ລະບົບທໍ່ສົ່ງເຊື້ອໄຟຢູ່ Lubmin, ເຢລະມັນ (ພາບປະກອບ: AFP/TTXVN)

        ຕາມຂໍ້ຕົກລົງແລ້ວ, ບັນດາປະເທດຈະສະໝັກໃຈຫລຸດຜ່ອນຄວາມຕ້ອງການນຳໃຊ້ອາຍແກັດແຕ່ເດືອນ ສິງຫາ 2022 ຫາເດືອນ ມີນາ 2023 ເມື່ອທຽບໃສ່ລະດັບການຊົມໃຊ້ສະເລ່ຍໄລຍະ 2017 – 2021. ເປົ້າໝາຍຫລຸດຜ່ອນນີ້ອາດຈະກາຍເປັນຂໍ້ບັງຄັບໃນກໍລະນີຮີບດ່ວນກ່ຽວກັບແຫຼ່ງສະໜອງ.

ບັນດາຄຳເຫັນທີ່ກົງກັນຂ້າມ

        ບັນດານັກຊ່ຽວຊານຖືວ່າ ລະດູໜາວ 2022 – 2023 ຈະປະສົບກັບຄວາມຫຍຸ້ງຍາກຫຼາຍຢ່າງ, ພິເສດ, ຖ້າສະພາບອຸນຫະພູມຕ່ຳຫຼາຍ. ເປົ້າໝາຍໃນການຫລຸດຜ່ອນການນຳໃຊ້ອາຍແກັດ 15% ແມ່ນເພື່ອແນໃສ່ຊ່ວຍໃຫ້ ອີຢູ ຜ່ານຜ່າລະດູໜາວນີ້ໄດ້.

        ຕາມການຄາດຄະເນຂອງຄະນະກຳມະການເອີລົບ ແລ້ວ, ຖ້າຫາກ ສະຫະພາບເອີລົບ (ອີຢູ) ຫລຸດຜ່ອນການນຳໃຊ້ອາຍແກັດ 15%, ບັນດາປະເທດສະມາຊິກສະຫະພາບເອີລົບ ອາດສາມາດປະຢັດອາຍແກັດໄດ້ປະມານ 45 ຕື້ແມັດກ້ອນ. ຕົວເລກດັ່ງກ່າວອາດຈະຕ່ຳກ່ວາຫຼາຍ ຖ້າຫາກບັນດາປະເທດສະມາຊິກນຳໃຊ້ສິດຍົກເວັ້ນ ຫຼື ເຂົ້າຮ່ວມດ້ວຍລະດັບໜ້ອຍກ່ວາ. ວົງການເຈົ້າໜ້າທີ່ ອີຢູ ເຊື່ອໝັ້ນວ່າ ໃນຂະນະທີ່ທຸກປະເທດສະມາຊິກນຳໃຊ້ສິດຍົກເວັ້ນນັ້ນ, ແຜນການນີ້ຍັງຊ່ວຍໃຫ້ສະຫະພາບເອີລົບຜ່ານຜ່າລະດູໜາວດ້ວຍລະດັບຄວາມໜາວທຳມະດາ.

        ແຜນການຮັດເຂັມຂັດກ່ຽວກັບການນຳໃຊ້ອາຍແກັດ ເບື້ອງຕົ້ນຄາດວ່າຈະແກ່ຍາວເປັນເວລາສອງປີ, ແຕ່ລັດຖະບານບັນດາປະເທດສະມາຊິກ ອີຢູ ໄດ້ຫລຸດຜ່ອນເວລາລົງເຫຼືອພຽງປີໜຶ່ງເທົ່ານັ້ນ. ພາຍຫຼັງລະດູໜາວປີນີ້, ເຂົາເຈົ້າຈະປຶກສາຫາລືແຜນການອາຍແກັດຄັ້ງຕໍ່ໄປໃຫ້ແກ່ລະດູໜາວ 2023 – 2024.

        ກ່ອນທີ່ຈັດກອງປະຊຸມໃນວັນທີ 26 ກໍລະກົດ, ວົງການເຈົ້າໜ້າທີ່ ອີຢູ ຍອມຮັບວ່າ: ຢ່າງໜ້ອຍສຸດມີ 12 ໃນຈຳນວນ 27 ປະເທດສະມາຊິກມີຄວາມວິຕົກວັງວົນກ່ຽວກັບຂໍ້ສະເໜີຫລຸດຜ່ອນປະລິມານການນຳໃຊ້ອາຍແກັດ. ວັນທີ 21 ກໍລະກົດ, ທ່ານ  Joao Galamba, ລັດຖະມົນຕີພະລັງງານ ປອກຕຸຍການ ໄດ້ເນັ້ນໜັກວ່າ: Lisbon “ຄັດຄ້ານ” ແຜນການຂອງ ອີຢູ ຍ້ອນວ່າ “ຂໍ້ສະເໜີນີ້ບໍ່ຄິດໄລ່ເຖິງຄວາມແຕກຕ່າງກັນລະຫວ່າງປະເທດຕ່າງໆ”. ທ່ານ Kostas Skrekas, ລັດຖະມົນຕີພະລັງງານ ເກັຼກ ເວົ້າວ່າ ປະເທດນີ້ຄັດຄ້ານການບັງຄັບໃຫ້ປະຕິບັດເປົ້າໝາຍຫລຸດຜ່ອນນີ້ ກໍ່ຄືບໍ່ເຫັນດີເຫັນພ້ອມກັບລະດັບຈຳກັດການນຳໃຊ້ອາຍແກັດທີ່ ອີຢູ ປະກາດ. ທ່ານນາງ Anna Moskwa, ລັດຖະມົນຕີ ດິນຟ້າອາກາດ ໂປໂລຍ ໄດ້ຊີ້ແຈ້ງວ່າ: “ບໍ່ສາມາດຍອມຮັບຄຳຕັດສິນໃດໆທີ່ຈັດວາງກັບບັນດາປະເທດ. ຄວາມໝັ້ນຄົງດ້ານພະລັງງານແມ່ນສິດພິເສດຂອງປະເທດນັ້ນ”. ເຖິງວ່າ, ໄດ້ປ່ອນບັດສະໜັບສະໜູນຂໍ້ຕົກລົງນີ້, ແຕ່ທ່ານນາງລັດຖະມົນຕີດິນຟ້າອາກາດ ໂປໂລຍ ຍັງຢັ້ງຢືນວ່າ: ຂະແໜງອຸດສາຫະກຳຂອງປະເທດນີ້ອາດຈະບໍ່ຖືກບັງຄັບໃຫ້ຫລຸດຜ່ອນການນຳໃຊ້ ອາຍແກັດ ເພື່ອຊ່ວຍໜູນປະເທດອື່ນໄດ້. ສ່ວນຮຸງກາຣີ, ເຊິ່ງເປັນປະເທດໜຶ່ງດຽວທີ່ຄັດຄ້ານຂໍ້ຕົກລົງນີ້ ໄດ້ປະກາດວ່າ, ເອກະສານສະບັບນີ້ “ບໍ່ເປັນທຳ, ບໍ່ມີຜົນປະໂຫຍດ, ບໍ່ສາມາດປະຕິບັດໄດ້ ແລະ ມີຜົນຮ້າຍ”.

        ກ່ອນໜ້ານັ້ນ, ບັນດາປະເທດສະມາຊິກ ອີຢູ ກໍ່ໄດ້ປະຕິເສດຂໍ້ສະເໜີຂອງຄະນະກຳມະການເອີລົບ (ອີຊີ) ກ່ຽວກັບການມອບສິດໃຫ້ແກ່ ບຣຸກແຊນ ຈັດວາງການຫລຸດຜ່ອນປະລິມານອາຍແກັດທີ່ນຳໃຊ້ໃນກໍລະນີຮີບດ່ວນ. ເຂົາເຈົ້າຢາກໃຫ້ 27 ປະເທດສະມາຊິກ - ຫາກບໍ່ແມ່ນອົງການບໍລິຫານ ອີຢູ ທີ່ມີສຳນັກງານຕັ້ງຢູ່ ບຣຸກແຊນ - ຕັດສິນໃຈກ່ຽວກັບຈຸດເວລາ ແລະ ວິທີການປະຕິບັດບັນດາເປົ້າໝາຍທີ່ຜູກມັດນີ້.

ການສະສົມພະລັງງານ

        ບາງຄຳເຫັນທີ່ມີຄວາມວິຕົກວັງວົນຖືວ່າ, ເລື່ອງຫລຸດຜ່ອນ 15% ຄວາມຕ້ອງການນຳໃຊ້ອາຍແກັດ ແມ່ນຍັງບໍ່ທັນພຽງພໍເພື່ອສະກັດກັ້ນສະພາບຂາດເຂີນອາຍແກັດຢູ່ ເອີລົບ ໃນລະດູໜາວປີນີ້. ລະດັບການສະສົມໃນປະຈຸບັນພວມມີຄວາມແຕກໂຕນກັນລະຫວ່າງບັນດາປະເທດ, ມາຮອດປະຈຸບັນ, ທົ່ວອີຢູ ສາມາດຫລຸດຜ່ອນການນຳໃຊ້ອາຍແກັດໄດ້ພຽງແຕ່ 5% ເທົ່ານັ້ນ, ໂດຍບໍ່ຫົວຊາຕໍ່ລາຄາ ອາຍແກັດ ທີ່ເພີ່ມຂຶ້ນສູງໃນຫຼາຍເດືອນຜ່ານມາ ແລະ ການສະໜອງຈາກ ລັດເຊຍ ນັບມື້ນັບຖືກຮັດແໜ້ນຂຶ້ນຕື່ມ.

        ສັງລວມແລ້ວ, ອີຢູ ມີແຜນການສະສົມປະມານ 80% ບັນດາສາງບັນຈຸເຊື້ອໄຟ ໃນວັນທີ 1 ພະຈິກຈະມາເຖິງ, ເພື່ອສາມາດຮັບປະກັນແຫຼ່ງສະໜອງໃຫ້ແກ່ຊຸມເດືອນຂອງລະດູໜາວນີ້.  ເຢຍລະມັນ ມີເປົ້າໝາຍສູງກ່ວາແມ່ນສະສົມພະລັງງານເຂົ້າສາງໃຫ້ຢູ່ໃນລະດັບ 95% ໃນເດືອນພະຈິກນີ້.

        ຂໍ້ມູນຈາກພື້ນຖານໂຄງລ່າງອາຍແກັດຂອງເອີລົບ ໄດ້ສະແດງໃຫ້ເຫັນວ່າ: ມາຮອດປະຈຸບັນ, ລະດັບສະສົມອາຍແກັດຂອງ ເອີລົບ ແມ່ນຢູ່ໃນລະດັບ 66%. ສ່ວນສຳລັບ ເຢຍລະມັນ, ຮອດວັນທີ 23 ກໍລະກົດ, ຍອດປະລິມານອາຍແກັດສະສົມມາໄດ້ບັນລຸ 65,91%.

        ທ່ານນາງ Kateryna Filippenko, ນັກຊ່ຽວຊານໄຈ້ແຍກຂັ້ນສູງສັງກັດບໍລິສັດທີ່ປຶກສາ Wood Mackenzie, ໃຫ້ຮູ້ວ່າ: ເອີລົບ ມີຄວາມສາມາດຜ່ານຜ່າລະດູໜາວ ດ້ວຍປະລິມານອາຍແກັດຍັງເຫຼືອ 20%ທີ່ສະສົມຈົນຮອດສາງໃນທ້າຍເດືອນມີນາ 2023 - ເຊິ່ງເປັນລະດັບຕ່ຳສຸດ.

        ຕາມວົງການນັກໄຈ້ແຍກແລ້ວ, ລະບົບພະລັງງານຂອງເອີລົບ ພວມຕ້ອງຜ່ານຜ່າວິກິດການ. ໄພນາບຂູ່ຄວາມໝັ້ນຄົງດ້ານພະລັງງານແມ່ນພວມເກີດຂຶ້ນ. ດັ່ງນັ້ນ, ບັນດາປະເທດ ເອີລົບ ຕ້ອງຮ່ວມມືນຳກັນຖ້າຢາກຜ່ານຜ່າລະດູໜາວ ໂດຍບໍ່ມີຄວາມເສຍຫາຍໃດໆ. ແຕ່ໃນຂະນະທີ່ບັນດາປະເທດ ເອີລົບ ເຮັດແນວນັ້ນ, ສະພາບການຂອງລະດູໜາວຕໍ່ໄປ (ປີ 2023 – 2024) ນັ້ນ, ລາຄາພະລັງງານອາດຈະເພີ່ມຂຶ້ນຢູ່ໃນລະດັບສູງໃນຫຼາຍເດືອນ./.