ທ່ານປະທານາທິບໍດີລັດເຊຍ Vladimir Putin (ຂວາ) ແລະ ທ່ານປະທານາທິບໍດີອີຣານ Hassan Rouhani ເຈລະຈາທາງໂທລະສັບໃນວັນທີ 16/7 (ພາບ: Oana)

    ການຊຸກຍູ້ການພົວພັນຢ່າງແໜ້ນແຟ້ນກັບ 2 ປະເທດກຳມະການປະຈຳ ສະພາຄວາມໝັ້ນຄົງ ສປຊ ທີ່ເຕັມໄປດ້ວຍສິດອຳນາດຄືລັດເຊຍ ແລະ ຈີນ ນັ້ນ, ໄດ້ຮັບການຕີລາຄາຈາກວົງການນັກໄຈ້ແຍກວ່າ ແມ່ນການຄິດໄລ່ຍຸດທະສາດຂອງອີຣານ ເພື່ອຮັບໃຊ້ໃຫ້ແກ່ບັນດາເປົ້າໝາຍຍຸດທະສາດ ແລະ ຜົນປະໂຫຍດຫລັກແຫຼ່ງຂອງຕົນ, ເປັນຕົ້ນແມ່ນການຟື້ນຟູພື້ນຖານເສດຖະກິດແຫ່ງຊາດ ທີ່ພວມຖືກທຳລາຍຢ່າງໜັກໜ່ວງ ຍ້ອນຄຳສັ່ງຂວ້ຳບາດສາກົນ ແລະ ໂລກລະບາດ.

ບັນດາຂໍ້ຕົກລົງການຮ່ວມມືທີ່ມີຄວາມມຸ່ງຫວັງ

  ບັນດາແຫຼ່ງຂ່າວຈາກພາກພື້ນ ແລະ ສາກົນຢືນຢັນວ່າ, ອີຣານ ພວມຊອກຫາວິທີຕໍ່ກຳນົດເວລາ ຂໍ້ຕົກລົງຮ່ວມມືທີ່ມີການກຳນົດເວລາ 20 ປີສະບັບ 1 ກັບລັດເຊຍ, ພ້ອມກັບພວມເຈລະຈາຂໍ້ຕົກລົງອີກສະບັບ 1 ທີ່ມີການກຳນົດເວລາຂຶ້ນເຖິງ 25 ປີກັບຈີນ.

  ກ່ຽວກັບການຮ່ວມມືກັບລັດເຊຍ, ວັນທີ 21 ກໍລະກົດ, ທ່ານລັດຖະມົນຕີການຕ່າງປະເທດອີຣານ Mohammad Javid Zarif ໄດ້ເດີນທາງໄປມົດສະກູ ເພື່ອເຈລະຈາກ່ຽວກັບການ “ເຮັດຄືນໃໝ່” ຂໍ້ຕົກລົງຮ່ວມມືສອງຝ່າຍໃນຮອບເວລາ 2 ທົດສະວັດຈະມາເຖິງ, ລະອຽດແມ່ນ ຕໍ່ກຳນົດເວລາຂໍ້ຕົກລົງປະຫວັດສາດ ກ່ຽວກັບການຮ່ວມມືດ້ານບໍ່ນ້ຳມັນ, ອາວຸດ ແລະ ນິວເຄຼຍ ໂດຍທ່ານປະທານາທິບໍດີລັດເຊຍ Vladimir Putin ແລະ ປະທານາທິບໍດີອີຣານ Mohammed Khatami ລົງນາມເມື່ອວັນທີ 12 ມີນາປີ 2001. ນີ້ກໍ່ແມ່ນ 1 ໃນບັນດາຈຸດສຸມຂອງການປຶກສາຫາລື ໃນການເຈລະຈາທາງໂທລະສັບເມື່ອວັນທີ 16 ກໍລະກົດລະຫວ່າງ ທ່ານປະທານາທິບໍດີລັດເຊຍ Vladimir Putin ແລະ ທ່ານປະທານາທິບໍດີອີຣານ Hassan Rouhani, ຄຽງຂ້າງບັນດາບັນຫາກ່ຽວກັບໂລກລະບາດໂຄວິດ 19, ກໍ່ແມ່ນຂໍ້ຕົກລົງວ່າດ້ວຍນິວເຄຼຍອີຣານ ປີ 2015 ແລະ ສົງຄາມຢູ່ຊີຣີ.

   ກ່ອນນີ້ປະມານ 1 ອາທິດ, ເອກະສານລະອຽດສະບັບ 1 ທີ່ມີ 18 ໜ້າກ່ຽວກັບແຜນການຮ່ວມມື ທີ່ເຕັມໄປດ້ວຍຄວາມມຸ່ງຫວັງລະຫວ່າງອີຣານ ແລະ ຈີນ ກໍ່ຖືກເປີດເຜີຍໃນທາງອິນເຕີແນັດ ຊື່ງມີເນື້ອໃນວ່າ ລັດຖະບານອີຣານ ພວມ “ມີຄວາມເຊື່ອໝັ້ນທີ່ສຸດ” ຕໍ່ບັນດາການເຈລະຈາ ກ່ຽວກັບແຜນການສ້າງສາຍພົວພັນຄູ່ຮ່ວມມື 25 ປີກັບຈີນ, ຊື່ງຈຸດສຸມແມ່ນບ້ວງເງິນທີ່ມີມູນຄ່າຂຶ້ນເຖິງ 400 ຕື້ USD ຂອງຈີນ ລົງທຶນເຂົ້າໃນພື້ນຖານເສດຖະກິດອີຣານ, ໂດຍສຸມໃສ່ບັນດາຂົງເຂດກໍ່ສ້າງພື້ນຖານໂຄງລ່າງ ແລະ ພະລັງງານ.

ທ່ານລັດຖະມົນຕີການຕ່າງປະເທດອີຣານ Mohammad Javid Zarif ພົບປະກັບຄູ່ຕຳແໜ່ງລັດເຊຍ Sergey Lavrov (ຂວາ) ຢູ່ມົດສະກູ-ລັດເຊຍ ວັນທີ 21/7 (ພາບ: ກະຊວງການຕ່າງປະເທດລັດເຊຍ)

 ໂອກາດທອງເພື່ອໃຫ້ອີຣານ ປະເຊີນໜ້າກັບກຳລັງດັນຈາກອາເມລິກາ

   ໃນສະພາບການຕ້ອງທົນຕໍ່ກຳລັງດັນອັນໃຫ່ຍຫຼວງຫຼາຍຢ່າງຈາກອາເມລິກາ, ເລື່ອງອີຣານ ຫຍັບມໍ່ເຂົ້າກັບບັນດາປະເທດມະຫາອຳນາດ ທີ່ມີທັງກຳລັງຄວາມສາມາດບົ່ມຊ້ອນ ມີທັງອິດທິພົນໃນທົ່ວໂລກ, ນັບທັງມີທັດສະນະຄ້າຍຄືກັນ ໃນຫຼາຍບັນຫາພາກພື້ນ ແລະ ສາກົນຄືລັດເຊຍ ແລະ ຈີນນັ້ນ, ແມ່ນສິ່ງທີ່ສາມາດອະທິບາຍໄດ້ຢ່າງງ່າຍດາຍ. ໃນຕົວຈິງ, ນັບແຕ່ຫຼາຍປີກ່ອນ, ຫາງສຽງສາກົນໄດ້ຮັບຮູ້ທິດທາງແຫ່ງການຮ່ວມມື ທີ່ນັບມື້ນັບດີຂຶ້ນລະຫວ່າງອີຣານ ກັບລັດເຊຍ ແລະ ຈີນ ແລະ ລະຫວ່າງສາມປະເທດນຳກັນ. ຊ້ຳບໍ່ໜຳ, ທ້າຍປີ 2019, ສາມປະເທດໄດ້ດຳເນີນການຊ້ອມຮົບທະຫານເຮືອຮ່ວມກັນຄັ້ງທຳອິດຢູ່ອ່າວ Oman ແລະ ມະຫາສະມຸດອິນເດຍ ທີ່ແກ່ຍາວເປັນເວລາ 4 ວັນ. ການຊ້ອມຮົບໄດ້ດຶງດູດຄວາມສົນໃຈເປັນພິເສດ ຈາກຫາງສຽງສາກົນ ຍ້ອນໄດ້ດຳເນີນໃນສະພາບການເກີດຄວາມເຄັ່ງຕຶງເພີ່ມຂຶ້ນ ລະຫວ່າງແຕ່ລະປະເທດໃນກຸ່ມກັບອາເມລິກາ, ສ້າງຂ່າວລືກ່ຽວກັບຄວາມສາມາດຈະສ້າງຕັ້ງສຳພັນທະມິດການທະຫານໃໝ່ ຫລືວິທີຮ່ວມມືໃໝ່ ທີ່ມີຄວາມຜູກພັນຢ່າງສະໜິດແໜ້ນລະຫວ່າງສາມປະເທດ ເພື່ອໃຫ້ມີຄວາມດຸ່ນດ່ຽງກັບອາເມລິກາ.

   ຕາມວົງການນັກໄຈ້ແຍກແລ້ວ, ສະພາບສູ້ຢັນກັນທີ່ເຄັ່ງຕຶງທີ່ບໍ່ເຄີຍມີມາກ່ອນ ລະຫວ່າງອາເມລິກາ ແລະ ຈີນ ໃນທຸກຂົງເຂດ ແລະ ສະພາບການພົວພັນລະຫວ່າງລັດເຊຍ-ອາເມລິກາ “ຢູ່ໃນລະດັບຕ່ຳສຸດ” ຄືປະຈຸບັນ, ແມ່ນ “ໂອກາດທອງ” ເພື່ອໃຫ້ອີຣານ ຊຸກຍູ້ການພົວພັນຢ່າງສະໜິດແໜ້ນ ກັບສອງປະເທດມະຫາອຳນາດ ຕາມທິດມີຜົນປະໂຫຍດໃຫ້ແກ່ລັດຖະບານອີຣານ, ນັ້ນແມ່ນຕ້ານຄືນກຳລັງດັນຈາກອາເມລິກາ ພ້ອມທັງຟື້ນຟູພື້ນຖານເສດຖະກິດທີ່ພວມຖືກຊຸດໂຊມ ຍ້ອນຄຳສັ່ງຂວ້ຳບາດສາກົນ ແລະ ຜົນສະທ້ອນຈາກໂລກລະບາດໂຄວິດ 19.