ຮອບທີ 2 ການເຈລະຈາຂໍ້ຕົກລົງດ້ານການຄ້າ ພາຍຫຼັງທີ່ອັງກິດ ຖອນຕົວອອກຈາກສະຫະພາບເອີລົບ (ອີຢູ) ຫຼື ເອີ້ນວ່າ Brexit ຄາດວ່າຈະດຳເນີນໃນວັນທີ 18 ມີນາ ຢູ່ນະຄອນຫຼວງລອນດອນ, ປະເທດອັງກິດ ຖືກຍົກເລີກຍ້ອນມີຄວາມວິຕົກກັງວົນຕໍ່ໂລກພະຍາດໂຄວິດ-19. ໂດຍແທນການພົບປະກັນໂດຍກົງ, ບັນດາຝ່າຍພວມຊອກຫາວິທີອື່ນໆເພື່ອສືບຕໍ່ວຽກງານເຈລະຈາ. ເຖິງຢ່າງໃດກໍ່ຕາມ, ເມື່ອສັງເກດຮອບເຈລະຈາຄັ້ງທຳອິດເຊິ່ງດຳເນີນໄປຢູ່ບຣຸກແຊນ, ປະເທດແບນຊິກ ເມື່ອວັນທີ 02 ມີນາ ນັ້ນ,ຕາມບັນດານັກຊ່ຽວຊານໃຫ້ຂໍ້ສັງເກດວ່າ ວິວັດທະນາການເຈລະຈາຄັ້ງນີ້ຍັງປະສົບກັບຄວາມຫຍຸ້ງຍາກຫຼາຍຢ່າງ.

        ວິວັດການເຈລະຈາໄດ້ເລີ່ມເຄື່ອນໄຫວພາຍຫຼັງ ອັງກິດ ຖອນຕົວອອກຈາກອີຢູ ເປັນເວລາ 1 ເດືອນ. ທ່ານ Michel Barnier, ຫົວໜ້າຄະນະເຈລະຈາອີຢູ ແລະ ຄູ່ຮ່ວມຕຳແໜ່ງຝ່າຍ ອັງກິດ David Frost ໄດ້ດຳເນີນຮອບເຈລະຈາຄັ້ງທຳອິດໃນລະຫວ່າງວັນທີ 02 – 05 ມີນາ ຜ່ານມາ. ເປົ້າໝາຍເຊິ່ງອັງກິດ ແລະ ອີຢູ ໄດ້ວາງອອກນັ້ນແມ່ນບັນລຸໄດ້ຂໍ້ຕົກລົງກ່ຽວກັບການພົວພັນ 2 ຝ່າຍໃນອະນາຄົດ ກ່ອນທີ່ສິ້ນສຸດໄລຍະສົ່ງຜ່ານ ໃນວັນທີ 31 ທັນວາ 2020, ຈາກນັ້ນ ສ້າງເງື່ອນໄຂເພື່ອໃຫ້ບັນດາເນື້ອໃນໃນຂໍ້ຕົກລົງດັ່ງກ່າວເລີ່ມປະຕິບັດໃນປີ 2021.

        ຮ່າງຂໍ້ຕົກລົງຫວ່າງມໍ່ໆມານີ້ຂອງອີຢູ ກັບອັງກິດ ແມ່ນມຸ່ງໄປເຖິງເປົ້າໝາຍການແກ່ງແຍ້ງດ້ານການຄ້າຢ່າງສະເໝີພາບລະຫວ່າງບັນດາຝ່າຍ, ກໍ່ຄືການຮ່ວມມືຢ່າງແໜ້ນແຟ້ນກ່ຽວກັບນະໂຍບາຍການຕ່າງປະເທດ ແລະ ຄວາມໝັ້ນຄົງສາກົນ. ກ່ອນໜ້ານັ້ນ, ອີຢູ ໄດ້ສົ່ງຮ່າງຂໍ້ຕົກລົງການຄ້າທີ່ “ເຕັມໄປດ້ວຍຄວາມມັກໃຫຍ່ໄຝ່ສູງ” ກັບອັງກິດ ຕໍ່ລັດຖະສະພາເອີລົບ (EP) ແລະ ບັນດາປະເທດສະມາຊິກພິຈາລະນາ.

ບັນດາຄວາມບໍ່ລົງລອຍກັນຍາກທີ່ຈະແກ້ໄຂໄດ້

        ທີ່ຮອບເຈລະຈາຄັ້ງທຳອິດຢູ່ ແບນຊິກ, ມີຫຼາຍບັນຫາທີ່ຍັງມີຄວາມບໍ່ລົງລອຍກັນລະຫວ່າງ 2 ຝ່າຍທີ່ເຕື້ອງເຖິງໃນຮ່າງຂໍ້ຕົກລົງໄດ້ນຳມາປຶກສາຫາລື.

        ພາຍຫຼັງການເຈລະຈາຄັ້ງທຳອິດ, ທ່ານ Michel Barnier ເນັ້ນໜັກວ່າ, ປະຈຸບັນຍັງມີ 4 ຈຸດທີ່ມີຄວາມແຕກຕ່າງກັນຢ່າງໃຫຍ່ຫຼວງລະຫວ່າງອີຢູ ແລະ ອັງກິດ ນັ້ນແມ່ນ: ຝ່າຍອັງກິດ ບໍ່ຢາກຍົກອອກບັນດາຂໍ້ກຳນົດລວມແບບຜູກມັດດ້ານນິຕິກຳໃນຂົງເຂດແກ່ງແຍ້ງ ແລະ ດຳເນີນທຸລະກິດ; ອັງກິດ ປະຕິເສດພັນທະປະຕິບັດສົນທິສັນຍາເອີລົບ ກ່ຽວກັບສິດທິມະນຸດ, ພ້ອມກັນນັ້ນ ກໍ່ບໍ່ຮັບຮອງບັນດາຂໍ້ກຳນົດຂອງສານຍຸຕິທຳເອີລົບ ຢູ່ຜືນແຜ່ນດິນຂອງປະເທດຕົນ…

        ນັບແຕ່ກ່ອນມາຮອດປະຈຸບັນ, ອັງກິດ ມີແນວຄວາມຄິດສ້າງລະບົບກົດໝາຍສະເພາະຂອງຕົນ ພາຍຫຼັງ Brexit ແລະ ບໍ່ຢາກປະຕິບັດຕາມບັນດາຫຼັກການເຊິ່ງໄດ້ເອີ້ນວ່າ “ເດີ່ນຫຼີ້ນສະເໝີພາບ” ໂດຍອີຢູ ຈັດວາງ. ໃນຂະນະນັ້ນ, ອີຢູ ພວມມານະພະຍາຍາມຊຸກຍູ້ຂໍ້ຕົກລົງເຊິ່ງ ອັງກິດ ຕ້ອງຍອມຮັບການຕິດຕາມກວດກາຂອງອີຢູ ເພື່ອແລກເອົາສິດໄດ້ຊົມໃຊ້ບຸລິມະສິດເຂົ້າຕະຫຼາດອີຢູ.

ບໍ່ມີເວລາຫຼາຍອີກແລ້ວ

        ນັບແຕ່ຈຸດເວລາອັງກິດ ຖອນຕົວອອກຈາກອີຢູ ຢ່າງເປັນທາງການເມື່ອວັນທີ 31 ມັງກອນ ຜ່ານມາ, ພາຍຫຼັງ 47 ປີເປັນສະມາຊິກຂອງສຳພັນທະມິດດັ່ງກ່າວ, ລາຊະອານາຈັກອັງກິດ ໄດ້ກ້າວເຂົ້າສູ່ໄລຍະສົ່ງຜ່ານຈົນຮອດວັນທີ 31 ທັນວາ ຈະມາເຖິງ. ໃນໄລຍະນີ້, ອັງກິດ ຈະສືບຕໍ່ຈັດວາງບັນດາມາດຕະຖານອີຢູ.

        ຮອບເຈລະຈາຄັ້ງທຳອິດທີ່ດຳເນີນໄປແລ້ວນັ້ນ, ເຖິງວ່າບັນດານັກເຈລະຈາຂອງ 2 ຝ່າຍ ແລະ ບັນດານັກສັງເກດການໄດ້ໃຫ້ຂໍ້ສັງເກດວ່າ, ຮອບເຈລະຈາດຳເນີນໄປບົນຈິດໃຈສ້າງສັນ ແລະ ເຂັ້ມງວດ, ແຕ່ເພື່ອບັນລຸໄດ້ຂໍ້ຕົກລົງນັ້ນແມ່ນ “ຫຍຸ້ງຍາກ”. ຄາດວ່າ, ອັງກິດ ແລະ ອີຢູ ຈະຈັດຕັ້ງກອງປະຊຸມສຸດຍອດໃນເດືອນ ມິຖຸນາ ຈະມາເຖິງ ເພື່ອເປັນການຕົກລົງກັນວ່າຈະຕ້ອງສືບຕໍ່ເຈລະຈາອີກ ຫຼື ບໍ່. ມີນັກຊ່ຽວຊານຫຼາຍທ່ານໄດ້ກ່າວເຕືອນວ່າ, ອັງກິດ ແລະ ອີຢູ ຈະບໍ່ສາມາດບັນລຸໄດ້ຂໍ້ຕົກລົງກ່ອນຈຸດເວລາທ້າຍປີນີ້ ຖ້າຫາກ 2 ຝ່າຍບໍ່ມີຄວາມຜ່ອນສັ້ນຜ່ອນຍາວ.

        ຮອດເດືອນ ກໍລະກົດ 2020 ຈຶ່ງຮອດກຳນົດເວລາເພື່ອທ່ານນາຍົກລັດຖະມົນຕີອັງກິດ B.Johnson ຍົກອອກຄຳຕັດສິນທີ່ວ່າ ປະເທດອັງກິດ ຢາກຮັກສາບັນດາການພົວພັນກັບອີຢູ ເໝືອນເດີມຄືໃນປະຈຸບັນ ຮອດທ້າຍປີ 2021 ຫຼືບໍ່. ມາຮອດຈຸດເວລານີ້, ເລື່ອງບໍ່ພົບປະກັນໂດຍກົງເພື່ອດຳເນີນການເຈລະຈາແມ່ນວິທີບໍ່ສະດວກຢ່າງຍິ່ງ ແລະ 2 ຝ່າຍບໍ່ມີເວລາຫຼາຍເພື່ອຍົກອອກບັນດາຂໍ້ຕົກລົງສຸດທ້າຍ.