(vovworld) - ພາຍຫຼັງ 2 ປີ ແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໂສມໜ້າຊົນນະບົດຫວຽດນາມ ໄດ້ມີການປ່ຽນໃໝ່ເທື່ອລະກ້າວ, ຊີວິດການເປັນຢູ່ຂອງປະຊາຊົນໃນເຂດຊົນນະບົດໄດ້ຮັບການຍົກສູງຂຶ້ນພໍສົມຄວນ, ພິເສດແມ່ນການກໍ່ສ້າງທາງຄົມມະນາຄົມ ແລະ ພັດທະນາການຜະລິດ. ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ ໃນ 2 ປີ ຜ່ານມາ, ອຳນາດການປົກຄອງ ແລະ ປະຊາຊົນທ້ອງຖີ່ນຍາມໃດກໍ່ມີຄວາມເອົາໃຈໃສ່ຊ່ວຍເຫຼືອ ບົນພື້ນຖານນຳໃຊ້ 19 ມາດຖານກ່ຽວກັບການກໍ່ສ້າງຊົນນະບົດໃໝ່ຢ່າງມີໄຫວພິກ, ອັນໄດ້ຊ່ວຍໃຫ້ໂສມໜ້າຊົນນະບົດຫວຽດນາມ ນັບມື້ນັບໄດ້ຮັບການປ່ຽນໃໝ່.
ພາບປະກອບ
ໄລ່ມາຮອດປະຈຸບັນ, ໄດ້ມີ 97% ຕາແສງ ໃນ 63 ແຂວງ, ນະຄອນ, ຜັນຂະຫຍາຍການວາງແຜນຊົນນະບົດໃໝ່, ໃນນັ້ນ ເກືອບ 60% ຈຳນວນຕາແສງ ໄດ້ເຊັນອະນຸມັດແຜນສັງລວມ; 50% ຈຳນວນຕາແສງເຊັນອະນຸມັດແຜນຮ່າງຊົນນະບົດໃໝ່ແລ້ວ. ແຜນກຳນົດຂອງທ້ອງຖີ່ນຕ່າງໆ ລ້ວນແຕ່ເອົາໃຈໃສ່ເຖິງການກໍ່ສ້າງໂຄງລ່າງ, ນີ້ແມ່ນຂອດບຸກທະລຸໃນການກໍ່ສ້າງຊົນນະບົດໃໝ່. ເຖິງວ່າຄຸນນະພາບບັນດາແຜນກຳນົດບໍ່ທັນສູງກໍ່ຕາມ, ແຕ່ພະນັກງານ, ປະຊາຊົນຢູ່ບັນດາບ້ານ, ຕາແສງລ້ວນແຕ່ຮັບຮູ້ໄດ້ຄວາມໝາຍ ແລະ ຄວາມຈຳເປັນຕ້ອງມີແຜນກຳນົດເພື່ອເຮັດໃຫ້ໂສມໜ້າຂອງໝູ່ບ້ານມີຄວາມສວຍງາມ ແລະ ຄຸນນະພາບຊີວິດການເປັນຢູ່ຂອງປະຊາຊົນໄດ້ຮັບການຍົກສູງຂຶ້ນ. ຕົວຢ່າງຄືຢູ່ແຂວງ ຟູ໋ອຽນ, ມາຮອດປະຈຸບັນ, ທັງ 91 ຕາແສງໃນແຂວງລ້ວນແຕ່ສຳເລັດວຽກງານວາງແຜນກຳນົດ ແລະ ເຊັນອະນຸມັດແຜນຮ່າງກໍ່ສ້າງຊົນນະບົດໃໝ່ເຖິງປີ 2020 ແລ້ວ. ຜ່ານໂຄງການ, ປີນີ້ບັນດາຕາແສງໃນແຂວງໄດ້ຮັບເງິນລົງທຶນກວ່າ 855 ຕື້ດົ່ງ ເພື່ອກໍ່ສ້າງຊົນນະບົດໃໝ່. ທ່ານ ຫງວຽນວັນກຽມ, ຮອງເລຂາຄະນະພັກເມືອງ ໄຕຮ່ວາ, ເຊິ່ງແມ່ນເມືອງໄດ້ປະຕິບັດສຳເລັດ 12/19 ມາດຖານກ່ຽວກັບການກໍ່ສ້າງຊົນນະບົດໃໝ່, ແບ່ງປັນວ່າ:
”ໃນວິວັດແຫ່ງການຂົນຂວາຍການກໍ່ສ້າງຊົນນະບົດໃໝ່ນັ້ນ, ບົດບາດຂອງປະຊາຊົນມີຄວາມສຳຄັນທີ່ສຸດ, ເພື່ອຍົກສູງຊີວິດການເປັນຢູ່ຂອງປະຊາຊົນຂຶ້ນຕື່ມ, ທຸກຄົນຕ້ອງມີຄວາມຮັບຜິດຊອບ. ຕົວຢ່າງຄືເຮືອນຊານຂອງປະຊາຊົນມີຄວາມສະອາດ, ສວຍງາມ, ກໍ່ເປັນການປະກອບສ່ວນກໍ່ສ້າງຊົນນະບົດໃໝ່. ຢາກເຮັດໄດ້ຄືແນວນັ້ນ, ຕ້ອງມີການປະຊຸມ, ອະທິບາຍໃຫ້ປະຊາຊົນມີຄວາມເຂົ້າໃຈ, ເມື່ອເຂົ້າໃຈແລ້ວ, ເຂົາເຈົ້າຈະເຫັນດີ ແລະ ຮ່ວມແຮງຮ່ວມໃຈໃນການກໍ່ສ້າງຊົນນະບົດໃໝ່”.
ພາບປະກອບ
ທ່ານ ຕັງມິງໂລກ, ຫົວໜ້າຫ້ອງການປະສານງານ ໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ໃຫ້ຮູ້ວ່າ, ປະຈຸບັນມີຫຼາຍທ້ອງຖີ່ນຖືເປັນສຳຄັນການພັດທະນາການຜະລິດ, ຍົກສູງລາຍຮັບໃຫ້ແກ່ປະຊາຊົນ. ທົ່ວປະເທດໄດ້ມີ ກວ່າ 5000 ຮູບແບບຜະລິດກະສີກຳ, ສິນຄ້າ, ເພີ່ມປະສິດທິຜົນຈາກ 15-20%. ປະຈຸບັນ, ໄດ້ປະກົດມີບັນດາຮູບແບບທີ່ດີຄື: ”ຮູບແບບທົ່ງນາຂະໜາດໃຫຍ່” ຢູ່ອານຢາງ. ນະຄອນ ໂຮ່ຈີມິນ ມີນະໂຍບາຍໜູນຊ່ວຍວິສາຫະກິດກໍ່ສ້າງບັນດາເຂດຜະລິດໝູນໃຊ້ເຕັກໂນໂລຢີສູງ. ແຂວງ ທ໋າຍບິ່ງ ມີນະໂຍບາຍໜູນຊ່ວຍຊາວກະສີກອນຊື້ ລົດໄຖນາ, ເກັບກ່ຽວເຂົ້າ… ແຂວງ ຮ່າຕິ້ງ ໃຫ້ຊາວກະສີກອນກູ້ຢືມທຶນດ້ວຍອັດຕາດອກເບ້ຍຕຳ່. ນີ້ແມ່ນມາດຕະການທີ່ດີ ແລະ ຄວນໄດ້ຮັບການຂະຫຍາຍອອກຢ່າງກວ້າງຂວາງ.
”ກ່ອນປະຕິບັດໂຄງການກໍ່ສ້າງຊົນນະບົດໃໝ່, ບັນດາຕາແສງລ້ວນແຕ່ຕີລາຄາສະພາບຕົວຈິງຢູ່ເຂດຊົນນະບົດຕາມ 19 ມາດຖານ. ຕາມນັ້ນແລ້ວ, ທົ່ວປະເທດພຽງແຕ່ມີປະມານ 200 ຕາແສງບັນລຸໄດ້ກວ່າ 10 ມາດຖານເທົ່ານັ້ນ. ແຕ່ພາຍຫຼັງ 2 ປີ ແຫ່ງການປະຕິບັດໂຄງການ, ທົ່ວປະເທດມີເກືອບ 1000 ຕາແສງບັນລຸກວ່າ 10 ມາດຖານ, ໃນນັ້ນ 32 ຕາແສງບັນລຸໄດ້ 16/19 ມາດຖານ…ແລະ ເຂົາເຈົ້າພວມສູ້ຊົນຮອດປີ 2015 ບັນລຸໃຫ້ໄດ້ 19 ມາດຖານ. ໝາກຜົນດັ່ງກ່າວ ໄດ້ພິສູດໃຫ້ເຫັນເຖິງການກະທົບ ແລະ ຄວາມໝາຍຂອງໂຄງການກໍ່ສ້າງຊົນນະບົດໃໝ່”.
ພາບປະກອບ
ຄວາມຈິງສະແດງໃຫ້ເຫັນວ່າ, ຄວາມຫຍຸ້ງຍາກທີ່ສຸດໃນການກໍ່ສ້າງຊົນນະບົດໃໝ່ໃນປະຈຸບັນ ແມ່ນແຫຼ່ງກຳລັງ ແລະ ຄວາມຮັບຮູ້ຂອງການນຳ, ປະຊາຊົນກ່ຽວກັບຂະບວນການນີ້. ກ່ຽວກັບແຫຼ່ງກຳລັງ, ປີ 2012, ໃນເງື່ອນໄຂເສດຖະກິດຂອງປະເທດຍັງປະສົບກັບຄວາມຫຍຸ້ງຍາກຫຼາຍຢ່າງ, ແຕ່ງົບປະມານຂອງລັດຖະບານທີ່ສະຫງວນໃຫ້ແກ່ການກໍ່ສ້າງຊົນນະບົດໃໝ່ຍັງຄົງຮັກສາໄວ້. ໃນ 2 ປີຜ່ານມາ, ລັດຖະບານໄດ້ໜູນຊ່ວຍເງິນເກືອບ 3.300 ຕື້ດົ່ງ ພ້ອມກັບ 14.000 ຕື້ດົ່ງແຫຼ່ງງົບປະມານທ້ອງຖີ່ນ ໃຫ້ແກ່ໂຄງການກໍ່ສ້າງຊົນນະບົດໃໝ່. ທ່ານ ຕັງມິງໂລກ ແບ່ງປັນວ່າ, ການກໍ່ສ້າງຊົນນະບົດໃໝ່ຄວນເອົາໃຈໃສ່ເປັນພິເສດເຖິງການຍົກສູງລະດັບຄວາມຮູ້, ແລະ ເພີ່ມລາຍຮັບໃຫ້ແກ່ປະຊາຊົນ. ດ້ານອື່ນແມ່ນຕ້ອງນຳໃຊ້ບັນດາແຫຼ່ງທຶນຂອງລັດຖະບານຢ່າງມີປະສິດທິຜົນ.
”ການກໍ່ສ້າງຊົນນະບົດໃໝ່ຂອງຫວຽດນາມ ແມ່ນໂຄງການໃຫຍ່, ປະຕິບັດໃນໄລຍະຍາວ, ດັ່ງນັ້ນໃນເບື້ອງຕົ້ນຈຶ່ງປະສົບກັບຄວາມຫຍຸ້ງຍາກຫຼາຍຢ່າງ. ພາຍຫຼັງ 2 ປີ ແຫ່ງການປະຕິບັດໂຄງການ, ຄວາມຫຍຸ້ງຍາກທີ່ສຸດແມ່ນຄວາມຮັບຮູ້ຂອງປະຊາຊົນ ແລະ ພະນັກງານຮາກຖານ, ນັບທັງພະນັກງານທຸກຂັ້ນ, ມີບາງແຫ່ງຍັງມີແນວຄິດອິງໃສ່ແຫຼ່ງທຶນຂອງລັດ. ດັ່ງນັ້ນຕ້ອງຖືເປັນສຳຄັນການໂຄສະນາ, ອົບຮົມເພື່ອຍົກສູງຄວາມຮັບຮູ້ໃຫ້ພະນັກງານ ແລະ ປະຊາຊົນກ່ຽວກັບຊົນນະບົດໃໝ່, ແລະ ຕ້ອງປະຕິບັດໃນໄລຍະຍາວ”.
ພາບປະກອບ
ປີ 2013 ແລະ ໃນຊຸມປີຕໍ່ໆໄປ, ຈະສືບຕໍ່ປະຕິບັດບັນດາໜ້າທີ່ຈຸດສຸມຄື: ຍູ້ແຮງວຽກງານໂຄສະນາໃນໝູ່ປະຊາຊົນ, ແລະ ບຳລຸງດ້ານຄວາມຮູ້ໃຫ້ຖັນແຖງພະນັກງານ, ພິເສດແມ່ນພະນັກງານຂັ້ນບ້ານ, ຕາແສງ ກ່ຽວກັບການກໍ່ສ້າງຊົນນະບົດໃໝ່; ສ້າງສຳເລັດແຜນກຳນົດ ແລະ ແຜນຮ່າງຊົນນະບົດໃໝ່ໃຫ້ແກ່ບັນດາຕາແສງ, ສ້າງບາດກ້າວພັດທະນາເສດຖະກິດຊົນນະບົດ, ໃນນັ້ນຈຸດສູມ ແມ່ນການພັດທະນາຜະລິດຕະພັນກະເສດ ເພື່ອເພີ່ມລາຍຮັບໃຫ້ແກ່ຊາວກະສີກອນ.