ຮູບເງົາຫວຽດນາມ ເລື່ອງ “ຈໍຕານຣຶກເຣີ" (ພາບ: ຄະນະຜູ້ກຳກັບການສະແດງ)

        ຮູບເງົາຫວຽດນາມ ເລື່ອງ “ຈໍຕານຣຶກເຣີ ຫຼື ເທົ່າຖ່ານທີ່ຮຸ່ງເຮືອງ ” (Glorious Ashes) ຂອງຜູ້ກຳກັບການສະແດງ ບຸຍທາກຈວຽນ, ຫາກໍ່ຍາດໄດ້ລາງວັນ “ບອນລູນຄຳ” ເຊິ່ງແມ່ນລາງວັນສູງທີ່ສຸດຢູ່ງານມະໂຫລານຮູບເງົາ 3 ທະວີບ (3continents) ເຊິ່ງຈັດຂຶ້ນແຕ່ວັນທີ 18 ຫາ 27 ພະຈິກ, ຢູ່ Nantes, ປະເທດ ຝລັ່ງ. ຮູບເງົາເລື່ອງດັ່ງກ່າວ ຈະເລີ່ມສາຍຢູ່ລະບົບໂຮງໜັງ CGV ຫວຽດນາມ ແຕ່ວັນທີ 02 ທັນວາ.

        ໂດຍໄດ້ສ້າງຂຶ້ນຈາກເລື່ອງສັ້ນ 2 ເລື່ອງແມ່ນ “ຈໍຕານຣຶກເຣີ” (ເທົ່າຖ່ານທີ່ຮຸ່ງເຮືອງ) ແລະ “ກຸຍມຸກໂຈຍເວ່” (ຟືນເນົ່າໄຫຼມາ) ຂອງນັກວັນນະຄະດີ ຫງວຽນງອັກຕື, ຮູບເງົາໄດ້ເລົ່າເລື່ອງຂອງຜູ້ຍິງ 3 ຄົນແມ່ນ: ຍ່ານ, ເຮົາ, ລວານຂຸ່ງ ດ້ວຍຄວາມຮັກ ແລະ ຄວາມເຈັບປວດຂອງເຈົາເຂົ້າ. ເລື່ອງລາວຂອງຮູບເງົາໄດ້ສ້າງຄວາມດຶງດູດໃຈ ຕົ້ນຕໍແມ່ນໄດ້ໄປຖ່າຍທຳຢູ່ເຂດແມ່ນ້ຳ ກ່າເມົາ. ເມື່ອໄດ້ຊົມຮູບເງົາເລື່ອງ “ຈໍຕານຣຶກເຣີ” ທີ່ໄດ້ສາຍກ່ອນຢູ່ໂຮງໜັງນະຄອນ ໂຮ່ຈີມິນ, ທ່ານປອ. ດ່າວເລນາ, ຫົວໜ້າພະແນກປະດິດສ້າງ ແລະ ວິຈານເວທີສະແດງຮູບເງົາ, ຢູ່ມະຫາວິທະຍາໄລວິທະຍາສາດສັງຄົມ ແລະ ມະນຸດສາດນະຄອນ ໂຮ່ຈີມິນ, ໃຫ້ຂໍ້ສັງເກດວ່າ:

        “ດົນແລ້ວ ຂ້າພະເຈົ້າຫາກໍ່ໄດ້ຮັບຊົມຮູບເງົາຂອງ ຫວຽດນາມ ທີ່ເຕັມໄປດ້ວຍຄວາມຮູ້ສຶກ ແລະ ກໍ່ມີຫຼາຍບັນຫາເພື່ອໃຫ້ເຮົາຄິດຫງຳ. ຖ້າຜູ້ໃດໄດ້ອ່ານເລື່ອງສັ້ນ 2 ເລື່ອງດັ່ງກ່າວນັ້ນແລ້ວ ຈະເຫັນໄດ້ວ່າ ມັນມີມູ້ມມອງທີ່ໜ້າຈັບໃຈທີ່ສຸດ. 2 ເລື່ອງລາວດັ່ງກ່າວເບິ່ງຄືວ່າບໍ່ມີສ່ວນກ່ຽວຂ້ອງກັນ, ແຕ່ຜູ້ກຳກັບການສະແດງ ບຸຍທາກຈວຽນ ໄດ້ຂຸດຄົ້ນ ສ້າງຂຶ້ນເປັນການດຳລົງຊີວິດຂອງຊາວພາກໃຕ້ ຫວຽດນາມ ໃນຮູບເງົາ. ນີ້ແມ່ນຮູບເງົາທີ່ຫາຍາກຂອງ ຫວຽດນາມ ເຊິ່ງເຮັດໃຫ້ຜູ້ຊົມມີຄວາມຮູ້ສຶກວ່າ ໄດ້ໃກ້ຊິດສະໜິດສະໜົມກັບສະພາບແວດລ້ອມແຫ່ງແມ່ນ້ຳລຳເຊຂອງທາງພາກໃຕ້ ຫວຽດນາມ”.

        ງານມະໂຫລານຮູບເງົາ 3 ທະວີບແມ່ນງານມະໂຫລານໄດ້ຈັດຂຶ້ນປະຈຳປີຢູ່ນະຄອນ Nantes ຂອງ ຝລັ່ງ, ສະຫງວນໃຫ້ບັນດາຮູບເງົາຂອງ 3 ທະວີບ ອາຊີ, ອາຟະລິກາ ແລະ ອາເມລິກາລາຕິນ. ໂດຍຍາດໄດ້ລາງວັນສູງສຸດຢູ່ງານມະໂຫລານຄັ້ງນີ້, ເຊິ່ງດຳເນີນແຕ່ວັນທີ 18 – 27 ພະຈິກ, ຢູ່ Nantes, ຝລັ່ງ, “ຈໍຕານຣຶກເຣີ” ພວມສ້າງຄວາມດຶງດູດໃຫ້ຜູ້ມັກຮັກຮູບເງົາ ຫວຽດນາມ ແລະ ສາກົນ.

        ໂດຍຍາດໄດ້ລາງວັນ “ບອນລູນຄຳ” ກໍ່ແມ່ນຄວາມເປັນກຽດໃຫ້ຜູ້ກຳກັບການສະແດງ ບຸຍທາກຈວຽນ ແລະ ນັກຜະລິດ ເຈິ່ນທິບິກງອັກ ແລະ ທັງທິມງານຜະລິດຮູບເງົາ. ນີ້ແມ່ນຂ່າວດີໃຫ້ແກ່ຮູບເງົາ ຫວຽດນາມ ພາຍຫຼັງທີ່ປະສົບກັບຄວາມຫຍຸ້ງຍາກຈາກໂລກລະບາດໂຄວິດ -19. ທ່ານ ເຈິ່ນທິບິກງອັກ, ໃຫ້ຮູ້ວ່າ:

        “ບໍ່ມີຫຼາຍຮູບເງົາເລື່ອງໃດໄດ້ໄປຖ່າຍທຳຢູ່ກ່າເມົາທາງພາກໃຕ້ຂອງປະເທດ ຫວຽດນາມ. ຢູ່ເຂດດິນແດນແຫ່ງນີ້ ມີຕົວລະຄອນສ້າງຄວາມຈັບອົກຈັບໃຈທີ່ສຸດ, ບັນດາເລື່ອງລາວກ່ຽວກັບຄວາມຮັກ, ທິວທັດທຳມະຊາດຂອງເຂດດິນແດນນີ້ຫາຍາກທີ່ຈະໄດ້ເບິ່ງຜ່ານໜ້າຈໍໃຫຍ່. ຊົມຮູບເງົາເລື່ອງນີ້, ທຸກຄົນອາດຈະຮູ້ສຶກເຫັນອົກເຫັນໃຈໄປກັບຕົວລະຄອນ, ກັບຄວາມຮັກໃນເລື່ອງລາວຕ່າງໆ, ຫືຼ ວ່າອາດຈະມີຄຳຕອບໃຫ້ແກ່ຕົນເອງ.”

        ຜູ້ກຳກັບການສະແດງ ຟານດັງຢີ, ເປັນໜຶ່ງໃນບັນດາຜູ້ກຳກັບການສະແດງຮູບເງົາສິລະປະເອກະລາດທີ່ມີຊື່ສຽງຢູ່ ຫວຽດນາມ, ຖືວ່າ:

        “ເລື່ອງງານມະໂຫລານມອບລາງວັນສູງສຸດໃຫ້ແກ່ຮູບເງົາຂອງຜູ້ກຳກັບການສະແດງ ບຸຍທາກຈວຽນ ແມ່ນສັນຍານທີ່ດີ, ກ່ອນອື່ນໝົດແມ່ນເພື່ອຮູບເງົາເລື່ອງນີ້ ຍ້ອນນັ້ນແມ່ນຄວາມຮັບຮູ້ຂອງວົງການວິຊາສະເພາະ, ພ້ອມທັງແມ່ນເລື່ອງຍິນດີສຳລັບຮູບເງົາ ຫວຽດນາມ, ຍ້ອນວ່າ ດົນແລ້ວຈຶ່ງມີຮູບເງົາໄດ້ຮັບການຮັບຮູ້ຈາກງານມະໂຫລານທີ່ມີຄວາມສຳຄັນຄືແນວນີ້. ແລະ ຮູບເງົາເລື່ອງນີ້ຂອງ ຫວຽດນາມ ກໍ່ແມ່ນຮູບເງົາເລື່ອງທຳອິດທີ່ໄດ້ຮັບລາງວັນສູງສຸດ”.

        ງານມະໂຫລານ 3 ທະວີບ ແມ່ນງານມະໂຫລານໄດ້ຈັດຂຶ້ນປະຈຳປີ ທີ່ສະຫງວນໃຫ້ບັນດາຮູບເງົາດີເດັ່ນຂອງ 3 ທະວີບ ອາຊີ, ອາຟະລິກາ ແລະ ອາເມລິກາ ລາຕິນ. ຜູ້ກຳກັບການສະແດງ ຟານດັງຢີ, ໃຫ້ຮູ້ຕື່ມອີກວ່າ:

        “ງານມະໂຫລານ 3 ທະວີບຢູ່ Nantes ແມ່ນງານມະໂຫລານຮູບເງົາມີປະຫວັດສາດມາແຕ່ດົນນານແລ້ວ. ນີ້ແມ່ນງານມະໂຫລານເຊິ່ງບັນດາຜູ້ສ້າງຮູບເງົາຖືເປັນສຳຄັນ, ພິເສດແມ່ນຢູ່ບັນດາປະເທດ ອາຊີ, ອາເມລິກາ ລາຕິນ ແລະ ອາຟະລິກາ. Nantes ແມ່ນງານມະໂຫລານລຽບງ່າຍ, ສຸມໃສ່ບັນດາບັນຫາວິຊາສະເພາະ ແລະ ຕັ້ງເປົ້າໝາຍຊອກສຽງເວົ້າໃໝ່ໃນຮູບເງົາ, ມາຈາກບັນດາເຂດເຊິ່ງ ບໍ່ມີຫຼາຍຄົນຢູ່ ເອີລົບ ຮູ້ຈັກເຖິງ”.

        “ຈໍຕານຣຶກເຣີ” ແມ່ນຮູບເງົາເລື່ອງທຳອິດທີ່ໄດ້ເຂົ້າແຂ່ງຂັນຊິງລາງວັນຢູ່ໃນລາຍການຕົ້ນຕໍ (Competition) ຂອງງານມະໂຫລານຮູບເງົາ ໂຕກຽວ (TIFF) 2022. ຮູບເງົາເລື່ອງນີ້ກໍ່ເຄີຍຍາດໄດ້ລາງວັນອຸປະຖຳມາແລ້ວ ໃນລາຍການ Asian Project ຢູ່ງານມະໂຫລານ Busan 2017 (ສ.ເກົາຫຼີ).