(vovworld)-ຮັບປະກັນຊີວິດສັງຄົມແມ່ນຫນຶ່ງໃນບັນດານະໂຍບາຍສັງຄົມພື້ນຖານ ສະແດງໃຫ້ເຫັນແນວທາງແຜນນະໂຍບາຍຂອງພັກ ແລະ ລັດຫວຽດນາມ ມຸ່ງໄປສູ່ຈຸດໝາຍພັດທະນາມະນຸດ, ຍົກສູງຄຸນນະພາບຊີວິດຂອງປະຊາຊົນ. ໄລຍະຜ່ານມາ, ວຽກງານຮັບປະກັນຊີວິດສັງຄົມໄດ້ຮັບການຜັນຂະຫຍາຍຢ່າງມີປະສິດທິຜົນ, ປະກອບສ່ວນປະຕິບັດ ມາດຕາ 34, ໃນລັດຖະທຳມະນູນປີ 2013, ນັ້ນແມ່ນ ພົນລະເມືອງ ມີສິດໄດ້ຮັບປະກັນຊີວິດສັງຄົມ.
ພາບປະກອບ:internet
|
ການຮັບປະກັນຊີວິດສັງຄົມໄດ້ຮັບການກຳນົດວ່າແມ່ນພາກສ່ວນຫນຶ່ງທີ່ສຳຄັນຂອງນະໂຍບາຍສັງຄົມ, ນອນໃນຍຸດທະສາດພັດທະນາເສດຖະກິດສັງຄົມຂອງປະເທດຊາດ. ຫວຽດນາມຖືວຽກງານຮັບປະກັນຊີວິດສັງຄົມແມ່ນເນື້ອໃນແທດຈິງທີ່ສຸດ ປະຕິບັດບັນດາສິດສັງຄົມຂອງປະຊາຊົນທຸກຄົນ, ທັງແມ່ນກຳລັງຫນູນ ແລະ ແມ່ນຈຸດໝາຍຂອງພາລະກິດປ່ຽນແປງໃຫມ່ປະເທດຊາດ.
ຮັບປະກັນຊີວິດສັງຄົມເສີມຂະຫຍາຍປະສິດທິຜົນໃນທຸກຂົງເຂດ
ເຖິງວ່າມີການຜັນແປຫລາຍຢ່າງກ່ຽວກັບດ້ານເສດຖະກິດ, ແຫລ່ງກຳລັງຂອງປະເທດຊາດຍັງຈຳກັດຢູ່ ແຕ່ພັກ ແລະ ລັດ ຍັງຄົງຖືວຽກງານຮັບປະກັນຊີວິດສັງຄົມເປັນສຳຄັນ. ຖ້າຫາກປີ 2012 ຍອດລາຍຈ່າຍໃຫ້ແກ່ວຽກງານຮັບປະກັນຊີວິດສັງຄົມ ເທົ່າກັບ 5,58% GDP, ຮອດປີ 2015 ຕົວເລກນີ້ໄດ້ເພີ່ມຂຶ້ນປະມານ ກວ່າ 6,6% GDP. ເຖິງວ່າເງື່ອນໄຂເສດຖະກິດປະສົບກັບຄວາມຫຍຸງຍາກ ແຕ່ລັດຖະບານຫວຽດນາມ ບໍ່ຫລຸດຜ່ອນນະໂຍບາຍໃດ, ຫາກບ້ວງລາຍຈ່າຍທີ່ສະຫງວນໃຫ້ຂົງເຂດນີ້ຍັງເພີ່ມຂຶ້ນ. ຫວຽດນາມ ກໍໄດ້ປະຕິບັດບັນດານະໂຍບາຍສັງຄົມຈາກຫລາຍແຫລ່ງກຳລັງຢ່າງມີປະສິດທິຜົນຄື: ບັນດາໂຄງການຊ່ວຍເຫລືອລ້າຂອງຕ່າງປະເທດ, ແຫລ່ງກຳລັງສັງຄົມຈາກບັນດາວິສາຫະກິດ, ອົງການຈັດຕັ້ງ ແລະ ແຫລ່ງກຳລັງຈາກປະຊາຊົນ.
ຊົ່ວໂມງຮຽນຄອມພິວເຕີຂອງນັກຮຽນປະຖົມ
ພາບ:baoquangninh
|
ຈາກການລົງທຶນດັ່ງກ່າວ, ບັນດາໂຄງການລົບລ້າງຄວາມອຶດຫິວຫລຸດຜ່ອນຄວາມທຸກຍາກຂອງຫວຽດນາມ ໃນລະດັບຊາດ ບັນລຸໄດ້ບັນດາໝາກຜົນດີສົມຄວນ ໄດ້ຮັບການຕີລາຄາສູງຈາກຫາງສຽງສາກົນ. ອັດຕາສ່ວນຄອບຄົວທຸກຍາກຫລຸດລົງສະເລ່ຍປະມານ 2%/ປີ, ແຕ່ 14,2% (ທ້າຍປີ 2010) ລົງຕ່ຳກວ່າ 4,5% (ປີ 2015). ເປັນຫນ້າສົນໃຈ, ເພື່ອຫລຸດຜ່ອນຄວາມທຸກຍາກແບບຍືນຍົງ, ປີ 2015 ທ່ານນາຍົກລັດຖະມົນຕີ ໄດ້ປະກາດໃຊ້ຂໍ້ຕົກລົງອະນຸມັດຜ່ານແຜນຮ່າງສັງລວມຫັນປ່ຽນວິທີສຳພັດຈາກຄວາມທຸກຍາກຍ້ອນລາຍຮັບຕ່ຳໄປສູ່ຄວາມທຸກຍາກທີ່ບໍ່ໄດ້ຊົມໃຊ້ບໍລິການຕ່າງໆໃຫ້ແກ່ໄລຍະ 2016 -2020. ນີ້ແມ່ນວິທີສຳພັດໃຫມ່ ຊື່ງສາກົນໄດ້ສະເຫນີບັນດາປະເທດນຳໃຊ້ເພື່ອເພີ່ມລາຍຮັບ, ຍົກສູງຄວາມສາມາດສຳພັດຂອງປະຊາຊົນກ່ຽວກັບບັນດາບໍລິການສັງຄົມພື້ນຖານກວ່າອີກ. ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ:
“ຫລຸດຜ່ອນຄວາມທຸກຍາກແມ່ນແຜນນະໂຍບາຍໃຫຍ່ຂອງພັກ ແລະ ລັດ, ແມ່ນຄາດໝາຍພັດທະນາແບບຍືນຍົງຊື່ງໄດ້ຮັບຄວາມເຫັນດີເຫັນພ້ອມ, ການສະຫນັບສະຫນູນຈາກປະຊາຊົນ ແລະ ປະຊາຄົມສາກົນ. ເພື່ອໃຫ້ເໝາະສົມກັບຄວາມຮຽກຮ້ອງຕ້ອງການພັດທະນາ, ພວກເຮົາຕັດສິນຫັນມານຳໃຊ້ວິທີສຳພັດຄວາມທຸກຍາກຫລາຍດ້ານ. ນີ້ກໍແມ່ນວິທີສອດຄ່ອງກັບໂຄງການດຳເນີນງານ 2030 ຂອງສະຫະປະຊາຊາດ (ສປຊ) ເພື່ອການພັດທະນາແບບຍືນຍົງ.”
ນະໂຍບາຍຮັບປະກັນຊີວິດສັງຄົມໄດ້ຮັບການຜັນຂະຫຍາຍຢ່າງມີປະສິດທິຜົນໄດ້ຊ່ວຍໃຫ້ຫວຽດນາມ ລື່ນກາຍແຜນການທັງ 3 ຄາດໝາຍກ່ຽວກັບແຮງງານ, ວຽກເຮັດງານທຳ, ສອນວິຊາຊີບ ໃນປີ 2015. ໃນນັ້ນ, ຈຳນວນຄົນງານທີ່ມີວຽກເຮັດງານທຳແມ່ນກວ່າ 1,6 ລ້ານຄົນ, ອັດຕາຄົນງານໄດ້ຮັບການບຳລຸງສ້າງ 51,6%, ອັດຕາຜູ້ຫວ່າງງານຢູ່ເຂດຕົວເມືອງ 3,35%. ອົງປະກອບແຮງງານມີການຫັນປ່ຽນຕາມທິດເພີ່ມອັດຕາສ່ວນອຸດສາຫະກຳບໍລິການ. ໃນຂົງເຂດຫນູນຊ່ວຍຜູ້ມີຄຸນງາມຄວາມດີໄດ້ຮັບການປະຕິບັດຢ່າງດີກວ່າ ຍ້ອນມີການປັບປຸງຫລາຍນະໂຍບາຍຕາມທິດເປີດກວ້າງເປົ້າໝາຍ, ຍົກລະດັບຫນູນຊ່ວຍຂຶ້ນ. ທ້າຍປີ 2015 ຈຳນວນຜູ້ເຂົ້າຮ່ວມປະກັນສັງຄົມ, ປະກັນສຸຂະພາບ, ປະກັນຜູ້ຫວ່າງງານ ແມ່ນ 70,2 ລ້ານຄົນ, ກວມ 77% ຈຳນວນພົນລະເມືອງ, ຫລາຍກວ່າ 8,3% ເມື່ອທຽບໃສ່ປີ 2014.
ສ້າງລະບົບນະໂຍບາຍຮັບປະກັນຊີວິດສັງຄົມໃນທົ່ວປວງຊົນ
ຫວຽດນາມ ກຳນົດຮອດປີ 2020 ສ້າງລະບົບຮັບປະກັນຊີວິດສັງຄົມໃນທົ່ວປວງຊົນໂດຍພື້ນຖານ, ຮັບປະກັນໃຫ້ປະຊາຊົນໄດ້ສຳພັດກັບບັນດານະໂຍບາຍວຽກເຮັດງານທຳ, ຫລຸດຜ່ອນຄວາມທຸກຍາກ, ເຂົ້າຮ່ວມປະກັນສັງຄົມ, ຫນູນຊ່ວຍບັນດາຜູ້ປະສົບກັບຄວາມຫຍຸ້ງຍາກເປັນພິເສດ, ເພີ່ມທະວີບັນດາບໍລິການສັງຄົມໂດຍພື້ນຖານຢູ່ໃນລະດັບຕ່ຳສຸດ. ເພື່ອບັນລຸຄາດໝາຍນີ້, ໃນຕໍ່ຫນ້າ ຫວຽດນາມ ຕັ້ງຫນ້າຜັນຂະຫຍາຍວິທີການຫລຸດຜ່ອນຄວາມທຸກຍາກຫລາຍດ້ານ. ທ່ານ ຫງວຽນຈ້ອງດາມ, ລັດຖະມົນຕີຊ່ວຍວ່າການກະຊວງແຮງງານ ທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ:
“ພວກເຮົາຈະຜັນຂະຫຍາຍ ລາຍການຫລຸດຜ່ອນຄວາມທຸກຍາກໃຫມ່ໃຫ້ໄລຍະ 5 ປີຈະມາເຖິງ ກໍຄືສຳຫລວດກວດກາລະບົບນະໂຍບາຍຫລຸດຜ່ອນຄວາມທຸກຍາກ ເພື່ອເພີ່ມເຕີມ, ປັບປຸງຄືແນວໃດໃຫ້ເໝາະສົມກັບວິທີສຳພັດໃຫມ່. ບັນດາມາດຕະການນີ້ຮັບປະກັນໃຫ້ປະຊາຊົນ, ເປັນຕົ້ນແມ່ນຜູ້ທຸກຍາກປັບປຸງຊີວິດການເປັນຢູ່ບໍ່ພຽງແຕ່ດ້ານສະບຽງອາຫານ, ທັນຍາຫານເທົ່ານັ້ນ ຫາກຍັງວິທີສຳພັດກັບການບໍລິການໂດຍພື້ນຖານອີກດ້ວຍ. ສຳລັບກຸ່ມຄົນດ້ອຍໂອກາດ ພວກເຮົາສືບຕໍໍ່ຄົ້ນຄ້ວາເພື່ອ ມີນະໂຍບາຍຫນູນຊ່ວຍຢ່າງມີປະສິດທິຜົນກວ່າ.”
ຫວຽດນາມ ສືບຕໍ່ປັບປຸງພື້ນຖານດ້ານກົດໝາຍ, ບັນດານະໂຍບາຍ ແລະ ມາດຕະການຮັບປະກັນຊີວິດສັງຄົມ ຄືຊຸກຍູ້ການກໍ່ສ້າງ ແລະ ສ້າງລະບົບກົດໝາຍວ່າດ້ວຍການຮັບປະກັນຊີວິດສັງຄົມ, ໃນນັ້ນ ຄົ້ນຄ້ວາການສ້າງ ແລະ ປະກາດໃຊ້ກົດໝາຍວ່າດ້ວຍວຽກເຮັດງານທຳ, ກົດໝາຍວ່າດ້ວຍເງິນເດືອນພື້ນຖານ, ກົດໝາຍວ່າດ້ວຍການຫນູນຊ່ວຍສັງຄົມ, ກົດໝາຍບຸລິມະສິດສັງຄົມ. ຄົ້ນຄ້ວາປັບປຸງປະມວນກົດໝາຍວ່າດ້ວຍແຮງງານ, ກົດໝາຍວ່າດ້ວຍປະກັນສັງຄົມ, ກົດໝາຍວ່າດ້ວຍຄົນພິການ, ກົດໝາຍວ່າດ້ວຍຜູ້ອາຍຸສູງ…. ທ່ານນາງ ເລທິອຽນ ກຳມະການກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດ ຖືວ່າ:
“ສະພາແຫ່ງຊາດ, ລັດຖະບານ ສືບຕໍ່ເອົາໃຈໃສ່ເຖິງການກໍ່ສ້າງ, ສ້າງລະບົບກົດໝາຍກ່ຽວຂ້ອງເຖິງລະບອບນະໂຍບາຍຂອງຄົນງານ, ຜູ້ມີຄຸນງາມຄວາມດີຕໍ່ການປະຕິວັດ. ລັດຖະບານ ຕ້ອງສ້າງກົດໝາຍວ່າດ້ວຍເງິນເດືອນພື້ນຖານໂດຍໄວ, ເພື່ອຮັບປະກັນລະດັບຄອງຊີບຂອງຄົນງານ… ເພື່ອປະຕິບັດວິວັດການເປີດກວ້າງເປົ້າໝາຍເຂົ້າຮ່ວມປະກັນສັງຄົມ, ປະກັນສຸຂະພາບໃນທົ່ວປວງຊົນຮອດປີ 2020, ລັດຖະບານປະກາດໃຊ້ບັນດານະໂຍບາຍຫນູນຊ່ວຍໃຫ້ແກ່ຄົນງານ, ເຂົ້າຮ່ວມປະກັນສຸຂະພາບດ້ວຍຄວາມສະຫມັກໃຈ ພ້ອມທັງປະຕິບັດບັນດາມາດຕະການ, ເປີດກວ້າງເປົ້າໝາຍເຂົ້າຮ່ວມປະກັນສຸຂະພາບ.”
ບັນດາແຜນນະໂຍບາຍ, ນະໂຍບາຍ, ໝາກຜົນ ແລະ ການກຳນົດທິດ, ຈຸດໝາຍສູ້ຊົນປະຕິບັດການຮັບປະກັນຊີວິດສັງຄົມໄດ້ຢືນຢັນນະໂຍບາຍສະເຫມີຕົ້ນສະເຫມີປາຍ ແລະ ບັນດາຄວາມມານະພະຍາຍາມຢ່າງຄົບຊຸດລະຫວ່າງລັດຖະບານ ແລະ ປະຊາຊົນຫວຽດນາມ, ປະກອບສ່ວນປະຕິບັດສິດທິມະນຸດ ແລະ ພັດທະນາ ເສດຖະກິດສັງຄົມຢ່າງຮອບດ້ານ.