(ທີ່ລາຍການພົບປະແລກປ່ຽນສະແດງສິລະປະ)

        ລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ” ໂດຍວິທະຍຸກະຈາຍສຽງ ຫວຽດນາມ (VOV), ຄະນະໂຄສະນາສຶກສາສູນກາງພັກ, ກົມໃຫຍ່ການເມືອງກອງທັບປະຊາຊົນ ຫວຽດນາມ - ກະຊວງປ້ອງກັນປະເທດ ແລະ ຄະນະກຳມະການປະຊາຊົນແຂວງ ແຄງຮ່ວາ ໄດ້ສົມທົບກັນຈັດຂຶ້ນໃນຕອນຄ່ຳວັນທີ 12 ສິງຫາ, ຢູ່ ທ່າກຳປັ່ນທະຫານ ຍາຈາງ, ແຂວງ ແຄງຮ່ວາ. ລາຍການແມ່ນເພື່ອປະກອບສ່ວນແຜ່ກະຈາຍຄວາມຮັກຕໍ່ເຂດທະເລ, ໝູ່ເກາະ ແລະ ບັນດາຜົນງານຂອງ ຫວຽດນາມ ໃນ 5 ປີແຫ່ງການຜັນຂະຫຍາຍມະຕິເລກທີ 36 (ລົງວັນທີ 22 ຕຸລາ 2018) ຂອງຄະນະບໍລິການງານສູນກາງພັກຊຸດທີ XII ກ່ຽວກັບຍຸດທະສາດພັດທະນາເສດຖະກິດທະເລ ຫວຽດນາມ ແບບຍືນຍົງຮອດປີ 2030, ວິໄສທັດຮອດປີ 2045.

        ນີ້ແມ່ນລາຍການພົບປະແລກປ່ຽນສະແດງສິລະປະລະດັບຊາດ, ມີຂອບຂະໜາດໃຫຍ່ສຸດນັບແຕ່ກ່ອນມາຮອດປະຈຸບັນ. ບັນດາສານທີ່ຍົກອອກມາໃນລາຍການແມ່ນ: ຄວາມຮັກຕໍ່ທະເລ, ໝູ່ເກາະ, ຄວາມເອກອ້າງທະນົງໃຈຕໍ່ປະເທດຊາດ, ເຈດຈຳນົງ, ຄວາມຕັດສິນໃຈປົກປັກຮັກສາອະທິປະໄຕເຂດທະເລ, ໝູ່ເກາະແຫ່ງບ້ານເກີດເມືອງນອນ ແລະ ຄວາມຄາດຫວັງພິຊິດທະເລ, ສ້າງຄວາມຮັ່ງມີຈາກທະເລ…

ເນື້ອໃນເລິກເຊິ່ງ ແລະ ມີຄວາມໝາຍ

        ລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ” ລວມມີ 3 ພາກຕົ້ນຕໍ, ດ້ວຍຫົວຂໍ້ທີ່ວ່າ: “ຈິດສຳນຶກທະເລ”, “ຫວຽດນາມ ມຸ່ງໄປເຖິງການສ້າງຄວາມຮັ່ງມີຈາກທະເລ” ແລະ “ຫວຽດນາມ ມຸ່ງໄປເຖິງການສ້າງທະເລໃຫ້ເຂັ້ມແຂງ”. ນັກສິລະປິນດີເດັ່ນ ຢວານເຈື່ອງງວຽນ, ຫົວໜ້າພະແນກດົນຕີ (VOV3), ວິທະຍຸກະຈາຍສຽງ ຫວຽດນາມ, ຮັບຜິດຊອບເນື້ອໃນດົນຕີຂອງລາຍການ, ໃຫ້ຮູ້ວ່າ:

        “ເນື້ອໃນທັງໝົດໄດ້ສົ່ງຜ່ານບັນດາຮູບແບບ, ຄື: ສາລະຄະດີ, ການສຳພາດ, tallshow ບົນເວທີສະແດງ. ພິເສດ, ດ້ວຍພາສາດົນຕີ, ລາຍການໄດ້ສົ່ງສານຕ່າງໆ, ບັນດາແຜນນະໂຍບາຍຂອງພັກ ແລະ ລັດຖະບານ, ເນື້ອໃນຈິດໃຈຂອງມະຕິເລກທີ 36 ກ່ຽວກັບຍຸດທະສາດພັດທະນາເສດຖະກິດທະເລແບບຍືນຍົງ”.

        ນອກຈາກລາຍການສະແດງສິລະປະທີ່ໄດ້ຮັບການປະຕິບັດຢ່າງຟົດຟື້ນ, ມີຂອບຂະໜາດໃຫຍ່ແລ້ວ, ບັນດານັກຊ່ຽວຊານ, ນັກຄົ້ນຄວ້າກ່ຽວກັບທະເລ, ໝູ່ເກາະຂອງ ຫວຽດນາມ ຍັງໄດ້ແບ່ງປັນບັນດາເລື່ອງລາວສະຖານະການການເມືອງ, ຍົກອອກຫຼາຍຄຳເຫັນປະກອບສຳລັບຍຸດທະສາດພັດທະນາເສດຖະກິດທະເລແບບຍືນຍົງອີກດ້ວຍ. ໃນພາກສຸດທ້າຍຂອງລາຍການ, ມີນັກຮົບ 300 ຄົນທີ່ຕາງໜ້າໃຫ້ບັນດາກຳລັງປົກປັກຮັກສາອະທິປະໄຕທາງທະເລ ໄດ້ພ້ອມກັນສະແດງໃຫ້ເຫັນຈິດໃຈສາມັກຄີ, ຄວາມຕັດສິນໃຈໃນການປົກປັກຮັກສາອະທິປະໄຕເຂດທະເລ, ໝູ່ເກາະຂອງປະເທດຊາດ. ທ່ານພັນເອກ ບຸຍຢຸຍເຈົາ, ອະດີດອາຈານສອນຢູ່ວິທະຍາຄານກອງທັບເຮືອ, ແປ່ງປັນວ່າ:

        “ຂ້າພະເຈົ້າມີຄວາມຕື້ນຕັນໃຈ, ມີຄວາມເປັນກຽດ ແລະ ມີຄວາມເອກອ້າງທະນົງໃຈເມື່ອໄດ້ຮັບຂອງຂວັນອັນລ້ຳຄ່າແມ່ນແກ້ວນ້ຳທະເລ ເຊິ່ງບັນດານັກຮົບຢູ່ກຳປັ່ນດຳນ້ຳເອົາມາຈາກເຂດທີ່ມີຄວາມເລິກຢູ່ທະເລແຫ່ງຄວາມຮັກຂອງປະເທດຊາດ. ຂອງຂວັນນີ້ແມ່ນຄວາມເປັນກຽດ, ການຕອບບຸນແທນຄຸນໃຫ້ລຸ້ນຂ້າພະເຈົ້າ. ຂ້າພະເຈົ້າເຊື່ອໝັ້ນວ່າ, ບັນດາກຳລັງປະກອບອາວຸດຂອງ ຫວຽດນາມ ທີ່ເຄື່ອນໄຫວຢູ່ເຂດທະເລຈະປົກປັກຮັກສາເຂດທະເລ, ໝູ່ເກາະທີ່ຮັ່ງມີສວຍງາມຂອງປະເທດຊາດໄວ້ຢ່າງໝັ້ນຄົງ”.

ແຜ່ກະຈາຍສານກ່ຽວກັບຄວາມຮັກຕໍ່ເຂດທະເລ, ໝູ່ເກາະ

        ລຸງ ກາວວັນເທີ, ຊາວປະມົງຢູ່ຕາແສງ ເຟືອກຮົ່ງ, ນະຄອນ ຍາຈາງ, ແຂວງ ແຄງຮ່ວາ, ປີນີ້ມີອາຍຸກວ່າ 60 ປີແລ້ວ. ລຸງໄດ້ຕິດພັນກັບອາຊີບການປະມົງເປັນເວລາເກືອບ 2/3 ຂອງຊີວິດແລ້ວ, ລຸງ ເທີ ໄດ້ຖືທະເລຄືດັ່ງເຮືອນຂອງຕົນ. ເມື່ອໄດ້ຮັບຊົມລາຍການສາລະຄະດີກ່ຽວກັບທະເລ, ໝູ່ເກາະ, ຮັບຟັງບັນດາບົດເພງກ່ຽວກັບຄວາມຮັກຕໍ່ບ້ານເກີດເມືອງນອນ, ຮັບຊົມພາບຖ່າຍກຳປັ່ນທີ່ລອບຢູ່ທະເລຂອງປະເທດຊາດ ທັງເວັນ ແລະ ຄືນທີ່ສະເໜີໃນລາຍການດັ່ງກ່າວ, ລຸງໃຫ້ຮູ້ວ່າ:

        “ລາຍການມ່ວນທີ່ສຸດ, ເມື່ອຮັບຊົມແລ້ວ ພວກຂ້າພະເຈົ້າຮູ້ສຶກວ່າ ຕົນເອງໄດ້ຮັບການລະດົມກຳລັງໃຈເພື່ອສືບຕໍ່ເດີນເຮືອຕິດພັນກັບທະເລ. ລາຍການກໍ່ສະແດງໃຫ້ເຫັນບັນຫາທີ່ວ່າ ຍາມໃດພັກ ແລະ ລັດ ກໍ່ມີຫຼາຍນະໂຍບາຍທີ່ມີຄວາມເອົາໃຈໃສ່ເຖິງຊາວປະມົງ. ສານທີ່ພວກຂ້າພະເຈົ້າຮັບຮູ້ໄດ້ຜ່ານລາຍການ, ນັ້ນແມ່ນ: ຊາວປະມົງໃນມື້ນີ້ເມື່ອເດີນເຮືອໄປຫາປາແມ່ນຈະບໍ່ໂດດດ່ຽວ ຫາກຍັງມີການຮຽງບ່າຮຽງໄຫຼ່, ການຮ່ວມເດີນທາງຂອງບັນດາກຳລັງຕະຫຼວດທະເລ, ທະຫານຊາຍແດນ. ຄວາມຈິງແລ້ວ, ເມື່ອຮັບຊົມຂ້າພະເຈົ້າມີຄວາມມັກຮັກລາຍການນີ້ຫຼາຍ”.

(ບັນດາຜູ້ແທນເຂົ້າຮ່ວມລາຍການ)

ແຜ່ກະຈາຍຄວາມຄາດຫວັງສ້າງຄວາມຮັ່ງມີ, ເຂັ້ມແຂງຈາກທະເລ

        ລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ” ໄດ້ຢືນຢັນວ່າ ຫວຽດນາມ ແມ່ນປະເທດທະເລ ດ້ວຍຄາດຫວັງຈາກລຸ້ນຕ່າງໆວ່າຢາກພິຊິດທະເລ, ສ້າງຄວາມວັດທະນາຖາວອນຈາກທະເລ ແລະ ປົກປັກຮັກສາສັນຕິພາບຢູ່ທະເລ, ເຈດຈຳນົງຕັດສິນໃຈປົກປັກຮັກສາອະທິປະໄຕເຂດທະເລ, ໝູ່ເກາະຂອງ ຫວຽດນາມ. ທ່ານ ຟ້າມແມ້ງຮຸ່ງ, ຮອງຜູ້ອຳນວຍການໃຫຍ່ VOV, ຮອງຫົວໜ້າຄະນະຊີ້ນຳ, ຫົວໜ້າຄະນະຈັດຕັ້ງລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ”, ໃຫ້ຮູ້ວ່າ:

“ພວກຂ້າພະເຈົ້າຫວັງວ່າ, ລາຍການນີ້ຈະສ້າງການແຜ່ກະຈາຍຄວາມຮັກ, ຄວາມເອກອ້າງທະນົງໃຈຕໍ່ເຂດທະເລ, ໝູ່ເກາະແຫ່ງບ້ານເກີດເມືອງນອນ ຫວຽດນາມ ແລະ ໜ້າທີ່ຄວາມຮັບຜິດຊອບຂອງປະຊາຊົນ ຫວຽດນາມ ໃນການເສີມຂະຫຍາຍ, ຂຸດຄົ້ນ, ອະນຸລັກຮັກສາເຂດທະເລ ຫວຽດນາມ ຮັບໃຊ້ການພັດທະນາປະເທດຊາດ ໃນພາຍພາກໜ້າ ແລະ ໃນໄລຍະຍາວ”.

ເມື່ອຕີລາຄາກ່ຽວກັບແນວຄິດຂອງລາຍການ, ທ່ານພົນໂທ ຈິ້ງວັນກວຽດ, ກຳມະການສູນກາງພັກ, ຮອງຫົວໜ້າກົມໃຫຍ່ການເມືອງກອງທັບປະຊາຊົນ ຫວຽດນາມ, ຢືນຢັນວ່າ:

“ລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ” ຈະປະກອບສ່ວນເພື່ອໃຫ້ທຸກຂັ້ນ, ທຸກຂະແໜງການ ສືບຕໍ່ຍົກສູງຄວາມຮັບຮູ້ກ່ຽວກັບສະຕິຄວາມຮັບຜິດຊອບໃນການເຂົ້າຮ່ວມການປົກປັກຮັກສາອະທິປະໄຕເຂດທະເລ, ໝູ່ເກາະ. ເປັນເຈົ້າການ, ເພີ່ມທະວີ, ເປີດກວ້າງການພົວພັນຕ່າງປະເທດ ແລະ ການຮ່ວມມືສາກົນກ່ຽວກັບການຄຸ້ມຄອງ, ນຳໃຊ້ ແລະ ປົກປັກຮັກສາທະເລ ແລະ ມະຫາສະໝຸດແບບຍືນຍົງ. ຍົກສູງກຳລັງຮັບມືກັບບັນດາສິ່ງທ້າທາຍຕໍ່ຄວາມໝັ້ນຄົງແບບໃໝ່ທາງທະເລ”.

ດ້ວຍການສົມທົບກັນຢ່າງປະສົມກົມກຽວລະຫວ່າງບັນຫາສະຖານະການການເມືອງ, ວິເຄາະການເມືອງ ກັບບັນດາລາຍການສະແດງສິລະປະທີ່ເປັນເອກະລັກສະເພາະ ແລະ ເວທີທີ່ໃຫຍ່ໂຕນັ້ນ. ລາຍການພົບປະແລກປ່ຽນສະແດງສິລະປະ “ສ້າງຄວາມຮັ່ງມີ, ເຂັ້ມແຂງຈາກທະເລແຫ່ງບ້ານເກີດເມືອງນອນ” ໄດ້ສ້າງຄວາມເອກອ້າງທະນົງໃຈ ແລະ ຄວາມຮັກຕໍ່ທະເລ, ເຈດຈຳນົງປົກປັກຮັກສາອະທິປະໄຕເຂດທະເລ, ໝູ່ເກາະຂອງຊາວ ຫວຽດນາມ ລຸ້ນຕ່າງໆ.