(vovworld) – ໂດຍໄດ້ຮັບຄຳເຊີນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດສາທາລະນະລັດປະຊາຊົນຈີນ ສີຈີ້ນຜິງ, ວັນທີ 12/01, ທ່ານເລຂາທິການໃຫຍ່ຄະນະບໍລິການງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ເລີ່ມຕົ້ນການຢ້ຽມຢາມສປ.ຈີນ ຢ່າງເປັນທາງການ ເປັນເວລາ 4 ວັນ. ການຢ້ຽມຢາມເພື່ອແນໃສ່ສືບຕໍນຳການພົວພັນລະຫວ່າງຫວຽດນາມ - ຈີນ ໃຫ້ພັດທະນາຢ່າງປອດໃສ, ສະຖຽນລະພາບ ເພື່ອຜົນປະໂຫຍດຂອງປະຊາຊົນ 2 ປະເທດ, ເພື່ອສັນຕິພາບ, ຄວາມວັດທະນາຖາວອນຂອງພາກພື້ຶ້ນ ແລະ ໂລກ.
(ທ່ານເອກອັກຄະລັດຖະທູດຫວຽດນາມ ປະຈຳຈີນ ດັ້ງມິງຄອຍ) ການຢ້ຽມຢາມຈີນ ຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟຸຈ້ອງ ຖືກດຳເນີນກົງກັບໂອກາດ 2 ປະເທດກະກຽມສະເຫຼີມສະຫຼອງ 67 ປີແຫ່ງວັນສ້າງຕັ້ງການພົວພັນທາງການທູດ ແລະ ບຸນປີໃໝ່ປະຈຳຊາດຂອງ 2 ປະເທດ, ແມ່ນໂອກາດສຳຄັນເພື່ອໃຫ້ບັນດາການນຳສູງສຸດຂອງ 2 ພັກ, 2 ລັດ ໄດ້ພົບປະລົງເລິກ, ແລກປ່ຽນບັນດາມາດຕະການເພີ່ມທະວີການພົວພັນ, ກຳນົດທິດພັດທະນາຢ່າງປອດໄສ, ຍາວນານໃຫ້ການພົວພັນຫວຽດນາມ - ຈີນ.
ການຮ່ວມມືມິດຕະພາບຍັງແມ່ນທິດຕົ້ນຕໍ
ຫວຽດນາມ ແລະ ຈີນ ແມ່ນ 2 ປະເທດບ້ານໃກ້ເຮືອນຄຽງ, ມີສາຍພົວພັນມິດຕະພາບທີ່ເປັນມູນເຊື້ອມາແຕ່ດົນນານ. ນຳ້ໃຈມິດຕະພາບລະຫວ່າງ 2 ປະເທດ ໂດຍປະທານໂຮ່ຈິມິນ, ປະທານ ມາວເຈືອຕຸງ ພ້ອມກັບການນຳລຸ້ນຕ່າງໆຂອງ 2 ພັກ, 2 ລັດເພີ່ມພູນຄູນສ້າງ, ກາຍເປັນຊັບສົມບັດອັນລ້ຳຄ່າຂອງ 2 ຊາດ. ການພົວພັນລະຫວ່າງ 2 ປະເທດ ເຖິງວ່າບາງໄລຍະມີການຜັນປ່ຽນກໍ່ຕາມ, ແຕ່ການຮ່ວມມືມິດຕະພາບຍັງແມ່ນບັນຫາຕົ້ນຕໍ.
ພາຍຫຼັງສ້າງການພົວພັນເປັນປົກກະຕິເມື່ອປີ 1991, ການພົວພັນມິດຕະພາບລະຫວ່າງຫວຽດນາມ - ຈີນ ໄດ້ຮັບການພັດທະນາຢ່າງໄວໃນທຸກຂົງເຂດ. 2 ປະເທດໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານເມື່ອປີ 2008 ເພື່ອເປີດກວ້າງ ແລະ ເຮັດໃຫ້ການພົວພັນລະຫວ່າງຫວຽດນາມ - ຈີນ ເລິກເຊິ່ງກວ່າ, ແນໃສ່ຕອບສະໜອງຜົນປະໂຫຍດຂອງປະຊາຊົນ 2 ປະເທດ, ກໍ່ຄືເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ. ໃນໄລຍະຜ່ານມາ, 2 ຝ່າຍໄດ້ຮັກສາການພົວພັນແລກປ່ຽນ ແລະ ການພົບປະຂັ້ນສູງເປັນປະຈຳ ພາຍໃຕ້ຮູບການທີ່ມີໄຫວພິບ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການຮ່ວມມືຢ່າງແທດຈິງ, ນຳການພົວພັນລະຫວ່າງ 2 ປະເທດພັດທະນາຢ່າງປອດໄສ ແລະ ໝັ້ນຄົງ. ພິເສດ, ການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖິ່ນ 2 ປະເທດໃຫ້ສືບຕໍ່ໄດ້ຮັບການຮັກສາ ແລະ ນຳມາເຊິ່ງປະສິດທິຜົນຢ່າງແທດຈິງ. ທ່ານເອກອັກຄະລັດຖະທູດຫວຽດນາມ ປະຈຳຈີນ ດັ້ງມິງຄອຍ, ຢືນຢັນວ່າ.
“ການຮ່ວມມືລະຫວ່າງບັນດາທ້ອງຖິ່ນຂອງຫວຽດນາມ ແລະ ຈີນ ແມ່ນພາກສ່ວນສຳຄັນທີ່ສຸດ. ນັບແຕ່ປີ 1991 ມາຮອດປະຈຸບັນ, ພາຍຫຼັງ 2 ປະເທດໄດ້ສ້າງຕັ້ງພົວພັນເປັນປົກກະຕິ, ການຮ່ວມມືລະຫວ່າງບັນດາທ້ອງຖິ່ນ, ໂດຍສະເພາະແມ່ນ 7 ແຂວງເຂດຊາຍແດນທາງພາກເໜືອ ແລະ ບາງນະຄອນໃຫຍ່ອື່ນຄື: ຮ່າໂນ້ຍ, ນະຄອນໂຮ່ຈິມິນ, ບິ່ງເຢືອງ, ກັບບັນດາທ້ອງຖິ່ນຂອງຈີນ ໄດ້ຮັບການພັດທະນາຢ່າງແຮງ. ການຮ່ວມມືດັ່ງກ່າວໄດ້ປະກອບສ່ວນເພີ່ມທະວີການແລກປ່ຽນລະຫວ່າງ 2 ຝ່າຍ, ບໍ່ພຽງແຕ່ດ້ານການຄ້າ, ການລົງທຶນເທົ່ານັ້ນ, ຫາກນັບທັງການພົບປະແລກປ່ຽນປະຊາຊົນ, ບຳລຸງສ້າງພະນັກງານອີກດ້ວຍ”.
ການພົວພັນດ້ານເສດຖະກິດ, ການຄ້າໄດ້ຮັບການພັດທະນາຢ່າງເປັນປົກກະຕິ, ປອດໄສ, ຕາມທິດນັບມື້ນັບມີຄວາມດຸນດ່ຽງກວ່າ. ປີ 2017, 2 ຝ່າຍສູ້ຊົນນຳວົງເງິນການຄ້າ 2 ສົ້ນໃຫ້ບັນລຸ 100 ຕື້ USD. ແຂກທ່ອງທ່ຽວຈີນ ກວມສ່ວນຫຼາຍຕະຫຼາດທ່ອງທ່ຽວຂອງຫວຽດນາມ. ປີ 2016, ມີນັກທ່ອງທ່ຽວຈີນ ກວ່າ 2,3 ລ້ານເທື່ອຄົນມາຢ້ຽມຢາມຫວຽດນາມ, ເພີ່ມຂຶ້ນເກືອບ 60% ເມື່ອທຽບໃສ່ໄລຍະດຽວກັນຂອງປີ 2015. ການພົວພັນແລກປ່ຽນປະຊາຊົນດຳເນີນໄປຢ່າງຟົດຟື້ນມ່ວນຊື່ນ, ປະກອບສ່ວນເຂົ້າໃນການຊຸກຍູ້ຄວາມເຂົ້າອົກເຂົ້າໃຈເຊິ່ງກັນແລະກັນລະຫວ່າງປະຊາຊົນ 2 ປະເທດ.
ເດັດດ່ຽວມານະພະຍາຍາມແກ້ໄຂຄວາມບໍ່ລົງລອຍກັນ
ຄຽງຂ້າງບັນດາຜົນງານທີ່ບັນລຸໄດ້, 2 ປະເທດຍັງຄົງມີບັນດາຄວາມບໍ່ລົງລອຍກັນ, ພິເສດແມ່ນບັນຫາທະເລຕາເວັນອອກ, ຮຽກຮ້ອງໃຫ້ທັງ 2 ຝ່າຍຕ້ອງເດັດດ່ຽວມານະພະຍາຍາມແກ້ໄຂຄວາມຫຍຸ້ງຍາກ. ບັນດາການຜັນແປຫວ່າງແລ້ວນີ້ຢູ່ທະເລຕາເວັນອອກ ຍິ່ງສະແດງໃຫ້ເຫັນຄວາມຈຳເປັນຕ້ອງແກ້ໄຂບັນຫາໂດຍສັນຕິວິທີ, ບົນພື້ນຖານກົດໝາຍສາກົນ. ການນຳຂັ້ນສູງ 2 ພັກ, 2 ລັດ ໄດ້ມີແລກປ່ຽນເປັນຫຼາຍຄັ້ງ ແລະ ບັນລຸໄດ້ຄວາມຮັບຮູ້ລວມທີ່ສຳຄັນ ກ່ຽວກັບການແກ້ໄຂຄວາມບໍ່ລົງລອຍກັນ ແລະ ການຂັດແຍ້ງກັນຢູ່ທະເລຢ່າງສົມເຫດສົມຜົນ ບົນພື້ນຖານເຄົາລົບຜົນປະໂຫຍດອັນຊອບທຳຂອງກັນ, ເຄົາລົບກົດໝາຍສາກົນ. 2 ຝ່າຍເຫັນດີປະຕິບັດບັນດາຄວາມຮັບຮູ້ລວມ ແລະ ຂໍ້ຕົກລົງຂັ້ນສູງ, “ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນດາບັນຫາບົນທະເລຫວຽດນາມ - ຈີນ”; ນຳໃຊ້ ກົນໄກເຈລະຈາຂັ້ນລັດຖະບານ ກ່ຽວກັບເຂດຊາຍແດນຜືນແຜ່ນດິນຫວຽດນາມ - ຈີນ ໃຫ້ເປັນຢ່າງດີ. 2 ຝ່າຍໄດ້ເຫັນດີພ້ອມກັນຄວບຄຸມຄວາມບໍ່ລົງລອຍກັນບົນທະເລໃຫ້ດີ, ບໍ່ມີການກະທຳກໍຄວາມສັບສົນ, ເປີດກວ້າງການຂັດແຍ້ງ; ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ຊຸກຍູ້ເພື່ອບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ, ແກ້ໄຂບັນດາການຂັດແຍ້ງກັນໂດຍສັນຕິວິທີ, ເໝາະສົມກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982. ກ່ຽວກັບບັນຫານີ້, ທ່ານເອກອັກຄະລັດຖະທູດຫວຽດນາມ ປະຈຳຈີນ ດັ້ງມິງຄອຍ ຖືວ່າ.
“ຈີນ ແມ່ນປະເທດໃຫຍ່, ພວມບືນຕົວຂຶ້ນຢ່າງແຮງ. ນັບແຕ່ປີ 2010, ຈີນ ໄດ້ກາຍເປັນພື້ນຖານເສດຖະກິດໃຫຍ່ອັນດັບ 2 ຂອງໂລກ ແລະ ປະຈຸບັນ ໃນຫຼາຍຂົງເຂດຄື: ວິທະຍາສາດ, ເຕັກໂນໂລຊີ, ຈີນ ບັນລຸໄດ້ບັນດາຜົນງານຢ່າງໃຫຍ່ຫຼວງ. ແຕ່ພວກຂ້າພະເຈົ້າກໍຖືວ່າ, ຈີນ ພຽງແຕ່ພັດທະນາ ແລະ ເຕີບໃຫຍ່ຢ່າງແຮງໄດ້ເມື່ອພາກພື້ນອາຊີ - ປາຊີຟິກ ມີສັນຕິພາບ ແລະ ສະຖຽນລະພາບ ແລະ ນີ້ກໍ່ແມ່ນຜົນປະໂຫຍດຂອງຈີນ. ໃນການແລກປ່ຽນ, ພວກຂ້າພະເຈົ້າລ້ວນແຕ່ຊີ້ແຈ້ງສິ່ງດັ່ງກ່າວຢ່າງຈະແຈ້ງ ແລະ ຈີນ ຕ້ອງເຮັດແນວໃດເພື່ອໃຫ້ໂລກ ແລະ ພາກພື້ນເຫັນໄດ້ຢ່າງຈະແຈ້ງວ່າ ຈີນ ແມ່ນປະເທດໃຫຍ່ພັດທະນາຢ່າງແຮງ, ແຕ່ກໍມີຄວາມຕັ້ງໜ້າປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບຢູ່ພາກພື້ນ”.
ການຢ້ຽມຢາມຈີນ ເປັນຄັ້ງທຳອິດນັບແຕ່ພາຍຫຼັງກອງປະຊຸມໃຫຍ່ຄັ້ງທີ 12 ຂອງພັກ ຂອງທ່ານເລຂາທິການໃຫຍ່ ຫງວຽນຟຸຈ້ອງ ຄັ້ງນີ້ ມີຄວາມໝາຍສຳຄັນພິເສດ, ຢືນຢັນວ່າຍາມໃດພັກ, ລັດ ແລະ ປະຊາຊົນຫວຽດນາມ ກໍຖືເປັນສຳຄັນການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືສະເໝີພາບຕ່າງຝ່າຍຕ່າງມີຜົນປະໂຫຍດກັບຈີນ, ຖືນີ້ແມ່ນໜຶ່ງໃນບັນດາບຸລິມະສິດແຖວໜ້າໃນນະໂຍບາຍການຕ່າງປະເທດຂອງຫວຽດນາມ ແລະ ຍາມໃດກໍ່ປາດຖະໜາຢາກໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ ພັດທະນາຢ່າງປອດໄສ, ມີສະຖຽນລະພາບ, ໝັ້ນຄົງຍາວນານ, ເພື່ອຜົນປະໂຫຍດຂອງປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.