ແຕ່ລະຄົນມີການກະທຳອັນດີງາມ ໄດ້ແຜ່ຂະຫຍາຍໄປເຖິງຫລາຍຄົນ ເພື່ອຮ່ວມແຮງຮ່ວມໃຈກັນປົກປັກຮັກສາສິ່ງແວດລ້ອມ. ບົດຂຽນຂອງນັກຂ່າວ VOV.

ການແຂ່ງຂັນ "ແມ່ຍິງ ດ່າໜັງ ດຳລົງຊີວິດຂຽວ, ມີການກະທຳຂຽວ”(ພາບ: ສະຫະພັນແມ່ຍິງ ດ່າໜັງ)

  ປະມານ 2 ປີມານີ້, ເມື່ອຮອດວັນທິດຂອງທຸກໆອາທິດ, ບັນດາສະມາຊິກແມ່ຍິງຢູ່ສະມາຄົມແມ່ຍິງ ແທັງວິງ 4, ຕາແສງ ເທາະກວາງ, ນະຄອນ ດ່າໜັງ ໄດ້ລົງໄປເກັບຂີ້ເຫຍື້ອຢາງປຼາດສະຕິກ, ເຈ້ຍເສດຢູ່ນຳແຕ່ລະຄອບຄົວ. ຫລັງຈາກນັ້ນ, ເອື້ອຍນ້ອງແມ່ຍິງກໍ່ພ້ອມກັນຈັດແບ່ງປະເພດຂີ້ເຫຍື້ອ, ສ່ວນໜຶ່ງແມ່ນເອົາໄປຂາຍເພື່ອສ້າງເປັນກອງທຶນ, ອີກສ່ວນໜຶ່ງແມ່ນເອົາໄປຜະລິດຄືນໃໝ່ ເພື່ອເຮັດກັບປາກກາໃຫ້ແກ່ນັກຮຽນ. ເມື່ອເວົ້າກ່ຽວກັບເລື່ອງເຮັດອຸປະກອນການຮຽນຈາກສິ່ງເສດເຫຼືອນັ້ນ, ເອື້ອຍ ຟານທິຮວາ, ຫົວໜ້າສະມາຄົມແມ່ຍິງ ແທັງວິງ 4 ໃຫ້ຮູ້ວ່າ: ນີ້ແມ່ນແນວຄວາມຄິດຂອງສະມາຊິກແມ່ຍິງໃນສະມາຄົມ ລາວເປັນຄູສອນໂຮງຮຽນອະນຸບານ ແລະ ປັດຈຸບັນ, ລາວໄດ້ອອກກິນເບ້ຍບຳນານແລ້ວ. ມາຮອດປັດຈຸບັນ, ຮູບແບບນີ້ ໄດ້ສ້າງວຽກເຮັດງານທຳໃຫ້ແກ່ເອື້ອຍນ້ອງແມ່ຍິງໃນສະມາຄົມຫລາຍຄົນ. ຈາກວິທີເຮັດຄືດັ່ງກ່າວ, ສະມາຄົມແມ່ຍິງສາມາດສ້າງລາຍຮັບໄດ້ເກືອບສິບລ້ານດົ່ງ ເພື່ອສ້າງເປັນກອງທຶນຊ່ວຍເຫຼືອໃຫ້ແກ່ສະມາຊິກທີ່ທຸກຍາກ. ນອກນັ້ນ, ເພື່ອຫລຸດຜ່ອນການນຳໃຊ້ຖົງຢາງນີລົງ, ສະມາຄົມຍັງເກັບຊື້ຖົງຢາງນີລົງທີ່ໃຊ້ແລ້ວຈາກບັນດາຄອບຄົວ, ຫລັງຈາກນັ້ນ ກໍ່ເອົາໄປລ້າງໃຫ້ສະອາດ ແລ້ວຂາຍໃຫ້ບໍລິສັດສິ່ງແວດລ້ອມ. ເອື້ອຍ ຟານທິຮວາ ໃຫ້ຮູ້ວ່າ:

“ທີໜຶ່ງແມ່ນສ້າງວຽກເຮັດງານທຳໃຫ້ເອື້ອຍນ້ອງແມ່ຍິງຕື່ມອີກ. ທີສອງແມ່ນສ້າງກອງທຶນໃຫ້ສະມາຄົມ ເພື່ອປະກອບສ່ວນເຂົ້າໃນຂະບວນການເຄື່ອນໄຫວຂອງເອື້ອຍນ້ອງແມ່ຍິງ.”

ບັນດາຮູບແບບ “ການດຳລົງຊີວິດຂຽວ” ຂອງແມ່ຍິງ ດ່າໜັງ ໄດ້ຮັບການຜັນຂະຫຍາຍຢ່າງກ້ວາງຂວາງ

  ຢູ່ຕາແສງ ເທາະກວາງ, ນະຄອນ ດ່າໜັງ, ສວນຜັກຂອງເອື້ອຍນ້ອງແມ່ຍິງຢູ່ທີ່ນີ້ ໄດ້ເຮັດໃຫ້ຫລາຍຄົນມີຄວາມປະຫລາດໃຈ. ກ່ອນນີ້ ເຂດດິນດັ່ງກ່າວມີຫຍ້າປົ່ງຕຶບໜາ. ເອື້ອຍນ້ອງແມ່ຍິງຢູ່ຕາແສງໄດ້ພາກັນມາຖາງ, ເສຍຫຍ້າເຮັດອະນາໄມບັນດາເຂດດິນດັ່ງກ່າວ ເພື່ອປູກຜັກຫລາຍຊະນິດຄື: ຜັກກາດ, ຜັກບົ້ງ, ຜັກມັນດ້າງ. ເອື້ອຍ ຫງວຽນທິເຟື້ອງ, ຜູ້ຮັບຜິດຊອບການບຳບັດຮັກສາສວນຜັກໃຫ້ຮູ້ວ່າ:

 “ປູກຜັກມີຜົນປະໂຫຍດແມ່ນຜັກປອດສານພິດ. ຍ້ອນວ່າ ຜັກຢູ່ຕະຫລາດບໍ່ຮັບປະກັນສຸຂະອະນາໄມດ້ານສະບຽງອາຫານ ດັ່ງນັ້ນ ເອື້ອຍນ້ອງແມ່ຍິງ ຈຶ່ງໄດ້ປູກຜັກກິນເອງ. ປູກຜັກທັງໄດ້ຂາຍລາຄາຖືກໃຫ້ເອື້ອຍນ້ອງແມ່ຍິງ ທັງຮັບປະກັນຜັກປອດສານພິດ ແລະ ທັງມີຄຸນນະພາບສູງ.”

ບັນດາຮູບແບບ “ການດຳລົງຊີວິດຂຽວ” ຂອງແມ່ຍິງ ດ່າໜັງ ໄດ້ຮັບການຜັນຂະຫຍາຍຢ່າງກ້ວາງຂວາງ

  ຮູບແບບ “ການດຳລົງຊີວິດຂຽວ” ໄດ້ເລີ່ມທົດລອງເຮັດນາແຕ່ປີ 2010 ຈາກກຸ່ມວົງຄະນະຍາດນ້ອຍໆ ຂຶ້ນກັບຕາແສງ ຮ່ວາແຄ໊ງບັກ (ເມືອງ ລຽນຈ໋ຽວ, ນະຄອນ ດ່າໜັງ) ໂດຍສະຫະພັນແມ່ຍິງນະຄອນ ດ່າໜັງ ສົມທົບກັບສູນການກະທຳເພື່ອການພັດທະນາຕົວເມືອງ ດ່າໜັງ ຜັນຂະຫຍາຍ. ໃນເບື້ອງຕົ້ນ, ສະຫະພັນແມ່ຍິງ ດ່າໜັງ ໄດ້ຝຶກອົບຮົມໃຫ້ແກ່ເອື້ອຍນ້ອງແມ່ຍິງທີ່ເປັນສະມາຊິກຂອງກຸ່ມກ່ຽວກັບ “ການດຳລົງຊີວິດຂຽວ” ດ້ວຍ 6 ຫົວຂໍ້ທີ່ວ່າ: ຂີ້ເຫຍື້ອ, ນ້ຳ, ພະລັງງານ, ຜູ້ອຸປະໂພກບໍລິໂພກທີ່ສະຫລາດ, ເຮືອນປອດໄພ ແລະ ສຸຂະພາບ. ຫລັງຈາກນັ້ນ, ເອື້ອຍນ້ອງແມ່ຍິງ ໄດ້ຮັບການແນະນຳໂດຍກົງກ່ຽວກັບວິທີແບ່ງປະເພດຂີ້ເຫຍື້ອ, ຂັ້ນຕອນເຮັດຝຸ່ນຊີວະພາບ, ວິທີນຳໃຊ້ຖັງໂຟມປູກຜັກທີ່ເປັນເຄືອ, ປະຢັດໄຟຟ້າ, ນ້ຳ ແລະ ບັນດາຮູບແບບໃໝ່ຄື: ສຳນັກງານຂຽວ, ສະມາຄົມຂຽວ; ແມ່ຍິງຈຳກັດການນຳໃຊ້ຖົງຢາງນີລົງ; ຈັດແບ່ງປະເພດຂີ້ເຫຍື້ອຢູ່ຄອບຄົວ…

ມາຮອດປັດຈຸບັນ, ຮູບແບບດັ່ງກ່າວໄດ້ທະວີຄຸນຢ່າງກ້ວາງຂວາງຢູ່ 7 ເມືອງ, 56 ຕາແສງໃນທົ່ວນະຄອນ ດ່າໜັງ ດ້ວຍ 900 ກຸ່ມ “ການດຳລົງຊີວິດຂຽວ” ແລະ ມີສະມາຊິກກ່ວາ 16.000 ຄົນ. ບັນດາສະມາຄົມແມ່ຍິງໄດ້ມີບັນດາວິທີການປະຕິບັດແຕກຕ່າງກັນຄື: ເອື້ອຍນ້ອງແມ່ຍິງຢູ່ເມືອງ ຮ່ວາວາງ ໄດ້ປູກກ້ວຍ ເພື່ອເອົາໃບຕອງໄປຫໍ່ຂອງກິນ ແທນໃຫ້ຖົງຢາງນີລົງ…; ແມ່ຍິງເມືອງ ເຊີນຈາ ໄດ້ນຳໃຊ້ກະຕ່າຢາງໄປຕະຫລາດ ເພື່ອຫລຸດຜ່ອນການນຳໃຊ້ຖົງຢາງນີລົງ…ທຸກການກະທຳນັ້ນ ລ້ວນແຕ່ນຳມາເຊິ່ງປະສິດທິຜົນຕັ້ງໜ້າ.

ເພື່ອຍົກສູງສະຕິໃຫ້ບັນດາສະມາຊິກແມ່ຍິງ, ກໍຄືເຜີຍແຜ່ຈິດໃຈການດຳລົງຊີວິດຂຽວອອກສູ່ວົງຄະນະຍາດ, ສະຫະພັນແມ່ຍິງນະຄອນ ດ່າໜັງ ຍັງໄດ້ຈັດຕັ້ງບັນດາຂະບວນການແຂ່ງຂັນ ຊຸກຍູ້ການຊອກຮູ້ບັນດາຮູບແບບການດຳລົງຊີວິດຂຽວຂອງເອື້ອຍນ້ອງແມ່ຍິງ, ພ້ອມທັງ ຊອກຫາບັນດາມາດຕະການທີ່ແທດຈິງ ແນໃສ່ປົກປັກຮັກສາສິ່ງແວດລ້ອມ. ທ່ານນາງ ຫງວຽນທິຮ່າ, ປະທານສະຫະພັນແມ່ຍິງນະຄອນ ດ່າໜັງ ໃຫ້ຮູ້ວ່າ:

“ພວກຂ້າພະເຈົ້າປຸກລະດົມຂະບວນການແຂ່ງຂັນດ້ວຍຫົວຂໍ້ຕ້ານຂີ້ເຫຍືຶ້ອຢາງ ປຼາດສະຕິກ. ນີ້ແມ່ນຫົວຂໍ້ ທັງຕອບສະໜອງການປຸກລະດົມຂອງສູນກາງສະຫະພັນແມ່ຍິງ ຫວຽດນາມ, ທັງແມ່ນບັນດາລາຍການເສດຖະກິດ - ສັງຄົມ, ພິເສດແມ່ນວຽກງານປົກປັກຮັກສາສິ່ງແວດລ້ອມ ເຊິ່ງຄະນະກຳມະການປະຊາຊົນນະຄອນ ຜັນຂະຫຍາຍໃນຊຸມປີຜ່ານມາ. ດ້ວຍຂະບວນການແຂ່ງຂັນດັ່ງກ່າວ, ພວກຂ້າພະເຈົ້າຈະສືບຕໍ່ຍູ້ແຮງການຈັດຕັ້ງຢູ່ຂັ້ນຮາກຖານ; ພິເສດແມ່ນຍົກສູງສະຕິຄວາມຮັບຮູ້ຂອງວົງຄະນະຍາດ ກ່ຽວກັບການຕ້ານຂີ້ເຫຍື້ອຢາງປຼາດສະຕິກ, ປົກປັກຮັກສາສິ່ງແວດລ້ອມ.”

ບັນດາການກະທຳນ້ອຍໆ, ງ່າຍດາຍຂອງເອື້ອຍນ້ອງແມ່ຍິງ ຈະກະທົບໃສ່ສະຕິຂອງແຕ່ລະຄົນໃນຄອບຄົວ, ພໍ່ແມ່ປະຊາຊົນຢູ່ອ້ອມຂ້າງ. ທຸກຄົນລ້ວນແຕ່ປາດຖະໜາຢາກໃຫ້ “ການດຳລົງຊີວິດຂຽວ” ບໍ່ພຽງແຕ່ແມ່ນຄຳຂວັນເທົ່ານັ້ນ, ແຕ່ຢາກໃຫ້ມັນເປັນການກະທຳທີ່ລະອຽດ, ລົງເລິກເຂົ້າໃນຈິດສຳນຶກ, ປ່ຽນແປງສະຕິຄວາມຮັບຮູ້ຂອງແຕ່ລະຄົນ, ປະກອບສ່ວນສ້າງນະຄອນ ດ່າໜັງ ໃຫ້ມີສິ່ງແວດລ້ອມທີ່ດີງາມແບບຍືນຍົງ./.