ຫວຽດນາມບັນລຸບາດກ້າວເດີນສຳຄັນກ່ຽວກັບສິດທິມະນຸດໃນປີ 2013

Thu Hoa -

ວັນສຸກ ທີ 27 ທັນວາ ຄ.ສ. 2013 | 15:44:12

(vovworld)-ຫວຽດນາມໄດ້ຮັບເລືອກຕັ້ງເປັນສະມາຊິກສະພາສິດທິມະນຸດສປຊ ດ້ວຍຈຳນວນບັດສະຫນັບສະຫນູນສູງ, ສະພາແຫ່ງຊາດຫວຽດນາມ ຮັບຮອງເອົາລັດຖະທຳມະນູນ ສສ ຫວຽດນາມ ດ້ວຍຫລາຍມາດຕາເຊີດຊູສິດທິມະນຸດ.. ນັ້ນແມ່ນບັນດາຂີດໝາຍພົ້ນເດັ່ນກ່ຽວກັບຜົນງານສິດທິມະນຸດຂອງຫວຽດນາມໃນປີຜ່ານມາ.

ຫວຽດນາມບັນລຸບາດກ້າວເດີນສຳຄັນກ່ຽວກັບສິດທິມະນຸດໃນປີ 2013 - ảnh 1

ຍາມໃດລັດຖະບານຫວຽດນາມກໍ່ເອົາໃຈໃສ່ເຖິງເຂດຊົນເຜົ່າ
ສ່ວນຫນ້ອຍ
ພາບປະກອບ: internet

ນັບແຕ່ຊຸມວັນເດືອນທຳອິດຂອງປີ 2013, ຫວຽດນາມ ໄດ້ເລີ່ມບັນດາການເຄື່ອນໄຫວຂອງບັ້ນເຄື່ອນໄຫວສະໝັກຮັບເລືອກຕັ້ງເປັນສະມາຊິກຂອງສະພາສິດທິມະນຸດ ສປຊ ແລະ ບັ້ນດຳເນີນຊີວິດການເມືອງຢ່າງເລິກເຊິ່ງກວ້າງຂວາງໃນທົ່ວປວງຊົນເພື່ອປະກອບຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງ. ບັນດາຄວາມມານະພະຍາຍາມດັ່ງກ່າວຂອງຫວຽດນາມບັນລຸໄດ້ຄວາມເຫັນດີເຫັນພ້ອມສູງຂອງທົ່ວສັງຄົມ.

ໝາກຜົນພົ້ນເດັ່ນ

ຫວຽດນາມກາຍເປັນສະມາຊິກສະພາສິດທິມະນຸດ ສປຊ ດ້ວຍຈຳນວນບັດສະຫນັບສະຫນູນສູງໃນການເລືອກຕັ້ງເມື່ອວັນທີ 12/11/2013 ຢູ່ ນິວຢອກ ສະຫະລັດອາເມລິກາ. ຮ່າງລັດຖະທຳມະນູນປີ 1992 ສະບັບປັບປຸງ ກໍໄດ້ຮັບຮອງເອົາທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມຊຸດທີ 13 ເມື່ອວັນທີ 28/11/2013 ແລະ ທ່ານປະທານປະເທດ ເຈືອງເຕີນຊາງ ໄດ້ເຊັນລັດຖະດຳລັດປະກາດໃຊ້ເມື່ອວັນທີ 8/12/2013 ອັນໄດ້ກາຍເປັນລັດຖະທຳມະນູນ ສສ ຫວຽດນາມ ປີ 2013. ເລື່ອງຫວຽດນາມ ກາຍເປັນສະມາຊິກສະພາສິດທິມະນຸດ ສປຊ ແມ່ນການສະແດງໃຫ້ເຫັນຄວາມໄວ້ວາງໃຈຂອງບັນດາປະເທດສະມາຊິກ ສປຊ. ສິ່ງດັ່ງກ່າວສະແດງໃຫ້ເຫັນການຮັບຮູ້, ຕີລາຄາສູງຂອງປະຊາຄົມໂລກສຳລັບນະໂຍບາຍ, ຄວາມມານະພະຍາຍາມ ແລະ ບັນດາຜົນງານຂອງຫວຽດນາມ ໃນກິດຈະການປ່ຽນແປງໃຫມ່ຮອບດ້ານ, ໃນນັ້ນມີການສ້າງລັດແຫ່ງອຳນາດນິຕິບັນຍັດ, ເສີມຂະຫຍາຍປະຊາທິປະໄຕ ແລະ ຮັບປະກັນບັນດາສິດຂອງປະຊາຊົນນັບມື້ນັບດີກວ່າ. ເລື່ອງສະພາແຫ່ງຊາດຫວຽດນາມ ຮັບຮອງເອົາລັດຖະທຳມະນູນ ສສ ຫວຽດນາມ ໃນປີ 2013 ໄດ້ນຳມາເຊິ່ງຄວາມເບິກບານມ່ວນຊື່ນກ່ຽວກັບບັນດາຜົນງານຂອງຫວຽດນາມ ໃນຄວາມມານະພະຍາຍາມສ້າງກອບກົດໝາຍກ່ຽວກັບສິດທິມະນຸດ. ເພາະວ່າ ລັດຖະທຳມະນູນ ສສຫວຽດນາມປີ 2013 ສະແດງຄວາມຮັບຮູ້ໃຫມ່ຢ່າງເຕັມສ່ວນ, ເລິກເຊິ່ງກວ່າໃນການຫັນທັດສະນະຂອງຫວຽດນາມກ່ຽວກັບການເຊີດຊູປັດໄຈມະນຸດໃຫ້ເປັນກົດໝາຍ, ຖືມະນຸດເປັນເຈົ້າ, ເປັນແຫລ່ງກຳລັງຕົ້ນຕໍແມ່ນຈຸດໝາຍຂອງການພັດທະນາ. ບົນພື້ນຖານບັນດາຫລັກການພື້ນຖານ, ລັດຖະທຳມະນູນໄດ້ກຳນົດບັນດາສິດ ແລະ ພັນທະພື້ນຖານຂອງພົນລະເມືອງ,ໃນນັ້ນ ເພີ່ມເຕີມບາງສິດໃຫມ່ຢ່າງແຫນ້ນແຟ້ນ, ຊັດເຈນ, ມີຄວາມສາມາດເປັນໄປ, ສອດຄອ່ງກັບບັນດາສົນທິສັນຍາສາກົນກ່ຽວກັບສິດທິມະນຸດຊື່ງ ລັດແຫ່ງ ສສ ຫວຽດນາມ ເປັນສະມາຊິກ.

ບັນດາຄຳຍ້ອງຍໍ ແລະ ຄວາມປາດຖະຫນາ

ເພື່ອນມິດສາກົນຕີລາຄາສູງເລື່ອງຫວຽດນາມ ກາຍເປັນຫນຶ່ງໃນ 4 ຕົວແທນຂອງພາກພື້ນ ອາຊີ - ປາຊີຟີກ ໃນສະພາສິດທິມະນຸດ ສປຊ . ທ່ານ Masood Khan, ຫົວຫນ້າຄະນະຜູ້ແທນ ປາກິດສະຖານ ປະຈຳ ສປຊ ຊີ້ແຈ້ງວ່າ: “ໝາກຜົນການເລືອກຕັ້ງແມ່ນປະທັບໃຈທີ່ສຸດ ແລະ ສະແດງໃຫ້ເຫັນອິດທິພົນຊື່ສຽງ ແລະ ກຳລັງແຮງຂອງຫວຽດນາມ ໃນບົດບາດປະເທດຫນຶ່ງທີ່ໄດ້ມີການປະກອບສ່ວນເຂົ້າໃນວິວັດການຊຸກຍູ້ ແລະ ປົກປ້ອງສິດທິມະນຸດໃນໂລກ. ຫວຽດນາມບໍ່ພຽງແຕ່ເອົາໃຈໃສ່ພັດທະນາເສດຖະກິດເທົ່ານັ້ນ ຫາກຍັງໃຫ້ບຸລິມະສິດປົກປ້ອງບັນດາສິດພົນລະເມືອງ,ວັດທະນະທຳ, ສັງຄົມຂອງປະຊາຊົນອີກດ້ວຍ. ຫວຽດນາມ ເຂົ້າຮ່ວມສະພາສິດທິມະນຸດ ສປຊ ໄດ້ປະກອບສ່ວນຊຸກຍູ້ ແລະ ປົກປ້ອງສິດທິມະນຸດ. ທ່ານ Filippe Savadogo, ເອກອັກຄະລັດຖະທູດ, ຜູ້ຕາງຫນ້າປະຈຳອົງການບັນດາປະເທດໃຊ້ພາສາຝລັ່ງ ຢູ່ ສປຊ ໄດ້ຢືນຢັນວ່າ: “ຂ້າພະເຈົ້າມີຄວາມພຶງພໍໃຈຕໍ່ເລື່ອງຫວຽດນາມໄດ້ຮັບເລືອກຕັ້ງເປັນສະມາຊິກສະພາສິດທິມະນຸດ ສປຊ. ກຳລັງແຮງຂອງປະຊາຄົມໃຊ້ພາສາ ຝລັ່ງ ຈະໄດ້ຮັບການເພີ່ມທະວີ. ຂ້າພະເຈົ້າໄດ້ເຫັນປະຈັກຕາທຸກຄວາມມານະພະຍາຍາມຂອງຫວຽດນາມເພື່ອປະກອບສ່ວນຢ່າງຕັ້ງຫນ້າໃຫ້ແກ່ກຸ່ມປະເທດໃຊ້ພາສາຝລັ່ງ, ໃນນັ້ນ ມີຂົງເຂດສິດທິມະນຸດ. ສ່ວນທ່ານ Abdallah Al Muallimi, ຫົວຫນ້າຄະນະຜູ້ແທນ ຊາອູດີ ອາຣັບບີ ປະຈຳ ສປຊ ໃຫ້ຮູ້ວ່າ: “ຂ້າພະເຈົ້າຖືວ່າ ຫວຽດນາມ ກາຍເປັນສະມາຊິກສະພາສິດທິມະນຸດ ສປຊ ແມ່ນສົມເຫດສົມຜົນ”. ພວກຂ້າພະເຈົ້າຕີລາຄາສູງບັນດາຜົນງານຂອງປະຊາຊົນຫວຽດນາມ ແລະ ປາດຖະຫນາການເຂົ້າຮ່ວມຂອງຫວຽດນາມຈະປະກອບສ່ວນເພີ່ມທະວີ ແລະ ຊຸກຍູ້ບັນດາຄຸນຄ່າກໍຄືການເຄື່ອນໄຫວຂອງສະພາສິດທິມະນຸດ. ສຳນັກສື່ມວນຊົນໃຫຍ່ຫລາຍແຫ່ງຂອງຕ່າງປະເທດໄດ້ມີບັນດາບົດຂຽນຮັບຮູ້ເລື່ອງຮັບເອົາຄຳເຫັນປະກອບຂອງທົ່ວປວງຊົນເພື່ອສ້າງລັດຖະທຳມະນູນໃຫ້ສົມບູນແບບ ແລະ ຖືວ່າ ນີ້ແມ່ນການເຄື່ອນໄຫວມີຄວາມໝາຍດ້ວຍຈຸດປະສົງອັນດີງາມຂອງປະເທດຫວຽດນາມ“ຂອງປະຊາຊົນ, ມາຈາກປະຊາຊົນ ແລະ ເພື່ອປະຊາຊົນ.”

ຂີດໝາຍແຫ່ງໄລຍະບັນລຸຜົນງານຫລາຍຢ່າງ

ບັນດາໝາກຜົນໃນປີ 2013 ເປັນຂີດໝາຍມໃຫມ່ຂອງໄລຍະທີ່ຫວຽດນາມບັນລຸໄດ້ຜົນງານຫລາຍຢ່າງໃນຂົງເຂດສິດທິມະນຸດ. ໃນຫລາຍປີຜ່ານມາ, ບັນດາອົງການມີຫນ້າທີ່ຮັບຜິດຊອບຕະຫລອດຮອດແຕ່ລະບຸກຄົນໃນທົ່ວປະເທດຫວຽດນາມ ລ້ວນແຕ່ມານະພະຍາຍາມຢ່າງບໍ່ຢຸດຢັ້ງເພື່ອສ້າງລັດຫວຽດນາມ ທັງເຕີບໂຕດ້ານເສດຖະກິດ, ກ້າວຫນ້າ ແລະ ຍຸຕິທຳສັງຄົມ, ທັງຮັບປະກັນສິດທິມະນຸດ.

ຈາກລັດຖະທຳມະນູນປີ 1946 ຕະຫລອດຮອດລັດຖະທຳມະນູນ ສສຫວຽດນາມປີ 2013 ລ້ວນແຕ່ສະແດງຢ່າງເຕັມສ່ວນ ແລະ ຮອບດ້ານທຸກສິດທິມະນຸດກ່ຽວກັບດ້ານເສດຖະກິດ, ວັດທະນະທຳ, ສັງຄົມ ແລະ ການເມືອງ, ພົນລະເຮືອນ. ຄວາມຈິງ, ໃນ 5 ປີຜ່ານມາ, ການເຕີບໂຕດ້ານເສດຖະກິດ ແລະ GDP ຂອງຫວຽດນາມ ໄດ້ຮັບການຮັກສາໃນລະດັບປະມານ 6% ແມ່ນລະດັບສູງພໍສົມຄວນໃນພາກພື້ນ. ຫວຽດນາມ ໄດ້ສ້າງວຽກເຮັດງານທຳໃຫ້ແກ່ຄົນງານຕື່ມອີກ 8 ລ້ານຄົນ, ຫລຸດອັດຕາຄອບຄົວທຸກຍາກລົງເຫລືອພຽງ 9,5%, ຮັບປະກັນຊີວິດສັງຄົມ, ລະດັບການຊົມໃຊ້ບັນດາບໍລິການສາທາລະນະສຸກຂອງປະຊາຊົນ, ເປັນຕົ້ນແມ່ນເດັກນ້ອຍ, ຜູ້ທຸກຍາກ, ຊາວຊົນເຜົ່າສ່ວນຫນ້ອຍໄດ້ຮັບປະກັນ, ດັດຊະນີການພັດທະນາມະນຸດໄດ້ເພີ່ມຂຶ້ນຢ່າງບໍ່ຢຸດຢັ້ງ. ຫວຽດນາມ ໄດ້ສຳເລັດເປົ້າໝາຍພັດທະນາສະຫັດສະວັດກ່ອນກຳນົດເວລາ ແລະ ກາຍເປັນຫນຶ່ງໃນບັນດາແບບຢ່າງຂອງ ສປຊ ໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ຫວຽດນາມ ຍັງແມ່ນແບບຢ່າງກ່ຽວກັບການຮັບປະກັນສິດເສລີໃນການປາກເວົ້າ ແລະ ສິດເສລີໃນການເຊື່ອຖືສາດສະຫນາ.

ອາຍຸການ 2 ປີ ຂອງຫວຽດນາມ ໃນສະພາສິດທິມະນຸດ ສປຊ ຈະເລີ່ມຕົ້ນແຕ່ວັນທີ 1/1/2014 ເປັນຕົ້ນໄປ. ລັດຖະທຳມະນູນ ສສ ຫວຽດນາມ ມີຜົນສັກສິດນັບແຕ່ວັນ 1/1/2014 ເປັນຕົ້ນໄປ. ຄວາມມານະພະຍາຍາມເພື່ອຜັນຂະຫຍາຍປະຕິບັດຫນ້າທີ່ເປັນສະມາຊິກສະພາສິດທິມະນຸດ ສປຊ ແລະ ປະຕິບັດລັດຖະທຳມະນູນ ແນ່ນອນວ່າ ຈະນຳມາໃຫ້ຫວຽດນາມບັນດາຜົນງານໃຫມ່ກ່ຽວກັບສິດທິມະນຸດໃນປີຈະມາເຖິງ.

Thu Hoa