ທ່ານ Daniel Kritenbrink ເອກອັກຄະລັດຖະທູດ ອາເມລິກາ ປະຈຳ ຫວຽດນາມ

ບັນດາການເຄື່ອນໄຫວສະເຫຼີມສະຫຼອງທີ່ຈະດຳເນີນໃນປີນີ້ ຈະສ້າງກຳລັງໜູນສຳຄັນ ເພື່ອໃຫ້ ຫວຽດນາມ ແລະ ອາເມລິກາ ພ້ອມກັນສືບຕໍ່ກ້າວເດີນບົນເສັ້ນທາງ 25 ປີຈະມາເຖິງ ດ້ວຍຜົນປະໂຫຍດ ແລະ ຄວາມຈະເລີນຮຸ່ງເຮືອງສີວິໄລລວມ.

        25 ປີນັບແຕ່ເມື່ອຫັນການພົວພັນທາງການທູດເປັນປົກກະຕິ (ປີ 1995), ປັດຈຸບັນ, ຫວຽດນາມ ແລະ ອາເມລິກາ ໄດ້ກາຍເປັນຄູ່ຮ່ວມມືຮອບດ້ານ, ຍິ່ງນັບມື້ນັບມີຄວາມນັບຖື ໃນນະໂຍບາຍພາກພື້ນຂອງແຕ່ລະປະເທດ, ແບ່ງປັນບັນດາຜົນປະໂຫຍດຍຸດທະສາດ. ນີ້ແມ່ນຊັບສົມບັດອັນລ້ຳຄ່າຂອງການພົວພັນ 2 ປະເທດ, ຍາກທີ່ຈະບັນລຸໄດ້. ສະນັ້ນ, ທັງ ຫວຽດນາມ ແລະ ອາເມລິກາ ລ້ວນແຕ່ມີຄວາມຮັບຮູ້ຢ່າງຈະແຈ້ງກ່ຽວກັບຄວາມຕັດສິນໃຈດ້ານການເມືອງ, ວິໄສທັດໄລຍະຍາວ, ສັງລວມ, ຮ່ວມແຮງຮ່ວມໃຈເພື່ອສ້າງການພົວພັນນັ້ນ ໃຫ້ສືບຕໍ່ພັດທະນາ, ໝັ້ນຄົງເຂັ້ມແຂງ.

        ປີ 2020 ແມ່ນຫຼັກໝາຍອັນສຳຄັນ, ແມ່ນໂອກາດທີ່ມີຄວາມໝາຍທີ່ສຸດ ເພື່ອໃຫ້ 2 ຝ່າຍພ້ອມກັນຫວນຄືນ 25ປີແຫ່ງການຫັນການພົວພັນທາງການທູດເປັນປົກກະຕິ ແລະ ມຸ່ງໄປເຖິງໄລຍະ 25 ປີຕໍ່ໄປ.

ຄວາມໄວ້ເນື້ອເຊື່ອໃຈນັບມື້ນັບໄດ້ຮັບການປັບປຸງ, ໝັ້ນຄົງເຂັ້ມແຂງ

        25 ປີຜ່ານມາ, ເພື່ອສ້າງຄວາມໄວ້ເນື້ອເຊື່ອໃຈ, 2 ຝ່າຍຍາມໃດກໍ່ເອົາໃຈໃສ່ເຖິງຜົນປະໂຫຍດອັນຊອບທຳຂອງກັນ, ພ້ອມກັນແກ້ໄຂບັນດາບັນຫາທີ່ຍັງຄົງຄ້າງ ໂດຍຜ່ານການພົບປະເຈລະຈາຢ່າງສ້າງສັນ, ບົນເນື້ອໃນຈິດໃຈມີຄວາມເຂົ້າອົກເຂົ້າໃຈ, ເຄົາລົບເຊິ່ງກັນແລະກັນ, ເຄົາລົບລະບອບການເມືອງຂອງກັນ ແລະ ປະກອບສ່ວນເຂົ້າໃນການຊຸກຍູ້ການພົວພັນຮ່ວມມືຕ່າງຝ່າຍຕ່າງມີຜົນປະໂຫຍດຢ່າງແທດຈິງ.

        ຕາມການຕີລາຄາຂອງບັນດານັກໄຈ້ແຍກສາກົນແລ້ວ, ການພົວພັນລະຫວ່າງ ຫວຽດນາມ ແລະ ອາເມລິກາ ແມ່ນສິ່ງພິເສດທີ່ຫາຍາກໃນການພົວພັນສາກົນຍຸກປັດຈຸບັນ. ສະນັ້ນ, ການສະເຫຼີມສະຫຼອງ 25ປີແຫ່ງການຫັນການພົວພັນທາງການທູດເປັນປົກກະຕິ ແມ່ນເຫດການທີ່ມີຄວາມໝາຍພິເສດສຳລັບ 2 ປະເທດ. ທ່ານ Daniel Kritenbrink ເອກອັກຄະລັດຖະທູດ ອາເມລິກາ ປະຈຳ ຫວຽດນາມ ໃຫ້ຮູ້ວ່າ:

        “ສຳລັບພວກຂ້າພະເຂົ້າ, ພິທີສະເຫຼີມສະຫຼອງ 25 ປີແຫ່ງການສ້າງຕັ້ງການພົວພັນທາງການທູດໃນປີ 2020 ນີ້ ແມ່ນໂອກາດເພື່ອຂ່ຳນັບຮັບຕ້ອນການພົວພັນຮ່ວມມືກໍ່ຄືນ້ຳໃຈມິດຕະພາບ ເຊິ່ງ ອາເມລິກາ ແລະ ຫວຽດນາມ ໄດ້ສ້າງຂຶ້ນໃນຕະຫລອດ 25 ປີຜ່ານມາ. ພວກເຮົາລ້ວນແຕ່ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈຂອງກັນ, ພ້ອມກັນມີວັດທະນາຖາວອນ ແລະ ສິ່ງທີ່ມີຄວາມໝາຍທີ່ສຸດ ແມ່ນພວກເຮົາສາມາດຜ່ານຜ່າອະດີດຕະການ, ສ້າງນ້ຳໃຈເພື່ອນມິດ ແລະ ການຮ່ວມມື ເພື່ອພ້ອມກັນຮ່ວມງານໃນທຸກດ້ານ.”

        ບັນລຸໄດ້ໝາກຜົນຄືທຸກວັນນີ້ ແມ່ນຕ້ອງໄດ້ເວົ້າເຖິງບັນດາການປະກອບສ່ວນອັນລ້ຳຄ່າ, ຄວາມມານະພະຍາຍາມຢ່າງບໍ່ຮູ້ອິດບໍ່ຮູ້ເມື່ອຍຂອງຊາວ ຫວຽດນາມ ແລະ ອາເມລິກາ ຫລາຍລຸ້ນຄົນ ທີ່ໄດ້ສ້າງພື້ນຖານການພົວພັນມິດຕະພາບ, ການຮ່ວມມືຢ່າງເລິກເຊິ່ງກ້ວາງຂວາງ. ຍ້ອນເຫດນັ້ນ, ໜຶ່ງໃນບັນດາການເຄື່ອນໄຫວທຳອິດຂອງ ຫວຽດນາມ ໃນປີສະເຫຼີມສະຫຼອງ 25 ປີແຫ່ງການຫັນການພົວພັນທາງການທູດ ຫວຽດນາມ - ອາເມລິກາ ເປັນປົກກະຕິ ແມ່ນສະແດງຄວາມຮູ້ບຸນຄຸນຕໍ່ບັນດາເພື່ອນມິດ ອາເມລິກາ ໄດ້ນຳໜ້າໃນເລື່ອງຫັນການພົວພັນ 2 ປະເທດໃຫ້ເປັນປົກກະຕິ. ວັນທີ 13 ກຸມພາ ຜ່ານມາ, ເມື່ອໄປຢ້ຽມຢາມຄອບຄົວສະມາຊິກສະພາສູງ ອາເມລິກາ John McCain, ທ່ານເອກອັກຄະລັດຖະທູດ ຫວຽດນາມ ປະຈຳ ອາເມລິກາ ຮ່າກິມງອັກ ມີຄວາມຕື້ນຕັນໃຈເມື່ອພ້ອມກັບຄອບຄົວເພິ່ນຫວນຄືນບັນດາອະນຸສອນຂອງສະມາຊິກສະພາສູງ ອາເມລິກາ John McCain. ຄາວຍັງມີຊີວິດ, ເພິ່ນແມ່ນຜູ້ຮັກຫອມ ຫວຽດນາມ, ປະກອບສ່ວນຮຳບາດແຜສົງຄາມ, ຫັນການພົວພັນ 2 ປະເທດໃຫ້ເປັນປົກກະຕິ. ທ່ານເອກອັກຄະລັດຖະທູດ ຮ່າກິມງອັກ ຢືນຢັນວ່າ ວິໄສທັດຍຸດທະສາດ, ຄວາມກ້າຫານຜ່ານຜ່າຮົ້ວກີດຂວາງຂອງສະມາຊິກສະພາສູງ ອາເມລິກາ John McCain ໄດ້ປະກອບສ່ວນຢ່າງຕັ້ງໜ້າເຂົ້າໃນການພົວພັນລະຫວ່າງ ຫວຽດນາມ - ອາເມລິກາ, ເພີ່ມທະວີການພົວພັນດ້ານເສດຖະກິດ, ການຄ້າ, ພົວພັນແລກປ່ຽນປະຊາຊົນ, ກໍ່ຄືສົມທົບກັນກ່ຽວກັບບັນດາບັນຫາສາກົນ ແລະ ພາກພື້ນຄືໃນປັດຈຸບັນຢ່າງມີປະສິດທິຜົນ.

ຫວນຄືນ ແລະ ບາດກ້າວເດີນຕໍ່ໄປ

       ເມື່ອຫວນຄືນບັນດາຜົນງານໃນການພົວພັນທາງການທູດລະຫວ່າງ 2 ປະເທດໃນ 25 ປີຜ່ານມາ, ອາດເຫັນໄດ້ວ່າ 25 ປີບໍ່ແມ່ນໄລຍະທາງອັນຍາວໄກ, ແຕ່ສິ່ງໃດ ທີ່ຫວຽດນາມ ແລະ ອາເມລິກາ ບັນລຸໄດ້ແມ່ນມີຄວາມປະທັບໃຈຢ່າງແທ້ຈິງ. ການພົວພັນ 2 ປະເທດໄດ້ມີບັນດາບາດກ້າວພັດທະນາຢ່າງວ່ອງໄວ, ລື່ນກາຍຄາດໝາຍທັງລະດັບ ແລະ ລວງເລິກ. ຈາກການເປັນສັດຕູກັນພາຍຫລັງສົງຄາມ, 2 ປະເທດໄດ້ກາຍເປັນເພື່ອນມິດກັນ ແລະ ຍິ່ງໄປກ່ວານັ້ນ ກາຍເປັນຄູ່ຮ່ວມມືຮອບດ້ານ. ໃຫ້ຂໍ້ສັງເກດກ່ຽວກັບການພົວພັນລະຫວ່າງ ຫວຽດນາມ - ອາເມລິກາ, ທ່ານ ໂງກວາງຊວັນ, ອະດີດເອກອັກຄະລັດຖະທູດ ຫວຽດນາມ ປະຈຳ ສະຫະປະຊາຊາດ ຖືວ່າ:

        “ຂ້າພະເຈົ້າຄິດວ່າ ການພົວພັນຈາກການເປັນສັດຕູກັນຈົນກາຍເປັນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ ແລະ ມີຄວາມໝາຍສຳຄັນທີ່ສຸດນັ້ນ ເບິ່ງຄືວ່າ ການພົວພັນຍິ່ງມີຄວາມໝາຍຕໍ່ສັນຕິພາບ, ສະຖຽນລະພາບ. ປະເທດ ອາເມລິກາ ກໍ່ເຫັນໄດ້ຜົນປະໂຫຍດໂດຍກົງຂອງເຂົາເຈົ້າ ເຊິ່ງເຂົາເຈົ້າໄດ້ຂຸດຄົ້ນໃນການພົວພັນກັບ ຫວຽດນາມ ແລະ ເຂົາເຈົ້າເຫັນໄດ້ຄວາມສາມາດບົ່ມຊ້ອນໃນດ້ານການຕ່າງປະເທດຂອງເຂົາເຈົ້າ, ບໍ່ພຽງແຕ່ດ້ານການເມືອງ, ເສດຖະກິດ, ການຄ້າເທົ່ານັ້ນ ຫາກຍັງນັບທັງບັນດາຂົງເຂດອື່ນອີກດ້ວຍ. ຂ້າພະເຈົ້າຖືວ່າ ໃນໄລຍະຈະມາເຖິງ, ການພົວພັນນີ້ ຈະສືບຕໍ່ພັດທະນາຢ່າງແຮງກ່ວາອີກ.”

        ຈາກພື້ນຖານການພົວພັນຄູ່ຮ່ວມມືຮອບດ້ານໃນປັດຈຸບັນ, ລັດຖະບານ, ປະຊາຊົນ ຫວຽດນາມ ແລະ ອາເມລິກາ ລ້ວນແຕ່ມີຄວາມຮັບຮູ້ຢ່າງຈະແຈ້ງວ່າ 2 ປະເທດຍັງມີຄວາມສາມາດບົ່ມຊ້ອນຫລາຍຢ່າງໃນການຮ່ວມມື, ນຳມາເຊິ່ງບັນດາຜົນປະໂຫຍດແທດຈິງ ແລະ ໃຫຍ່ຫລວງກ່ວາອີກ. ເລີ່ມຕົ້ນບັນດາການເຄື່ອນໄຫວສະເຫຼີມສະຫຼອງ 25 ປີແຫ່ງການຫັນການພົວພັນທາງການທູດເປັນປົກກະຕິ ແນ່ນອນວ່າ ຈະເປັນກຳລັງໜູນຢ່າງໜັກແໜ້ນ ແລະ ແຂງແຮງ ເພື່ອສືບຕໍ່ນຳການພົວພັນລະຫວ່າງ ຫວຽດນາມ ແລະ ອາເມລິກາ ຂຶ້ນສູ່ລະດັບສູງໃໝ່ ./.