(vovworld) - ໂດຍປະຕິບັດຍຸດທະສາດພັດທະນາຊົນນະບົດໃໝ່ຂອງລັດຖະບານ, ມີຫຼາຍໂຄງການພັດທະນາຊົນນະບົດເພື່ອຄົນທຸກຍາກໄດ້ຮັບການຜັນຂະຫຍາຍຢ່າງກວ້າງຂວາງ ແລະ ເສີມຂະຫຍາຍປະສິດທິຜົນ, ປະກອບສ່ວນຊຸກຍູ້ການພັດທະນາເສດຖະກິດສັງຄົມຢູ່ທ້ອງຖີ່ນ, ໃນນັ້ນມີໂຄງການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນ. ບົດຂຽນ “ປະສິດທິຜົນຈາກໂຄງການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນຢູ່ແຂວງນິງທ້ວນ” ຂອງວັນແກງ, ຈະສ່ອງແສງບັນດາປະສິດທິຜົນ ເຊິ່ງໂຄງການໄດ້ນຳມາໃຫ້ຊາວກະສີກອນຢູ່ທີ່ນີ້.
ນິງທ້ວນໃນປະຈຸບັນ
(ພາບ: ອິນເຕີແນດ)
ໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນຢູ່ແຂວງນິງທ້ວນ (ທາງທິດໃຕ້ຂອງພາກກາງ) ໂດຍກອງທຶນພັດທະນາກະສີກຳສາກົນ (FAD) ອຸປະຖຳ ມີຍອດຈຳນວນທຶນກວ່າ 334 ຕື້ດົ່ງ. ຄາດໝາຍຂອງໂຄງການ ແມ່ນເພື່ອປັບປຸງຄຸນນະພາບການດຳລົງຊີວິດຂອງບັນດາຄອບຄົວຊາວກະສີກອນ, ພິເສດແມ່ນຢູ່ເຂດປະສົບກັບຄວາມຫຍຸ້ງຍາກ, ແລະເຂດຊົນເຜົ່າສ່ວນໜ້ອຍຢ່າງໝັ້ງຄົງ. ໂຄງການສຸມໃສ່ລົງທຶນເພີ່ມຄວາມສາມາດດ້ານລະບຽບກົດໝາຍເພື່ອປະຕິບັດຍຸດທະສາດຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນ; ພັດທະນາຄຸນຄ່າຕ່າງໆເພື່ອຄົນທຸກຍາກ; ກໍ່ສ້າງ ແລະ ປະຕິບັດແຜນການພັດທະນາເສດຖະກິດ - ສັງຄົມຂັ້ນຕາແສງຕາມທິດຕະຫຼາດ.
ມາຮອດປະຈຸບັນ, ຄະນະປະສານງານໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ ໄດ້ຜັນຂະຫຍາຍການພັດທະນາຄຸນຄ່າຕ່າງໆເພື່ອຄົນທຸກຍາກຢ່າງທັນການ. ນັບແຕ່ປີ 2012 ມາຮອດປະຈຸບັນ, ຄະນະປະສານງານໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ ໄດ້ສົມທົບກັບບັນດາຫົວໜ່ວຍທີ່ກ່ຽວຂ້ອງ ຈັດຊຸດອົບຮົມກ່ຽວກັບອະນາໄມສັດຕາວະແພດ, ຄວາມປອດໄພດ້ານທັນຍາຫານ, ເຕັກນິກບົວລະບັດຕົ້ນໄມ້, ສັດລ້ຽງຕາມ 6 ຄຸນຄ່າທີ່ໄດ້ຮັບການເລືອກເຝັ້ນ 100 ກວ່າຊຸດໃຫ້ແກ່ 3000 ກວ່າຄອບຄົວໃນເຂດປະຕິບັດໂຄງການ. ປ້າ ບໍທິລຽນ, ຊົນເຜົ່າຢາລາຍ, ຢູ່ຕາແສງເຟືອກທ້າຍ, ເມືອງນິງເຟືອກ, ແຂວງນິງທ້ວນ, ໃຫ້ຮູ້ວ່າ:
“ກ່ອນນີ້ຂ້າພະເຈົ້າບໍ່ຮູ້ລ້ຽງສັດ, ລ້ຽງງົວ, ແຕ່ພາຍຫຼັງເຂົ້າຮ່ວມຊຸດອົບຮົມ, ຂ້າພະເຈົ້າໄດ້ຮູ້ວິທີລ້ຽງງົວເມື່ອເປັນພະຍາດ. ຫວັງວ່າຈະໄດ້ເຂົ້າຮ່ວມຊຸດອົບຮົມຫຼາຍກວ່າອີກເພື່ອລ້ຽງງົວຄືແນວໃດໃຫ້ເກີດງົວນ້ອຍຫຼາຍກວ່າ”.
ປະຊາຊົນຊົນເຜົ່າໃນແຂວງໄດ້ຮັບການອົບຮົມກ່ຽວກັບວິທີການຽງສັດ
(ພາບ: ອິນເຕີແນດ)
ຜ່ານໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນ, ບໍ່ພຽງແຕ່ຊາວເຜົ່າຢາລາຍ ເທົ່ານັ້ນ, ຫາກຊາວເຜົ່າຈຳ ຢູ່ນິງທ້ວນ ໄດ້ມີເງື່ອນໄຂຊົມໃຊ້ຜົນປະໂຫຍດຈາກໂຄງການນີ້, ພິເສດແມ່ນຄອບຄົວທີ່ທຸກຍາກ. ທ່ານຮ໋ານເຕິ໋ນຢູຍ, ຊົນເຜົ່າຈຳ, ຫົວໜ້າຄະນະພັດທະນາຕາແສງເຟືອກທ໋າຍ, ເມືອງນິງເຟືອກ, ແຂວງນິງທ້ວນ, ໃຫ້ຮູ້ວ່າ:
“ໂຄງການໄດ້ລົງທຶນເປີດ 3 ຊຸດອົບຮົມແນະນຳກ່ຽວກັບຮູບແບບລ້ຽງງົວ, ໝູ, ແບ້, ແກະ. ຂ້າພະເຈົ້າເຫັນວ່າ, ພາຍຫຼັງເຂົ້າຮ່ວມຊຸດອົບຮົມນີ້ ພໍ່ແມ່ປະຊາຊົນໄດ້ຮູ້ໝູນໃຊ້ຄວາມກ້າວໜ້າດ້ານວິທະຍາສາດເຕັກນິກເຂົ້າໃນການຜະລິດ, ລ້ຽງສັດ, ສ້າງເປັນຜະລິດຕະພັນທີ່ມີຄຸນຄ່າໃຫ້ແກ່ພໍ່ແມ່ປະຊາຊົນ, ຈາກນັ້ນຊ່ວຍເຂົາເຈົ້າພັດທະນາເສດຖະກິດຄອບຄົວ, ເພື່ອຫຼຸດພົ້ນອອກຈາກຄວາມທຸກຍາກ”.
ປະຊາຊົນຊົນເຜົ່າໃນແຂວງໄດ້ຮັບການອົບຮົມກ່ຽວກັບວິທີການປູກຝັງ
(ພາບ: ອິນເຕີແນດ)
ຄະນະປະສານງານໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ ໄດ້ເອົາໃຈໃສ່ເປັນພິເສດເຖິງການຜັນຂະຫຍາຍໂຄງການຢ່າງແໜ້ນແຟ້ນ, ປະກອບສ່ວນຊ່ວຍຄະນະກຳມະການປະຊາຊົນຕາແສງຕ່າງໆສຳຜັດກັບວິທີການ, ສ້າງແຜນພັດທະນາເສດຖະກິດ - ສັງຄົມ ໂດຍມີການເຂົ້າຮ່ວມຂອງປະຊາຄົມ. ມາຮອດປະຈຸບັນ, ມີ 27 ຕາແສງໃນເຂດປະຕິບັດໂຄງການ ໄດ້ສ້າງສຳເລັດແຜນພັດທະນາເສດຖະກິດ - ສັງຄົມຕາມທິດຕະຫຼາດໂດຍພື້ນຖານແລ້ວ. ທ່ານ ທຽນຍ່ານ, ຮອງຫົວໜ້າຄະນະໜູນຊ່ວຍການດຳເນີນທຸລະກິດກະສີກຳນິງເຟືອກ, ແຂວງນິງທ້ວນ, ໃຫ້ຮູ້ວ່າ:
“ຜ່ານແຜນການທີ່ໄດ້ວາງອອກ, ພວກເຮົາກໍ່ກຳໄດ້ຄວາມຕ້ອງການຂອງປະຊາຊົນ, ຈາກນັ້ນຂະແໜງການທຸກຂັ້ນຈະສັງລວມ ແລະ ສ້າງເງື່ອນໄຂຊ່ວຍເຫຼືອ, ພິເສດແມ່ນສຳລັບຄອບຄົວທຸກຍາກ, ຄົນຊົນເຜົ່າສ່ວນໜ້ອຍ, ແມ່ຍິງ. ຜ່ານແຜນການນັ້ນ, ທາງຕາແສງຈະຜັນຂະຫຍາຍການປະຕິບັດຕາມຄວາມຕ້ອງການຂອງທ້ອງຖີ່ນ, ສ້າງສົ້ນອອກຜະລິດຕະພັນກະເສດເປັນປົກກະຕິໃຫ້ແກ່ບັນດາຄອບຄົວທີ່ທຸກຍາກ.”
ປະຈຸບັນ, ຄະນະປະສານງານໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ ພວມສຸມໃສ່ຍູ້ແຮງວຽກງານບຳລຸງສ້າງ, ອົບຮົມ, ຍົກສູງຄວາມສາມາດໃຫ້ແກ່ຖັນແຖວພະນັກງານປະຕິບັດໂຄງການຢູ່ຕາແສງ; ສົມທົບກັບບັນດາຂະແໜງທີ່ກ່ຽວຂ້ອງໃນແຂວງຜັນຂະຫຍາຍການເຮັດປື້ມຄູ່ມື ແນະນຳ, ໜູນຊ່ວຍສະຫະກອນພັດທະນາກະສີກຳ, ສ້າງບັນດາໜ່ວຍ, ກຸ່ມທີ່ມີຄວາມນິຍົມດຽວກັນ. ທ່ານ ຫວໍທ້າຍຕ໋ວນ, ຮອງຫົວໜ້າອຳນວຍການຄະນະປະສານງານໂຄງໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ, ໃຫ້ຮູ້ວ່າ:
“ໂຄງການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນແຂວງນິງທ້ວນ ຈະສຸມໃສ່ເພີ່ມທະວີວຽກງານໂຄສະນາເພື່ອໃຫ້ພະນັກງານ ແລະ ປະຊາຊົນຕາແສງຮູ້ຄາດໝາຍ, ໜ້າທີ່ ແລະ ການເຄື່ອນໄຫວຂອງໂຄງການ, ທີສອງແມ່ນເພີ່ມທະວີບົດບາດເປັນເສນາທິການ, ສະເໜີຂອງຄະນະປະສານງານໂຄງການ, ກໍ່ຄືບົດບາດປະສານງານ, ໜູນຊ່ວຍຂອງບັນດາຫົວໜ່ວຍເປັນເຈົ້າພາບ, ບັນດາຫົວໜ່ວຍປະຕິບັດ ເພື່ອຜັນຂະຫຍາຍການເຄື່ອນໄຫວຕ່າງໆຂອງໂຄງການ, ຮັບປະກັນຕາມຄວາມຄືບໜ້າ, ຄາດໝາຍທີ່ໄດ້ວາງອອກຂອງໂຄງການ”.
ໂດຍເສີມຂະຫຍາຍບັນດາໝາກຜົນທີ່ບັນລຸໄດ້ນັ້ນ, ໃນໄລຍະຈະມາເຖິງ, ທຸກຂັ້ນ, ທຸກຂະແໜງການໃນແຂວງຈະເອົາໃຈໃສ່ ແລະ ຜັນຂະຫຍາຍການປະຕິບັດໂຄງການໜູນຊ່ວຍການຮ່ວມສຳພັນລະຫວ່າງລັດ - ນັກທຸລະກິດ - ຊາວກະສີກອນຢູ່ແຂວງນິງທ້ວນ ຢ່າງມີປະສິດທິຜົນ. ຜ່ານນັ້ນປະກອບສ່ວນປັບປຸງສິ່ງແວດລ້ອມແຫ່ງການດຳເນີນທຸລະກິດ, ຍົກສູງຄຸນນະພາບ, ຄວາມສາມາດສຳຜັດກັບການບໍລິການດ້ານເຕັກນິກ, ການເງິນສຳລັບບັນດາຄອບຄົວຊາວກະສີກອນ, ເພື່ອປະຕິບັດຍຸດທະສາດພັດທະນາກະສີກຳ, ຊົນນະບົດຢ່າງມີປະສິດທິຜົນ.