ຄະນະປະຕິບັດງານ ຂອງ VOV ເຮັດວຽກກັບວິທະຍຸກະຈາຍສຽງ ອິນເດຍ

ປະຈຸບັນ, ວິທະຍຸກະຈາຍສຽງ ຫວຽດນາມ  ມີການພົວພັນຮ່ວມມືໃນຂົງເຂດກະຈາຍສຽງກັບ 51 ວິທະຍຸກະຈາຍສຽງຕ່າງປະເທດ, 17 ອົງການກະຈາຍສຽງໂທລະພາບ ແລະ ອົງການບໍ່ຂຶ້ນກັບລັດຖະບານສາກົນ.

ຄູ່ຮ່ວມມືຢ່າງຂະຫຍັນຂັນເຄື່ອນ ແລະ ຕັ້ງຫນ້າ

ດ້ວຍບົດບາດແມ່ນ ວິທະຍຸກະຈາຍສຽງແຫ່ງຊາດ, ວິທະຍຸກະຈາຍສຽງ ຫວຽດນາມ ຮັກສາ ແລະ ພັດທະນາການພົວພັນຫລາຍຮູບແບບກັບຫລາຍຄູ່ຮ່ວມມື ນັ້ນແມ່ນ ວິທະຍຸກະຈາຍສຽງແຫ່ງຊາດໃຫຍ່ຢູ່ບັນດາປະເທດທີ່ມີການພົວພັນມິດຕະພາບທີ່ເປັນມູນເຊື້ອກັບ ຫວຽດນາມຄື: ລາວ, ກຳປູເຈຍ, ຈີນ, ໄທ, ສ.ເກົາຫລີ, ອີຢີບ, ອິນເດຍ, ຝລັ່ງ, ອາກຊັງຕີນ.. ຄຽງຄູ່ກັນນັ້ນ ວິທະຍຸກະຈາຍສຽງ ຫວຽດນາມ ກໍ່ແມ່ນສະມາຊິກທີ່ຕັ້ງຫນ້າຂອງບັນດາອົງການສາກົນໃຫຍ່ໃນຂົງເຂດກະຈາຍສຽງ ໂທລະພາບ.

ເລື່ອງເຂົ້າຮ່ວມ, ລົງນາມໃນຂໍ້ຕົກລົງຮ່ວມມືກັບບັນດາຄູ່ຮ່ວມມືສາກົນ ໄດ້ຊ່ວຍໃຫ້ ວິທະຍຸກະຈາຍສຽງ ຫວຽດນາມ ເຊື່ອມໂຍງຢ່າງເລິກເຊິ່ງກວ້າງຂວາງໃນຂົງເຂດກະຈາຍສຽງ, ໂທລະພາບ, ສ້າງເຄືອຂ່າຍສື່ສານອັນໝັ້ນແກ່ນ, ຜ່ານນັ້ນ ກໍ່ປະກອບສ່ວນຍົກສູງບົດບາດ, ທີ່ຕັ້ງຂອງ ວິທະຍຸກະຈາຍສຽງ ຫວຽດນາມ. ພິເສດ ເຄື່ອງໝາຍຂອງ ວິທະຍຸກະຈາຍສຽງ ຫວຽດນາມ ໄດ້ສະແດງໃຫ້ເຫັນຢ່າງຈະແຈ້ງທີ່ສຸດໃນເລື່ອງນັບມື້ນັບສະແດງໃຫ້ເຫັນສີສັນໃນບັນດາຜະລິດຕະພັນທີ່ມີຄຸນນະພາບເມື່ອເຂົ້າຮ່ວມການແຂ່ງຂັນຊີງບັນດາລາງວັນສາກົນໃຫຍ່ກ່ຽວກັບກະຈາຍສຽງ - ໂທລະພາບ, ຈາກລາງວັນພິເສດຂອງຄະນະກຳມະການລາງວັນ ABU, ລາງວັນຊົມເຊີຍ; ແລະ ຕໍ່ມາແມ່ນບັນດາລາງວັນສູງສຸດຂອງ ABU ໃນປີ 2021, 2022, 2023 ຢູ່ຫລາຍປະເພດແຕກຕ່າງກັນ.

ແລະ ຫວ່າງແລ້ວນີ້ ຄືວັນທີ 3 ກັນຍາ, ວິທະຍຸກະຈາຍສຽງ ຫວຽດນາມ ສືບຕໍ່ຍາດໄດ້ລາງວັນຂອງ AIBD ໃນປະເພດ “ເຕັກໂນໂລຊີສີຂຽວ ແລະ ຍືນຍົງ. ທ່ານ Javad Mottagi, ອະດີດເລຂາທິການ ABU ແບ່ງປັນວ່າ:

“ອາດເວົ້າໄດ້ວ່າ ວິທະຍຸກະຈາຍສຽງ ຫວຽດນາມ ໄດ້ເຂົ້າຮ່ວມຢ່າງຕັ້ງຫນ້າເຂົ້າໃນການເຄື່ອນໄຫວຂອງ  ABU ໃນຊຸມປີຜ່ານມາ. ພວກຂ້າພະເຈົ້າມີຄວາມເອກອ້າງທະນົງໃຈຍ້ອນການຮ່ວມມື ແລະ ເປັນຄູ່ຮ່ວມມືຂອງ ວິທະຍຸກະຈາຍສຽງ ຫວຽດນາມ. ພວກຂ້າພະເຈົ້າ ຕີລາຄາສູງເລື່ອງ ວິທະຍຸກະຈາຍສຽງ ຫວຽດນາມ ຮ່ວມມື, ໂອ້ລົມສົນທະນາ, ແບ່ງປັນກ່ຽວກັບບັນດາສິ່ງທ້າທາຍ ແລະ ວິທີການເພື່ອຫັນສິ່ງທ້າທາຍເປັນກາລະໂອກາດ”

ຄຽງຄູ່ກັບບັນດາລາງວັນສາກົນນັ້ນ, ວິທະຍຸກະຈາຍສຽງ ຫວຽດນາມ ຍັງສະແດງໃຫ້ເຫັນການຮ່ວມມືສາກົນຢ່າງເລິກເຊິ່ງກວ້າງຂວາງ ຜ່ານວຽກງານແລກປ່ຽນລາຍການຕ່າງໆ. ເລື່ອງແລກປ່ຽນນີ້ ໄດ້ຊ່ວຍໃຫ້ ວິທະຍຸກະຈາຍສຽງ ຫວຽດນາມ ສົ່ງຜະລິດຕະພັນກະຈາຍສຽງ, ໂທລະພາບນັບພັນໆຢ່າງໄປຍັງບັນດາຄູ່ຮ່ວມມືຕ່າງປະເທດ, ຜ່ານນັ້ນ ກໍ່ແຜ່ຂະຫຍາຍຊື່ສຽງຂອງ ວິທະຍຸກະຈາຍສຽງ ຫວຽດນາມອອກສູ່ໂລກ.

ຫັນປ່ຽນຢ່າງແຮງ ເພື່ອຍົກສູງທີ່ຕັ້ງບົດບາດ

ເພື່ອໃຫ້ມີກຳລັງຄວາມສາມາດເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ, ວິທະຍຸກະຈາຍສຽງ ຫວຽດນາມ ໄດ້ສ້າງພື້ນຖານອັນໝັ້ນແກ່ນໂດຍອີງໃສ່ຄວາມຄາດຫວັງເຮັດວຽກງານສື່ມວນຊົນໃຫ້ນັບມື້ນັບເປັນມືອາຊີບກວ່າ, ໄປຄຽງຄູ່ກັບການຫັນເປັນເຕັກໂນໂລຊີທີ່ນັບມື້ນັບແຮງກວ່າ.  ທ່ານ ຟ້າມແມ້ງຮຸ່ງ, ຮອງຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມ ໃຫ້ຮູ້ວ່າ:

“ພວກຂ້າພະເຈົ້າຍາມໃດກໍ່ວິເຄາະໄຈ້ແຍກກ່ຽວກັບຜົນສຳເລັດຂອງ ວິທະຍຸກະຈາຍສຽງ ຫວຽດນາມ ແລະ ຊອກສິ່ງທີ່ດີກວ່າເພື່ອຕອບສະຫນອງຄວາມມຸ່ງຫວັງຂອງຖັນແຖວພະນັກງານ, ນັກຂ່າວ, ບັນນາທິການ ວິທະຍຸກະຈາຍສຽງ ຫວຽດນາມ ດ້ວຍໄຊຊະນະໃຫມ່ ແລະ ມຸ່ງໄປເຖິງການປັບປຸງທັກສະອາຊີບຂອງຕົນເພື່ອໃຫ້ແຕ່ລະປະເພດກະຈາຍສຽງ, ໂທລະພາບ, ສື່ເອເລັກໂຕນິກ, ສື່ສິ່ງພິມ ລ້ວນແຕ່ມີຜະລິດຕະພັນທີ່ດີກວ່າ ແລະ ການເຄື່ອນໄຫວໃນຂົງເຂດສື່ມວນຊົນນັບມື້ນັບເປັນມືອາຊີບກວ່າ”

ທ່ານຟ້າມແມັ້ງຮຸ່ງ ຮອງຜູ້ອຳນວຍການໃຫຍ່ VOV

ເພື່ອຫນູນຊ່ວຍໃຫ້ເປົ້າໝາຍດັ່ງກ່າວ, ວິທະຍຸກະຈາຍສຽງ ຫວຽດນາມ ພວມຫັນເປັນດິຈີຕອນຢ່າງແຮງ. ຕາມທ່ານ ຫວູຫາຍກວາງ, ຮອງຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມແລ້ວ, ປະຈຸບັນ ວິທະຍຸກະຈາຍສຽງ ຫວຽດນາມ ພວມສ້າງແຜນຮ່າງພື້ນຖານດິຈີຕອນກະຈາຍສຽງແຫ່ງຊາດ ເພື່ອແນໃສ່ສ້າງພື້ນຖານໂຄງລ່າງດິຈີຕອນຢ່າງມີປະສິດທິຜົນໃນໄລຍະເວລາໄວທີ່ສຸດ.

“ ຫນ້າທີ່ຫລັກຂອງພວກຂ້າພະເຈົ້າ ປະຈຸບັນ ແມ່ນ ພວມສ້າງພື້ນຖານໂຄງລ່າງດິຈີຕອນ ເພື່ອໝູນໃຊ້ໃຫ້ທຸກການເຄື່ອນໄຫວຂອງ ວິທະຍຸກະຈາຍສຽງ ຫວຽດນາມ, ໃນນັ້ນ ເອົາໃຈໃສ່ເປັນພິເສດເຖິງການຂຸດຄົ້ນທ່າແຮງຂອງປັນຍາປະດິດ, ເພື່ອວິເຄາະ, ລວບລວມຂ່າວ, ບົດ, ການກະທຳຂອງຜູ້ໃຊ້, ຕອບສະຫນອງຄວາມຮຽກຮ້ອງຕ້ອງການຂອງຜູ້ຟັງຜູ້ອ່ານ”

ນັກຂ່າວ ເລກວັກມິງ, ບັນນາທິການໃຫຍ່ ຫນັງສືພິມເຍີນເຢີນ (ປະຊາຊົນ), ຮອງຫົວຫນ້າຄະນະໂຄສະນາສຶກສາສູນກາງ, ປະທານ ສະມາຄົມນັກຂ່າວ ຫວຽດນາມ ຕີລາຄາສູງຍຸດທະສາດຫັນເປັນດິຈີຕອນ ຂອງ ວິທະຍຸກະຈາຍສຽງ ຫວຽດນາມ.

“ວິທະຍຸກະຈາຍສຽງ ຫວຽດນາມ ມີຄວາມກ້າຫານໃນການໝູນໃຊ້ບັນດາເຕັກໂນໂລຊີໃຫມ່, ໄດ້ມີບັນດາບາດກ້າວແຮງກ້າໃນວິວັດການຫັນເປັນດິຈີຕອນ. ວິທະຍຸກະຈາຍສຽງ ຫວຽດນາມ ໄດ້ຍົກອອກບັນດາລາຍການກະຈາຍສຽງຂອງຕົນ, ເບື້ອງຕົ້ນແມ່ນອອກອາກາດ ແລະ ປະຈຸບັນ ແມ່ນຜ່ານທາງອິນເຕີເນັດ, ແຜ່ກະຈາຍໄປສູ່ປະຊາຊົນທຸກຄົນຢູ່ທຸກແຖບຖິ່ນຂອງປະເທດຊາດ ກໍ່ຄືສາກົນ”

ພ້ອມກັບທັກສະເຮັດວຽກງານສື່ມວນຊົນທີ່ນັບມື້ນັບເປັນມືອາຊີບກວ່າ, ການຫັນປ່ຽນເຕັກໂນໂລຊີນັບມື້ນັບແຮງກວ່າ, ວິທະຍຸກະຈາຍສຽງ ຫວຽດນາມ ຈະສືບຕໍ່ປັບປຸງ, ຍູ້ແຮງການຮ່ວມມືສາກົນ, ພົວພັນແລກປ່ຽນສອງຝ່າຍ ແລະຫລາຍຝ່າຍກັບບັນດາອົງການກະຈາຍສຽງ - ໂທລະພາບສາກົນ, ເພື່ອແນໃສ່ປະກອບສ່ວນໃຫ້ແກ່ການພັດທະນາ, ຍົກສູງທີ່ຕັ້ງບົດບາດຂອງ ວິທະຍຸກະຈາຍສຽງ ຫວຽດນາມ.