ຜູ້ທຸກຍາກຫລາຍຄົນໄດ້ຮັບເຮືອນຫລັງໃຫມ່ຈາກກອງທຶນຫນູນຊ່ວຍຂອງແນວໂຮມປະເທດຊາດ

ໃນສະພາບການເກີດໂລກລະບາດ, ຜູ້ທຸກຍາກຢູ່ ຫວຽດນາມ ກໍ່ຄືທຸກແຫ່ງຢູ່ໃນໂລກ ຍິ່ງຖືກຜົນສະທ້ອນຢ່າງຫນັກຫນ່ວງ. ຄອບຄົວໃກ້ທຸກຍາກບໍ່ມີເງິນສະສົມ ສະນັ້ນ ຍາກທີ່ຈະຫລີກລ້ຽງໄພທຸກຍາກກັບຄືນມາ. ຕາມການຄົ້ນຄ້ວາຫວ່າງແລ້ວນີ້ຂອງສູນວິເຄາະ ແລະ ຄາດຄະເນ (ສະຖາບັນດິດວິທະຍາສາດ ສັງຄົມຫວຽດນາມ)ແລ້ວ, ອັດຕາຜູ້ທຸກຍາກດ້ານລາຍຮັບຊົ່ວຄາວຢູ່ ຫວຽດນາມ ໄດ້ເພີ່ມຈາກລະດັບ 10% ກ່ອນເກີດໂລກລະບາດ ຂຶ້ນເປັນ 33,4 % ໃນເດືອນສິງຫາ ປີ 2021.

ເພື່ອຫນູນຊ່ວຍໂດຍດ່ວນໃຫ້ປະຊາຊົນ, ພິເສດແມ່ນຜູ້ທຸກຍາກ, ລັດຖະບານ ໄດ້ຜັນຂະຫຍາຍມະຕິເລກທີ 68 ດ້ວຍບ້ວງເງິນຫນູນຊ່ວຍ 26 ພັນຕຶ້ດົ່ງ ຫລື ຫວ່າງແລ້ວນີ້ ແມ່ນບ້ວງເງິນຫນູນຊ່ວຍ 38 ພັນຕື້ດົ່ງ ໂດຍຫັກຈາກກອງທຶນປະກັນໄພວ່າງງານ ຫນູນຊ່ວຍຄົນງານ ແລະ ວິສາຫະກິດ ທີ່ປະສົບກັບຄວາມຫຍຸ້ງຍາກ ຍ້ອນໂລກລະບາດໂຄວິດ -19. ອຳນາດການປົກຄອງບັນດາແຂວງ, ນະຄອນ ກໍ່ຫັກເງິນຈາກງົບປະມານທ້ອງຖິ່ນ ຫນູນຊ່ວຍປະຊາຊົນເພື່ອຜ່ານຜ່າຄວາມຫຍຸ້ງຍາກ.

ບັນດາອົງການຈັດຕັ້ງສັງຄົມ ລ້ວນແຕ່ມີການເຄື່ອນໄຫວແທດຈິງ ເພື່ອຫນູນຊ່ວຍຜູ້ປະສົບກັບຄວາມຫຍຸ້ງຍາກ, ຜູ້ມີຄວາມສ່ຽງ, ຄົນງານຖືກວ່າງງານ. ຄຽງຄູ່ການຫນູນຊ່ວຍໂດຍດ່ວນນັ້ນ, ບັນດາມາດຕະການຫນູນຊ່ວຍຜູ້ທຸກຍາກໄລຍະຍາວກໍ່ພວມໄດ້ຮັບການຜັນຂະຫຍາຍຈາກບັນດາອົງການມີບົດບາດຫນ້າທີ່.

ບໍ່ພຽງແຕ່ມີການເຂົ້າຮ່ວມຂອງສູນກາງ, ບັນດາແຂວງ, ນະຄອນ ໃນທົ່ວປະເທດກໍ່ມີຄວາມເປັນເຈົ້າການໃນການຄົ້ນຄ້ວາ, ສະເຫນີ, ປະຕິບັດບັນດານະໂຍບາຍຫນູນຊ່ວຍພິເສດ, ເໝາະສົມກັບເງື່ອນໄຂຂອງທ້ອງຖິ່ນ ເພື່ອແນໃສ່ຮັບປະກັນໃຫ້ປະຊາຊົນ, ເປັນຕົ້ນແມ່ນຄອບຄົວທຸກຍາກຜ່ານຜ່າໄລຍະຫຍຸ້ງຍາກນີ້.

ຢູ່ ຮ່າໂນ້ຍ, ໄລ່ຮອດຕົ້ນເດືອນ ຕຸລາ, ບັນດາອົງການມີບົດບາດຫນ້າທີ່ ໄດ້ເຊັນອະນຸມັດ ແລະ ປະຕິບັດການຫນູນຊ່ວຍສຳລັບ 8/8 ກຸ່ມເປົ້າໝາຍ. ມີເກືອບ 289.000 ຄົນ, ຄອບຄົວດຳເນີນທຸລະກິດໄດ້ຊົມໃຊ້ບັນດານະໂຍບາຍ . ງົບປະມານໄດ້ເຊັນອະນຸມັດຫນູນຊ່ວຍແມ່ນ ເກືອບ 300 ຕື້ດົ່ງ. ຈາກແຫລ່ງກຳລັງຂົນຂວາຍໃນສັງຄົມ, ທົ່ວນະຄອນ ໄດ້ຊ່ວຍເຫລືອ, ຫນູນຊ່ວຍໃຫ້ເກືອບ 1,06 ລ້ານເທື່ອຄົນ, ຄອບຄົວປະສົບກັບຄວາມຫຍຸ້ງຍາກໃນບໍລິເວນ ດ້ວຍຈຳນວນເງິນຫລາຍກວ່າ 304 ຕື້ດົ່ງ.

          ບັນດານະໂຍບາຍສຳລັບຜູ້ມີຄວາມສ່ຽງໃນສັງຄົມ, ເປັນຕົ້ນແມ່ນຜູ້ທຸກຍາກ ບໍ່ພຽງແຕ່ໃນຊ່ວງເວລາເກີດໂລກລະບາດໂຄວິດ 19, ເຄີຍແມ່ນແຜນນະໂຍບາຍສະເຫມີຕົ້ນສະເຫມີປາຍ ແລະ ລຸລ່ວງຂອງພັກ, ລັດ ໃນຫລາຍທົດສະວັດ. ສອງປີມານີ້ ເຖິງວ່າຖືກປະສົບກັບໄພທຳມະຊາດ, ໂລກລະບາດ, ເປັນຕົ້ນແມ່ນໂລກລະບາດໂຄວິດ 19 ກໍຕາມ ແຕ່ສະພາແຫ່ງຊາດ, ລັດຖະບານ ຫວຽດນາມ ຍັງຄົງເພີ່ມແຫລ່ງກຳລັງລົງທຶນໃຫ້ວຽກງານຫລຸດຜ່ອນຄວາມທຸກຍາກຂຶ້ນທົບ 2 ເທົ່າເມື່ອທຽບໃສ່ໄລຍະກ່ອນນີ້; 21% ງົບປະມານແຫ່ງລັດ ໄດ້ນຳໃຊ້ເຂົ້າໃນວຽກງານສະຫວັດດີການສັງຄົມ. ນີ້ແມ່ນລະດັບສູງສຸດເພື່ອທຽບກັບບັນດາປະເທດໃນ ອາຊຽນ.

ລັດຖະບານ ໄດ້ມີນະໂຍບາຍຫນູນຊ່ວຍໂດຍກົງໃຫ້ 13 ລ້ານຄົນຖືກຜົນສະທ້ອນຍ້ອນໂລກລະບາດໂຄວິດ -່19, ໃນນັ້ນ ເອົາໃຈໃສ່ເຖິງຜູ້ທຸກຍາກ. ຫວ່າງແລ້ວນີ້ ສະພາແຫ່ງຊາດ ໄດ້ຮັບຮອງເອົາມະຕິວ່າດ້ວຍການເຊັນອະນຸມັດແຜນນະໂຍບາຍລົງທຶນໂຄງການເປົ້າໝາຍແຫ່ງຊາດຫລຸດຜ່ອນຄວາມທຸກຍາກແບບຍືນຍົງໄລຍະ 2021-2025. ຍອດແຫລ່ງທຶນປະຕິບັດໂຄງການແມ່ນ 75 ພັນຕື້ດົ່ງ.

ພິເສດ ດ້ວຍຈິດໃຈ  “ທົ່ວປະເທດຮ່ວມແຮງຮ່ວມໃຈເພື່ອຜູ້ທຸກຍາກ -ບໍ່ໃຫ້ຜູ້ໃດຖືກປະໄວ້ຢູ່ທາງຫລັງ”, ຫວ່າງແລ້ວນີ້ ນາຍົກລັດຖະມົນຕີ ໄດ້ມີຄຳເຫັນຊີ້ນຳຍູ້ແຮງການປະຕິບັດບັນດານະໂຍບາຍຫລຸດຜ່ອນຄວາມທຸກຍາກແບບຍືນຍົງ, ປະຕິບັດນະໂຍບາຍ, ຫນ້າທີ່, ມາດຕະການຫລຸດຜ່ອນຄວາມອຶດຫິວທຸກຍາກຢ່າງມີປະສິດທິຜົນ, ສືບຕໍ່ເອົາໃຈໃສ່ຜູ້ທຸກຍາກ, ຜູ້ປະສົບກັບຄວາມຫຍຸ້ງຍາກ, ຜູ້ມີຄວາມສ່ຽງໃນສັງຄົມໃຫ້ດີກວ່າ, ເປັນຕົ້ນແມ່ນຜູ້ທຸກຍາກຖືກຜົນສະທ້ອນຈາກໄພທຳມະຊາດ, ໂລກລະບາດໂຄວິດ -19.

ວຽກງານຫລຸດຜ່ອນຄວາມທຸກຍາກແບບຍືນຍົງໃນໄລຍະປະຈຸບັນ ແມ່ນສິ່ງທ້າທາຍໃຫຍ່, ສົ່ງຜົນກະທົບບໍ່ແມ່ນຫນ້ອຍເຖິງບັນຫາຮັບປະກັນຊີວິດສັງຄົມ. ການເຄື່ອນໄຫວໃນເດືອນຈຸດສຸມເພື່ອຜູ້ທຸກຍາກ ແມ່ນເລີ່ມຕົ້ນແຕ່ ວັນທີ 17 ຕຸລາ ປີ 2021 ຮອດວັນທີ 18 ພະຈິກປີ 2021 ໂດຍແນວໂຮມປະເທດຊາດຫວຽດນາມ ປຸກລະດົມ, ຈະຫນູນຊ່ວຍຜູ້ທຸກຍາກຜ່ານຜ່າຄວາມຫຍຸ້ງຍາກໃນຊ່ວງເວລາເກີດໂລກລະບາດໂຄວິດ 19, ສືບຕໍ່ເຮັດໃຫ້ມູນເຊື້ອອຸມຊູຊ່ວຍເຫລືອເຊິ່ງກັນແລະກັນຂອງຊາດຫວຽດນາມ ຍິ່ງອຸດົມສົມບູນກວ່າອີກ.