ປີ 2017, ຢູ່ ເວທີປາໄສຮ່ວມມືເສດຖະກິດ ອາຊີ - ປາຊີຟິກ (APEC), ທ່ານປະທານາທິບໍດີ ອາເມລິກາ Donald Trum ໄດ້ເຕື້ອງເຖິງແນວຄວາມຄິດສ້າງ ພາກພື້ນ ມະຫາສະໝຸດ ອິນເດຍ - ປາຊີຟິກ ໃຫ້ມີຄວາມເສລີ ແລະ ເປີດກວ້າງ. ຮອດເດືອນກັນຍາ 2019, ກະຊວງການຕ່າງປະເທດ ອາເມລິກາ ໄດ້ປະກາດບົດລາຍງານມີຄວາມໜາ 32 ໜ້າ ກ່ຽວກັບພາກພື້ນ ມະຫາສະໝຸດ ອິນເດຍ - ປາຊີຟິກ ທີ່ເສລີ ແລະ ເປີດກວ້າງ. ບົດລາຍງານໄດ້ຢັ້ງຢືນກ່ຽວກັບວິໄສທັດ ແລະ ວິທີການສຳຜັດຂອງ ອາເມລິກາ ແມ່ນຕິດພັນຢ່າງແໜ້ນແຟ້ນກັບແຜນການ ປາຊີຟິກ ທີ່ເສລີ ແລະ ເປີດກວ້າງຂອງ ຍີ່ປຸ່ນ, ກັບ ນະໂຍບາຍການກະທຳ ມຸ່ງໄປສູ່ທິດຕາເວັນອອກຂອງ ອິນເດຍ, ກັບແຜນການ ມະຫາສະໝຸດອິນເດຍ - ປາຊີຟິກ ຂອງ ອົດສະຕາລີ, ກັບ ນະໂຍບາຍທາງທິດໃຕ້ ໃໝ່ ຂອງ ສ.ເກົາຫຼີ ແລະ ນະໂຍບາຍໃໝ່ ທາງທິດໃຕ້ ຂອງ ໄຕ້ຫວັນ (ຈີນ).

ລັດຖະມົນຕີການຕ່າງປະເທດ ກຸ່ມ 4 ປະເທດ QUAD (ພາບ: AFP)

        ເພາະສະນັ້ນ, ກອງປະຊຸມໂດຍກົງ ຂອງບັນດາລັດຖະມົນຕີການຕ່າງປະເທດ ກຸ່ມ 4 ປະເທດ QUAD ທີ່ຈັດຂຶ້ນຢູ່ ໂຕກຽວ ໃນວັນທີ 6 ຕຸລາ ໄດ້ຮັບຖືວ່າ ແມ່ນຄວາມມານະພະຍາຍາມຫຼ້າສຸດຂອງ ກຸ່ມ 4 ປະເທດດັ່ງກ່າວ ໃນການ ຢັ້ງຢືນວິໄສທັດສະເໝີຕົ້ນສະເໝີປາຍ ແລະ ຈະແຈ້ງຂອງກຸ່ມ ກ່ຽວກັບພາກພື້ນ ມະຫາສະໝຸດອິນເດຍ - ປາຊີຟິກ ທີ່ເສລີ ແລະ ເປີດກວ້າງ ບົນພື້ນຖານກົດໝາຍສາກົນ.

ເຄົາລົບກົດໝາຍ: ທັດສະນະຈະແຈ້ງ ແລະ ສະເໝີຕົ້ນສະເໝີປາຍຂອງ ກຸ່ມ 4 ປະເທດ QUAD

ໃນກອງປະຊຸມໂດຍກົງ ຢູ່ ໂຕກຽວ, ລັດຖະມົນຕີການຕ່າງປະເທດ 4 ປະເທດ ໄດ້ເຫັນດີເພີ່ມທະວີຄວາມສາມັກຄີ ເພື່ອປະຕິບັດ ວິໄສທັດສ້າງພາກພື້ນ ມະຫາສະໝຸດ ອິນເດຍ - ປາຊີຟິກ ໃຫ້ມີຄວາມເສລີ ແລະ ເປີດກວ້າງ, ພ້ອມທັງເພີ່ມທະວີການຮ່ວມສຳພັນກັບຫຼາຍປະເທດອື່ນໆ. ພິເສດ, ດ້ວຍຖານະເປັນປະເທດເຈົ້າພາບ, ຍີ່ປຸ່ນ  ໄດ້ຊີ້ແຈ້ງວ່າ, ໃນສະພາບການຄວາມເປັນລະບຽບຮຽບຮ້ອຍຂອງໂລກໃນຊຸມປີມໍ່ໆມານີ້ ພວມປະເຊີນໜ້າກັບສິ່ງທ້າທາຍໃນຫຼາຍຂົງເຂດ ແລະ ໂລກລະບາດ ໂຄວິດ - 19 ຍິ່ງເຮັດໃຫ້ສະພາບການດັ່ງກ່າວຮ້າຍແຮງຂຶ້ນຕື່ມ, 4 ປະເທດມີຈຸດປະສົງລວມ ແມ່ນ ເພີ່ມທະວີຄວາມເປັນລະບຽບຮຽບຮ້ອຍໃນໂລກ ແລະ ພາກພື້ນ ມະຫາສະໝຸດອິນເດຍ - ປາຊີຟິກ ທີ່ເສລີ ແລະ ເປີດກວ້າງ, ແມ່ນວິໄສທັດສວມບົດບາດສຳຄັນໃນການປະຕິບັດເປົ້າໝາຍດັ່ງກ່າວ. ກ່ອນໜ້ານັ້ນ, ໃນກອງປະຊຸມຖະແຫຼງຂ່າວ ທີ່ຈັດຂຶ້ນໃນວັນທີ 29 ກັນຍາ, ທ່ານລັດຖະມົນຕີການຕ່າງປະເທດ Motegi ກໍໃຫ້ຮູ້ວ່າ, ໜຶ່ງໃນບັນດາເນື້ອໃນສຳຄັນຂອງກອງປະຊຸມ ກຸ່ມ 4 ປະເທດ QUAD ຢູ່ ໂຕກຽວ ແມ່ນ ເພີ່ມທະວີການຮ່ວມສໍາພັນ ເພື່ອປະຕິບັດວິໄສທັດ ພາກພື້ນມະຫາສະໝຸດ ອິນເດຍ - ປາຊີຟິກ ເສລີ ແລະ ເປີດກວ້າງ ໃຫ້ປະກົດຜົນເປັນຈິງ, ໃນສະພາບສະຖານະການຢູ່ທະເລຕາເວັນອອກ ແລະ ທະເລຮວາຕຸງ ພວມມີການຜັນແປຢ່າງສັບສົນ”.

        ກ່ອນວັນດຳເນີນກອງປະຊຸມຢູ່ໂຕກຽວ ໜຶ່ງວັນ, ວັນທີ 5 ຕຸລາ, ກະຊວງການຕ່າງປະເທດ ອາເມລິກາ  ໄດ້ອອກແຈ້ງການ ໂດຍເນັ້ນໜັກເຖິງວິໄສທັດລວມ ຂອງ ອາເມລິກາ ແລະ ຍີ່ປຸ່ນ ກ່ຽວກັບ ພາກພື້ນ ມະຫາສະໝຸດ ອິນເດຍ - ປາຊີຟິກ ທີ່ເສລີ ແລະ ເປີດກວ້າງ.  ວໍຊີງຕັນ ຢັ້ງຢືນວ່າ ຈະພ້ອມກັບ ໂຕກຽວ ປະຕິບັດບັນດາເປົ້າໝາຍລວມ, ດ້ວຍວິທີສຳຜັດອີງໃສ່ກົດໝາຍ ແລະ ເຄົາລົບກົດໝາຍສາກົນ. ໃນວັນດຽວກັນ, ທ່ານນາຍົກລັດຖະມົນຕີ ຍີ່ປຸ່ນ Suga  Yoshihide  ແລະ ທ່ານປະທານາທິບໍດີຝລັ່ງ Emmanuel Macron ໄດ້ເຫັນດີເພີ່ມທະວີການຮ່ວມມືເພື່ອຫັນວິໄສທັດສ້າງພາກພື້ນ ມະຫາສະໝຸດອິນເດຍ - ປາຊີຟິກ ທີ່ເສລີ ແລະ ເປີດກວ້າງ ໃຫ້ປະກົດຜົນເປັນຈິງ. ລະອຽດແມ່ນ, ໃນການໂອ້ລົມທາງໂທລະສັບທີ່ແກ່ຍາວເປັນເວລາ 25 ນາທີ, ການນຳສອງທ່ານໄດ້ຢັ້ງຢືນຈະເພີ່ມທະວີການຮ່ວມມືເພື່ອຫັນວິໄສທັດສ້າງພາກພື້ນ ມະຫາສະໝຸດອິນເດຍ ປາຊີຟິກ ທີ່ເສລີ ແລະ ເປີດກວ້າງ ໃຫ້ປະກົດຜົນເປັນຈິງໂດຍອີງໃສ່ທັດສະນະ ແບ່ງປັນບັນດາຄຸນຄ່າພື້ນຖານກ່ຽວກັບຄວາມເສລີ, ປະຊາທິປະໄຕ ແລະ ຄຸ້ມຄອງໂດຍອີງໃສ່ກົດໝາຍ.

ການເຈລະຈາລະຫວ່າງລັດຖະມົນຕີການຕ່າງປະເທດ ອາເມລິກາ ແລະ ຍີ່ປຸ່ນ (ພາບ:KYODO)

ກໍໃນທັດສະນະດັ່ງກ່າວ, ພາຍຫຼັງກອງປະຊຸມອອນລາຍ ບັນດາເຈົ້າໜ້າທີ່ທາງການທູດ ຂອງກຸ່ມ4 ປະເທດ QUAD ທີ່ຖືກຈັດຂຶ້ນໃນວັນທີ 25  ກັນຍາ, ກະຊວງການຕ່າງປະເທດ ອິນເດຍ ໄດ້ອອກຖະແຫຼງການ ໂດຍຢັ້ງຢືນວ່າ ບັນດາເຈົ້າໜ້າທີ່ກຸ່ມ 4 ປະເທດ QUAD ໄດ້ຢັ້ງຢືນຄືນໃໝ່ຄຳໝັ້ນສັນຍາມຸ່ງໄປເຖິງການສ້າງພາກພື້ນ ມະຫາສະໝຸດ ອິນເດຍ - ປາຊີຟິກ ໃຫ້ມີຄວາມເສລີ, ເປີດກວ້າງ, ວັດທະນາຖາວອນ ແລະ ກວມລວມ, ໂດຍອີງໃສ່ບັນດາຄຸນຄ່າ ແລະ ຫຼັກການລວມ ກໍຄື ເຄົາລົບກົດໝາຍສາກົນ.

        ຄວາມສົນໃຈລວມຂອງປະຊາຄົມສາກົນ ແລະ ທີ່ຕັ້ງບົດບາດຂອງ ອາຊຽນ

        ສິ່ງທີ່ໜ້າສົນໃຈນັ້ນແມ່ນ, ເມື່ອກ່າວຄຳເຫັນຕໍ່ວົງການສື່ມວນຊົນ ພາຍຫຼັງກອງປະຊຸມເມື່ອວັນທີ 6 ຕຸລາ, ທ່ານລັດຖະມົນຕີການຕ່າງປະເທດ ຍີ່ປຸ່ນ Toshimitsu Motegi ໄດ້ຢັ້ງຢືນວ່າ ຂໍ້ລິເລີ່ມ ມະຫາສະໝຸດ ອິນເດຍ - ປາຊີຟິກ ທີ່ເສລີ ແລະ ເປີດກວ້າງ ເຊິ່ງ ຍີ່ປຸ່ນ ເປັນຜູ້ລິເລີ່ມນັ້ນ ໄດ້ແຜ່ຂະຫຍາຍອອກສູ່ປະຊາຄົມສາກົນຢູ່ໃນລະດັບບໍ່ເຄີຍມີມາກ່ອນ. ຄຳຖະແຫຼງດັ່ງກ່າວຂອງທ່ານລັດຖະມົນຕີການຕ່າງປະເທດ ຍີ່ປຸ່ນ ໄດ້ຮັບຄໍາແບ່ງປັນຈາກນັກໄຈ້ແຍກຫຼາຍຄົນ. ໃນນັ້ນ, ວົງການນັກໄຈ້ແຍກມີຄວາມເອົາໃຈໃສ່ເປັນພິເສດເຖິງ ອາຊຽນ, ເຊິ່ງເປັນໂຄງປະກອບສຳຄັນຂອງພາກພື້ນ ມະຫາສະໝຸດອິນເດຍ - ປາຊີຟິກ.

        ໃນຕົວຈິງ, ເດືອນ ມິຖຸນາ 2019, ອາຊຽນ ໄດ້ຮັບຮອງເອົາ “ວິໄສທັດ ມະຫາສະໝຸດ ອິນເດຍ - ປາຊີຟິກ” ໃນກອງປະຊຸມສຸດຍອດ ອາຊຽນ ຄັ້ງທີ 34. ນີ້ໄດ້ຮັບຖືວ່າ ແມ່ນບາດກ້າວຍຸດທະສາດ ເພື່ອແນໃສ່ຮັກສາບົດບາດເປັນໃຈກາງຂອງ ອາຊຽນ ໃນການຮັບປະກັນສັນຕິພາບ, ຄວາມໝັ້ນຄົງ ແລະ ສະຖຽນລະພາບ ຢູ່ ອາຊີຕາເວັນອອກສ່ຽງໃຕ້ ໃນວິໄສທັດລວມ ກ່ຽວກັບ ພາກພື້ນ ມະຫາສະໝຸດອິນເດຍ - ປາຊີຟິກ ທີ່ເສລີ ແລະ ເປີດກວ້າງ ບົນພື້ນຖານກົດໝາຍສາກົນ. ສິ່ງດັ່ງກ່າວເປັນການອະທິບາຍໃຫ້ຄຳຖາມທີ່ວ່າ ເປັນຫຍັງກຸ່ມ 4 ປະເທດ QUAD ຍາມໃດກໍເຊີດຊູບົດບາດຂອງ ອາຊຽນ ໃນວິໄສທັດ ກ່ຽວກັບພາກພື້ນ ມະຫາສະໝຸດອິນເດຍ - ປາຊີຟິກ ທີ່ເສລີ ແລະ ເປີດກວ້າງຂອງຕົນ.  ຕາມຖະແຫຼງການທີ່ໄດ້ຍົກອອກໃນວັນທີ 25 ກັນຍາ ຂອງກະຊວງການຕ່າງປະເທດ ອິນເດຍ ແລ້ວ, ບັນດາເຈົ້າໜ້າທີ່ທາງການທູດຂອງກຸ່ມ QUAD ໄດ້ສະແດງຄວາມພ້ອມເພື່ອເຮັດວຽກກັບ ອາຊຽນ ແລະ ບັນດາປະເທດອື່ນໆ ແນໃສ່ປະຕິບັດວິໄສທັດລວມ ແລະ ມີແງ່ຫວັງໃຫ້ແກ່ພາກພື້ນ ມະຫາສະໝຸດ ອິນເດຍ - ປາຊີຟິກ. ພ້ອມກັນນັ້ນ, ກຸ່ມ 4 ປະເທດ QUAD ກໍໄດ້ຢ້ຳຄືນການສະໜັບສະໜູນຢ່າງໜັກແໜ້ນສຳລັບບັນດາກົນໄກ ໂດຍ ອາຊຽນ ເປັນໃຈກາງ ແລະ ອາຊຽນ ນຳພາ, ພິເສດແມ່ນ ກອງປະຊຸມສຸດຍອດ ອາຊີຕາເວັນອອກ, ໃນໂຄງສ້າງພາກພື້ນ ມະຫາສະໝຸດ ອິນເດຍ - ປາຊີຟິກ./.