(ເຮືອນຮັບແຂກ 27/7)

ກວາງຈິ ແມ່ນທ້ອງຖິ່ນແຫ່ງໜຶ່ງດຽວໃນທົ່ວປະເທດມີເຂດສຸສານນັກຮົບເສຍສະຫຼະຊີວິດເພື່ອຊາດແຫ່ງຊາດ 2 ແຫ່ງ ແລະ ເຂດສຸສານນັກຮົບເສຍສະຫຼະຊີວິດ 70 ແຫ່ງຢູ່ທົ່ວທຸກບ່ອນໃນແຂວງ. ເດືອນ ກໍລະກົດ ໃນແຕ່ລະປີ, ແຂວງ ກວາງຈິ ໄດ້ຕ້ອນຮັບຍາດຕິພີ່ນ້ອງ, ນັກຮົບເກົ່ານັບຫຼາຍພັນຄົນ ໄດ້ມາຊອກຫາຂຸມຝັງສົບຂອງຍາດຕິພີ່ນ້ອງ ຫຼື ສະແດງຄວາມຮູ້ບຸນຄຸນ, ໄວ້ອາໄລສຸສານນັກຮົບເສຍສະຫຼະຊີວິດເພື່ອຊາດ. ໂດຍຕັ້ງຢູ່ແຄມທາງຫຼວງ 1A, ຕາແສງ ດົງຢາງ, ນະຄອນ ດົງຮ່າ, ເຮືອນຕ້ອນຮັບຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດເຊິ່ງຫຼາຍຄົນເຄີຍເອີ້ນວ່າ ເຮືອນຮັບແຂກ 27/7 ແມ່ນຊາຍຄາລວມຂອງປະຊາຊົນໃນທົ່ວປະເທດໃນການເດີນທາງມາຊອກຫາຂຸມຝັງສົບນັກຮົບເສຍສະຫຼະຊີວິດເພື່ອຊາດ.

        ພາຍຫຼັງເດີນທາງດ້ວຍລົດໂດຍສານມາໄດ້ຄືນໜຶ່ງ, ເອື້ອຍ ເລທິເທິມ, ຢູ່ຕາແສງ ກິມເຟື້ອງ, ເມືອງ ດິ້ງຮ່໊ວາ, ແຂວງ ທ໊າຍງວຽນ, ໄດ້ໄປເຖິງເຂດດິນແດນ ກວາງຈິ ເພື່ອຢ້ຽມຢາມຂຸມຝັງສົບພໍ່ຂອງຕົນແມ່ນນັກຮົບເສຍສະຫຼະຊີວິດເພື່ອຊາດມີຊື່ວ່າ ເລແອັງຮ໊ຽນ, ເສຍສະຫຼະຊີວິດເມື່ອປີ 1973 ຢູ່ເສັ້ນທາງເລກ 9 ທາງພາກໃຕ້ຂອງລາວ, ຢູ່ເຂດສຸສານນັກຮົບເສຍສະຫຼະຊີວິດເພື່ອຊາດແຫ່ງຊາດ ເຈື່ອງເຊີນ. ປີໃດກໍ່ເຊັ່ນດຽວກັນ, ໃນໂອກາດວັນທີ 27 ກໍລະກົດ, ເອື້ອຍ ເທິມ ໄດ້ເດີນທາງໄປແຂວງກວາງຈິ. ເມື່ອມາຮອດນະຄອນ ດົງຮ່າ, ເອື້ອຍ ເທິມ ໄດ້ມາພັກເຊົາຢູ່ເຮືອນຮັບແຂກ 27/7. ກ່ອນນີ້, ເມື່ອຄອບຄົວຂອງເອື້ອຍໄດ້ຮັບຂ່າວກ່ຽວກັບນັກຮົບເສຍສະຫຼະຊີວິດເພື່ອຊາດ ເລແອັງຮ໊ຽນ ໄດ້ນຳເອົາອັດຖິມາຝັງຢູ່ສຸສານນັກຮົບເສຍສະຫຼະຊີວິດເພື່ອຊາດແຫ່ງຊາດ ເຈື່ອງເຊີນ, ນັ້ນກໍ່ແມ່ນເທື່ອທຳອິດທີ່ເອື້ອຍ ເທິມ ໄປເຖິງແຂວງ ກວາງຈິ ດ້ວຍລົດໂດຍສານ ເພື່ອຈູດທູບໄວ້ອາໄລດວງວິນຍານພໍ່ຂອງເອື້ອຍ. ຄາວນັ້ນ, ການໄປມາ, ການກິນຢູ່ແມ່ນປະສົບກັບຄວາມຫຍຸ້ງຍາກທີ່ສຸດ. ຕໍ່ມາ, ເອື້ອຍໄດ້ຮູ້ຈັກວ່າມີເຮືອນຮັບແຂກ 27/7 ຮັບໃຊ້ສະເພາະແກ່ຍາດຕິພີ່ນ້ອງບັນດານັກຮົບເສຍສະຫຼະຊີວິດເພື່ອຊາດ, ສະຖານທີ່ແຫ່ງນີ້ຈຶ່ງໄດ້ກາຍເປັນບ່ອນລື້ງເຄີຍຂອງຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດຫຼາຍຄົນ ໃນການເດີນທາງມາສະແດງຄວາມຮູ້ບຸນຄຸນ ຫຼື ຊອກຫາອັດຖິຂອງຍາດຕິພີ່ນ້ອງ. ເອື້ອຍ ເທິມ ເວົ້າວ່າ.

        “ຂ້າພະເຈົ້າໄດ້ຮັບການຕ້ອນຮັບເປັນຢ່າງດີ, ບ່ອນກິນບ່ອນຢູ່ແມ່ນສະດວກສະບາຍ, ຊ່ວຍຄອບຄົວເຮັດລະບຽບການໄດ້ຢ່າງວ່ອງໄວ ແລະ ມີຄວາມສະດວກໃນການແນະນຳໃຫ້ຄອບຄົວຂ້າພະເຈົ້າໄປຊອກຫາຂຸມຝັງສົບ . ຂ້າພະເຈົ້າຮູ້ສຶກໄດ້ເຖິງຄວາມສຸດຈິດສຸດໃຈ, ເປັນການຫຼຸດຜ່ອນຄວາມເຈັບປວດຂອງຄອບຄົວໄດ້ສ່ວນໃດສ່ວນໜຶ່ງ”.

        ເມື່ອສົງຄາມໄດ້ຢຸດຕິລົງແລ້ວ, ແຕ່ຄວາມເຈັບປວດຍ້ອນສົງຄາມຍັງຝັງຢູ່ໃນດວງໃຈໃນການໄປຊອກຫາອັດຖິຂອງບັນດາຍາດຕິພີ່ນ້ອງຂອງນັກຮບເສຍສະຫຼະຊີວິດເພື່ອຊາດ. ຍາມໃດແຂວງ ກວາງຈິ ກໍ່ແມ່ນເຂດດິນແດນເຊິ່ງຫຼາຍຄົນໄດ້ຮູ້ຈັກເຖິງ. ໃນການເດີນທາງໄປຊອກຫາ, ຍາດຕິພີ່ນ້ອງຂອງບັນດານັກຮົບເສຍສະຫຼະຊີວິດເພື່ອຊາດ ກໍ່ຫວັງວ່າ ຈະຊອກເຫັນຂຸມຝັງສົບຂອງນັກຮົບເສຍສະຫຼະຊີວິດເພື່ອຊາດຢູ່ເຂດສຸສານແຫ່ງໃດໜຶ່ງໃນຈຳນວນເຂດສຸສານ 70 ແຫ່ງຢູ່ແຂວງ ກວາງຈິ. ນັບສິບປີຜ່ານມາ ທ່ານອະດີດນັກຮົບເກົ່າ ຫງວຽນດຶກຢ່ວນ, ຢູ່ຕາແສງ ມົງຮ໊ວາ, ນະຄອນ ຮ່ວາບິ່ງ, ແຂວງ ຮ່ວາບິ່ງ, ແມ່ນສະມາຊິກສະມາຄົມໜູນຊ່ວຍຄອບຄົວນັກຮົບເສຍສະຫຼະຊີວິດເພື່ອຊາດແຂວງ ຮ່ວາບິ່ງ ໄດ້ພາຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດຫຼາຍຄົນໄປແຂວງ ກວາງຈິ  ແລະ ບັນດາແຂວງ, ນະຄອນອື່ນໆ ເພື່ອຊອກຫາຂຸມຝັງສົບນັກຮົບເສຍສະຫຼະຊີວິດເພື່ອຊາດ. ແຕ່ລະເທື່ອເມື່ອໄປຮອດແຂວງ ກວາງຈິ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດ ກໍ່ໄດ້ຮັບການຕ້ອນຮັບ, ຈັດແຈງບ່ອນກິນບ່ອນຢູ່ເປັນຢ່າງດີ. ທ່ານ ຫງວຽນດຶກຢ່ວນ, ໃຫ້ຮູ້ວ່າ.

        “ຢູ່ເຮືອນຮັບແຂກການກິນການຢູ່ແມ່ນບໍ່ໄດ້ຈ່າຍເງິນ. ແລະຖ້າຫາກຊອກເຫັນອັດຖິຢູ່ແຂວງ ກວາງຈິ ແມ່ນບໍ່ຕ້ອງຈ່າຍເງິນ ແລະ ໄດ້ຮັບການໃຫ້ຄຳປຶກສາເຮັດເອກະສານຕ່າງໆຢູ່ທີ່ນີ້, ສະດວກທີ່ສຸດ. ຂ້າພະເຈົ້າໄດ້ມາເຮັດວຽກຢູ່ນີ້ຫຼາຍຄັ້ງແລ້ວ, ເມື່ອເຂົ້າມາພັກຢູ່ເຮືອນຮັບແຂກນີ້ ບໍ່ວ່າຈະເປັນກາງເວັນ ຫຼື ກາງຄືນກໍ່ລ້ວນແຕ່ໄດ້ຮັບການຕ້ອນຮັບຢ່າງສຸດຈິດສຸດໃຈ”.

        ເຮືອນຮັບແຂກ 27/7 ໄດ້ຮັບການກໍ່ສ້າງນັບແຕ່ປີ 1997. ເຮືອນຮັບແຂກນີ້ຍາມໃດກໍ່ກຽມພ້ອມທຸກວິທີການຕ້ອນຮັບ, ເພື່ອຮັບໃຊ້ໃຫ້ຍາດຕິພີ່ນ້ອງຂອງນັກຮົບເສຍສະຫຼະຊີວິດເພື່ອຊາດ ຫຼື ໄປໄວ້ອາໄລຢູ່ສຸສານໃນແຕ່ລະປີເກືອບ 10.000 ເທື່ອຄົນ. ຍາດຕິພີ່ນ້ອງເມື່ອມາຊອກຫາຂຸມຝັງສົບນັກຮົບເສຍສະຫຼະຊີວິດເພື່ອຊາດ ຫຼື ໄປໄວ້ອາໄລຢູ່ສຸສານທີ່ມາພັກຢູ່ເຮືອນຮັບແຂກແຫ່ງນີ້ລ້ວນແຕ່ໄດ້ກິນ ແລະ ພັກເຊົາໂດຍບໍ່ເສຍຄ່າເປັນເວລາ 4 ວັນ. ທ່ານ ຮ່ວາງຕ໊ວນແອັງ, ຮອງຫົວໜ້າພະແນກແຮງງານ, ທະຫານເສຍອົງຄະ ແລະ ສັງຄົມແຂວງ ກວາງຈິ, ໃຫ້ຮູ້ວ່າ.

        “ເມື່ອຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດມາແຫ່ງນີ້ ພວກຂ້າພະເຈົ້າຍາມໃດກໍ່ໄດ້ຈັດບ່ອນຢູ່ບ່ອນກິນໃຫ້. ຫວ່າງແລ້ວນີ້, ສູນກໍ່ໄດ້ຂະຫຍາຍ ແລະ ກໍ່ສ້າງຮາກຖານໜຶ່ງອີກຢູ່ເທດສະບານ ເກືອຫວຽດ ຕື່ມອີກ. ເນື່ອງໃນໂອກາດວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ ຈຸດສຸມແມ່ນຕ້ອນຮັບຍາດຕິພີ່ນ້ອງຂອງນັກຮົບເສຍສະຫຼະຊີວິດເພື່ອຊາດມາຈູບທູບທຽນຖະຫວາຍທູບທຽນດອກໄມ້. ໃນເດືອນ ກໍລະກົດ, ພວກຂ້າພະເຈົ້າມີບາດກ້າວບຸກທະລຸໃນການປະຕິຮູບລະບຽບການບໍລິຫານຕື່ມອີກ ໃນການແກ້ໄຂນະໂຍບາຍໃຫ້ແກ່ຜູ້ມີຄຸນງາມຄວາມດີ”.

        ແຕ່ລະປີ, ທາງແຂວງ ກວາງຈິ ໄດ້ຕ້ອນຮັບຜູ້ມາຕອບບຸນແທນຄຸນ, ໄວ້ອາໄລຢູ່ສຸສານນັກຮົບເສຍສະຫຼະຊີວິດເພື່ອຊາດ ທີ່ມາຈາກທຸກແຖບຖິ່ນໃນທົ່ວປະເທດ ກວ່າ 70.000 ເທື່ອຄົນ. ການຕ້ອນຮັບ, ການເບິ່ງແຍງບັນດາຍາດຕິພີ່ນ້ອງຂອງນັກຮົບເສຍສະຫຼະຊີວິດເພື່ອຊາດ ແລະ ບັນດານັກຮົບເກົ່າມາໄວ້ອາໄລເພື່ອນຮ່ວມກົມກອງທີ່ໄດ້ເສຍສະຫຼະຊີວິດຢູ່ເຂດດິນແດນແຫ່ງນີ້ຢ່າງລອບຄອບທີ່ຖ້ວນນັ້ນ ກໍ່ແມ່ນວິທີເພື່ອສະແດງຄວາມຮູ້ບຸນຄຸນຂອງພະນັກງານ, ພາລະກອນເຮືອນຮັບແຂກ 27/7 ຢູ່ແຂວງ ກວາງຈິ.