ໂດຍປົກກະຕິໄປແລ້ວ, ໃນຫຼາຍປີມານີ້, ເມື່ອລະດູໃບໄມ້ຫຼົ່ນວຽນມາ, ການນຳພະແນກບັນດາລາຍການກະຈາຍສຽງພາກພາສາຕ່າງປະເທດ ກໍໄດ້ຈັດງານພົບປະພະນັກງານລຸ້ນຕ່າງໆທີ່ເຄີຍເຮັດວຽກ ແລະ ພວມເຮັດວຽກຢູ່ VOV5  ເພື່ອສະເຫຼີມສະຫຼອງວັນສ້າງຕັ້ງພະແນກ ແລະ ສ້າງຕັ້ງວິທະຍຸກະຈາຍສຽງ ຫວຽດນາມ (ວັນທີ 7 ກັນຍາ 1945). ໃນໂອກາດນີ້, ສໍານັກງານຂອງພະແນກ VOV5 ຕັ້ງຢູ່ເຮືອນເລກທີ 45, ຖະໜົນບ່າຈ້ຽວ, ຮວ່ານກຽມ, ຮ່າໂນ້ຍ ກໍເຕັມໄປດ້ວຍສຽງເວົ້າສຽງຫົວ ແລະ ບັນຍາກາດເບີກບານມ່ວນຊື່ນຕ້ອນຮັບບັນດາອະດີດພະນັກງານ, ນັກຂ່າວ, ບັນນາທິການ, ຜູ້ທີ່ເຄີຍເຮັດວຽກຢູ່ VOV ໃນຫຼາຍປີຜ່ານມາ.

ບັນຍາກາດຂອງງານພົບປະ (ພາບ: VOV)

ເມື່ອໄດ້ພົບປະກັບຄູ່ຮ່ວມງານເກົ່າ ທີ່ບໍ່ໄດ້ພົບກັນມາດົນ, ໃຜໆກໍໜ້າຊື່ນຕາບານ. ບັນດາອະນຸສອນຈາກຫຼາຍປີກ່ອນໄດ້ຫວນຄືນມາ, ຫຼືວ່າ ບັນດາເລື່ອງລາວທີ່ດີໆໃນຊີວິດ ກໍໄດ້ເອົາມາແບ່ງປັນສູ່ກັນຟັງ. ໃນຈຳນວນອະດີດພະນັກງານເຫຼົ່ານັ້ນ, ທ່ານ ຫງວຽນຕຽນລອງ, ອະດີດຫົວໜ້າພະແນກ VOV5 ຫາກໍພັກຈາກການປະຕິບັດໜ້າທີ່ຢູ່ທີ່ນີ້ ແຕ່ເດືອນ ສິງຫາ ທີ່ຜ່ານມາ. ພາຍຫຼັງທີ່ຕິດພັນກັບ VOV ເວົ້າລວມ ແລະ VOV5 ເວົ້າສະເພາະມາເປັນເວລາຫຼາຍປີ, ເມື່ອກັບມາຢາມສຳນັກງານ ແລະ ເຂົ້າຮ່ວມງານພົບປະສັງສັນດັ່ງກ່າວ ທ່ານໄດ້ແບ່ງປັນວ່າ:

“ບໍ່ວ່າຜູ້ໃດ ເມື່ອມາຢາມສຳນັກງານ VOV5, ເຖິງວ່າເປັນຜູ້ທີ່ເຄີຍເຮັດວຽກ ຫຼື ກຳລັງເຮັດວຽກຢູ່ທີ່ນີ້, ກໍລ້ວນແຕ່ມີຄວາມເອກອ້າງທະນົງໃຈເປັນຢ່າງຍິ່ງຕໍ່ກັບມູນເຊື້ອປະຫວັດສາດຂອງ VOV5 ທີ່ຕິດພັນກັບ VOV. ພວກເຮົາສະເຫຼີມສະຫຼອງວັນສ້າງຕັ້ງ VOV5 ກໍເປັນການສະເຫຼີມສະຫຼອງວັນສ້າງຕັ້ງ VOV ຄົບຮອບ 78 ປີ. ແຕ່ລະປີ, ເມື່ອຮອດງານພົບປະສັງສັນແບບນີ້, ຂ້າພະເຈົ້າກໍຮູ້ສຶກປະທັບໃຈຫຼາຍ. ນັ້ນແມ່ນບັນດາພະນັກງານ ເຖິງວ່າມີອາຍຸສູງແລ້ວກໍຕາມ, ແຕ່ສ່ວນຫຼາຍແມ່ນຍັງມີສຸຂະພາບແຂງແຮງ ແລະ ໄດ້ພົບປະໂອ້ລົມກັບນັກຂ່າວ, ບັນນາທິການໜຸ່ມ ຢ່າງມ່ວນຊື່ນ, ສະໜິດສະໜົມ. ນັ້ນແມ່ນພາບບັນຍາກາດທີ່ຕື້ນຕັນໃຈຫຼາຍ, ເຊິ່ງເປັນການສຶກສາກ່ຽວກັບມູນເຊື້ອອັນດີງາມ ແລະ ເປັນຄວາມເອກອ້າງທະນົງໃຈທີ່ບໍ່ອາດປະຕິເສດໄດ້”.

ທ່ານ ຫງວຽນຕຽນລອງ, ອະດີດຫົວໜ້າພະແນກ VOV5 ແບ່ງປັນຄວາມຮູ້ສຶກໃນງານພົບປະ (ພາບ: VOV)

78 ປີຜ່ານມາ, ໃນແຕ່ລະບາດກ້າວພັດທະນາຂອງ VOV5 ລ້ວນແຕ່ມີການປະກອບສ່ວນຢ່າງບໍ່ຮູ້ອິດບໍ່ຮູ້ເມື່ອຍຂອງພະນັກງານ, ນັກຂ່າວ, ບັນນາທິການຫຼາຍລຸ້ນຄົນ. ໃນສົງຄາມ 2 ຄັ້ງຂອງຊາດ ຫວຽດນາມ, ເຂົາເຈົ້າບໍ່ຫວາດຫວັ່ນຕໍ່ຄວາມອັນຕະລາຍ, ສ່ຽງເປັນສ່ຽງຕາຍຜ່ານຜ່າກັບຫ່າລູກລະເບີດ, ພາຍຸລູກປືນໃຫຍ່ ເພື່ອຮັບປະກັນໃຫ້ບັນດາລາຍການກະຈາຍສຽງໄດ້ນຳທັດສະນະທີ່ເປັນທຳຂອງ ຫວຽດນາມ ອອກສູ່ໂລກ ຢ່າງເປັນປົກກະຕິ.  ເມື່ອປະເທດຍາດໄດ້ເອກະລາດ, ມີສັນຕິພາບ, ບຸກຄົນເຫຼົ່ານັ້ນ ຍັງສືບຕໍ່ພະຍາຍຍາມເຮັດວຽກງານແນະນຳພາບພົດຂອງ ຫວຽດນາມ ແຫ່ງສັນຕິພາບ, ມີຄວາມສວຍງາມ, ປະຊາຊົນ ຫວຽດນາມ ດຸໝັ່ນຂະຫຍັນພຽນ, ສະໜິດສະໜົມ, ຮັກແພງແຂກຄົນສູ່ເພື່ອມິດສາກົນ. ແລະໃນວັນນີ້, ບັນດານັກຂ່າວ, ບັນນາທິການຂອງ VOV5 ກໍຍັງສືບຕໍ່ພາລະກິດແນະນຳກ່ຽວກັບ ປະເທດ ຫວຽດນາມ ທີ່ພັດທະນາ, ປະຊາຊົນ ຫວຽດນາມ ທີ່ຂະຫຍັນຂັນເຄື່ອນ, ມີຫົວຄິດປະດິດສ້າງ ເຖິງຜູ້ຟັງຂອງ 5 ທະວີບໃນໂລກ, ຊ່ວຍໃຫ້ເຂົາເຈົ້າມີຄວາມເຂົ້າໃຈແຈ້ງກວ່າ ແລະ ຮັກປະເທດ, ປະຊາຊົນ ຫວຽດນາມ ຫຼາຍກວ່າອີກ.

ບັນດາລາຍການກະຈາຍສຽງພາກພາສາຕ່າງປະເທດ ເໝືອນດັ່ງຂົວເຊື່ອມຕໍ່ ຫວຽດນາມ ກັບເພື່ອນມິດສາກົນ, ແລະນັກຂ່າວ, ບັນນາທິການແຕ່ລະຄົນຂອງ VOV5 ກໍເປັນຜູ້ກໍ່ສ້າງຂົວດັ່ງກ່າວ. ຍ້ອນເຫດນັ້ນ, ສຳລັບນັກຂ່າວ, ບັນນາທິການຫຼາຍຄົນແລ້ວ, ໄລຍະເວລາທີ່ເຮັດວຽກຢູ່ VOV5 ແມ່ນສິ່ງທີ່ໜ້າເຄົາລົບຮັບຖືທີ່ສຸດ, ເຮັດໃຫ້ເຂົາເຈົ້າມີຄວາມຜູກພັນກັບ VOV5 ເປັນເວລາດົນນານ. ປ້າ ຕ້າທູຮັ່ງ, ບັນນາທິການລາຍການພາສາ ລັດເຊຍ ແຕ່ປີ 1985 – 2014, ເວົ້າຄວາມໃນໃຈສູ່ຟັງວ່າ:

“ສຳລັບຂ້າພະເຈົ້າແລ້ວ, ການທີ່ໄດ້ເຮັດວຽກຢູ່ VOV5 ກໍເປັນບຸນວາດສະໜາ ແລະ ຂ້າພະເຈົ້າກໍຮັກມັກວຽກງານນີ້ທີ່ສຸດ. ຂ້າພະເຈົ້າມັກພາສາ ລັດເຊຍ, ສະນັ້ນ ວຽກງານຢູ່ທີ່ນີ້ກໍເໝາະສົມກັບຂ້າພະເຈົ້າຫຼາຍ. ແຕ່ລະມື້, ຂ້າພະເຈົ້າທັງໄດ້ອ່ານຂ່າວໃນຄື້ນກະຈາຍສຽງ, ທັງໄດ້ຮຽນຮູ້ນຳລຸ້ນອ້າຍລຸ້ນເອື້ອຍ. ຂ້າພະເຈົ້າຮູ້ສຶກມີຄວາມສຸກຫຼາຍ. ມາຮອດປັດຈຸບັນ, ຂ້າພະເຈົ້າ ພັກບຳນານໄດ້ 8 ກວ່າປີແລ້ວ, ແຕ່ບັນດາຮູບພາບກ່ຽວກັບ VOV5 ຍັງຢູ່ໃນຫ້ວງແນວຄິດຂອງຂ້າພະເຈົ້າສະເໝີ. ບາງເທື່ອຂ້າພະເຈົ້າຍັງຝັນວ່າ ເຊົ້າມື້ຕໍ່ມາ ເຮົາຍັງຈະໄປເຮັດວຽກປົກກະຕິ. ປີໃດກໍເຊັ່ນດຽວກັນ, ເມື່ອກັບມາຢ້ຽມຢາມ VOV5, ຄວາມຮູ້ສຶກເຫຼົ່ານັ້ນກໍຫວນຄືນຂຶ້ນມາ, ແມ່ນຄວາມຮູ້ສຶກຮັກແພງສຳລັບສະຖານທີ່ແຫ່ງນີ້”.

ໂດຍສືບຕໍ່ລຸ້ນພໍ່ລຸ້ນອ້າຍ, ບັນດານັກຂ່າວ, ບັນນາທິການໜຸ່ມຂອງ VOV5 ຂອງວັນນີ້ ບໍ່ພຽງແຕ່ມີຄວາມເມົາມົວກັບອາຊີບນັກຂ່າວເທົ່ານັ້ນ, ຫາກຍັງມີຄວາມຂະຫຍັນຂັນເຄື່ອນ ແລະ ມີຫົວຄິດປະດິດສ້າງ, ມີຄວາມຮັບຜິດຊອບກັບທຸກໜ້າທີ່ການງານທີ່ໄດ້ຮັບການມອບໝາຍ. ນາງ ຫງວຽນຖຸ່ຍລິງ, ເລຂາຄະນະຊາວໜຸ່ມຮາກຖານ VOV5, ບັນນາທິການລາຍການກະຈາຍສຽງພາກພາສາ ຝລັ່ງ ແບ່ງປັນວ່າ:

“ເມື່ອໄດ້ພົບປະ, ໂອ້ລົມກັບພະນັກງານລຸ້ນພໍ່ລຸ້ນອ້າຍ, ຊາວໜຸ່ມພວກຂ້າພະເຈົ້າ ກໍຮັບຟັງເອົາບົດຮຽນ, ປະສົບການບໍ່ພຽງແຕ່ທາງດ້ານວິຊາສະເພາະເທົ່ານັ້ນ ຫາກນັບທັງບົດຮຽນໃນຊີວິດປະຈຳວັນ, ການປະພຶດກັບເພື່ອນຮ່ວມງານຢູ່ບ່ອນເຮັດວຽກນຳອີກ...ສິ່ງເຫຼົ່ານັ້ນເຮັດໃຫ້ພວກຂ້າພະເຈົ້າຮູ້ສຶກວ່າ ມີຄວາມຜູກພັນກັບຫ້ອງການຫຼາຍກວ່າ, ຮູ້ສຶກວ່າ ຫ້ອງການຄືດັ່ງເຮືອນຫຼັງໜຶ່ງ ແລະ ພະນັກງານທຸກຄົນທີ່ເຮັດວຽກໃນເຮືອນຫຼັງນັ້ນ ໃຜໆກໍສະໜິດຕິດພັນ, ຮັກແພງກັນ. ໂດຍເປັນຄົນລຸ້ນໜຸ່ມທີ່ເຮັດວຽກຢູ່ທີ່ນີ້, ພວກຂ້າພະເຈົ້າຍິ່ງມີຄວາມເອກອ້າງທະນົງໃຈ ແລະ ຮັກມັກວຽກງານທີ່ຕົນກຳລັງເຮັດຫຼາຍກວ່າອີກ". 

ສຳລັບພະນັກງານ, ນັກຂ່າວ, ບັນນາທິການລຸ້ນຕ່າງໆຂອງ VOV5, ຄຳວ່າ VOV5 ແມ່ນຄວາມຮັກ, ແມ່ນຄວາມເອກອ້າງທະນົງໃຈ, ແມ່ນກຳລັງໜູນຕະຫຼອດໄປ ເພື່ອໃຫ້ທຸກຄົນພະຍາຍາມນຳຄື້ນກະຈາຍສຽງໃຫ້ນັບມື້ນັບອອກໄປກວ້າງໄກກວ່າ, ນຳ ຫວຽດນາມ ຫຍັບມໍ່ເຂົ້າກັບທ່ານຜູ້ຟັງໃນໂລກຫຼາຍກວ່າອີກ./.