(vovworld) - ຄວາມບໍ່ລົງລອຍກັນຢ່າງເລິກເຊິ່ງລະຫວ່າງບັນດາສະມາຊິກຂອງສະພາຄວາມໝັ້ນຄົງກ່ຽວກັບບັນຫາ ຊີຣີ ໄດ້ສະແດງອອກຢ່າງຈະແຈ້ງໃນວາລະປະຊຸມວິສາມັນເມື່ອຕອນເຊົ້າວັນທີ 9/10, ພາຍຫຼັງ ຮ່າງມະຕິທັງສອງຂອງ ຝລັ່ງ ແລະ ລັດເຊຍທີ່ເຕື້ອງເຖິງວິທີການແກ້ໄຂສະພາບການຢູ່ ຊີຣີ ລ້ວນແຕ່ໄດ້ຮັບຈຳນວນບັດສະໜັບສະໜູນຢ່າງພຽງພໍເພື່ອຮັບຮອງເອົາ. ໝາກຜົນດັ່ງກ່າວ ອີກເທື່ອໜຶ່ງໄດ້ລົບລ້າງຄວາມຫວັງຂອງປະຊາຄົມສາກົນກ່ຽວກັບມະຕິຂອງ ສະຫະປະຊາຊາດ ເພື່ອແນໃສ່ແຊກແຊງ, ປະກອບສ່ວນຢຸດຕິການໃຊ້ຄວາມຮຸ້ນແຮງຢູ່ ຊີຣີ.
(ພາບປະກອບ: AFP/TTXVN) ວາລະປະຊຸມດຳເນີນໄປໃນສະພາບການໃຊ້ຄວາມຮຸ້ນແຮງສືບຕໍ່ເພີ່ມຂຶ້ນຢູ່ນະຄອນ Allepo ປະເທດ ຊີຣີ, ກໍ່ຄີຄວາມເຄັ່ງຕຶງລະຫວ່າງ ລັດເຊຍ ກັບ ອາເມລິກາ ກ່ຽວກັບບັນຫາ ຊີຣີພວມເພີ່ມຂຶ້ນ. ຮ່າງມະຕິສະບັບໜຶ່ງຢາກໄດ້ຮັບການຮັບຮອງເອົາຈາກສະພາຄວາມໝັ້ນຄົງ ແມ່ນຕ້ອງໄດ້ຮັບບັດສະໜັບສະໜູນ 9 ບັດ ແລະ ບໍ່ໄດ້ຮັບບັດຄັດຄ້ານສະບັບໃດຢ່າງເດັດຂາດຂອງ 1 ໃນ 5 ປະເທດປະຈຳແມ່ນ ລັດເຊຍ, ອາເມລິກາ, ອັງກິດ, ຝລັ່ງ, ຈີນ.
ຄວາມບໍ່ລົງລອຍກັນຢ່າງເລິກເຊິ່ງກ່ຽວກັບບັນຫາ ຊີຣີ
ຢູ່ວາລະປະຊຸມ, ຝລັ່ງ ແລະ ລັດເຊຍ, ເຊິ່ງແມ່ນສອງປະເທດມີສິດປະຕິເສດໃນສະພາຄວາມໝັ້ນຄົງ, ໄດ້ຍົກອອກຮ່າງມະຕິຕ່າງຫາກສອງສະບັບເພື່ອແກ້ໄຂສະພາບການຢູ່ ຊີຣີ. ຮ່າງມະຕິຂອງ ຝລັ່ງມີເນື້ອໃນຕົ້ນຕໍແມ່ນຮຽກຮ້ອງທຸກຝ່າຍຢຸດຕິການບຸກໂຈມຕີທາງອາກາດທັງໝົດ ແລະ ການບິນດ້ານການທະຫານໃນເຂດນ່ານຟ້ານະຄອນ Allepo ປະເທດ ຊີຣີ. ພ້ອມທັງຮຽກຮ້ອງຄຳສັ່ງຢຸດຍິງ ແລະ ສ້າງເງື່ອນໄຂໃຫ້ການຂົນສົ່ງສິນຄ້າຊ່ວຍເຫຼືອມະນຸດສະທຳເຖິງທຸກແຫ່ງຢູ່ ຊີຣີ. ຮ່າງມະຕິນີ້ໄດ້ຮັບການສະໜັບສະໜູນຈາກ 11 ໃນຈຳນວນ 15 ປະເທດພາຄີຂອງສະພາຄວາມໝັ້ນຄົງ. ເຖິງຢ່າງໃດກໍ່ຕາມ, ລັດເຊຍໄດ້ປະຕິເສດຮ່າງມະຕິນີ້ເມື່ອຖືວ່າການບຸກໂຈມຕີທາງອາກາດຂອງ ລັດເຊຍເຂົ້າ Allepo ແມ່ນເລັ່ງໃສ່ກຸ່ມກໍ່ການຮ້າຍ ແລະ ບໍ່ເປັນໄພອັນຕະລາຍເຖິງສາມັນຊົນ. ນີ້ແມ່ນເທື່ອທີ 5 ທີ່ລັດເຊຍປະຕິເສດມະຕິຂອງສະຫະປະຊາຊາດກ່ຽວກັບ ຊີຣີ ໃນໄລຍະ ກວ່າ 5 ປີແຫ່ງການເກີດສົງຄາມຢູ່ ຊີຣີ.
ໃນຂະນະນັ້ນ, ຮ່າງມະຕິຂອງ ລັດເຊຍ ຮຽກຮ້ອງເຖິງການຢຸດຍິງຢູ່ ຊີຣີ, ແຕ່ໃນນັ້ນພັດບໍ່ເຕື້ອງເຖິງເລື່ອງຢຸດຕິການບຸກໂຈມຕີທາງອາກາດ. ຮ່າງມະຕິນີ້ກໍ່ບໍ່ໄດ້ຮັບຜົນເມື່ອໄດ້ຮັບບັດຄ້ານຫຼາຍບັດ, ໃນນັ້ນມີ ອັງກິດ, ຝລັ່ງ ແລະ ອາເມລິກາ.
ສິ່ງທີ່ໜ້າສົນໃຈນັ້ນນັ້ນວາລະປະຊຸມດຳເນີນໄປໃນບັນຍາກາດຂາດຄວາມຮ່ວມມື, ໃນລະບຽບການປ່ອນບັດ, ບັນດາປະເທດພາຄີຂອງສະພາຄວາມໝັ້ນຄົງເກືອບທັງໝົດບໍ່ສົນໃຈເຖິງການຄຳປາໄສຂອງກັນ. ຊ້ຳບໍ່ໜຳ, ໃນຂະນະທ່ານເອກອັກຄະລັດຖະທູດ ຊີຣີ ພວມກ່າວປາໄສ, ຜູ້ຕາງໜ້າຂອງ ອາເມລິກາ, ອັງກິດ, ຝລັ່ງ ພັດປະເມືອ. ຮ່າງມະຕິທັງສອງຂອງ ລັດເຊຍ ແລະ ຝລັ່ງ ລ້ວນແຕ່ບໍ່ໄດ້ຮັບຮອງເອົາ, ຍ້ອນຝ່າຍຕ່າງໆບໍ່ຜ່ອນສັ້ນຜ່ອນຍາວນຳກັນ.
ເລື່ອງຮ່າງມະຕິທັງສອງບໍ່ໄດ້ຮັບການຮັບຮອງເອົານັ້ນ, ສະແດງໃຫ້ເຫັນຄວາມບໍ່ລົງລອຍກັນຢ່າງເລິກເຊິ່ງ ລະຫວ່າງບັນດາປະເທດພາຄີຂອງສະພາຄວາມໝັ້ນຄົງ ກ່ຽວກັບບັນຫາ ຊີຣີ. ທ່ານ Vitaly Churkin ເອກອັກຄະລັດຖະທູດ ລັດເຊຍ ປະຈຳ ສະຫະປະຊາຊາດ ກໍ່ຍອມຮັບວ່າ, ການປ່ອນບັດໃຫ້ຮ່າງມະຕິທັງສອງໃນວັນທີ 9/10 ແມ່ນເຫດການທີ່ບໍ່ເຄີຍມີມາກອນໃນປະຫວັດສາດຂອງສະພາຄວາມໝັ້ນຄົງ ສະຫະປະຊາຊາດ. ບັນຫາວິກິດການຢູ່ ຊີຣີ ມີຄວາມສຳຄັນທີ່ສຸດ ແລະ ຕ້ອງໄດ້ຮັບການສົມທົບຂອງບັນດາຄວາມມານະພະຍາຍາມດ້ານການເມືອງໃນປະຊາຄົມສາກົນ, ແຕ່ພັດຂາດຄວາມເຫັນດີເຫັນພ້ອມລະຫວ່າງບັນດາປະເທດສະມາຊິກ, ສິ່ງດັ່ງກ່າວແມ່ນບໍ່ສາມາດຮັບຮູ້ໄດ້. ໃນຂະນະນັ້ນ, ບັນດານັກການທູດຢູ່ ສະຫະປະຊາຊາດ ຖືວ່າຈະບໍ່ມີມະຕິໃດກ່ຽວກັບ ຊີຣີ ໄດ້ຮັບການຮັບຮອງເອົາ, ຖ້າຫາກວ່າທັງ ລັດເຊຍ ແລະ ອາເມລິກາ ບໍ່ປະຊຸມເພື່ອຊອກຫາທັດສະນະລວມກ່ຽວກັບບັນຫານີ້ຄືໃນປະຈຸບັນ.
ທ່ານ Vitaly Churkin ເອກອັກຄະລັດຖະທູດ
ລັດເຊຍ ປະຈຳ ສະຫະປະຊາຊາດ
(ພາບ: AFP)
ສືບຕໍ່ມີຄວາມຫວັງຕໍ່ຄວາມມານະພະຍາຍາມດ້ານການທູດ
ທ່ານ Vitaly Churkin ເອກອັກຄະລັດຖະທູດ ລັດເຊຍ ປະຈຳ ສະຫະປະຊາຊາດ ຖະແຫຼງວ່າ, ເລື່ອງບໍ່ສາມາດຮັບຮອງເອົາບັນດາຮ່າງມະຕິກ່ຽວກັບ ຊີຣີ ບໍ່ໝາຍຄວາມວ່າ, ບັນດາຄວາມມານະພະຍາຍາມດ້ານການທູດຖືກຢຸດຕິໄວ້. ຕາມທ່ານແລ້ວ, ບັນດາຄວາມມານະພະຍາຍາມຫຼາຍຝ່າຍ ແລະ ສອງຝ່າຍຍັງຄົງສືບຕໍ່ຢູ່. ພ້ອມທັງສະແດງຄວາມຫວັງວ່າ, ສະພາບການຢູ່ ຊີຣີ ຈະເປັນປົກກະຕິໂດຍໄວ. ໃນຂະນະນັ້ນ, ທ່ານ Jean –Marc Ayrault ໄດ້ຢືນຢັນວ່າ, ຈະສືບຕໍ່ເຈລະຈາກັບ ລັດເຊຍ ໃນການຊອກຫາມາດຕະການແກ້ໄຂທີ່ມີປະສິດທິຜົນໃຫ້ວິກິດການຢູ່ ຊີຣີ, ໂດຍບໍ່ຫົວຊາຕໍ່ເລື່ອງ ລັດເຊຍ ໄດ້ປະຕິເສດຮ່າງມະຕິກ່ຽວກັບສົງຄາມຢູ່ ຊີຣີ ໂດຍ ຝລັ່ງ ຮຽບຮຽງ. ທ່ານ ລັດຖະມົນຕີ ຝລັ່ງ ຊີ້ແຈ້ງວ່າ: ຝລັ່ງຈະບໍ່ຢຸດຕິການເຈລະຈາກັບ ລັດເຊຍ ຢ່າງເດັດຂາດ, ພ້ອມທັງໃຫ້ຮູ້ວ່າ, ຝລັ່ງຈະຊັ່ງຊາຕໍ່ການເລືອກເຟັ້ນທີ່ແຕກຕ່າງກັນ ແລະ ຈະສືບຕໍ່ຄວາມມານະພະຍາຍາມຊອກຫາມາດຕະການແກ້ໄຂດ້ວຍສັນຕິພາບໃຫ້ແກ່ ຊີຣີ. ກ່າວຄວາມເຫັນທາງໂທລະພາບຂອງເຢັຍລະມັນທີ່ອອກອາກາດໃນວັນທີ 12/10, ທ່ານເລຂາທິການໃຫຍ່ ສະຫະປະຊາຊາດ Ban Ki moon ກໍ່ຍອມຮັບວ່າ, ະຫະປະຊາຊາດຕ້ອງມີຄວາມມານະພະຍາຍາມກວ່າອີກ ເພື່ອສະກັດກັ້ນບໍ່ໃຫ້ເກີດບັນດາຜົນຮ້າຍຢ້ອນຫຼັງຄືທຸກສິ່ງທຸກຢ່າງເຊິ່ງ ຊີຣີ ພວມປະສົບໃນປະຈຸບັນ. ທ່ານຍັງຮຽກຮ້ອງວ່າ ໃນອະນາຄົດ ສະພາຄວາມໝັ້ນຄົງຕ້ອງມີການກະທຳ “ປະຊາທິປະໄຕກວ່າ, ຈະແຈ້ງກວ່າ ແລະ ມີລັກສະນະເປັນຕົວແທນກວ່າ“ .
ເລື່ອງມະຕິທັງສອງກ່ຽວກັບ ຊີຣີ ບໍ່ໄດ້ຮັບຮອງເອົາຢູ່ສະພາຄວາມໝັ້ນຄົງ ສະຫະປະຊາຊາດ, ໄດ້ເຮັດໃຫ້ການແກ້ໄຂສະພາບການຢູ່ ຊີຣີ ຕົກເຂົ້າສູ່ສະພາບຈົນຕາແຈອີກຄັ້ງໜຶ່ງ. ປະຈຸບັນເລື່ອງຢຸດຕິສົງຄາມຢູ່ ຊີຣີ ຕ້ອງສືບຕໍ່ລໍຖ້າມາດຕະການດ້ານການທູດອື່ນຂອງປະຊາຄົມສາກົນ, ຫຼືລໍຖ້າການຜ່ອນສັ້ນຜ່ອນຍາວຂອງບັນດາປະເທດໃຫຍ່ໃນສະພາຄວາມໝັ້ນຄົງ ເພື່ອຊອກຫາທັດສະນະລວມ, ໃນການແກ້ໄຂບັນຫາສັນຕິພາບຢູ່ ຊີຣີ.