(VOVWORLD) -ເຖິງວ່າດຳລົງຊີວິດໃນສັງກາດດີຈີຕອນ ແລະ ເຊື່ອມໂຍງເຂົ້າກັບສາກົນດ້ວຍການດຳລົງຊີວິດທຳມາຫາກິນ ຍາມໃດກໍຕ້ອງໄວວາກໍ່ຕາມ ແຕ່ການອະນຸລັກຮັກສາວັດທະນະທຳ ລ້ວນແຕ່ໄດ້ຮັບຄວາມເອົາໃຈໃສ່ຈາກພັກ, ລັດ ຫວຽດນາມ ແລະ ປະຊາຊົນ ສືບທອດ, ເສີມຂະຫຍາຍເລື້ອຍໆມາ. ພິເສດແມ່ນບັນດາເພື່ອນໜຸ່ມ - ກະດູກສັນຫຼັງຂອງຊາດ ແລະ ຊາວ ຫວຽດນາມ ອາໄສຢູ່ຕ່າງປະເທດ - ຂົວຕໍ່, ທູດວັດທະນະທຳຂອງຊາດ, ເຂົາເຈົ້າຍາມໃດກໍມີຄວາມຫວັງ ແລະ ການກະທຳລະອຽດ ເພື່ອບໍ່ພຽງແຕ່ອະນຸລັກຮັກສາ, ເສີມຂະຫຍາຍວັດທະນະທຳເທົ່ານັ້ນ ຫາກຍັງແຜ່ກະຈາຍວັດທະນະທຳຫວຽດ ອອກສູ່ທົ່ວ 5 ທະວີບ ແລະ ເຊື່ອມໂຍງເຂົ້າກັບສາກົນ.
ໂດຍຕັ້ງຢູ່ກາງຖະໜົນທີ່ເຕັມໄປດ້ວຍດອກໄມ້ Home Hanoi Xuan (ຖະໜົນດອກໄມ້ລະດູບານໃໝ່ ແລະ ງານຕະຫຼາດນັດ Happy Tet ເຊິ່ງຈັດຂຶ້ນໃນກາງເດືອນມັງກອນຜ່ານມາ ຢູ່ຮ່າໂນ້ຍ, ຮ້ານວາງສະແດງຜະລິດຕະພັນຫັດຖະກຳ Hoa Tien Brocade ໄດ້ດຶງດູດໄວໜຸ່ມ ແລະ ຊາວ ຫວຽດນາມ ອາໄສຢູ່ຕ່າງປະເທດມາຊົມເປັນຈຳນວນຫຼາຍ ດ້ວຍບັນດາຜະລິດຕະພັນຫັດຖະກຳທີ່ເປັນເອກະລັກຂອງຊົນເຜົ່າຜູ້ໄທ, ຊົນເຜົ່າມົ້ງ. ພິເສດ, ສຳລັບຜູ້ທີ່ມີຄວາມສົນໃຈເຖິງວັດທະນະທຳຄື ປ້າ ເຈິ່ນທູຢຸງ, ຊາວ ຫວຽດນາມ ອາໄສ ຢູ່ ຝລັ່ງ ຍິ່ງພາດບໍ່ໄດ້. ໂດຍນຸ່ງຊຸດເຊື້ອຍາວທີ່ເປັນມູນເຊື້ອ, ຫົວໃສ່ກຸບ, ປ້າຢຸງ ພວມເມົາມົວກັບການເຮັດທົດລອງ ແລະ ຊອກຮູ້ກ່ຽວກັບສິລະປະແຕ້ມລວດລາຍໃສ່ແຜ່ນແພດ້ວຍຂີ້ເຜິ້ງຂອງຊາວເຜົ່າມົ້ງ.
“ຂ້າພະເຈົ້າມັກວິຊາວິຈິດສິນທີ່ສຸດ. ຂ້າພະເຈົ້າ ມັກຈັດບັນດາງານວາງສະແດງພາບແຕ້ມຢູ່ ຝລັ່ງ ເພື່ອໃຫ້ວິສາຫະກິດ ຫວຽດນາມ ມາວາງສະແດງ. ຄືຜະລິດຕະພັນນີ້ເປັນຕົ້ນ, ຂ້າພະເຈົ້າກໍສາມາດນຳໄປຈັດເປັນງານວາງສະແດງໄດ້ ເພື່ອແລກປ່ຽນວັດທະນະທຳ ຫວຽດນາມ - ຝລັ່ງ, ຝລັ່ງ - ຫວຽດນາມ ແລະ ກັບບັນດາປະເທດ ເອີຣົບ”.
 ປ້າຢຸງ ນັ່ງແບ່ງປັນກ່ຽວກັບໂອກາດ ແລະ ແຜນການຢາກນຳວັດທະນະທຳອອກສູ່ໂລກກັບເອື້ອຍນ້ອງ ຕິງ ແລະ ອວຽນ |
ໂດຍເປັນ ປອ ຜູ້ໜຶ່ງທີ່ເຄີຍໄປຮຽນຢູ່ຫຼາຍປະເທດ, ເຄີຍເປັນອາຈານ ແລະ ດຳລົງຊີວິດຢູ່ຝລັ່ງ ເປັນເວລາກວ່າ 30 ປີ, ເຖິງວ່າໄດ້ພັກບຳນານແລ້ວກໍຕາມ, ແຕ່ ປ້າ ເຈິ່ນທູຢຸງ ຍັງສືບຕໍ່ເຂົ້າຮ່ວມຄະນະ, ສະມາຄົມຕ່າງໆເພື່ອອະນຸລັກຮັກສາ, ແລກປ່ຽນ, ໂຄສະນາເຜີຍແຜ່ວັດທະນະທຳ ຫວຽດນາມ ກັບເພື່ອນມິດສາກົນ ເປັນຕົ້ນແມ່ນ ຄະນະພາສາຫວຽດ ອອນໄລ, ຄະນະຕິດຕໍ່ພົວພັນຊາວ ຫວຽດນາມ ອາໄສ ຢູ່ ເອີຣົບ, ສະມາຄົມແລກປ່ຽນວັດທະນະທຳ ຫວຽດນາມ - ຝລັ່ງ.... ສຳລັບປ້າແລ້ວ, ຫວຽດນາມແມ່ນປະເທດທີ່ມີພື້ນຖານວັດທະນະທຳທີ່ອຸດົມສົມບູນ ແລະ ຫຼາກຫຼາຍສີສັນ ຕ້ອງໄດ້ຮັບການອະນຸລັກຮັກສາ ແລະ ມີກຳລັງບົ່ມຊ້ອນຫຼາຍຢ່າງເພື່ອພັດທະນາ.
“ຂ້າພະເຈົ້າຫວັງຢ່າງຍິ່ງວ່າ ໂລກ ຈະເບິ່ງ ຫວຽດນາມ ໃນມູມມອງໃໝ່. ຂ້າພະເຈົ້າຄິດວ່າ ມື້ໃດມື້ໜຶ່ງ, ຂ້າພະເຈົ້າຈະນຳເອົາຈຸດຄວາມງາມທາງດ້ານວັດທະນະທຳທັງໝົດຂອງ ຫວຽດນາມ ໄປວາງສະແດງຢູ່ ຝລັ່ງ, ເວລານັ້ນ ເຂົາເຈົ້າຈະເຫັນປະເທດ ຫວຽດນາມ ແບບແປກປະຫຼາດໃຈ, ປະເທດ ຫວຽດນາມ ທີ່ໜ້າຈັບອົກຈັບໃຈທີ່ສຸດ. ຫວຽດນາມ ເຊື່ອມໂຍງເຂົ້າກັບສາກົນ ແຕ່ຍັງຮັກສາໄດ້ຈຸດຄວາມງາມທີ່ເປັນເອກະລັກສະເພາະຂອງຕົນ. ຂ້າພະເຈົ້າຄິດວ່າ ນີ້ແມ່ນສິ່ງທີ່ຕ້ອງເຮັດ. ຂ້າພະເຈົ້າມີຄວາມຮັກມັກວັດທະນະທຳ ແລະ ຢາກນຳເອົາວັດທະນະທຳຂອງ ຫວຽດນາມ ອອກສູ່ໂລກ. ຂ້າພະເຈົ້າຢາກຈັດງານວາງສະແດງວັດທະນະທຳ 54 ຊົນເຜົ່າ ຫວຽດນາມ ຢູ່ປະເທດ ຝລັ່ງ”.
 ຕິງ ແລະ ອວຽນ ຮູ້ສຶກດີໃຈຫຼາຍ ເມື່ອໂອກາດທີ່ນາງລໍຄອຍແຕ່ໃດໆ ກໍມາເຖິງແລ້ວ |
ຄຳແບ່ງປັນຂອງ ປ້າຢຸງ ກໍແມ່ນຄວາມຝັນຂອງຄົນລຸ້ນໜຸ່ມຫຼາຍຄົນທີ່ຢາກອະນຸລັກຮັກສາສີສັນຂອງຊາດໄວ້ ຄືດັ່ງເອື້ອຍນ້ອງ ເຊິ່ມທິອວຽນ ແລະ ເຊິ່ມທິຕິງ. ຍາມໃດເຂົາເຈົ້າກໍຫວັງວ່າ ຈະມີໂອກາດເພື່ອໂຄສະນາເຜີຍແຜ່ວັດທະນະທຳຂອງຊົນເຜົ່າຜູ້ໄທຂອງຕົນເວົ້າສະເພາະ ແລະ ຂອງຊາດ ຫວຽດນາມ ເວົ້າລວມສູ່ເພື່ອນມິດສາກົນ. ນາງ ເຊິ່ມທິຕິງ - ເຈົ້າຂອງສະຫະກອນ ແຜ່ນແພພື້ນເມືອງ Hoa Tien Brocade ກໍ່ຮູ້ສຶກດີໃຈ ເມື່ອໂອກາດທີ່ນາງລໍຄອຍແຕ່ໃດໆ ກໍມາເຖິງແລ້ວ.
“ໂດຍເກີດມາເປັນລູກຊົນເຜົ່າສ່ວນໜ້ອຍ ແລະ ມີຫຼາຍຮີດຄອງປະເພນີໄດ້ເຊື່ອມເລິກເຂົ້າສາຍເລືອດຂອງຂ້າພະເຈົ້າແລ້ວ, ຂ້າພະເຈົ້າຢາກຮັກສາບັນດາສິ່ງດັ່ງກ່າວໄວ້. ໃນອະນາຄົດ, ຂ້າພະເຈົ້າຢາກຮຽນຮູ້ ແລະ ຄົ້ນຫາວັດທະນະທຳຂອງເຜົ່າອື່ນ, ເຂດພາກອື່ນຕື່ມອີກ ແລະ ຖ້າຫາກວ່າໄດ້ຮຽນຮູ້, ແລກປ່ຽນວັດທະນະທຳກັບບັນດາປະເທດເພື່ອນມິດໃນໂລກນັ້ນ ກໍຈະແມ່ນສິ່ງທີ່ເປັນປະໂຫຍດຫຼາຍສຳລັບຂ້າພະເຈົ້າ. ນີ້ແມ່ນໂອກາດທີ່ດີສຳລັບພວກຂ້າພະເຈົ້າ. ພວກຂ້າພະເຈົ້າຢາກນຳເອົາຜະລິດຕະພັນຂອງຕົນໄປໂຄສະນາແນະນຳໃຫ້ເພື່ອນມິດສາກົນຮູ້ຈັກຫຼາຍຂຶ້ນ”.
 ນາງ ເຊິ່ມທິຕິງ ພະຍາຍາມອະນຸລັກຮັກສາ ແລະ ໂຄສະນາເຜີຍແຜ່ວັດທະນະທຳ ຫວຽດນາມ ກັບເພື່ອນມິດສາກົນ |
ໃນໄລຍະຜ່ານມາ, ປ້າຢຸງ ໄດ້ຊ່ວຍເຫຼືອ ແລະ ສ້າງເງື່ອນໄຂສະດວກ ກໍຄືເປັນຂົວຕໍ່ໃຫ້ວິສາຫະກິດ, ນັກສິລະປະກອນ, ນັກແຕ້ມ ຫວຽດນາມ ຫຼາຍຄົນ ໄປວາງສະແດງ, ເຂົ້າຮ່ວມງານວາງສະແດງຕ່າງໆຢູ່ ຝລັ່ງ ແລະ ກົງກັນຂ້າມ. ກັບມາຕ້ອນຮັບບຸນເຕັດຢູ່ບ້ານເກີດເມືອງນອນ ພາຍຫຼັງໄລຍະເວລາ 34 ປີ, ປ້າຢຸງ ໄດ້ຕັດສິນໃຈ ຍາດເອົາເຄິ່ງໜຶ່ງຂອງໄລຍະເວລາສັ້ນໆພຽງ 7 ມື້ຢູ່ ຫວຽດນາມ ເພື່ອໄປຄົ້ນຫາວັດທະນະທຳຂອງບັນດາເຜົ່າດຳລົງຊີວິດຢູ່ ຮ່າຢາງ. ປ້າພວມມານະພະຍາຍາມປະຕິບັດແຜນການຈັດງານວາງສະແດງວັດທະນະທຳ 54 ຊົນເຜົ່າ ຫວຽດນາມ ຢູ່ ຝລັ່ງ ໃນໄລຍະຈະມາເຖິງ. ທຸກການກະທຳຂອງປ້າ ຢຸງ ແລະ ບັນດາເພື່ອນໜຸ່ມຄື ຕິງ ແລະ ອວຽນ ຈະມີການປະກອບສ່ວນບໍ່ໜ້ອຍເຂົ້າໃນການແຜ່ກະຈາຍວັດທະນະທຳ ຫວຽດນາມ ອອກສູ່ທົ່ວ 5 ທະວີບ./.