັດສຳເລັດບັນດາເປົ້າໝາຍພັດທະນາຂອງປີ 2023.

        ບົດລາຍງານຂອງລັດຖະບານທີ່ວາລະໄຂກອງປະຊຸມຂອງສະພາແຫ່ງຊາດ ແມ່ນການເຄື່ອນໄຫວປະຈຳປີ.

ບັນດາຈຸດພົ້ນເດັ່ນໃນການພັດທະນາ.

        ຕາມທ່ານຮອງນາຍົກລັດຖະມົນຕີ ເລມິງຄາຍ ແລ້ວ, ສະພາບການເສດຖະກິດ - ສັງຄົມໃນຊຸມເດືອນທ້າຍປີ 2022 ສືບຕໍ່ຟື້ນຟູ, ປະກອບສ່ວນເຂົ້າໃນຜົນງານລວມຂອງທັງປີ. ໃນນັ້ນ, ບັນລຸໄດ້ຫຼາຍຄາດໝາຍດີກວ່າຕົວເລກທີ່ໄດ້ລາຍງານຕໍ່ສະພາແຫ່ງຊາດ, ຄື: GDP ເພີ່ມຂຶ້ນ 8,02% (ລາຍງານແມ່ນ 8%). GDP ຄິດສະເລ່ຍຕໍ່ຫົວຄົນບັນລຸ 4.109 USD (ໄດ້ລາຍງານ 4.075 USD); ດັດຊະນີລາຄາໃຊ້ສອຍ (CPI) ຄິດສະເລ່ຍເພີ່ມຂຶ້ນ 3,15% (ໄດ້ລາຍງານປະມານ 4%); ລາຍຮັບງົບປະມານແຫ່ງລັດແມ່ນ 12,5%, ໂດຍຕອບສະໜອງໄດ້ບັນດາໜ້າທີ່ໃນລາຍຈ່າຍລົງທຶນພັດທະນາ, ປະຕິບັດນະໂຍບາຍຮັບປະກັນຊີວິດສັງຄົມ, ດັດປັບເງິນເດືອນ ແລະ ບັນດາໜ້າທີ່ຮີບດ່ວນອື່ນໆຢ່າງທັນການ, ຄົບຖ້ວນ.

        “ບັນດາຄາດໝາຍໜີ້ສາທາລະນະ, ໜີ້ລັດຖະບານ, ໜີ້ຕ່າງປະເທດຂອງ ຫວຽດນາມ ສືບຕໍ່ຫຼຸດລົງ ແລະ ຢູ່ໃນເກນທີ່ປອດໄພ. ຮອດທ້າຍປີ 2022, ລັດຖະບານໄດ້ໜູນຊ່ວຍຈຳນວນເງິນປະມານ 4,45 ຕື້ USD ໃຫ້ແກ່ຜູ້ນຳໃຊ້ແຮງງານກວ່າ 1,4 ລ້ານເທື່ອຄົນ ແລະ ຜູ້ອອກແຮງງານກວ່າ 68,43 ລ້ານເທື່ອຄົນທີ່ປະສົບກັບຄວາມຫຍຸ້ງຍາກ. ມູນຄ່າເຄື່ອງໝາຍແຫ່ງຊາດຂອງ ຫວຽດນາມ ປີ 2022 ບັນລຸ 431 ຕື້ USD, ຢືນອັນດັບທີ 32 ໃນກຸ່ມ 100 ເຄື່ອງໝາຍແຫ່ງຊາດທີ່ພັດທະນາໃນໂລກ”.

        ໃນທ່າສະດວກນັ້ນ, ໃນຊຸມເດືອນຕົ້ນປີ 2023, ຫວຽດນາມ ສືບຕໍ່ຮັບປະກັນເສດຖະກິດມະຫາພາກເປັນປົກກະຕິ, ຮັບປະກັນໄດ້ບັນດາຄວາມດຸ່ນດ່ຽງໃຫຍ່. ໃນເງື່ອນໄຂເສດຖະກິດໂລກທີ່ປະສົບກັບຄວາຫຍຸ້ງຍາກຫຼາຍຢ່າງ, GDP ໃນໄຕມາດທີ 1 ຍັງຄົງຮັກສາທ່າເຕີບໂຕບັນລຸ 3,32% ເມື່ອທຽບໃສ່ໄລຍະດຽວກັນ. ການສົ່ງອອກເກີນດຸນບັນລຸ 7,56 ຕື້ USD (ໃນໄລຍະດຽວກັນແມ່ນ 2,25 ຕື້ USD)… ຄຽງຂ້າງນັ້ນ, ວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນກໍ່ໄດ້ຮັບການຜັນຂະຫຍາຍຢ່າງເປັນເຈົ້າການ, ຕັ້ງໜ້າ, ບັນລຸປະສິດທິຜົນ ແລະ ຮອບດ້ານ. ທ່ານຮອງນາຍົກລັດຖະມົນຕີ ເລມິນຄາຍ ໃຫ້ຮູ້ວ່າ:

        “ຫວຽດນາມ ປະຕິບັດບັນດາໂຄງການພົວພັນຕ່າງປະເທດຂັ້ນສູງຂອງການນຳພັກ, ລັດຢ່າງມີປະສິດທິຜົນ, ປະກອບສ່ວນນຳການພົວພັນຮ່ວມມື 2 ຝ່າຍໃຫ້ເຂົ້າສູ່ລວງເລິກ, ແທດຈິງ ແລະ ເສີມຂະຫຍາຍບົດບາດຢູ່ບັນດາເວທີປາໄສຫຼາຍຝ່າຍ. ການທູດເສດຖະກິດໄດ້ສຸມໃສ່ຊີ້ນຳ ແລະ ບັນລຸຜົນງານຫຼາຍຢ່າງ, ປະກອບສ່ວນດຶງດູດແຫຼ່ງກຳລັງຮັບໃຊ້ການພັດທະນາ; ສຳເລັດການເຈລະຈາສັນຍາການຄ້າເສລີ (FTA) ຫວຽດນາມ - ອິດສະຣາແອັນ. ຜັນຂະຫຍາຍກຳລັງເຂົ້າຮ່ວມການກູ້ໄພກູ້ຊີບໄພພິບັດແຜ່ນດິນໄຫວຢູ່ ຕວັກກີ ຢ່າງທັນການ, ປະກອບສ່ວນຍົກສູງອິດທິພົນຊື່ສຽງ ແລະ ພາບພົດຂອງ ຫວຽດນາມ ຢູ່ເວທີສາກົນ”.

ສຸມໃສ່ລົງທຶນໃຫ້ແກ່ບັນດາກຳລັງໜູນການເຕີບໂຕ

        ໂດຍສັງເກດສະພາບການໃນໄລຍະຈະມາເຖິງ, ທ່ານຮອງນາຍົກລັດຖະມົນຕີ ເລມິນຄາຍ ຖືວ່າ, ພື້ນຖານເສດຖະກິດ ຫວຽດນາມ ຈະສືບຕໍ່ຖືກ “ຜົນກະທົບຄວບຄູ່” ຈາກບັນດາປັດໄຈຫຍໍ້ທໍ້ຢູ່ພາຍນອກ ແລະ ບັນດາຂໍ້ຈຳກັດ, ຂໍ້ຄົງຄ້າງຢູ່ພາຍໃນປະເທດທີ່ແກ່ຍາວເປັນເວລາຫຼາຍປີ. ໃນສະພາບການນັ້ນ, ລັດຖະບານໄດ້ຍົກອອກ 10 ມາດຕະການຕົ້ນຕໍ, ໃນນັ້ນ, ກ່ອນອື່ນໝົດແມ່ນສືບຕໍ່ປະຕິບັດເປົ້າໝາຍຮັກສາເສດຖະກິດມະຫາພາກໃຫ້ເປັນປົກກະຕິ, ຄວບຄຸມໄພເງິນເຟີ້, ຊຸກຍູ້ການເຕີບໂຕ, ຮັບປະກັນບັນດາຄວາມດຸ່ນດ່ຽງໃຫຍ່ຂອງພື້ນຖານເສດຖະກິດຢ່າງສະເໝີຕົ້ນສະເໝີປາຍ. ລັດຖະບານຈະສຸມໃສ່ໃຫ້ແກ່ບັນດາກຳລັງໜູນການເຕີບໂຕ (ການໃຊ້ສອຍ, ການລົງທຶນ, ການສົ່ງອອກ); ຍູ້ແຮງການປ່ອຍເງິນລົງທຶນສາທາລະນະ, ສູ້ຊົນປ່ອຍເງິນລົງທຶນປີ 2023 ບັນລຸຕ່ຳສຸດແມ່ນ 95%... ທ່ານຮອງນາຍົກລັດຖະມົນຕີ ເລມິນຄາຍ ເນັ້ນໜັກວ່າ:

        “ສຸມໃສ່ກວດກາ, ແກ້ໄຂຄວາມຫຍຸ້ງຍາກເພື່ອນຳບັນດາກິດຈະກຳ, ໂຄງການອຸດສາຫະກຳຈຸດສຸມເຂົ້າໃຊ້ການ. ເອົາໃຈໃສ່ພັດທະນາບັນດາການບໍລິການທີ່ມີຄວາມສາມາດບົ່ມຊ້ອນ, ທ່າແຮງນຳໃຊ້ເຕັກໂນໂລຊີສູງ ແລະ ມີມູນຄ່າເພີ່ມສູງ. ສ້າງໂຄງປະກອບຕະຫຼາດທ່ອງທ່ຽວຄືນໃໝ່; ຂຸດຄົ້ນບັນດາຕະຫຼາດແຂກທ່ອງທ່ຽວສາກົນຢ່າງມີປະສິດທິຜົນກວ່າ; ຍູ້ແຮງການໂຄສະນາ, ສົ່ງເສີມ, ຊຸກຍູ້ການຟື້ນຟູ, ພັດທະນາການທ່ອງທ່ຽວແບບຍືນຍົງ; ພັດທະນາບັນດາຜະລິດຕະພັນທ່ອງທ່ຽວເປັນຫຼາຍຮູບຫຼາຍແບບ ຕິດພັນກັບຄວາມສາມາດບົ່ມຊ້ອນ, ທ່າແຮງຂອງແຕ່ລະເຂດ, ທ້ອງຖິ່ນ”.

        ພ້ອມກັບບັນດາມາດຕະການແກ້ໄຂດັ່ງກ່າວ, ຫວຽດນາມ ສືບຕໍ່ປັບປຸງ, ເພີ່ມທະວີກຳລັງບົ່ມຊ້ອນພາຍໃນ ແລະ ຍູ້ໄວການຫັນການປ້ອງກັນຊາດ, ປ້ອງກັນຄວາມສະຫງົບເປັນທັນສະໄໝ, ຮັກສາເອກະລາດ, ຮັກສາອະທິປະໄຕເປັນໜຶ່ງດຽວ, ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ. ຫວຽດນາມ ກໍ່ສືບຕໍ່ຜັນຂະຫຍາຍບັນດາການເຄື່ອນໄຫວພົວພັນຕ່າງປະເທດ, ການເຊື່ອມໂຍງເຂົ້າກັບສາກົນຢ່າງຄົບຊຸດ, ຮອບດ້ານ.

        ທ່ານຮອງນາຍົກລັດຖະມົນຕີ ເລມິນຄາຍ ຢືນຢັນວ່າ, ການປະຕິບັດແຜນການພັດທະນາເສດຖະກິດ - ສັງຄົມໃນໄລຍະຈະມາເຖິງຮຽກຮ້ອງຕ້ອງມີຄວາມມານະພະຍາຍາມຢ່າງໃຫຍ່ຫຼວງຂອງທັງລະບົບ, ສືບຕໍ່ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ ກໍຄືຈິດໃຈນະວັດຕະກຳ ເພື່ອສາມາດປະຕິບັດບັນດາເປົ້າໝາຍພັດທະນາທີ່ໄດ້ວາງອອກໃຫ້ບັນລຸຜົນສຳເລັດ.