(vovworld)- ທີ່ສູນການຄ້າໂລກ Putra ຢູ່ນະຄອນຫລວງ ກົວລາລຳເປີ ປະເທດ ມາເລເຊຍ ພວມດຳເນີນບັນດາການເຄື່ອນໄຫວກະກຽມໃຫ້ກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 48(AMM 48) ແລະ ບັນດາກອງປະຊຸມກ່ຽວຂ້ອງ ຄາດວ່າຈະໄຂຂຶ້ນໃນວັນທີ 4/8. ນີ້ແມ່ນຫນຶ່ງໃນບັນດາເຫດການປະຈຳປີທີ່ສຳຄັນໃນການເຄື່ອນໄຫວຕ່າງໆຂອງ ອາຊຽນ ໃນປີນີ້. ກວ່າ 4 ເດືອນກ່ອນທີ່ສ້າງປະຊາຄົມ ອາຊຽນ, ບັນດາກອງປະຊຸມຄັ້ງນີ້ ມີຄວາມໝາຍສຳຄັນ ບໍ່ພຽງແຕ່ສິ້ນສຸດບັນດາບັນຫາສຳຄັນທີ່ສຸດຂອງ ອາຊຽນໃນປີ 2015ເທົ່ານັ້ນ ຫາກອາຊຽນ ຍັງຢືນຢັນບົດບາດໃຈກາງຢ່າງແຮງຂອງຕົນໃນພາກພື້ນ ທີ່ພວມມີການຜັນແປຢ່າງສັບສົນຫລາຍຢ່າງ ຍາກທີ່ຄາດຄະເນໄດ້.
 |
ນັບແຕ່ເມື່ອ ອາຊຽນ ໄດ້ຮັບການສ້າງຕັ້ງກ່ອນນີ້ 48 ປີ, ບັນດາປະເທດສະມາຊິກກໍ່ຕັ້ງອາຊຽນ ຍາມໃດກໍມຸ້ງໄປເຖິງຄາດໝາຍແມ່ນສະຫນິດຕິດພັນກັບທຸກປະເທດໃນພາກພື້ນ ພາຍໃຕ້ຊາຍຄາລວມ: ສັນຕິພາບ, ສະຖຽນລະພາບ ແລະ ພັດທະນາຖາວອນ. ສະນັ້ນ ແນວຄວາມຄິດສ້າງປະຊາຄົມ ອາຊຽນ ຈຶ່ງຕິດພັນກັບປະຫວັດສາດ 48 ປີແຫ່ງການສ້າງຕັ້ງ ແລະ ພັດທະນາອາຊຽນ. ໃນເກືອບເຄິ່ງສັດຕະວັດຜ່ານມາ, ເຖິງວ່າ ໄດ້ຜ່ານຜ່າການຜັນແປຫລາຍຢ່າງ ແຕ່ອາຊຽນ ຍາມໃດກໍສະແດງໃຫ້ເຫັນພະລັງຊີວິດຢ່າງເຂັ້ມແຂງຂອງຕົນ. ອາຊຽນ ໄດ້ ແລະ ພວມ ແມ່ນປັດໄຈສຳຄັນ ປະກອບສ່ວນຮັບປະກັນສະພາບແວດລ້ອມແຫ່ງສັນຕິພາບ ແລະ ສະຖຽນ ລະພາບ, ຊຸກຍູ້ການຮ່ວມມື ແລະ ພັດທະນາຢູ່ພາກພື້ນ ອາຊີ ປາຊີຟີກ.
ປັດໄຈສຳຄັນໃນການຮັບປະກັນຄວາມໝັ້ນຄົງຂອງພາກພື້ນ
ໃນເດືອນ 7, 8 ປະຈຳປີ, ອາຊຽນ ຕ້ອນຮັບ ສືບໆ ຄູ່ຮ່ວມມືຊັ້ນນຳຂອງພາກພື້ນ ອາຊີ ປາຊີຟີກ ແລະໂລກມາເຂົ້າຮ່ວມບັນດາເວທີປາໄສການຮ່ວມມື, ການເຈລະຈາສຳຄັນ. ນັ້ນແມ່ນ ເວທີປາໄສ ພາກພື້ນ ອາຊຽນ (ARF), ກົນໄກຄູ່ເຈລະຈາຂັ້ນສູງ ອາຊີ ຕາເວັນອອກ(EAS), ອາຊຽນ +1, ອາຊຽນ +3, ອາຊຽນ +6… ໃນນັ້ນ ພົ້ນເດັ່ນແມ່ນ ເວທີປາໄສພາກື້ນ ARF. ມາຮອດປະຈຸບັນ, ພາຍຫລັງເກືອບ 22 ປີແຫ່ງການສ້າງຕັ້ງ, ARF ໄດ້ກາຍເປັນເວທີປາໄສດ້ານການເມືອງ ຄວາມໝັ້ນຄົງໃຫຍ່ສຸດໃນພາກພື້ນ ໂດຍມີການເຂົ້າຮ່ວມຂອງ 18 ປະເທດພາຍນອກ ອາຊຽນ, ປະກອບສ່ວນສຳຄັນເຂົ້າໃນການສ້າງສະພາບແວດລ້ອມຄວາມສະຫງົບປອດໄພຂອງພາກພື້ນ. ຕາມການຕີລາຄາຂອງບັນດານັກການເມືອງແລ້ວ, ARF ສຳເລັດຜົນ ຍ້ອນອົງການນີ້ໄດ້ນຳມາເຊິ່ງຜົນປະໂຫຍດດ້ານຄວາມສະຫງົບປອດໄພໃຫ້ແກ່ແຕ່ລະປະເທດສະມາຊິກກໍຄືທັງພາກພື້ນ ແລະ ຍາມໃດກໍສ້າງບັນຍາກາດເຈລະຈາສັນຕິພາບໃນບັນດາບັນຫາຄວາມໝັ້ນຄົງລວມ. ທ່ານ Sjafrie Sjamsoeddin, ລັດຖະມົນຕີຊ່ວຍວ່າການກະຊວງປ້ອງກັນປະເທດ ອິນໂດເນເຊຍ ຖືວ່າ:
“ARF ແມ່ນຫນຶ່ງໃນບັນດາເວທີປາໄສສຳຄັນທີ່ສຸດໃນພາກພື້ນຂອງພວກເຮົາ. ບໍ່ພຽງແຕ່ປຶກສາຫາລືກ່ຽວກັບບັນດາບັນຫາຕ້ອງແກ້ໄຂໃນຂົງເຂດການເມືອງ ແລະ ຄວາມໝັ້ນຄົງເທົ່ານັ້ນ ເວທີປາໄສນີ້ຍັງແມ່ນບ່ອນເພື່ອໃຫ້ບັນດາການນຳ ອາຊຽນ, ການນຳບັນດາປະເທດຄູ່ເຈລະຈາຊອກຫາກາລະໂອກາດຮ່ວມມື, ເພີ່ມທະວີການສ້າງຄວາມໄວ້ເນື້ອເຊື່ອໃຈ, ແກ້ໄຂສິ່ງທ້າທາຍລວມ ຊື່ງພາກພື້ນພວມປະເຊີນຫນ້າ.”
ບັນດາກົນໄກ, ເວທີປາໄສຂອງ ອາຊຽນ ພວມມີການພັດທະນາ ແລະ ນັບມື້ນັບສວມບົດບາດສຳຄັນສຳລັບໂຄງປະກອບຄວາມໝັ້ນຄົງຂອງພາກພື້ນ, ປະກອບສ່ວນຮັບປະກັນສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ການພັດທະນາລວມ. ສະນັ້ນ ໃນຊຸມປີມໍ່ໆມານີ້, ບັນດາປະເທດຄູ່ເຈລະຈາເອົາໃຈໃສ່ເຖິງ ອາຊຽນ ທີ່ສຸດ, ຍາມໃດກໍສະຫນັບສະຫນູນຫລັກໝັ້ນຂອງ ອາຊຽນ, ບໍ່ພຽງແຕ່ຫນູນຊ່ວຍຄາດໝາຍສ້າງປະຊາຄົມ ເທົ່ານັ້ນ ຫາກໃນບັນຫາແກ້ໄຂການທ້າທາຍຕໍ່ຄວາມໝັ້ນຄົງຢູ່ທະເລຕາເວັນອອກອີກດ້ວຍ. ທ່ານເລຂາທິການໃຫຍ່ອາຊຽນ ເລເລືອງມີງ ໃຫ້ຮູ້ວ່າ:
“ບັນດາປະເທດຄູ່ເຈລະຈາທັງໝົດ ລ້ວນແຕ່ສະຫນັບສະຫນູນຫລັກໝັ້ນຂອງ ອາຊຽນ ກ່ຽວກັບການແກ້ໄຂບັນຫາທະເລຕາເວັນອອກ ບົນພື້ນຖານຫລັກການ 6 ຂໍ້ຂອງ ອາຊຽນ ແລະ ສະຫນັບສະຫນູນກຳລັງແຮງພາຍໃນຂອງ ອາຊຽນ ໃນການແກ້ໄຂບັນຫາທະເລຕາເວັນອອກ ສຳລັບຈີນ ບົນພື້ນຖານເຮັດແນວໃດຮັບປະກັນຄວາມໝັ້ນຄົງ, ສະຖຽນລະພາບຂອງພາກພື້ນ ກໍຄືຮັບປະກັນຄວາມປອດໄພການເດີນທະເລ, ຄວາມໝັ້ນຄົງຢູ່ທະເລ. ປະຈຸບັນ, ມີ 74 ປະເທດ ແຕ່ງຕັ້ງເອກອັກຄະລັດຖະທູດປະຈຳ ອາຊຽນ ສະແດງໃຫ້ເຫັນຄວາມມຸ້ງມາດປາດຖະຫນາ ແລະ ຄວາມເອົາໃຈໃສ່ຂອງບັນດາປະເທດ ເພີ່ມທະວີການຮ່ວມມືກັບອາຊຽນ.”
ຄວາມຈິງ ແລະ ປະສິດທິຜົນການພົວພັນລະຫວ່າງ ອາຊຽນ ແລະ ບັນດາຄູ່ຮ່ວມມື
ຫວນຄືນ 1 ປີ ຜ່ານມາ, ນັບແຕ່ເມື່ອ ກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 47 ຈັດຂຶ້ນຢູ່ ມຽນມາ, ບໍ່ພຽງແຕ່ຍູ້ແຮງການຮ່ວມມືພາຍໃນກຸ່ມ ເທົ່ານັ້ນ ຫາກການພົວພັນຂອງ ອາຊຽນ ກັບແຕ່ລະປະເທດຄູ່ເຈລະຈາພາຍນອກ ສືບຕໍ່ພັດທະນາຢ່າງຕັ້ງຫນ້າ ແລະ ແທດຈິງອີກດ້ວຍ. ສຳລັບຈີນ, ການພົວພັນສອງຝ່າຍ ໄດ້ຮັບການເປີດກວ້າງໄປຍັງຂົງເຂດໃຫມ່ຈຳນວນຫນຶ່ງ ແລະ ເຮັດໃຫ້ເລິກເຊິ່ງກວ່າ ຜ່ານການສ້າງຕັ້ງກົນໄກໃຫມ່ຈຳນວນຫນຶ່ງ. ສຳລັບ ຍີ່ປຸ່ນ ແລ້ວ, ຄຽງຄູ່ກັບການຊຸກຍູ້ການປະຕິບັດບັນດາຂໍ້ຕົກລົງ, ຄຳໝັ້ນສັນຍາທີ່ໄດ້ລົງນາມ, ຍີ່ປຸ່ນ ສືບຕໍ່ເພີ່ມທະວີການຮ່ວມມືກ່ຽວກັບການໝູນໃຊ້ເຕັກໂນໂລຊີດາວທຽມໃນການຄຸ້ມຄອງໄພທຳມະຊາດ, ການທູດ, ການແພດທົ່ວໂລກ, ການເຕີບໂຕຂຽວ ຕ້ານການປ່ຽນແປງຂອງດິນຟ້າອາກາດ ແລະ ການຄຸ້ມຄອງຕົວເມືອງ. ສຳລັບອິນເດຍ, ສອງຝ່າຍໄດ້ມານະພະຍາຍາມຊຸກຍູ້ບັນດາໂຄງການເຊື່ອມຈອດ ອິນເດຍ - ອາຊຽນ ນັບທັງທາງບົກ, ທາງອາກາດ, ການເດີນທະເລ, ດີຈີຕອນ… ສຳລັບ ສເກົາຫລີ, ອາຊຽນ ແລະ ສເກົາຫລີ ພວມປະຕິບັດຄາດໝາຍຍົກວົງເງິນການຄ້າສອງສົ້ນໃຫ້ຂຶ້ນເຖິງ 150 ຕື້ USD ໃນທ້າຍປີນີ້. ສຳລັບ ອາເມລິກາ, ສອງຝ່າຍສືບຕໍ່ຊຸກຍູ້ການພົວພັນຄູ່ເຈລະຈາຂຶ້ນສູ່ລະດັບຍຸດທະສາດ. ອາເມລິກາ ຍາມໃດກໍຢືນຢັນ ຖື ອາຊຽນ ແມ່ນໃຈກາງຂອງໂຄງປະກອບພາກພື້ນ ອາຊີ ປາຊີຟີກ ແລະ ແມ່ນໃຈກາງຂອງຍຸດທະສາດສົມດູນຄືນໃຫມ່ ຊື່ງອາເມລິກາ ພວມມູ່ງໄປເຖິງ. ຄວາມສຳຄັນຂອງການຮ່ວມມື ອາເມລິກາ - ອາຊຽນ, ເປັນຕົ້ນແມ່ນຂົງເຂດປ້ອງກັນຊາດ ຊື່ງ ລັດຖະມົນຕີວ່າການກະຊວງປ້ອງກັນປະເທດ ອາເມລິກາ Carter ໄດ້ຢືນຢັນ:
“ອາດຈະຢືນຢັນໄດ້ວ່າ ສາຍພົວພັນມິດຕະພາບລະຫວ່າງບັນດາປະເທດອາຊຽນ ແລະ ອາເມລິກາ ແມ່ນກາລະໂອກາດນັບມື້ນັບເພີ່ມຂຶ້ນ ເພື່ອໃຫ້ພວກເຮົາສືບຕໍ່ຮ່ວມມືນຳກັນ ເພື່ອແກ້ໄຂບັນດາການທ້າທາຍອາດຊະຍາກຳໃຫມ່ ແລະ ຍາວນານໃນທົ່ວພາກພື້ນ ອາຊີ - ປາຊີຟີກ. ການຮ່ວມມືປ້ອງກັນຊາດ ອາຊຽນ - ອາເມລິກາ ເປັນຂີດໝາຍສຳຄັນສະແດງໃຫ້ເຫັນສາຍພົວພັນນັບມື້ນັບເພີ່ມຂຶ້ນລະຫວ່າງ ອາເມລິກາ ແລະ ບັນດາປະເທດ ອາຊຽນ ແລະ ເປັນຂີດໝາຍໃຫມ່ກ່ຽວກັບບົດບາດຂອງ ອາຊຽນ ຊື່ງອາເມລິກາ ຖືເປັນສຳຄັນທີ່ສຸດ.”
ໂດຍແມ່ນບັນດາການເຄື່ອນໄຫວສຸດທ້າຍ ກ່ອນທີ່ ອາຊຽນ ກາຍເປັນປະຊາຄົມໃນທ້າຍປີ 2015, AMM 48 ພ້ອມກັບກອງປະຊຸມກ່ຽວຂ້ອງ ຈະນຳມາເຊິ່ງບັນດາໝາກຜົນແທດຈິງຢ່າງແນ່ນອນ. ບໍ່ພຽງແຕ່ສືບຕໍ່ປັບປຸງຄວາມສາມັກຄີ ແລະ ການຮ່ວມມືພາຍໃນກຸ່ມເທົ່ານັ້ນ, ຫາກ ອາຊຽນ ຍັງສືບຕໍ່ເສີມຂະຫຍາຍບົດບາດໃຈກາງໃນການຮັກສາສະພາບແວດລ້ອມສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການຮ່ວມມືໃນພາກພື້ນ ແລະ ໃນໂລກອີກດ້ວຍ.