ບັນດານັກກິລາບານເຕະຂອງ ທິມ Arsenal ຈະມາແຂ່ງຂັນກັບທິມຊາດຫວຽດນາມ ຢູ່ຮ່າໂນ້ຍ (ພາບ : internet )
|
ໃນຕອນຄ່ຳວັນທີ 17/7 ນີ້, ຜູ້ນິຍົມບານເຕະຫວຽດນາມຈະມີໂອກາດຮັບຊົມການແຂ່ງຂັນມິດຕະພາບ ກິລາບານເຕະລະຫວ່າງທິມບານເຕະ Arsenal ທີ່ມີຊື່ສຽງຂອງອັງກິດກັບທິມຊາດບານເຕະຫວຽດນາມຢູ່ສະໜາມກິລາ ມີ້ດິງ-ຮ່າໂນ້ຍ. ໃນຈຸດເວລານີ້, ບັນດາຜູ້ນິຍົມບານເຕະຫວຽດນາມ ຕ່າງກໍດີໃຈ ລໍຄອຍເຫດການ ນີ້.
ເຖິງວ່າ ຍັງບໍ່ທັນຮອດວັນແຂ່ງຂັນກໍຕາມ, ແຕ່ບັນດານັກກິລາບານເຕະຂອງ ທິມ Arsenal ໄດ້ຮັບການສະໜັບສະໜູນຈາກບັນດາຜູ້ນິຍົມບານເຕະຫວຽດນາມ ຜ່ານເຄືອຂ່າຍອິນເຕີເນັດ. ສຳລັບທ້າວ ເຈີນດຶກທັ້ງ, ທິມບານເຕະ Arsenal ແມ່ນທິມທີ່ລາວນິຍົມຊົມຊອບທີ່ສຸດຍ້ອນລີລາການເຕະທີ່ງາມຕາ. ທ້າວ ເຈີນດຶກທັ້ງ ເປີດເຜີຍວ່າ :
“ທິມບານເຕະ Arsenal ແມ່ນທິມທີ່ຂ້າພະເຈົ້ານິຍົມຊົມຊອບທີ່ສຸດ. ຢູ່ຫວຽດນາມມີ ຜູ້ນິຍົມບານເຕະຫວຽດນາມຫຼາຍຄົນຊົມຊອບທິມບານເຕະ Arsenal ທີ່ສຸດ. ຂ້າພະເຈົ້າຄອຍຖ້ານັດແຂ່ງຂັນນີ້ ມາແຕ່ດົນແລ້ວ. ຂ້າພະເຈົ້າຄາດຄະເນວ່າ ຜົນຂອງການແຂ່ງຂັນຈະສະເໝີກັນ. ຫວັງວ່າ 2 ທິມຈະແຂ່ງຂັນດ້ວຍລີລາການເຕະທີ່ງາມຕາເພື່ອສ້າງຄວາມປະທັບໃຈໃຫ້ຜູ້ຊົມ ”
ສ່ວນທ້າວ ດັ້ງກວາງເທາະ ໂຊເຟີລົດແທກຊີຢູ່ ຮ່າໂນ້ຍ ເປີດເຜີຍວ່າ :
“ ຂ້າພະເຈົ້າຄິດວ່າ ນີ້ແມ່ນຄວາມເປັນກຽດທີ່ມີຕໍ່ທິມຊາດບານເຕະຫວຽດນາມ ເພາະວ່າ ການມາຫວຽດນາມເພື່ອແຂ່ງຂັນມິດຕະພາບຂອງສະໂມສອນບານເຕະທີ່ມີຊື່ສຽງແມ່ນມີບໍ່ເທົ່າໃດ. ໃນການແຂ່ງຂັນເທື່ອນີ້, ຂ້າພະເຈົ້າປາດຖະໜາວ່າ ຈະເປັນການຊ່ວຍໃຫ້ ຜູ້ນິຍົມບານເຕະຍິ່ງຊົມຊອບທິມຊາດບານເຕະຫວຽດນາມຫຼາຍກ່ວາ ”
ການມາຫວຽດນາມ ແຂ່ງຂັນມິດຕະພາບຂອງສະໂມສອນບານເຕະທີ່ມີຊື່ສຽງ ຄື Arsenal ບໍ່ພຽງແຕ່ແມ່ນຄວາມເປັນກຽດຂອງກິລາບານເຕະຫວຽດນາມເທົ່ານັ້ນ, ຫາກຍັງແມ່ນໂອກາດເພື່ອໃຫ້ບັນດາຜູ້ນິຍົມບານເຕະຫວຽດນາມ ໄດ້ພົບໄດ້ເຫັນບັນດາດາລາເຕະບານທີ່ຕົນນິຍົມຊົມຊອບ. ນາງ ຫງວຽນເຫ້ວຈີ ຜູ້ນິຍົມ ທິມບານເຕະ Arsenal ໃຫ້ຮູ້ວ່າ :
“ທິມບານເຕະ Arsenal ບໍ່ພຽງແຕ່ແມ່ນ ທິມບານເຕະໃຫຍ່ຂອງອັງກິດເທົ່ານັ້ນ, ຫາກຍັງແມ່ນ ທິມບານເຕະທີ່ມີຊື່ສຽງຂອງໂລກອີກດ້ວຍ. ເຖິງວ່າໃນຈຸດເວລານີ້, ທິມ Arsenal ຍັງບໍ່ທັນມາຮອດຫວຽດນາມກໍຕາມ, ແຕ່ບັນຍາກາດຢູ່ສະໜາມກິລາມີ້ດິງ-ຮ່າໂນ້ຍ ມີຄວາມຟົດຟື້ນມ່ວນຊື່ນທີ່ສຸດ. ຜູ້ເຊຍນັບພັນຄົນໄດ້ຫຼັ່ງໄຫຼພາກັນມາຊື້ປີ້, ການບໍລິການຄືແຕ້ມໜ້າ, ຂາຍທຸງ, ຂາຍເຄື່ອງຂອງທີ່ລະນຶກກໍຍິ່ງຟົດຟື້ນມ່ວນຊື່ນເພື່ອກະກຽມຮັບຕ້ອນ ທິມບານເຕະ Arsenal ”
ໃນຕອນຄ່ຳວັນທີ 17/7 ນີ້ , ຢູ່ສະໜາມກິລາ ມີ້ດິງ-ຮ່າໂນ້ຍມີຜູ້ມາຊົມການແຂ່ງຂັນບານເຕະ 40.000 ຄົນ ແລະ ບໍ່ມີບ່ອນວ່າງຈັກບ່ອນເລີຍ. ເປັນຄັ້ງທຳອິດທີ່ໄດ້ມາຢ້ຽມຢາມ ແລະ ແຂ່ງຂັນມິດຕະພາບຢູ່ຫວຽດນາມທີ່ປະຊາຊົນມີຈິດໃຈຮັກແພງແຂກ, ພິເສດມີຜູ້ນິຍົມບານເຕະນັບລາ້ນຄົນ, ແນ່ນອນວ່າ ບັນດານັກເຕະບານທິມ Arsenal ຈະໄດ້ຮັບການຕ້ອນຮັບຢ່າງສະໜິດສະໜົມ .