(vovworld) - ແຂວງຊອກຈັງໄດ້ເລືອກເຟັ້ນ 22 ຕາແສງຢູ່ເຂດຫ່າງໄກສອກຫຼີກ, ເຂດຊົນເຜົ່າຂະແມ ທີ່ຍັງປະສົບກັບຄວາມຫຍຸ້ງຍາກກ່ຽວກັບພື້ນຖານໂຄງລ່າງເພື່ອລົງທຶນກໍ່ສ້າງຊົນນະບົດໃໝ່. ພາຍຫຼັງຜັນຂະຫຍາຍ ແລະ ປະຕິບັດເປັນເວລາເກືອບ 3 ປີ, ໄດ້ມີ 300 ກວ່າກິດຈະກຳສະຫວັດດີການສັງຄົມໄດ້ຮັບການກໍ່ສ້າງຂຶ້ນ, ອັນໄດ້ຊ່ວຍໃຫ້ຊາວທ້ອງຖີ່ນມີເງື່ອນໄຂພັດທະນາການຜະລິດ, ລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ກໍ່ສ້າງ ພູມຊອກໃຫ້ນັບມື້ນັບສວຍງາມຮັ່ງມີ.
ຊອກຈັງໃນປະຈຸບັນ
(ພາບ: ອິນເຕີແນດ)
ມາຮອດປະຈຸບັນ, ຕາແສງບາຈີງ, ເມືອງເກ໋ແຊກ, ແຂວງຊອກຈັງ ເຊິ່ງແມ່ນຕາແສງທີ່ອຳນາດການປົກຄອງທ້ອງຖີ່ນເລືອກເຟັ້ນເພື່ອປະຕິບັດທົດລອງການກໍ່ສ້າງຊົນນະບົດໃໝ່, ບັນລຸໄດ້ 11 ມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ເຢືອງເທີມ, ຢູ່ບ້ານ 4, ຕາແສງບາຈີງ, ໃຫ້ຮູ້ວ່າ: ຍ້ອນມີຊົນນະບົດໃໝ່, ວຽກງານກະສີກຳກໍ່ສະດວກສະບາຍກວ່າ, ມີນ້ຳສະອາດຕະຫຼອດປີ, ມີລະບົບຊົນລະປະທານ, ມີທາງຄົມມະນາຄົມ, ມີໄຟຟ້າ ແລະ ເດັກນ້ອຍທຸກຄົນລ້ວນແຕ່ໄດ້ໄປຮຽນ.
“ຂ້າພະເຈົ້າສະໜັບສະໜູນຂະບວນການກໍ່ສ້າງຊົນນະບົດໃໝ່ທີ່ສຸດ. ໂດຍມີຄວາມສາມັກຄີ, ຮ່ວມແຮງຮ່ວມໃຈລະຫວ່າງອຳນາດການປົກຄອງກັບປະຊາຊົນທ້ອງຖີ່ນ, ດັ່ງນັ້ນພວກຂ້າພະເຈົ້າຈຶ່ງກໍ່ສ້າງສຳເລັດບັນດາກິດຈະກຳໃນໂຄງການກໍ່ສ້າງຊົນນະບົດໃໝ່ເພື່ອຮັບໃຊ້ໃຫ້ແກ່ປະຊາຊົນ“.
ຢູ່ຕາແສງຊວນຮ່ວາ, ທາງຄົມມະນາຄົມໃນບ້ານໄດ້ຮັບການເຊື່ອມຕໍ່ນຳກັນ. ໃນຊຸມປີຜ່ານມາ, ທາງຕາແສງໄດ້ຂົນຂວາຍປະຊາຊົນປະກອບເງິນໄດ້ 2 ຕຶ້ດົ່ງ, ກໍ່ສ້າງສຳເລັດທາງຄົມມະນາຄົມທີ່ມີຄວາມຍາວ 3,5 ກມ ແລະ ຂົວ 4 ແຫ່ງ. ທ່ານ ຫງວຽນວັນຫວູ, ປະທານຄະນະກຳມະການປະຊາຊົນຕາແສງຊວນຮ່ວາ, ເມືອງເກ໋ແຊກ, ໃຫ້ຮູ້ວ່າ: ດ້ວຍທິດນຳ: “ລັດ ແລະ ປະຊາຊົນພ້ອມກັນເຮັດ“, ປະຊາຊົນຕາແສງຊວນຮ່ວາ ໄດ້ສະໜອງທີ່ດິນ, ປະກອບຊັບສິນເງິນທອງເພື່ອກໍ່ສ້າງທາງຄົມມະນາຄົມ. ເຂົາເຈົ້າຖືວ່າ, ກ່ອນນີ້ລັດໄດ້ເອົາໃຈໃສ່ຫຼາຍເຖິງປະຊາຊົນແລ້ວ, ປະຈຸບັນບໍ່ໄດ້ລໍຖ້າການຊ່ວຍເຫຼືອຈາກລັດອີກ, ຫາກຕ້ອງຮ່ວມແຮງຮ່ວມໃຈພ້ອມກັບລັດກໍ່ສ້າງບ້ານເກີດເມືອງນອນ
ຊອກຈັງໃນປະຈຸບັນ
(ພາບ: ອິນເຕີແນດ) ຕາແສງເຈື່ອງແຄ໋ງ, ເມືອງລອງຟູ໋, ດ້ວຍ 54% ຈຳນວນພົນລະເມືອງແມ່ນຊາວເຜົ່າຂະແມ ກໍ່ແມ່ນຕາແສງທີ່ແຂວງຊອກຈັງຄັດເລືອກ ເພື່ອປະຕິບັດຂະບວນການດັ່ງກ່າວ. ໂດຍແມ່ນຕາແສງຜະລິດກະສີກຳເປັນຕົ້ນຕໍ່, ດັ່ງນັ້ນໃນວິວັດແຫ່ງການລົງທຶນ, ອຳນາດການປົກຄອງທ້ອງຖີ່ນຈຶ່ງເອົາໃຈໃສ່ເປັນພິເສດເຖິງບັນດາມາດຖານທີ່ກ່ຽວຂ້ອງເຖິງຂົງເຂດກະສີກຳຄື: ຊົນລະປະທານ, ໂຄງປະກອບແຮງງານ, ຮູບການຈັດຕັ້ງການຜະລິດ... ເພື່ອປະຕິບັດໂຄງການຢ່າງມີປະສິດທິຜົນ, ທາງຕາແສງໄດ້ສົມທົບກັບບັນດາຂະແໜງທີ່ກ່ຽວຂ້ອງ ເພື່ອເປີດຊຸດເຝິກອົບຮົມກ່ຽວກັບການຖ່າຍທອດວິທະຍາສາດເຕັກນິກການຜະລິດ, ສ້າງບັນດາຮູບແບບທົ່ງນາທີ່ເປັນແບບຢ່າງ, ໜ່ວຍສະຫະກອນ ແລະ ສະຫະກອນຕິດພັນກັບການປົກປັກຮັກສາສິ່ງແວດລ້ອມ. ອ້າຍ ເລິມວິ້ງຊາງ, ຢູ່ບ້ານເຈື່ອງຮຶງ, ຊາວກະສີກອນຂະແມທີ່ເຂົ້າຮ່ວມໜ່ວຍສະຫະກອນ, ໃຫ້ຮູ້ວ່າ:
“ປີໃດຂ້າພະເຈົ້າກໍ່ເຂົ້າຮ່ວມບັນດາຊຸດອົບຮົມຖ່າຍທອດວິທະຍາສາດເຕັກນິກຢູ່ຕາແສງ. ຢູ່ທີ່ນີ້ຂ້າພະເຈົ້າໄດ້ຄົ້ນຄ້ວາກ່ຽວກັບວິທີປູກຝັງ, ຜະລິດກະສີກຳ, ລ້ຽງສັດ. ພາຍຫຼັງເຂົ້າຮ່ວມຊຸດອົບຮົມ, ຂ້າພະເຈົ້າມີຄວາມເຂົ້າໃຈກວ່າກ່ຽວກັບວຽກງານກະສີກຳຕື່ມອີກ, ດັ່ງນັ້ນການຜະລິດຈຶ່ງຮັບປະສິດທິຜົນສູງກວ່າ.“
ຊອກຈັງໃນປະຈຸບັນ
(ພາບ: ອິນເຕີແນດ)
ພາຍຫຼັງ 3 ປີ ທີ່ຜັນຂະຫຍາຍການປະຕິບັດໂຄງການ, ແຂວງຊອກຈັງ ໄດ້ລົງທຶນປະມານ 500 ຕື້ດົ່ງໃຫ້ 22 ຕາແສງປະຕິບັດທົດລອງ ເພື່ອກໍ່ສ້າງບັນດາກິດຈະກຳສະຫວັດດີການສັງຄົມ, ຫັນປ່ຽນໂຄງປະກອບເສດຖະກິດ ຜົນລະປູກ, ສັດລ້ຽງ, ວາງແຜນ ແລະ ນຳໃຊ້ທີ່ດິນກະສີກຳຢ່າງມີປະສິດທິຜົນ. ມາຮອດປະຈຸບັນ, ບັນດາຕາແສງປະຕິບັດທົດລອງຂອງແຂວງລ້ວນແຕ່ບັນລຸໄດ້ແຕ່ 10 ມາດຖານຂຶ້ນໄປ, ໃນນັ້ນມີ 2 ຕາແສງບັນລຸໄດ້ 13 ມາດຖານກໍ່ສ້າງຊົນນະບົດໃໝ່. ໃນວິວັດແຫ່ງການປະຕິບັດ. ຄະນະຊີ້ນຳທຸກຂັ້ນໄດ້ເອົາໃຈໃສ່ເປັນພິເສດເຖິງວຽກງານໂຄສະນາ ເພື່ອໃຫ້ປະຊາຊົນເຂົ້າໃຈໄດ້ຜົນປະໂຫຍດຂອງໂຄງການ, ດັ່ງນັ້ນຊາວທ້ອງຖີ່ນຈຶ່ງເຂົ້າຮ່ວມຢ່າງຕັ້ງໜ້າ. ທ່ານ ແທກທານ, ເລຂາຄະນະພັກເມືອງລອງຟູ໋, ໃຫ້ຮູ້ວ່າ:
“ໃນການກໍ່ສ້າງບັນດາກິດຈະກຳພື້ນຖານ. ເພື່ອໄດ້ຮັບການສະໜັບສະໜູນຈາກປະຊາຊົນ, ຄະນະຊີ້ນຳທຸກຂັ້ນໄດ້ໂຄສະນາ, ຂົນຂວາຍປະຊາຊົນ, ເພື່ອໃຫ້ເຂົາເຈົ້າມີຄວາມເຂົ້າໃຈແຈ້ງກວ່າກ່ຽວກັບຜົນປະໂຫຍດຂອງປະຊາຄົມ. ເມື່ອປະຊາຊົນເຂົ້າໃຈແລ້ວ, ເຂົາເຈົ້າຈະສະຫງວນທີ່ດິນ, ຊັບສົມບັດ, ກຳລັງແຮງ ເພື່ອພ້ອມກັບລັດປະຕິບັດຂະບວນການນີ້“.
ມາຮອດປະຈຸບັນ, ບັນດາຕາແສງທີ່ໄດ້ຮັບການລົງທຶນຈາກແຂວງ ຊອກຈັງ ເພື່ອກໍ່ສ້າງຊົນນະບົດໃໝ່ ໄດ້ສ້າງສຳເລັດ ແລະ ນຳເຂົ້າໃຊ້ການ 120 ກວ່າກິດຈະກຳສະຫວັດດີການສັງຄົມຄື: ໄຟຟ້າ, ທາງຄົມມະນາຄົມຊົນນະບົດ, ໂຮງຮຽນ, ສຸກສາລາ, ນ້ຳສະອາດ... ບັນດາກິດຈະກຳນີ້ຊ່ວຍໃຫ້ຊາວເຜົ່າຂະແມພັດທະນາການຜະລິດ, ຫັນປ່ຽນໂຄງປະກອບເສດຖະກິດກະສີກຳ, ປະກອບສ່ວນເຂົ້າໃນວຽກງານລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ກໍ່ສ້າງພູມຊອກ ໃຫ້ນັບມື້ນັບຮັ່ງມີສວຍງາມ./.