ພາຍຫລັງຜົນສຳເລັດໃນການສະກັດກັ້ນການແຜ່ລະບາດຂອງໂລກລະບາດໂຄວິດ-19, ປັດຈຸບັນ ຫວຽດນາມ ໄດ້ກາຍເປັນສະຖານທີ່ປອດໄພສຳລັບການເຄື່ອນໄຫວຜະລິດ, ດຳເນີນທຸລະກິດ. ດ້ວຍທ່າໄດ້ປຽບຫລາຍຢ່າງພາຍຫລັງໄລຍະໂຄວິດ-19, ຫວຽດນາມ ໄດ້ຮັບຖືວ່າ ແມ່ນສະຖານທີ່ໝັ້ນໝາຍດີ ໃນສະພາບການບັນດານັກລົງທຶນສາກົນ ພວມຊອກຫາວິທີສ້າງລະບົບສະໜອງຂອງເຂົາເຈົ້າເປັນຫລາຍຮູບຫລາຍແບບ.

(ພາບປະກອບ)

        ສື່ມວນຊົນສາກົນໄດ້ຍ້ອງຍໍຊົມເຊີຍຕໍ່ປະຕິກິລິຍາ ແລະ ວິທີປ້ອງກັນ, ສະກັດກັ້ນໂລກລະບາດໂຄວິດ-19 ຢ່າງວ່ອງໄວ ແລະ ສຳເລັດຜົນຂອງ ຫວຽດນາມ. ສື່ມວນຊົນໄດ້ຄັດສະເໜີບັນດາຄຳເວົ້າຂອງນັກຊ່ຽວຊານດ້ານເສດຖະກິດທີ່ຕີລາຄາວ່າ ດ້ວຍຈຳນວນຜູ້ຕິດເຊື້ອໂຄວິດ-19 ບໍ່ຫລາຍ ແລະ ບໍ່ມີກໍລະນີເສຍຊີວິດ, ຫວຽດນາມ ພວມມີທ່າໄດ້ປຽບ ເພື່ອຟື້ນຟູພື້ນຖານເສດຖະກິດໄດ້ໄວກ່ວາບັນດາປະເທດອື່ນ.

ຈຸດພົ້ນເດັ່ນເປັນໜ້າປະທັບໃຈໃນສາຍຕາຂອງວົງການນັກລົງທຶນ

       ບັນດາທີ່ປຶກສາໜູນຊ່ວຍໃຫ້ບັນດາບໍລິສັດຕ່າງປະເທດສ້າງລະບົບສະໜອງຄືນໃໝ່ຖືວ່າ: ຄວາມສຳເລັດຂອງຫວຽດນາມ ໃນການຮັບມືກັບໂລກລະບາດ ໄດ້ຊ່ວຍຊຸກຍູ້ຄວາມເຊື່ອໝັ້ນຂອງບັນດານັກລົງທຶນຕ່າງປະເທດທີ່ມີຕໍ່ຫວຽດນາມ. ທ່ານ Fred Burke, ເປັນຄູ່ຮ່ວມມືຄຸ້ມຄອງຢູ່ບໍລິສັດກົດໝາຍສາກົນ Baker McKenzie ໃຫ້ຂໍ້ສັງເກດວ່າ ປະຕິກິລິຍາ ແລະ ວິທີແກ້ໄຂຂອງຫວຽດນາມ ສຳລັບໂລກລະບາດ ໄດ້ຊ່ວຍໃຫ້ບັນດາວິສາຫະກິດຕ່າງປະເທດມີຄວາມອຸ່ນອ່ຽນໃຈ ແລະ ເຂົາເຈົ້າມີຄວາມຮູ້ສຶກປອດໄພກ່ວາ ເມື່ອຢູ່ຫວຽດນາມ. ທ່ານ Michael Sieburg ເປັນອີກຄູ່ຮ່ວມມືໜຶ່ງຂອງບໍລິສັດທີ່ປຶກສາ YCP Solidiance ລົງເລິກກ່ຽວກັບພາກພື້ນອາຊີ, ໄດ້ຢັ້ງຢືນຢ່າງຈະແຈ້ງກ່ວາວ່າ ເມື່ອທຽບໃສ່ກັບຫລາຍປະເທດໃນໂລກແລ້ວ, ຫວຽດນາມ ພົ້ນເດັ່ນຂຶ້ນກາຍເປັນຈຸດໂດດເດັ່ນທີ່ເປັນໜ້າປະທັບໃຈກ່ວາໝູ່ ໃນສາຍຕາຂອງບັນດານັກລົງທຶນ. ຜູ້ຕາງໜ້າບໍລິສັດພັດທະນາຮ່ວມທຸລະກິດ Kizuna, ເຊິ່ງແມ່ນຫົວໜ່ວຍກໍ່ສ້າງບັນດາໂຮງຈັກໂຮງງານ ທີ່ພວມກະກຽມນຳເຂົ້າເຄື່ອນໄຫວຢູ່ຫວຽດນາມ ຄາດຄະເນວ່າ ການລົງທຶນຈາກຕ່າງປະເທດຈະຫລັ່ງໄຫຼເຂົ້າຫວຽດນາມ ພາຍຫລັງໂລກລະບາດ. ສ່ວນບໍລິສັດ Kizuna ເອງກໍ່ພວມຍູ້ໄວແຜນການກໍ່ສ້າງໂຮງງານທີ່ມີເນື້ອທີ່ກ້ວາງປະມານ 100.000 m² ຢູ່ພາກໃຕ້ຫວຽດນາມ ໃຫ້ສຳເລັດໃນເດືອນກໍລະກົດ ປີ 2020, ເພື່ອຕອບສະໜອງຄວາມຕ້ອງການເພີ່ມຂຶ້ນໃນໄລຍະຈະມາເຖິງ.

        ສິ່ງທີ່ເປັນໜ້າສົນໃຈ ນັ້ນແມ່ນທ່າອ່ຽງຫັນປ່ຽນການເຄື່ອນໄຫວແມ່ນມີຄວາມພ້ອມແລ້ວ. ຕໍ່ໜ້າໂລກລະບາດ, ວິສາຫະກິດຫລາຍແຫ່ງທີ່ມີໂຮງງານຜະລິດຕັ້ງຢູ່ ຈີນ ກໍ່ມີຄວາມສົນໃຈເຖິງຫວຽດນາມ. ການຫັນປ່ຽນກະແສເງິນລົງທຶນຕ່າງປະເທດເຂົ້າບັນດາປະເທດອາຊຽນ, ໃນນັ້ນ ມີຫວຽດນາມ ກໍ່ໄດ້ເປີດກາລະໂອກາດຫລາຍຢ່າງໃຫ້ແກ່ຫວຽດນາມ. ທ່ານ ຫງວຽນແອ໊ງວັນ, ພະນັກງານຄຸ້ມຄອງເຂດອຸດສາຫະກຳ ເວິນຈູງ 2, ແຂວງບັກຢາງ ໃຫ້ຮູ້ວ່າ: ໃນຊຸມວັນຈຸດສູງ ມີວິສາຫະກິດຕ່າງປະເທດເຖິງ 10 ແຫ່ງໄດ້ມາຊອກຮູ້ ແລະ ຕັ້ງບັນຫາກ່ຽວກັບການລົງທຶນເຂົ້າເຂດອຸດສາຫະກຳດັ່ງກ່າວ.

        “ບັນດານັກລົງທຶນຕ່າງປະເທດເຂົ້າມາ ຫວຽດນາມ ອັນທຳອິດທີ່ເຂົາເຈົ້າເອົາໃຈໃສ່ເຖິງ ນັ້ນແມ່ນນະໂຍບາຍການລົງທຶນຂອງແຂວງ ແມ່ນມີຄວາມສະດວກສະບາຍຫຼືບໍ່. ອັນທີສອງ ແມ່ນທີ່ຕັ້ງພູມສາດ ແລະ ພື້ນຖານໂຄງລ່າງຂອງເຂດອຸດສາຫະກຳນັ້ນ ສາມາດຕອບສະໜອງໄດ້ຄວາມຕ້ອງການຂອງເຂົາເຈົ້າຫຼືບໍ່ ແລະ ອັນທີສາມແມ່ນຄວາມຕ້ອງການກ່ຽວກັບແຫຼ່ງສະໜອງແຮງງານກໍ່ມີຄວາມອຸດົມສົມບູນ ແລະ ມີຄຸນນະພາບຫຼືບໍ່.”

ຍາດແຍ່ງກາລະໂອກາດ, ສືບຕໍ່ປະກາຍແສງສະຫວ່າງ

       ໝາກຜົນຂອງການປ້ອງກັນ, ສະກັດກັ້ນໂຄວິດ-19 ສືບຕໍ່ຢັ້ງຢືນທ່າໄດ້ປຽບໃນການຮັບປະກັນສະຖຽນລະພາບ, ຄວາມປອດໄພ, ສະພາບແວດລ້ອມແຫ່ງການລົງທຶນທີ່ມີຄວາມສະດວກຢູ່ ຫວຽດນາມ. ໜັງສືພິມ Nikkei Asian Review ໃຫ້ຂໍ້ສັງເກດວ່າ ເລື່ອງຫັນປ່ຽນກະແສເງິນລົງທຶນ ແມ່ນທ່າອຽງທີ່ບໍ່ອາດຕ່າວປີນໄດ້ ພາຍຫລັງໂລກລະບາດໂຄວິດ-19 ແລະ ບັນດາປະເທດອາຊຽນ, ໃນນັ້ນ ມີຫວຽດນາມ, ແມ່ນບັນດາສະຖານທີ່ໄດ້ຮັບຄວາມນິຍົມຊົມຊອບ. ກໍ່ມີຂໍ້ສັງເກດເຊັນດຽວກັນ, ທ່ານ ດັ້ງຈ້ອງດຶກ, ຮອງຜູ້ອຳນວຍການໃຫຍ່ກຸ່ມບໍລິສັດ ຂາຍຕ່ວານ, ພວມກໍ່ສ້າງໂຮງຈັກໂຮງງານໃຫ້ເຊົ່າຢູ່ເຂດອຸດສາຫະກຳ ອຽນຟອງ, ແຂວງບັກນິງ ໃຫ້ຮູ້ວ່າ:

        “ຜົນສະທ້ອນຂອງໂລກລະບາດໂຄວິດ-19 ໄດ້ເຮັດໃຫ້ບັນດາກຸ່ມບໍລິສັດນາໆຊາດທີ່ມີໂຮງຈັກໂຮງງງານຫລາຍແຫ່ງຕັ້ງຢູ່ຈີນ ຕ້ອງພິຈາລະນາຄືນໃໝ່ ເມື່ອຈີນ ຕ້ອງປິດປະຕູຊາຍແດນ, ທົ່ວລະບົບສະໜອງຂອງເຂົາເຈົ້າຖືກຜົນສະທ້ອນ. ບັນດາວິສາຫະກິດໄດ້ສ້າງລະບົບແຫຼ່ງສະໜອງຂອງເຂົາເຈົ້າໃຫ້ເປັນຫລາຍຮູບຫລາຍແບບ, ໃນນັ້ນ ເຂົາເຈົ້າໄດ້ເລືອກເອົາຫວຽດນາມ ເພື່ອເປັນບ່ອນເຄື່ອນຍ້າຍໂຮງຈັກໂຮງງານບາງແຫ່ງ.”

        ໃນບົດລາຍງານແງ່ຫວັງເສດຖະກິດໂລກ 2020 ຊື່ງປະກາດໃນທ້າຍເດືອນ ເມສາ ຜ່ານມາ, IMF ໃຫ້ຂໍ້ສັງເກດວ່າ ຫວຽດນາມ “ແມ່ນປະເທດທີ່ມີແງ່ຫວັງເຕີບໂຕດີທີ່ສຸດໃນອາຊຽນ”. ທະນາຄານໂລກ (WB) ກໍ່ຖືວ່າ: ຫວຽດນາມ ໄດ້ຮັບມືດີກ່ວາ ໃນດ້ານເສດຖະກິດການຕ່າງປະເທດ ແລະ ເສດຖະກິດ ຫວຽດນາມ ຈະເຕີບໂຕຄືນໃໝ່. ທ່ານ Adam Sitkoff ຜູ້ອຳນວຍການຝ່າຍບໍລິຫານຫ້ອງການການຄ້າ ອາເມລິກາ (AmCham) ຢັ້ງຢືນວ່າ ຫວຽດນາມ ຍັງຄົງແມ່ນສະຖານທີ່ລົງທຶນທີ່ເຕັມໄປດ້ວຍຄວາມໝັ້ນໝາຍຢູ່ພາກພື້ນອາຊີ. ທ່ານ Hirai Shinji ຫົວໜ້າຜູ້ຕາງໜ້າ JETRO ປະຈຳນະຄອນ ໂຮ່ຈີມິນ ຕີລາຄາວ່າ ເມື່ອຫວຽດນາມ ຄວບຄຸມໂລກລະບາດໄດ້ເປັນຢ່າງດີນັ້ນ, ກະແສເງິນທຶນ FDI (ລວມມີທັງວິສາຫະກິດ ຍີ່ປຸ່ນ) ຈະສືບຕໍ່ເຂົ້າຫວຽດນາມ. ໜັງສືພິມລົງເລິກສະເພາະເສດຖະກິດ ChosunBiz ຂອງກຸ່ມບໍລິສັດສື່ມວນຊົນທີ່ມີຊື່ສຽງ Chosun (ສ.ເກົາຫຼີ) ຖືວ່າ ຄວາມຕັດສິນໃຈຂອງລັດຖະບານ ຫວຽດນາມ ໃນວິວັດແຫ່ງການປ້ອງກັນ, ສະກັດກັ້ນໂລກລະບາດ ໄດ້ຮັບຄວາມເຊື່ອໝັ້ນຢ່າງແຮງ ຈາກບັນດານັກລົງທຶນທົ່ວໂລກ. ພະຍານຫຼັກຖານແມ່ນໃນ 4 ເດືອນຕົ້ນປີ 2020 ສາມາດດຶງດູດທຶນຈົດທະບຽນໄດ້ຫລາຍກ່ວາ 12 ຕື້ USD.

        ປັດຈຸບັນ, ລັດຖະບານ ຫວຽດນາມ ວາງຄາດໝາຍການເຕີບໂຕ GDP 2020 ແມ່ນປະມານ 5%. ສ່ວນອົງການ Fitch Ratings (Fitch) ຄາດຄະເນ ທ່າເຕີບໂຕເສດຖະກິດຂອງ ຫວຽດນາມ ອາດຈະກັບຄືນສູ່ສະພາບເປັນປົກກະຕິໃນປີ 2021 ດ້ວຍລະດັບ GDP ແມ່ນ 7,3% ./.