(vovworld) – ບໍ່ຖືກຂີ້ຝຸ່ນເມື່ອແດດຮ້ອນ ແລະ ບວກຕົມເມື່ອຝົນຕົກຄືໃນເມື່ອກ່ອນອີກ. ປະຈຸບັນ, ປະຊາຊົນຢູ່ບ້ານ 6, ຕາແສງກວາງທິ້ງ, ເມືອງຫາຍຮ່າ, ແຂວງກວາງນິງ ມີຄວາມສະດວກກວ່າຫຼາຍຍ້ອນມີເສັ້ນທາງຄົມມະນາຄົມຍາວເກືອບ 400 ແມັດ ຫາກໍ່ນຳເຂົ້າໃຊ້ການ. ຕາແສງກວາງທິ້ງ ສູ້ຊົນເຖິງປີ 2015 ຈະສຳເລັດບັນດາຈຸດໝາຍກ່ຽວກັບການກໍສ້າງຊົນນະບົດໃໝ່ໂດຍພື້ນຖານ.
ປະຊາຊົນສະຫງວນທີ່ດິນກໍ່ສ້າງຊົນນະບົດໃໝ່
(ພາບ: ອິນເຕີແນດ)
ບົນເສັ້ນທາງເບຕົງສະອາດສາຍໃໝ່, ອ້າຍ ຟ້າມວັນແທ່ງ, ເຈົ້າບ້ານໆ 6 ເວົ້າວ່າ, ນີ້ແມ່ນເສັ້ນທາງແຫ່ງ “ແນວຄິດຂອງພັກ, ຈິດໃຈຂອງປະຊາຊົນ“. ໃນບ້ານໄດ້ມີ 100 ກວ່າຄອບຄົວບໍລິຈາກເງິນເກືອບ 50 ລ້ານດົ່ງ ແລະ 700 ກວ່າວັນແຮງງານດ້ວຍຄວາມສະໝັກໃຈ ເພື່ອບຸກເບີກໜ້າພຽງ, ສ້າງເປັນເສັ້ນທາງສາຍນີ້.
“ເມື່ອຫາກໍ່ຜັນຂະຫຍາຍໂຄງການກ່ອນນີ້ 2 ປີ, ພວກຂ້າພະເຈົ້າຮູ້ສຶກເປັນຫ່ວງເປັນໃຍຫຼາຍ, ບໍ່ຮູ້ວ່າຈະເຮັດແນວໃດ. ພວກຂ້າພະເຈົ້າໄດ້ຈັດການປະຊຸມກັບປະຊາຊົນຫຼາຍເທື່ອ, ອະທິບາຍໃຫ້ປະຊາຊົນເຂົ້າໃຈໄດ້ກ່ຽວກັບຜົນປະໂຫຍດຂອງໂຄງການກໍ່ສ້າງຊົນນະບົດໃໝ່ເພື່ອສະໜັບສະໜູນ, ປະກອບສ່ວນເຂົ້າໃນວຽກງານລວມຂອງປະຊາຄົມ ດ້ວຍຄວາມສະໝັກໃຈ“.
ຄອບຄົວປ້າ ບູ່ຍທິເລິ໋ນ ແມ່ນຄອບຄົວທຸກຍາກຢູ່ບ້ານ 6, ເຖິງວ່າຈະຂາດເນື້ອທີ່ດິນທຳການຜະລິດ, ແຕ່ເມື່ອຕາແສງຜັນຂະຫຍາຍການກໍ່ສ້າງບັນດາກິດຈະກຳໃນໂຄງການກໍ່ສ້າງຊນນະບົດໃໝ່, ປ້າໄດ້ສະຫງວນທີ່ດິນຂອງຕົນໃຫ້ແກ່ໂຄງການ, ປ້າຖືວ່າ, ການສະຫງວນທີ່ດິນ ກໍ່ແມ່ນພັນທະ, ແມ່ນໜ້າທີ່ຂອງພົນລະເມືອງ.
“ຄອບຄົວຂ້າພະເຈົ້າມີ 3 ທົ່ງນາ, ແຕ່ໄດ້ສະຫງວນ 1 ທົ່ງນາເພື່ອກໍ່ສ້າງຫໍວັດທະນະທຳ ແລະ 1 ທົ່ງນາເພື່ອກໍ່ສ້າງທາງຄົມມະນາຄົມ. ຂ້າພະເຈົ້າຄິດວ່າ, ລັດໄດ້ມີໂຄງການກໍ່ສ້າງຊົນນະບົດໃໝ່, ສ້າງເງື່ອນໄຂໃຫ້ປະຊາຊົນມີເສັ້ນທາງໄປມາສະດວກສະບາຍ ແລະ ພັດທະນາກວ່າ, ຂ້າພະເຈົ້າສະຫງວນທີ່ດິນເພື່ອກໍ່ສ້າງບ້ານໃຫ້ສວຍງາມກວ່າ. ຢູ່ທີ່ນີ້, ຄອບຄົວໃດກໍ່ພ້ອມແລ້ວທີ່ຈະສະຫງວນທີ່ດິນໃຫ້ໂຄງການດ້ວຍຄວາມສະໝັກໃຈ“.
ເມື່ອທຽບໃສ່ບ້ານອື່ນໆໃນຕາແສງ, ບ້ານ 4 ແມ່ນບ້ານມີເງື່ອນໄຂພັດທະນາກວ່າ, ຍ້ອນຕັ້ງຢູ່ໃກ້ກັບໃຈກາງຕາແສງ ແລະ ມີເສັ້ນທາງໄປມາລະຫວ່າງຕາແສງ. ປີ 2012, ໂດຍໄດ້ຮັບການໜູນຊ່ວຍຈາກລັດ ແລະ ການປະກອບສ່ວນຂອງປະຊາຊົນ, ຕາແສງ 4 ໄດ້ກໍ່ສ້າງຫໍວັດທະນະທຳທີ່ໃຫຍ່ໂຕໂອໂຖງ ແລະ ສວຍງາມ, ມີມູນຄ່າກວ່າ 1 ຕຶ້ດົ່ງສຳເລັດ. ພິເສດແມ່ນເນື້ອທີ່ດິນກໍ່ສ້າງຫໍວັດທະນະທຳກວ່າ 300 ຕາລາງແມັດ ລ້ວນແຕ່ໂດຍຄອບຄົວເອື້ອຍ ກາວທິຮົ່ງ ມອບໃຫ້.
“ກ່ອນນີ້, ຕາແສງບໍ່ມີຫໍວັດທະນະທຳ, ເມື່ອບ້ານຈັດການປະຊຸມ ຫຼືການລະຫຼິ້ນຕ່າງໆ ຕ້ອງອາໄສເຮືອນຂອງປະຊາຊົນ, ແຕ່ມັນຄັບແຄບຫຼາຍ. ເມື່ອໄດ້ຮັບເງິນໜູນຊ່ວຍຂອງລັດ ເພື່ອກໍ່ສ້າງຊົນນະບົດໃໝ່, ຄອບຄົວຂ້າພະເຈົ້າໄດ້ສະຫງວນທີ່ດິນໃຫ້ບ້ານເພື່ອກໍ່ສ້າງຫໍວັດທະນະທຳ ເປັນບ່ອນເຄື່ອນໄຫວ ດຳເນີນຊີວິດໃຫ້ແກ່ປະຊາຊົນ. ປະຊາຊົນຜູ້ໃດກໍ່ພາກພູມໃຈ, ສ່ວນຄອບຄົວເຮົາກໍ່ຮູ້ສຶກເອກອ້າງທະນົງໃຈ, ຍ້ອນຕົນເອງໄດ້ປະກອບສ່ວນເຂົ້າໃນການກໍ່ສ້າງໝູ່ບ້ານ“.
ປະຊາຊົນປະກອບແຮງງານກໍ່ສ້າງທາງຄົມມະນາຄົມໃນບ້ານ
(ພາບ: ອິນເຕີແນດ) ໃນວິວັດແຫ່ງການຜັນຂະຫຍາຍ, ເພື່ອສ້າງຄວາມໄວ້ເນື້ອເຊື່ອໃຈ, ເຮັດໃຫ້ປະຊາຊົນເຂົ້າຮ່ວມການກໍ່ສ້າງຊົນນະບົດໃໝ່, ຕາແສງກວາງທິ້ງ ໄດ້ສ້າງຕັ້ງຄະນະໂຄສະນາ ແນະນຳໃຫ້ປະຊາຊົນເຂົ້າໃຈແຈ້ງກ່ຽວກັບຈຸດໝາຍ, ຄວາມໝາຍຂອງໂຄງການຈຸດໝາຍແຫ່ງຊາດກ່ຽວກັບການກໍ່ສ້ງຊົນນະບົດໃໝ່ ດ້ວຍທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ ແລະ ຮັບຜົນປະໂຫຍດ“. ມາຮອດປະຈຸບັນ, ປະຊາຊົນຕາແສງກວາງທິ້ງ ໄດ້ມອບທີ່ດິນ ເກືອບ 7000 ຕາລາງແມັດ, ບໍລິຈາກເງິນເກືອບ 1 ຕື້ດົ່ງ ແລະ ນັບພັນວັນແຮງງານ ເພື່ອກໍ່ສ້າງທາງເບຕົງລະຫວ່າງຕາບ້ານ, ແສງກວ່າ 8 ກມ, ກໍ່ສ້າງຫໍວັດທະນະທຳບ້ານ... ທ່ານ ບູ່ຍວັນເລືອງ, ປະທານຄະນະກຳມະການປະຊາຊົນຕາແສງກວາງທິ້ງ ຢືນຢັນວ່າ:
“ຂະບວນການສະຫງວນທີ່ດິນ ພວມໄດ້ຮັບການຕອບສະໜອງຈາກປະຊາຊົນຢ່າງຕັ້ງໜ້າ. ປະຈຸບັນ, ຢູ່ບ້ານຕ່າງໆພວມສືບຕໍ່ກໍ່ສ້າງທາງເບຕົງໃໝ່ທີ່ກວ້າງຂວາງກວ່າ ແລະ ສວຍງາມກວ່າ. ມີຫໍວັດທະນະທຳຫຼາຍແຫ່ງໄດ້ກໍ່ສ້າງສຳເລັດ ແລະ ນຳເຂົ້າໃຊ້ການແລ້ວ. ໃນຕໍ່ໜ້າ, ພວກຂ້າພະເຈົ້າສືບຕໍ່ໂຄສະນາ ເພື່ອໃຫ້ປະຊາຊົນມີການປະກອບສ່ວນເຂົ້າໃນການກໍ່ສ້າງຊົນນະບົດໃໝ່ຫຼາຍກວ່າອີກ, ສູ້ຊົນຮອດປີ 2015 ທາງຕາແສງຈະປະຕິບັດສຳເລັດບັນດາຈຸດໝາຍກ່ຽວກັບການກໍ່ສ້າງຊົນນະບົດໃໝ່“.
ຈາກແຜນນະໂຍບາຍທີ່ຖືກຕ້ອງ, ເໝາະສົມກັບຈິດໃຈຂອງປະຊາຊົນ ແລະ ວີທີເຮັດຢ່າງເປີດເຜີຍ, ປະຊາທິປະໄຕ, ຂະບວນການສະຫງວນທີ່ດິນກໍ່ສ້າງຊົນນະບົດໃໝ່ຢູ່ຕາແສງກວາງທິ້ງ, ເມືອງຫາຍຮ່າ, ແຂວງກວາງນິງ ໄດ້ຮັບຜົນງານຫຼາຍຢ່າງ ແລະ ປະກອບສ່ວນເຂົ້າໃນການສ້າງໂສມໜ້າຊົນນະບົດໃໝ່ຢູ່ເຂດບ້ານນາແຫ່ງນີ້.