(vovworld) - ໂດຍປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ແຂວງກວາງນາມ ໄດ້ຄັດເລືອກ 3 ຕາແສງ ຄື ຢູຍຮ່ວາ, ຢູຍເຊີນ ແລະ ຢູຍເຟືອກ ທີ່ຂຶ້ນກັບເມືອງ ຢູຍຊວຽນ ເພື່ອປະຕິບັດທົດລອງ. ຜ່ານ 2 ປີ ແຫ່ງການປະຕິບັດ, ມາຮອດປະຈຸບັນ, ບັນດາຕາແສງເຫຼົ່ານີ້ບັນລຸໄດ້ 7/19 ມາດຖານກ່ຽວກັບການກໍ່ສ້າງຊົນນະບົດໃໝ່.
ປະຊາຊົນເມືອງ ຢູຍຊວຽນ ລະດົມແຮງງານກໍ່ສ້າງທາງຄົມມະນາຄົມ
(ພາບ: google.com.vn)
ນັບແຕ່ໄດ້ຮັບການເລືອກເຟັ້ນເປັນຕາແສງປະຕິບັດທົດລອງ ການກໍ່ສ້າງຮູບແບບຊົນນະບົດໃໝ່ຈາກແຂວງ ກວາງນາມ ນັ້ນ, ໂສມໜ້າຊົນນະບົດຢູ່ຕາແສງ ຢູຍຮ່ວາ, ເມືອງ ຢູຍຊວຽນ ນັບມື້ນັບໄດ້ຮັບການຈະເລີນເຕີບໂຕ. ດ້ວຍທິດນຳທີ່ວ່າ ”ລັດ ແລະ ປະຊາຊົນພ້ອມກັນເຮັດ”, ມາຮອດປະຈຸບັນ, ທາງຄົມມະນາຄົມລະຫວ່າງບ້ານ, ຕາແສງເກືອບທັງໝົດລ້ວນແຕ່ໄດ້ຮັບການກໍ່ສ້າງດ້ວຍເບຕົງ, ປະຊາຊົນມີເງື່ອນໄຂເປີດກວ້າງການຜະລິດ; ຊີວິດການເປັນຢູ່ໄດ້ຮັບການຍົກສູງຂຶ້ນເທື່ອລະກ້າວ. ທ່ານ Ngo Ba Loi, ປະທານຄະນະກຳມະການປະຊາຊົນຕາແສງ ຢູຍຮ່ວາ, ໃຫ້ຮູ້ວ່າ, ມາຮອດຈຸດເວລານີ້, ຢູຍຮ່ວາ ບັນລຸໄດ້ 7/19 ມາດຖານກໍ່ສ້າງຊົນນະບົດໃໝ່, ແຕ່ລະປີອັດຕາສ່ວນຄອບຄົວທຸກຍາກໄດ້ຫຼຸດລົງຫຼາຍພໍສົມຄວນ, ມີຫຼາຍຄອບຄົວປະຕິບັດການຫັນປ່ຽນໂຄງປະກອບຜົນລະປູກ ອັນໄດ້ນຳມາເຊິ່ງລາຍຮັບສູງ:
“ໂຄງການຊົນນະບົດໃໝ່ແມ່ນໂຄງການທີ່ມີລັກສະນະຮອບດ້ານ ແລະ ແທດຈິງທີ່ສຸດສຳຫຼັບຊົນນະບົດ, ກ່ອນອື່ນໝົດແມ່ນສ້າງຊີວິດໃຫ້ປະຊາຊົນໃນຫຼາຍດ້ານເຊັ່ນທາງດ້ານເສດຖະກິດ - ສັງຄົມ, ປ້ອງກັນຊາດ - ປ້ອງກັນຄວາມສະຫງົບ. ທາງຕາແສງສູ້ຊົນເຖິງປີ 2015 ຈະມີຄວາມເຂັ້ມແຂງໃນຫຼາຍດ້ານ, ພິເສດ ແມ່ນການຜະລິດກະສີກຳ, ພັດທະນາເສດຖະກິດຢ່າງແຮງ, ອັດຕາສ່ວນຄອບຄົວທີ່ທຸກຍາກເຖິງປີ 2015 ແມ່ນເຫຼືອພຽງປະມານ 5%. ໂສມໜ້າຊົນນະບົດຢູ່ ຢູຍຮ່ວາ ເຖິງປີ 2015 ຈະໄດ້ຮັບການພັດທະນາຢ່າງຮອບດ້ານກວ່າເມື່ອທຽບໃສ່ປະຈຸບັນ”.
ໂດຍປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຊາວກະສິກອນໃນຕາແສງ ຢູຍເຊີນ, ໄດ້ມອບທີ່ດິນນັບ ຮ້ອຍຕາລາງແມັດເພື່ອກໍ່ສ້າງທາງຄົມມະນາຄົມລະຫວ່າງບ້ານ, ປະກອບແຮງງານເພື່ອບູລະນະສ້ອມແປງ ແລະ ກໍ່ສ້າງເສັ້ນທາງຄົມມະນາຄົມໃໝ່, ສ້າງຄອງເໝືອງ. ດ້ວຍແຫຼ່ງທຶນຈາກໂຄງການຕ່າງໆ, ປີ 2011, ເມືອງຢູຍຊວຽນ ຍັງລົງທຶນເກືອບ 500 ລ້ານດົ່ງໃຫ້ແກ່ຕາແສງ ຢູຍເຊີນ ເພື່ອກໍ່ສ້າງພື້ນຖານໂຄງລ່າງ, ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ; ບັນດາກິດຈະກຳຊົນລະປະທານ, ຄອງເໝືອງ. ດ້ວຍການປະກອບສ່ວນຂອງປະຊາຊົນ, ຕາແສງ ຢູຍເຊີນ ພວມສືບຕໍ່ປະຕິບັດບັນດາມາດຕະຖານກ່ຽວກັບຮາກຖານດ້ານວັດຖຸ, ວັດທະນະທຳ, ຕະຫຼາດຊົນນະບົດ, ໄປສະນີ, ສຸກສາລາ, ຫໍວັດທະນະທຳ… ທ່ານ Le Cong Tien, ຢູ່ຕາແສງ ຢູຍເຊີນ, ເມືອງຢູຍຊວຽນ, ໃຫ້ຮູ້ວ່າ:
“ຂ້າພະເຈົ້າເຫັນດີກັບແຜນນະໂຍບາຍຂອງພັກ ແລະ ລັດ. ດັ່ງນັ້ນບັນດາຄອບຄົວຢູ່ແຄມທາງຄົມມະນາຄົມໃນຕາແສງລ້ວນແຕ່ສະຫງວນທີ່ດິນເພື່ອກໍ່ສ້າງທາງຄົມມະນາຄົມ. ອາດເວົ້າໄດ້ວ່າ ແຜນນະໂຍບາຍນີ້ແມ່ນສອດຄ່ອງກັບຈິດໃຈຂອງປະຊາຊົນ. ປະຕິບັດສຳເລັດ 19 ມາດຕະຖານໂດຍລັດວາງອອກ, ຕອບສະໜອງແຜນນະໂຍບາຍຂອງຄະນະພັກ, ສະພາປະຊາຊົນ, ຄະນະກຳມະການປະຊາຊົນປະຕິບັດຖືກຕາມມາດຕະຖານທີ່ໄດ້ວາງອອກໃນແຕ່ລະປີ ເພື່ອປະກອບສ່ວນພ້ອມກັບຕາແສງ ແລະ ເມືອງປະຕິບັດສຳເລັດໂຄງການກໍ່ສ້າງຊົນນະບົດໃໝ່.”
ປະຊາຊົນເມືອງ ຢູຍຊວຽນ ລະດົມແຮງງານກໍ່ສ້າງທາງຄົມມະນາຄົມ
(ພາບ: google.com.vn)
ປະຈຸບັນ, ເມືອງ ຢູຍຊວຽນ ພວມສູມໃສ່ກວດກາແຜນກຳນົດກໍ່ສ້າງຊົນນະບົດໃໝ່, ໃຫ້ບຸລິມາສິດແກ່ການການພັດທະນາພື້ນຖານໂຄງລ່າງ ແລະ ບັນດາປັດໃຈອັນຈຳເປັນອື່ນໆ, ມຸ່ງໄປເຖິງຈຸດໝາຍສູ້ຊົນເຮັດໃຫ້ 3 ຕາແສງປະຕິບັດທົດລອງລ້ວນແຕ່ບັນລຸໄດ້ມາດຖານຊົນນະບົດໃຫມ່ໃນປີ 2015. ທ່ານ ວັນບາ ນຳ, ຫົວໜ້າຫ້ອງການກະສິກຳ ເມືອງ ຢຸຍຊວຽນ ແຂວງ ກວາງນາ ເວົ້າວ່າ: “ແຕ່ນີ້ຮອດປີ 2015, ເມືອງຈະສູ້ຊົນເຮັດໃຫ້ 3 ຕາແສງບັນລຸມາດຖານທັງໝົດ 19 ຂໍ້, ສ່ວນບັນດາຕາແສງທີ່ຍັງເຫຼືອພະຍາຍາມຮອດປີ 2020 ຈະສຳເລັດ 19 ມາດຖານ. ໃນເບິ່ງລວມແລ້ວໂຄງການຈຸດໝາຍແຫ່ງຊາດກ່ຽວກັບການສ້າງຊົນນະບົດໃໝ່, ພວກຂ້າພະເຈົ້າໄດ້ປະຕິບັດວຽກງານໂຄສະນາ ຂົນຂວາຍປະຊາຊົນຕອບສະຫນອງເປັນຢ່າງດີ. ມີຫຼາຍແຫ່ງໄດ້ປະກອບເຫື່ອແຮງ, ມອບທີ່ດິນໃຫ້ແກ່ການກໍສ້າງທາງຄົມມະນາຄົມຊົນນະບົດ, ຢູ່ພາຍໃນໄດ້ຮ່ວມແຮງຮ່ວມໃຈກັນ, ປະຕິບັດໂຄງການຮວບໂຮມດິນໄຮ່ນາສຸມໃສ່ທຳການຜະລິດກະສິກຳ, ສ້າງທົ່ງນາຕົວແບບເທື່ອລະກ້າວ ແລະ ເພີ່ມລາຍຮັບໃຫ້ແກ່ປະຊາຊົນ”
ໃນຂະບວນວິວັດແຫ່ງການກໍສ້າງຊົນນະບົດໃຫມ່, ເມືອງ ຢຸ່ຍຊວຽນ, ແຂວງ ກວາງນາມໄດ້ລະດົມທຸກແຫ່ງກຳລັງ, ຜັນຂະຫຍາຍບັນດາໂຄງການຢ່າງມີປະສິດທິຜົນ ເພື່ອລົງທຶນຍົກສູງ, ສອ້ມແປງ ແລະ ກໍ່ສ້າງພື້ນຖານໂຄງລ່າງຕາມທິດຄົບຊຸຸດ, ທັນສະໄຫມເທື່ອລະກ້າວ, ຕອບສະຫນອງໄດ້ຕາມຄວາມຮຽກຮ້ອງຕ້ອງການໃນການພັດທະນາເສດຖະກິດ, ສັງຄົມ ແລະ ຮັບປະກັນຊີວິດການເປັນຢູ່ທີ່ດີໃຫ້ແກ່ພໍ່ແມ່ພີ່ນ້ອງໃນເຂດຊົນນະບົດ./.