(vovworld) – ໂດຍປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຕາແສງດົ່ງເຕີມແມ່ນໜຶ່ງໃນຈຳນວນ 3 ຕາແສງປະຕິບັດທົດລອງໂຄງການກໍ່ສ້າງຊົນນະບົດໃໝ່ໃນເມືອງອຽນເທ້, ແຂວງບັກຢາງ. ພາຍຫຼັງ 1 ປີ ແຫ່ງການຜັນຂະຫຍາຍ, ໂສມໜ້າຂອງຕາແສງດົ່ງເຕິມ ໄດ້ມີການປ່ຽນແປງຫຼາຍຢ່າງ. ທາງຄົມມະນາຄົມມີຄວາມສະດວກສະບາຍກວ່າ, ລາຍຮັບຂອງປະຊາຊົນໄດ້ຮັບການຍົກສູງຂຶ້ນ, ໂຄງປະກອບຜົນລະປູກ, ສັດລ້ຽງໄດ້ຮັບການຫັນປ່ຽນຕາມທິດມີປະສິດທິຜົນ.
ປະຊາຊົນດົ່ງເຕີມບໍລິຈາກທີ່ດິນເພື່ອກໍ່ສ້າງທາງ
(ພາບ: ອິນເຕີແນດ)
ເສັ້ນທາງໄປມາລະຫວ່າງບ້ານ, ຕາແສງຢູ່ດົ່ງເຕິມ ໃນປະຈຸບັນມີຄວາມສະດວກສະບາຍກວ່າກ່ອນນີ້ຫຼາຍ. ຍ້ອນມີຂະບວນການບໍລິຈາກທີ່ດິນເພື່ອເຮັດທາງ, ບັນດາເສັ້ນທາງຄົດລ້ຽວ, ຄັບແຄບໃນເມື່ອກ່ອນຢູ່ດົ່ງເຕິມ ໄດ້ຮັບການເປີດກວ້າງ ແລະ ກໍ່ສ້າງດ້ວຍເບຕົງຕາມມາດຖານທາງຄົມມະນາຄົມຊົນນະບົດໃໝ່. ມີ 200 ຄອບຄົວໃນຕາແສງດົ່ງເຕິມ ໄດ້ບໍລິຈາກທີ່ດິນກວ່າ 2,5 ເຮັກຕາ ແລະ ຝາຜະໜັງກວ່າ 1.200 ແມັດ, ເພື່ອເປີດກວ້າງທາງຄົມມະນາຄົມອອກ. ພົ້ນເດັ່ນແມ່ນຢູ່ບ້ານເຕິນສອຍ, ມີ 7 ຄອບຄົວໄດ້ບໍລິຈາກທີ່ດິນເກືອບ 4.000 ຕາລາງແມັດ ພ້ອມກັບພືດສຳຮອງ ແລະ ຊັບສິນໃນເນື້ອທີ່ດັ່ງກ່າວ ເພື່ອເປີດກວ້າງເສັ້ນທາງລະຫວ່າງບ້ານ, ຕາແສງ. ທ່ານ ຫງວຽນວັນແທ່ງ, ຜູ້ທີ່ໄດ້ບໍລິຈາກທີ່ດິນເກືອບ 1000 ຕາລາງແມັດ, ໃຫ້ຮູ້ວ່າ:
“ຄອບຄົວຂ້າພະເຈົ້າມີເນື້ອທີ່ດີນທັງໝົດແມ່ນ 5000 ຕາລາງແມັດ, ໃນນັ້ນບໍລິຈາກໃຫ້ລັດ 1000 ຕາລາງແມັດ. ທັງລັດ ແລະ ປະຊາຊົນພ້ອມກັນເຮັດ ເພື່ອໃຫ້ທາງຄົມມະນາຄົມກວ້າງຂວາງກວ່າ ແລະ ສ້າງຄວາມສະດວກສະບາຍໃຫ້ການໄປມາກວ່າ. ປະຊາຊົນພວກຂ້າພະເຈົ້າກໍ່ຢາກເຂົ້າຮ່ວມການກໍ່ສ້າງຊົນນະບົດໃໝ່ ເພື່ອໃຫ້ໂສມໜ້າບ້ານ, ຕາແສງມີການປ່ຽນໃໝ່, ສວຍງາມແລະ ພັດທະນາກວ່າ .“
ເສັ້ນທາງໄປມາຢູ່ອຽນເທ໋ໄດ້ຮັບການກໍ່ສ້າງໃໝ່ຢ່າງກວ້າງຂວາງ
(ພາບ: ອິນເຕີແນດ)
ປີ 2012, ຄະນະກຳມະການປະຊາຊົນຕາແສງດົ່ງເຕິມ ໄດ້ປະຕິບັດບັນດາມາດຖານກ່ຽວກັບການພັດທະນາການຜະລິດ, ວັດທະນະທຳ - ສັງຄົມ, ກໍ່ສ້າງລະບົບການເມືອງ, ຮັກສາຄວາມເປັນລະບຽບຮຽບຮ້ອຍ, ຄວາມໝັ້ນຄົງເປັນປະຈຳ… ເພື່ອກໍ່ສ້າງຊົນນະບົດໃໝ່, ຮັບປະກັນພັດທະນາຢ່າງໝັ້ນຄົງ, ຮອບດ້ານ ນັບທັງດ້ານເສດຖະກິດ, ສັງຄົມ.
ໂດຍກຳນົດວ່າ, ກໍ່ສ້າງຊົນນະບົດໃໝ່, ກ່ອນອື່ນໝົດແມ່ນຕ້ອງຍົກສູງຊີວິດການເປັນຢູ່, ລາຍຮັບຂອງປະຊາຊົນຂຶ້ນ, ການນຳຕາແສງດົ່ງເຕິມ ໄດ້ກຳນົດທິດພັດທະນາການລ້ຽງສັດ, ໃນນັ້ນເອົາໃຈໃສ່ເປັນພິເສດເຖິງການພັດທະນາການລ້ຽງໄກ່. ຍ້ອນເຫດນັ້ນ, ດົ່ງເຕິມ ໄດ້ກາຍເປັນຕາແສງທີ່ລ້ຽງໄກ່ດ້ວຍຈຳນວນຫຼາຍກວ່າໝູ່ໃນເມືອງອຽນເທ໋. ການລ້ຽງໄກ່ໄດ້ຮັບປະກັນຕາມຂັ້ນຕອນດ້ານເຕັກນິກ ແລະ ກໍ່ສ້າງເຄື່ອງໝາຍການຄ້າ, ດັ່ງນັ້ນ, ໄກ່ນັບໝື່ນໂຕຂອງດົ່ງເຕິມ ຍາມໃດກໍ່ພັດທະນາເປັນປົກກະຕິ. ໄກ່ຂາຍໄດ້ລາຄາສູງ, ຫຼາຍຄອບຄົວສ້າງກຳໄລໄດ້ນັບຮ້ອຍລ້ານດົ່ງຈາກການລ້ຽງໄກ່. ທ່ານ ຫງວຽນເລິມຈູງ, ຢູ່ຕາແສງດົ່ງເຕິມ, ໃຫ້ຮູ້ວ່າ:
“ໃນ 6 ເດືອນຕົ້ນປີ 2012, ຄອບຄົວຂ້າພະເຈົ້າລ້ຽງໄກ່ໄດ້ກວ່າ 6 ພັນໂຕ. ເດືອນ 2 ຂາຍ 2000 ໂຕ ຫາກຳໄລໄດ້ 28 ລ້ານດົ່ງ. ເດືອນ 5 ຂາຍ 4.500 ໂຕ ແຕ່ຖືກຫຼຸບທຶນ 42 ລ້ານດົ່ງ. ແຕ່ໃນ 6 ເດືອນທ້າຍປີພັດຫາກຳໄລໄດ້ 220 ລ້ານດົ່ງ. ປີນີ້ໄກ່ຂາຍໄດ້ລາຄາສູງກວ່າ“.
ໄກ່ອຽນເທ໋ (ພາບ:ອິນເຕີແນດ)
ເສດຖະກິດຄອບຄົວພັດທະນາ, ທັງແມ່ນຕາແສງທີ່ໄດ້ຮັບການສ້າງຕັ້ງຂຶ້ນຈາກນິຄົມກະເສດອຽນເທ໋ ມາເປັນເວລາ 3 ກວ່າປີ, ດັ່ງນັ້ນດົ່ງເຕິມ ຍິ່ງມີເງື່ອນໄຂສະດວກຫຼາຍຢ່າງ ເພື່ອຜັນຂະຫຍາຍການກໍ່ສ້າງຊົນນະບົດໃໝ. ດ້ວຍໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ ໄດ້ຮັບການລົງທຶນກໍ່ສ້າງໃໝ່. ເມື່ອເລີ່ມຕົ້ນຜັນຂະຫຍາຍໂຄງການກໍ່ສ້າງຊົນນະບົດໃໝ່ໃນຕົ້ນປີ 2012, ດົ່ງເຕິມ ບັນລຸໄດ້ 8/19 ມາດຖານ ແລະ ມາຮອດປະຈຸບັນ, ຕາແສງບັນລຸໄດ້ 11/19 ມາດຖານແລ້ວ. ເຖິງຢ່າງໃດກໍ່ຕາມ, ປະຈຸບັນ, ຕາແສງດົ່ງເຕິມ ຍັງປະສົບກັບຄວາມຫຍຸ້ງຍາກຫຼາຍຢ່າງຄື: ຄວາມສາມາດ ແລະ ລະດັບຄວາມຮູ້ຂອງພະນັກງານຂັ້ນຕາແສງຍັງຈຳກັດຢູ່. ປະຊາຊົນສ່ວນຫຼາຍແມ່ນເຮັດວຽກງານກະສີກຳ ດັ່ງນັ້ນການລະດົມທຶນໃນໝູ່ປະຊາຊົນກໍ່ປະສົບກັບຄວາມຫຍຸ້ງຍາກ; ມາດຖານອັດຕາຄອບຄົວທຸກຍາກ ກໍ່ບັນລຸໄດ້ຍາກ, ພິເສດ, ມາດຖານກ່ຽວກັບໂຄງປະກອບແຮງງານແມ່ນບັນລຸໄດ້ຍາກທີ່ສຸດ. ເພື່ອແກ້ໄຂບັນຫານີ້, ເມືອງອຽນເທ໋ ພ້ອມກັບຕາແສງດົ່ງເຕິມ ໄດ້ເລືອກເຟັ້ນມາດຕະການທີ່ຕັ້ງໜ້າ ນັ້ນແມ່ນຮຽກຮ້ອງການລົງທຶນ, ເພື່ອດຶງດູດຄົນງານໃນເຂດຊົນນະບົດ. ທ່ານ ລືວຊວນເວືອງ, ປະທານຄະນະກຳມະການປະຊາຊົນເມືອງອຽນເທ໋, ຢືນຢັນວ່າ:
“ບັນດາສິ່ງທີ່ຍັງຄົງຄ້າງຈະຕ້ອງສະເໜີ ເພື່ອໃຫ້ເໝາະສົມກັບສະພາບຕົວຈິງ. ກ່ຽວກັບບັນຫາຫັນປ່ຽນໂຄງປະກອບແຮງງານຈາກກະສີກຳເປັນປອດກະສີກຳ, ພິເສດແມ່ນສຳລັບດົ່ງເຕິມ, ທາງເມືອງໄດ້ມີມາດຕະການສ້າງກຸ່ມອຸດສາຫະກຳຢູ່ທີ່ນີ້ ເພື່ອດຶງດູດຜູ້ອອກແຮງງານ. ຢູ່ບໍລິເວນເມືອງ ກໍ່ຍູ້ແຮງວຽກງານດຶງດູດການລົງທຶນພັດທະນາອຸດສາຫະກຳ, ຕົວຢ່າງຄືໂຮງງານຕັດຫຍິບອຽນເທ໋ ດຶງດູດຜູ້ອອກແຮງງານມາເຮັດວຽກປະມານ 5 ພັນຄົນ. ທາງເມືອງກໍ່ພວມຕັ້ງໜ້າບຳລຸງສ້າງວິຊາຊີບໃຫ້ແກ່ຊາວກະສີກອນ“.
ດ້ວຍການສະໜັບສະໜູນຢ່າງຕັ້ງໜ້າຂອງປະຊາຊົນໃນການຫັນປ່ຽນໂຄງປະກອບຜົນລະປູກ, ສັດລ້ຽງ, ສ້າງວຽກເຮັດງານທຳເປັນປົກກະຕິ ແລະ ຍົກສູງລາຍຮັບໃຫ້ແກ່ປະຊາຊົນນັ້ນ, ເຊື່ອໝັ້ນວ່າຕາແສງດົ່ງເຕິມ ຈະປະຕິບັດສຳເລັດ 19 ມາດຖານກ່ຽວກັບການກໍ່ສ້າງຊົນນະບົດໃໝ່ຖືກຕາມຈຸດໝາຍທີ່ໄດ້ວາງອອກ. ເມືອງອຽນເທ໋ ສູ້ຊົນຮອດປີ 2015, 3 ຕາແສງປະຕິບັດທົດລອງຂອງແຂວງຈະປະຕິບັດສຳເລັດຈຸດໝາຍກ່ຽວກັບການກໍ່ສ້າງຊົນນະບົດໃໝ່, ໃນນັ້ນມີຕາແສງດົ່ງເຕິມ.