ບົດລາຍງານຂອງລັດຖະບານ ໂດຍທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ນຳສະເໜີກໍ່ຢັ້ງຢືນວ່າ: ປີ 2023, ຫວຽດນາມ ຈະສືບຕໍ່ຊຸກຍູ້ການຟື້ນຟູ ແລະ ພັດທະນາເສດຖະກິດ - ສັງຄົມ, ຍູ້ແຮງການສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງຕິດພັນກັບການເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ, ແທດຈິງ ແລະ ມີປະສິດທິຜົນ.

ພາບປະກອບ

ທ່າຟື້ນຟູທີ່ສະໝ່ຳສະເໝີ, ກຳລັງແຮງເສດຖະກິດໄດ້ຮັບການເພີ່ມທະວີ

        ເມື່ອລາຍງານທີ່ສະພາແຫ່ງຊາດ, ລັດຖະບານໃຫ້ຮູ້ວ່າ, ການຄາດຄະເນວ່າທັງປີ, ກ່ຽວກັບລະດັບການເຕີບໂຕ GDP ຈະບັນລຸປະມານ 8%, ລື່ນກາຍຄາດໝາຍທີ່ໄດ້ວາງອອກ (6 – 6,5%), ສ້າງທ່າສຳຄັນໃຫ້ແກ່ຊຸມປີຕໍ່ໄປເພື່ອປະຕິບັດຄາດໝາຍເຕີບໂຕເສດຖະກິດຂອງແຜນການ 5 ປີແຕ່ 2021 – 2025. ເຖິງວ່າ ຍັງອີກ 2 ເດືອນຈຶ່ງຈະໝົດປີ 2022 ກໍ່ຕາມ, ແຕ່ມາຮອດຈຸດເວລານີ້, ເບິ່ງຄືວ່າເປັນທີ່ແນ່ນອນແລ້ວ, ຈະມີຈຳນວນ 14/15 ຄາດໝາຍເສດຖະກິດ - ສັງຄົມຂອງປີ 2022 ບັນລຸ ແລະ ລື່ນກາຍຄາດໝາຍທີ່ໄດ້ວາງອອກ, ພິເສດແມ່ນຄາດໝາຍເຕີບໂຕເສດຖະກິດ. ຖ້າບໍ່ມີບັນດາການຜັນແປທີ່ຜິດປົກກະຕິ, ຫວຽດນາມ ອາດຈະບັນລຸລະດັບເຕີບໂຕ GDP 8%. ທ່ານນາຍົກລັດຖະມົນຕີ ຟ້າມມິງຈິງ, ຊີ້ແຈ້ງວ່າ:

“ເສດຖະກິດມະຫາພາກເປັນປົກກະຕິໂດຍພື້ນຖານ, ໄພເງິນເຟີ້ໄດ້ຮັບການຄວບຄຸມ, ການເຕີບໂຕເສດຖະກິດຟື້ນຟູຕັ້ງໜ້າ, ການດຸ່ນດ່ຽງໃຫຍ່ຂອງພື້ນຖານເສດຖະກິດໄດ້ຮັບປະກັນໃນເງື່ອນໄຂປະສົບກັບຄວາມຫຍຸ້ງຍາກຫຼາຍຢ່າງ. ໂຄງການຟື້ນຟູ ແລະ ພັດທະນາເສດຖະກິດ - ສັງຄົມ ແລະ 3 ໂຄງການຄາດໝາຍແຫ່ງຊາດໄດ້ຕັ້ງໜ້າຊີ້ນຳຜັນຂະຫຍາຍປະຕິບັດ. ໜີ້ສາທາລະນະ, ໜີ້ລັດຖະບານ, ໜີ້ຕ່າງປະເທດຂອງປະເທດຊາດໄດ້ຮັບການຄວບຄຸມຢ່າງປອດໄພ. ຫຼາຍອົງການສາກົນມີອິດທິພົນຊື່ສຽງໄດ້ຕີລາຄາສູງໝາກຜົນ ແລະ ແງ່ຫວັງຂອງພື້ນຖານເສດຖະກິດ ຫວຽດນາມ.”

ເມື່ອລາຍງານການສືບສວນຕໍ່ສະພາແຫ່ງຊາດ, ກຳມາທິການເສດຖະກິດຂອງສະພາແຫ່ງຊາດໄດ້ເຫັນດີເຫັນພ້ອມກັບບັນດາການຕີລາຄາຂອງລັດຖະບານ. ຕາມນັ້ນແລ້ວ, ທ່າຟື້ນຟູການເຕີບໂຕໄດ້ຢັ້ງຢືນຢູ່ທັງ 3 ຂົງເຂດຂອງພື້ນຖານເສດຖະກິດ (ຂົງເຂດກະສິກຳ, ເຄື່ອງປ່າຂອງດົ່ງ ແລະ ສິນໃນນ້ຳ; ຂົງເຂດອຸດສາຫະກຳ ແລະ ການກໍ່ສ້າງ, ຂົງເຂດການບໍລິການ) ແລະ “ໄດ້ດຳເນີນໄປຢ່າງສະໝ່ຳສະເໝີພໍສົມຄວນ” ລະຫວ່າງທ້ອງຖິ່ນຕ່າງໆ, ໃນຂະນະທີ່ມີ 44/63 ແຂວງ, ນະຄອນຢັ້ງຢືນລະດັບການເຕີບໂຕ GRDP ບັນລຸກ່ວາ 6%. ຫວຽດນາມ ແມ່ນປະເທດໜຶ່ງດຽວຢູ່ພາກພື້ນ ອາຊີ - ປາຊີຟິກ ແລະ ແມ່ນໜຶ່ງໃນຈຳນວນ 4 ປະເທດໃນໂລກ ທີ່ອົງການ Moody’s ຍົກລະດັບຄວາມໄວ້ວາງໃຈແຕ່ຕົ້ນປີມາຮອດປະຈຸບັນ.

ໝາກຜົນນີ້ໄດ້ສະແດງໃຫ້ເຫັນກຳລັງແຮງເສດຖະກິດຂອງ ຫວຽດນາມ ນັບມື້ນັບໄດ້ເພີ່ມທະວີຂຶ້ນ ແລະ ຄວາມສາມາດຮັບມືກັບການຜັນແປສັບສົນມະຫາພາກຈາກພາຍນອກຂອງພື້ນຖານເສດຖະກິດໃນໄລຍະນີ້ແມ່ນດີພໍສົມຄວນ; ຜ່ານນັ້ນ, ສ້າງທ່ວງທ່າໃຫ້ແກ່ການຟື້ນຟູ ແລະ ພັດທະນາເສດຖະກິດ - ສັງຄົມປີ 2023 ແລະ ທັງໄລຍະແຜນການ 5 ປີແຕ່ 2021 – 2025.

ຮັບມືຢ່າງທັນການ, ສ້າງພື້ນຖານໃຫ້ແກ່ການພັດທະນາ

        ປີ 2023, ສະພາບການສາກົນເວົ້າລວມ ແລະ ເສດຖະກິດໂລກເວົ້າສະເພາະ ຈະມີການຜັນແປສັບສົນຫຼາຍຢ່າງ, ຍາກທີ່ຈະຄາດຄະເນໄດ້ທັງດ້ານການເມືອງ, ຄວາມໝັ້ນຄົງ, ເສດຖະກິດ, ສັງຄົມ, ວາງອອກສິ່ງທ້າທາຍຫຼາຍຢ່າງກ່ຽວກັບການເຕີບໂຕ, ສະຖຽນລະພາບດ້ານເສດຖະກິດມະຫາພາກ ແລະ ການເລືອກເຟັ້ນນະໂຍບາຍສຳລັບບັນດາປະເທດ, ໃນນັ້ນມີ ຫວຽດນາມ. ລັດຖະບານ ຫວຽດນາມ ໄດ້ກຳນົດຄວາມມານະພະຍາຍາມ, ຄວາມຕັດສິນໃຈກະທຳສູງສຸດເພື່ອຊຸກຍູ້ການຟື້ນຟູ ແລະ ພັດທະນາເສດຖະກິດ - ສັງຄົມ; ເປັນເຈົ້າການໃນການຮັບມືກັບສະພາບການ; ຄວບຄຸມຄວາມສ່ຽງ, ຮັບມືກັບໄພຊຸດໂຊມຢ່າງທັນການ. ທ່ານນາຍົກລັດຖະມົນຕີ ຟ້າມມິງຈິງ, ເນັ້ນໜັກວ່າ:

        “ຕ້ອງມີລັດຖະນະໂຍບາຍຮັບມືເໝາະສົມ, ມີການບໍລິຫານບັນດານະໂຍບາຍເສດຖະກິດມະຫາພາກຢ່າງຄົບຊຸດ, ໄຫວພິບ, ມີປະສິດທິຜົນ; ເພີ່ມທະວີການໄຈ້ແຍກ, ຄາດຄະເນ, ເປັນເຈົ້າການບັນດາແຜນການ, ວິທີການຊີ້ນຳບໍລິຫານຮັບມືກັບທຸກກໍລະນີ. ຮັບປະກັນການສະໜອງທຶນສິນເຊື່ອໃຫ້ແກ່ພື້ນຖານເສດຖະກິດຢ່າງຄົບຖ້ວນ, ສຸມໃສ່ການຜະລິດດຳເນີນທຸລະກິດ, ບັນດາຂົງເຂດບຸລິມະສິດ ແລະ ກຳລັງໜູນເຕີບໂຕເສດຖະກິດ; ສ້າງຄວາມສະດວກໃຫ້ແກ່ປະຊາຊົນ, ວິສາຫະກິດ ສຳຜັດກັບທຶນສິນເຊື່ອ. ບຸລິມະສິດການຈັດແບ່ງທຶນເພື່ອການລົງທຶນຂອງລັດແບບມີຈຸດສຸມ, ສຸມໃສ່ບັນດາໂຄງການໂຄງປະກອບພື້ນຖານໂຄງລ່າງຈຸດສຸມ, ຍຸດທະສາດ, ຮັບປະກັນຄວາມກົມກຽວລົງຕົວລະຫວ່າງບັນດາທ້ອງຖິ່ນ, ເຂດ, ພາກ.”

        ຫວຽດນາມ ກໍ່ຍູ້ແຮງການສ້າງໂຄງປະກອບຂະແໜງການພາຍໃນ ແລະ ບັນດາຂະແໜງການອຸດສາຫະກຳ, ກະສິກຳ, ການບໍລິການຄືນໃໝ່. ສຸມໃສ່ປະຕິບັດບັນດາຍຸດທະສາດຢ່າງມີປະສິດທິຜົນ, ວາງແຜນຜັງພັດທະນາກະສິກຳ, ຊົນນະບົດແບບຍືນຍົງ. ເອົາໃຈໃສ່ພັດທະນາບັນດາປະເພດການບໍລິການໝູນໃຊ້ເຕັກໂນໂລຊີສູງ.

        ເພື່ອຮັບໃຊ້ວິວັດການຟື້ນຟູເສດຖະກິດ, ລັດຖະບານ ຫວຽດນາມ ຈະຍູ້ໄວຄວາມຄືບໜ້າບາງກິດຈະກຳພື້ນຖານໂຄງລ່າງການຄົມມະນາຄົມຈຸດສຸມແຫ່ງຊາດ, ມີລັກສະນະຮ່ວມສຳພັນເຂດ. ໃນປີ 2023, ສູ້ຊົນປະຕິບັດໃຫ້ສຳເລັດ, ນຳເຂົ້າເຄື່ອນໄຫວບາງຕອນຂອງເສັ້ນທາງຄວາມໄວສູງ ທີ່ມີແຜນນະໂຍບາຍລົງທຶນບາງໂຄງການລົດໄຟເຂດຕົວເມືອງ; ຍົກລະດັບ ເປີດກ້ວາງ, ຂຸດຄົ້ນບາງສະໜາມບິນສາມາດນຳໃຊ້ແບບຄວບຄູ່.

        ຖ້າປະຕິບັດບັນດາມາດຕະການຟື້ນຟູເສດຖະກິດ - ສັງຄົມໃຫ້ເປັນຢ່າງດີ, ຫວຽດນາມ ສາມາດຜ່ານຜ່າປີ 2023 ທີ່ເຕັມໄປດ້ວຍຄວາມຫຍຸ້ງຍາກນີ້ໄດ້ ແລະ ມຸ່ງໄປເຖິງປີ 2024 ຢ່າງຕັ້ງໜ້າກ່ວາອີກ.