ເຖິງວ່າໄດ້ດຳລົງຕຳແໜ່ງໃດກໍ່ຕາມ, ຍາມໃດທ່ານກໍ່ແມ່ນບຸກຄົນມັກເຮັດມັກທຳ, ເວົ້າໄປຄຽງຄູ່ກັບການກະທຳ. ທ່ານແມ່ນການນຳທີ່ມີການກະທຳຕິດແທດກັບຕົວຈິງ, ມີຄວາມສະໜິດສະໜົມຜູກພັນກັບປະຊາຊົນ ແລະ ໄດ້ສ້າງຂີດໝາຍຫຼາຍຢ່າງໃນກິດຈະການປ່ຽນແປງໃໝ່ຂອງປະເທດຊາດ.

ທ່ານ ໂດ໊ເມື່ອຍ ແລະ ທ່ານ ໄກສອນ ພົມວິຫານ

        ທ່ານ ເລຂາທິການໃຫຍ່ ໂດ໊ເມື່ອຍ ໄດ້ດຳລົງຫຼາຍຕຳແໜ່ງ, ຢູ່ຫຼາຍທ້ອງຖິ່ນທີ່ແຕກຕ່າງກັນ ແລະ ໄດ້ ຮັບການຝຶກຝົນຫຼໍ່ຫຼອມຜ່ານໄລຍະຕໍ່ສູ້ກູ້ຊາດ; ເຄີຍຖືກສັດຕູຈັບຕົວ ແລະ ກັກຂັງ, ເຄີຍເຂົ້າຮ່ວມການສ້າງອຳນາດການປົກຄອງ, ເຄີຍນຳພາຂະບວນການປະຕິວັດຢູ່ຫຼາຍທ້ອງຖິ່ນ. ໃນຕຳແໜ່ງໃດ ທ່ານກໍ່ເຮັດລ້ອນໜ້າທີ່ໄດ້ຮັບມອບໝາຍເປັນຢ່າງດີ. ທ່ານອະດີດເລຂາທິການໃຫຍ່ ໂດ໊ເມື່ອຍ ໄດ້ເຂົ້າເປັນສະມາຊິກສະພາລັດຖະມົນຕີເປັນເວລາ 19 ປີ, ນັບແຕ່ໄລຍະເວລາເປັນລັດຖະມົນຕີກະຊວງກໍ່ສ້າງ, ລັດຖະມົນຕີກະຊວງການຄ້າ, ຫົວໜ້າຄະນະກຳມະການຄວບຄຸມລາຄາສິນຄ້າແຫ່ງລັດ. ທ່ານດຳລົງຕຳແໜ່ງເປັນປະທານສະພາລັດຖະມົນຕີເປັນເວລາ 3 ປີ; ເປັນກຳມະການກົມການເມືອງ 5 ສະໄໝ; ເປັນຜູ້ປະຈຳການຄະນະເລຂາ, ເລຂາທິການໃຫຍ່, ເປັນທີ່ປຶກສາຄະນະບໍລິຫານງານສູນກາງພັກ. ດ້ວຍກຳລັງຄວາມສາມາດໃນການຈັດຕັ້ງ, ທ່ານອະດີດເລຂາທິການໃຫຍ່ ໂດ໊ເມື່ອຍ ໄດ້ສ້າງຂີດໝາຍໃນຫຼາຍກິດຈະກຳຫັນປະເທດເປັນປະເທດອຸດສາຫະກຳໃນໄລຍະທີ່ປະເທດຊາດປະສົບກັບຄວາມຫຍຸ້ງຍາກຫຼາຍຢ່າງຄື: ໂຄງການໄຟຟ້າໃຊ້ພະລັງຄວາມຮ້ອນ ອວງບີ໊, ຝາລ້າຍ, ໄຟຟ້ານ້ຳຕົກຮ່ວາບີ່ງ ຫຼື ກິດຈະກຳກໍ່ສ້າງສຸສານປະທານໂຮ່ຈີມິນ. ກິດຈະກຳທັງໝົດເຫຼົ່ານັ້ນ ລ້ວນແຕ່ເສີມຂະຫຍາຍການປະກອບສ່ວນສຳຄັນເຂົ້າໃນການພັດທະນາຂອງປະເທດຊາດຢ່າງມີປະສິດທິຜົນ. ປະຊາຊົນຫຼາຍຄົນໄດ້ຄິດຮອດຄິດເຖິງທ່ານເຊິ່ງເປັນການນຳທີ່ນຳໜ້າໃນກິດຈະການປ່ຽນແປງໃໝ່, ມີຄວາມສຸດຈິດສຸດໃຈ, ບໍລິສຸດຜຸດຜ່ອງ, ສະໜິດສະໜົມກັບມະຫາຊົນ, ຕິດແທດກັບພຶດຕິກຳຕົວຈິງ, ເວົ້າໄປຄຽງຄູ່ກັບການກະທຳ. ທ່ານ ຟ້າມຮືວຮ່ວາ, ຊາວເມືອງ ຮາຍບ່າຈຶງ, ສະແດງຄວາມເຫັນວ່າ:

        “ຂ້າພະເຈົ້າມີຄວາມປະທັບໃຈ 3 ຢ່າງກ່ຽວກັບທ່ານ ໂດ໊ເມື່ອຍ. ທີ່ໜຶ່ງ, ທ່ານເປັນຜູ້ດຳລົງຊີວິດຢ່າງປອດໃສ, ທີສອງ, ທ່ານຮູ້ນຳໃຊ້ຖືກຄົນຖືກວຽກ. ໃນໄລຍະທີ່ປະເທດຊາດປະສົບກັບຄວາມຫຍຸ້ງຍາກ ດັ່ງນັ້ນ ທ່ານຈຶ່ງສາມາດນຳປະເທດຊາດຜ່ານຜ່າຄວາມຫຍຸ້ງຍາກລຳບາກນີ້ໄປໄດ້. ທີສາມ ແມ່ນ, ຕໍ່ກັບບັນດາຄຳເຫັນທີ່ແຕກຕ່າງກັນນັ້ນ, ທ່ານກ້າຍອມຮັບ, ໝາຍຄວາມວ່າທ່ານກ້າຜ່ານຜ່າ. ນັ້ນແມ່ນສິ່ງທີ່ລ້ຳຄ່າທີ່ສຸດ.”

        ເມື່ອຕີລາຄາກ່ຽວກັບບັນດາການປະກອບສ່ວນຂອງທ່ານອະດີດເລຂາທິການໃຫຍ່ ໂດ໊ເມື່ອຍ ໃນໄລຍະທີ່ ຫວຽດນາມ ພວມປະຕິບັດກິດຈະການປ່ຽນແປງໃໝ່ໃນທ້າຍຊຸມປີ 1980, ຫາງສຽງສາກົນເຄີຍຮັບຮູ້ວ່າ: ທ່ານ ໂດ໊ເມື່ອຍ ໄດ້ດຳລົງຕຳແໜ່ງເປັນເລຂາທິການໃຫຍ່ໃນໄລຍະເວລາທີ່ສະພາບການໂລກ ແລະ ພາຍໃນປະເທດປະສົບກັບຄວາມຫຍຸ້ງຍາກ ທັງດ້ານການເມືອງ ແລະ ເສດຖະກິດ. ແຕ່ດ້ວຍຈັນຍາບັນຂອງການເປັນຜູ້ນຳ, ໃນຖານະຕຳແໜ່ງເປັນເລຂາທິການໃຫຍ່, ທ່ານໄດ້ນຳພາປະເທດຊາດຜ່ານຜ່າໄລຍະຫຍຸ້ງຍາກລຳບາກນີ້ໄດ້ຢ່າງສະຫງ່າຜ່າເຜີຍ. ໃນເວລາທີ່ທ່ານ ໂດ໊ເມື່ອຍ ເປັນເລຂາທິການໃຫຍ່ ກໍ່ແມ່ນໄລຍະເວລາທີ່ ຫວຽດນາມ ໄດ້ສ້າງຂີດໝາຍປະຫວັດສາດມີຄວາມໝາຍຍຸດທະສາດເປັນຕາຍຫຼາຍຢ່າງ ແລະ ບັນລຸໄດ້ບັນດາບາດກ້າວທີ່ບໍ່ເຄີຍມີມາກ່ອນກ່ຽວກັບຍຸດທະສາດການຕ່າງປະເທດ, ຄືເຂົ້າຮ່ວມ ອາຊຽນ, ລົງນາມໃນສັນຍາຄູ່ຮ່ວມມື ແລະ ການຮ່ວມມືຮອບດ້ານກັບສະຫະພາບ ເອີລົບ (EU), ສ້າງການພົວພັນກັບ ອາເມລິກາ ເປັນປົກກະຕິ… ທ່ານອະດີດເລຂາທິການໃຫຍ່ ໂດ໊ເມື່ອຍ ໄດ້ເປີດອອກໄລຍະໃໝ່ໃຫ້ແກ່ຂະແໜງການພົວພັນຕ່າງປະເທດ ຫວຽດນາມ, ເຮັດໃຫ້ພາບພົດຂອງ ຫວຽດນາມ ພົ້ນເດັ່ນຂຶ້ນໃນເວທີສາກົນ.