ວັກຊິນ Covivac ໂດຍສະຖາບັນ IVAC ຜະລິດ (ພາບ: TTXVN)

ໃນໄລຍະກວ່າ 20 ປີຜ່ານມາ, ຂົງເຂດຄົ້ນຄວ້າ ແລະ ພັດທະນາວັກຊິນປ້ອງກັນ ແລະ ຄວບຄຸມພະຍາດອັນຕະລາຍ ຊະນິດຕ່າງໆ ຢູ່ຫວຽດນາມ ໄດ້ຮັບຄວາມສົນໃຈ, ລົງທຶນຈາກລັດຖະບານ, ບັນດາກະຊວງ, ຂະແໜງການ ແລະ ໄດ້ບັນລຸ ໝາກຜົນໃດໜຶ່ງ. ໃນນັ້ນຕ້ອງເວົ້າເຖິງຊະນິດວັກຊິນປ້ອງກັນຄື ຄໍຕີບ-ບາດທະຍັກ-ໄອໄກ່, ວັນນະໂລກ, ພະຍາດຕັບອັກເສບ B, ພະຍາດສະໝອງອັກເສບຍີ່ປຸ່ນ… ໄດ້ຊ່ວຍຫຼຸດຜ່ອນຈຳນວນຜູ້ຕິດພະຍາດ ແລະ ເສຍຊີວິດລົງຫຼາຍພໍສົມຄວນ.

ມາຮອດປະຈຸບັນ, ຫວຽດນາມ ໄດ້ເປັນເຈົ້າຂອງເຕັກໂນໂລຊີ ແລະ ສາມາດຜະລິດວັກຊິນຮັບໃຊ້ໂຄງການສັກວັກຊິນເປີດກວ້າງ ແລະ ວັກຊິນບາງຊະນິດອື່ນ ປະກອບສ່ວນປ້ອງກັນ ແລະ ຍູ້ພະຍາດທີ່ເປັນອັນຕະຫຼາຍຫຼາຍປະເພດໃຫ້ຖອຍໄປ, ຮັບປະກັນຄວາມໝັ້ນຄົງ, ຄວາມປອດໄພທາງດ້ານສຸຂະພາບຂອງວົງຄະນະຍາດ.

ປະຈຸບັນ, ທົ່ວປະເທດຫວຽດນາມ ມີ 4 ຮາກຖານຂຶ້ນກັບລັດປະຕິບັດການຄົ້ນຄວ້າຜະລິດວັກຊິນ, ລວມມີ: ສະຖາບັນວັກຊິນ ແລະ ຜະລິດຕະພັນຊີວະວິທະຍາທາງການແພດ (IVAC); ສູນຄົ້ນຄວ້າ, ຜະລິດວັກຊິນ ແລະ ຜະລິດຕະພັນຊີວະວິທະຍາທາງການແພດ (POLYVAC); ບໍລິສັດ MTV vaccine ແລະ ຜະລິດຕະພັນຊີວະວິທະຍາເລກ 1 ຈຳກັດ (VABIOTECH); ແລະ ບໍລິສັດ MTV vaccine Pasteur ດ່າລາດ ຈຳກັດ. ພິເສດ, ນັບແຕ່ເມື່ອພະຍາດໂຄວິດ-19 ແຜ່ລະບາດນັ້ນ, ມີວິສາຫະກິດບາງແຫ່ງ (ນັບທັງພາກລັດ ແລະ ເອກະຊົນ) ໄດ້ລົງທຶນຄົ້ນຄວ້າ ແລະ ຮັບຖ່າຍທອດເຕັກໂນໂລຊີຜະລິດວັກຊິນດ້ວຍເຕັກໂນໂລຊີຫຼາຍຢ່າງທີ່ແຕກຕ່າງກັນ.

ໃນນັ້ນ, ຫວຽດນາມ ມີວັກຊິນ 2 ຊະນິດພວມຢູ່ໃນໄລຍະທົດລອງເບື້ອງຕົ້ນ ນັ້ນແມ່ນວັກຊິນ Nanocovax ໂດຍບໍລິສັດຫຸ້ນສ່ວນເຕັກໂນໂລຊີ ຊີວະວິທະຍາການຢາ Nanogen ຄົ້ນຄວ້າ, ພັດທະນາ ແລະ ວັກຊິນ  COVIVAC ໂດຍສະຖາບັນວັກຊິນ ແລະ ຜະລິດຕະພັນຊີວະວິທະຍາການແພດ (IVIVAC) ຂຶ້ນກັບກະຊວງສາທາລະນະສຸກ ຫວຽດນາມ ຄົ້ນຄວ້າ, ພັດທະນາ. ສະເພາະວັກຊິນໂຄວິດ-19 “made in Vietnam” Nanocovax ໂດຍບໍລິສັດ Nanogen ຜະລິດ, ປະຈຸບັນພວມທົດລອງໄລຍະທີ 3 ດ້ວຍການທົດລອງສັກ ແຕ່ 1 ຫາ 2 ເຂັມໃຫ້ປະຊາຊົນເກືອບ 14.000 ຄົນແລ້ວ. ທ່ານປະລິນຍາເອກ ໂດ້ມິງຊີ້, ຫົວໜ້າສູນຄົ້ນຄວ້າ, ບໍລິສັດ Nanogen ໃຫ້ຮູ້ວ່າ:

“ປະຈຸບັນ, ໃນໂລກມີເຕັກໂນໂລຊີຜະລິດວັກຊິນ 4 ຢ່າງຄື: ວັກຊິນເຊື້ອຕາຍ, ວັກຊິນສ້າງໄວຣັດ adeno, ທີ 3 ແມ່ນເຕັກໂນໂລຊີ mRNA ແລະ ສຸດທ້າຍແມ່ນເຕັກໂນໂລຊີໂປຼຕີນລີຄອມບີແນັນ. ພວກຂ້າພະເຈົ້າມີບົດຮຽນຫຼາຍຢ່າງໃນການພັດທະນາຜະລິດຕະພັນທີ່ກ່ຽວຂ້ອງເຖິງເຕັກໂນໂລຊີໂປຼຕີນລີຄອມບີແນັນ ສະນັ້ນພວກຂ້າພະເຈົ້າຈຶ່ງຕົກລົງພັດທະນາວັກຊິນຕາມເຕັກໂນໂລຊີນີ້”.

ທ່ານພົນຕີ, ສາດສະດາຈານ, ປະລິນຍາເອກ ໂດ້ກວຽດ (ພາບ: VGP)

ຕາມທ່ານພົນຕີ, ສາດສະດາຈານ, ປະລິນຍາເອກ ໂດ້ກວຽດ, ຫົວໜ້າວິທະຍາຄານເສນາຮັກ, ຫົວໜ່ວຍເຂົ້າຮ່ວມການຄົ້ນຄວ້າ, ທົດລອງວັກຊິນ Nanocovax ແລ້ວ, ໄລ່ມາຮອດຈຸດເວລານີ້ ອາດ ເວົ້າໄດ້ວ່າວັກຊິນສາມາດຮັບປະກັນລັກສະນະປອດໄພ ແລະ ມີປະສິດທິຜົນໂດຍອີງໃສ່ລັກສະນະການເກີດພູມຕ້ານທານ.

“ວິທະຍາຄານເສນາຮັກ ແລະ ສະຖາບັນ  Pasteur ນະຄອນໂຮ່ຈີມິນ ໄດ້ສັກວັກຊິນໃຫ້ປະຊາຊົນ 12.000 ຄົນແລ້ວ. ມາຮອດປະຈຸບັນໄດ້ສັກໃຫ້ກວ່າ 11.000 ຄົນແລ້ວ. ໝາກຜົນທີ່ບັນລຸໄດ້ໂດຍພື້ນຖານແມ່ນຫຼາຍກວ່າ 92%. ຈາກຜົນການຄົ້ນຄວ້າຂອງ 3 ໄລຍະນັ້ນ ເລື່ອງຕີລາຄາຂອງວັກຊິນແມ່ນຈະໄດ້ອີງໃສ່ 3 ປັດໃຈທີ່ເປັນພື້ນຖານທີ່ສຸດ. ສາມາດຢືນຢັນໄດ້ວ່າ ວັກຊິນດັ່ງກ່າວແມ່ນມີຄວາມປອດໄພ ແລະ ມີປະສິດທິຜົນ ໂດຍອີງໃສ່ລັກສະນະການເກີດພູມຕ້ານທານ ແລະ ສະເໜີໃຫ້ມີບົດລາຍງານຕໍ່ກະຊວງສາທາລະນະສຸກ, ສະພາຄຸນສົມບັດເພື່ອຄົ້ນຄວ້າພິຈາລະນາອອກໃບອະນຸຍາດ”.

ພ້ອມກັບວັກຊິນ Nanocovax, ວັກຊິນ Covivac ໂດຍສະຖາບັນ IVAC ຜະລິດກໍ່ສຳເລັດການທົດລອງໄລຍະທີ 1 ແລະ ກຳລັງຫັນໄປສູ່ໄລຍະທີ 2. ທ່ານປະລິນຍາເອກ ເຢືອງຮິວທ໊າຍ, ຫົວໜ້າສະຖາບັນ IVAC ໃຫ້ຮູ້ວ່າ, ການທົດລອງໄລຍະທີ 1 ວັກຊິນໄດ້ຮັບການຕີລາຄາວ່າ ມີຄວາມປອດໄພ, ທົນທານ, ມີລັກສະນະເກີດພູມຕ້ານທານໄດ້ດີ.

ນອກນັ້ນ, ເລື່ອງຮັບຖ່າຍທອດເຕັກໂນໂລຊີວັກຊິນຈາກຕ່າງປະເທດເພື່ອທຳການຜະລິດຢູ່ພາຍໃນປະເທດກໍ່ໄດ້ຮັບການຜັນຂະຫຍາຍຈາກບໍລິສັດບາງແຫ່ງຄື: Vingroup ຮັບການຖ່າຍທອດເຕັກໂນໂລຊີຜະລິດວັກຊິນກັນໂຄວິດ-19 ຕາມເຕັກໂນໂລຊີ mRNA ຂອງອາເມລິກາ ຫຼື ບໍລິສັດຫຸ້ນສ່ວນກ້າວໜ້າສາກົນ AIC ແລະ ບໍລິສັດ MTV vaccine ແລະ ຜະລິດຕະພັນຊີວະວິທະຍາເລກ 1 ຈຳກັດ (VABIOTECH) ຮັບການຖ່າຍທອດເຕັກໂນໂລຊີຜະລິດວັກຊິນຂອງບໍລິສັດ Shionogi (ຍີ່ປຸ່ນ); ເຕັກໂນໂລຊີຜະລິດ Sputnik-V (ຂອງ ລັດເຊຍ) ກໍ່ໄດ້ຖ່າຍທອດໃຫ້ VABIOTECH ແລະ ບໍລິສັດ DS-Bio ຜັນຂະຫຍາຍຜະລິດ.

ໂດຍກຳນົດໄດ້ຄວາມສຳຄັນຂອງວັກຊິນ, ພິເສດແມ່ນໃນສະພາບພະຍາດໂຄວິດ-19 ພວມມີການຜັນແປຢ່າງສັບສົນ, ໂດຍປະຕິບັດຕາມການຊີ້ນຳຂອງການນຳລັດຖະບານ, ກະຊວງວິທະຍາສາດ ແລະ ເຕັກໂນໂລຊີໄດ້ສົມທົບກັບບັນດາກະຊວງ, ຂະແໜງການ ສ້າງໂຄງການວິທະຍາສາດເຕັກໂນໂລຊີຈຸດສຸມແຫ່ງຊາດ “ຄົ້ນຄວ້າ, ຜະລິດວັກຊິນສັກໃຫ້ຄົນຮອດປີ 2030”. ສູ້ຊົນຮອດປີ 2030, ໃຫ້ໄດ້ເປັນເຈົ້າຂອງເຕັກໂນໂລຊີຜະລິດວັກຊິນ 30 ຊະນິດ ແລະ ຜະລິດວັກຊິນໃຫ້ໄດ້ຢ່າງໜ້ອຍສຸດແມ່ນ 20 ຊະນິດ./.