(vovworld) - ກໍ່ສ້າງຊົນນະບົດໃໝ່, ແມ່ນເພື່ອເຮັດໃຫ້ເສດຖະກິດຊົນນະບົດພັດທະນາ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການຍົກສູງຂຶ້ນເທື່ອລະກ້າວ, ພື້ນຖານໂຄງລ່າງເສດຖະກິດ - ສັງຄົມທັນສະໄໝ, ສະພາບແວດລ້ອມຂຽວ, ສະອາດ, ສວຍງາມ, ຮັກສາ ແລະ ເສີມຂະຫຍາຍສີສັນວັດທະນະທຳຂອງຊາດໄວ້. ດັ່ງນັ້ນໂຄງການກໍ່ສ້າງຊົນນະບົດໃໝ່ໄດ້ວາງອອກຫຼາຍບັນຫາຈຳເປັນຕ້ອງໄດ້ຮັບການແກ້ໄຂ. ໃນນັ້ນບັນຫາພື້ນຖານແລະຍາວນານນັ້ນແມ່ນກໍ່ສ້າງຊີວິດທາງດ້າວວັດທະນະທຳ.
ຕາແສງດ້າຍແທ່ງ
(ພາບ: ອິນເຕີແນດ)
ດ້າຍແທ່ງ ແມ່ນຕາແສງໜຶ່ງທີ່ບັນລຸມາດຖານວັດທະນະທຳກ່ອນໝູ່ ແລະ ແມ່ນປັດໃຈສຳຄັນເພື່ອໃຫ້ດ້າຍແທ່ງ ປະຕິບັດໂຄງການກໍ່ສ້າງຊົນນະບົດໃໝ່ເທື່ອລະກ້າວ. ພາຍຫຼັງ 3 ປີ ທີ່ຜັນຂະຫຍາຍໂຄງການກໍ່ສ້າງຊົນນະບົດໃໝ່, ຕາແສງດ້າຍແທ່ງ ໄດ້ສຳເລັດແຜນການກ່ອນເວລາທີ່ໄດ້ວາງອອກ, ກາຍເປັນຕາແສງທຳອິດຂອງເຂດທົ່ງພຽງແມ່ນຳ້ຂອງທີ່ປະຕິບັດສຳເລັດ 19/19 ມາດຖານຂອງໂຄງການກໍ່ສ້າງຊົນນະບົດໃໝ່.
ມາຢ້ຽມຢາມຕາແສງດ້າຍແທ່ງ, ສິ່ງທີ່ສ້າງຄວາມປະທັບໃຈກວ່າໝູ່ນັ້ນແມ່ນພູມພາບອຸດົມສົມບູນ, ເຮືອນຊານ, ຖະໜົນຫົນທາງ, ພື້ນຖານດ້ານວັດຖຸ, ວັດທະນະທຳໄດ້ຮັບການລົງທຶນກໍ່ສ້າງຢ່າງໃຫຍ່ໂຕໂອໂຖງ ແລະ ສວຍງາມ. ຊີວິດທາງດ້ານວັດທະນະທຳ, ຈິດໃຈຂອງປະຊາຊົນໄດ້ຮັບການເອົາໃຈໃສ່ ດ້ວຍການເຄື່ອນໄຫວວັດທະນະທຳສິລະປະທີ່ສຸດົມສົມບູນ. ທ່ານ ກາວແທງຮຸ່ງ, ຮອງປະທານຄະນະກຳມະນການປະຊາຊົນຕາແສງດ້າຍແທ່ງ, ໃຫ້ຮູ້ວ່າ:
“ປະຊາຊົນໄດ້ກຳນົດວ່າ, ຊີວິດທາງດ້ານຈິດໃຈແມ່ນຂາດບໍ່ໄດ້. ນັບແຕ່ຄອບຄົວຊາວກະສີກອນຕະຫຼອດຮອດອຳນາດການປົກຄອງຢູ່ບ້ານຕາແສງຕ່າງໆລ້ວນແຕ່ເອົາໃຈໃສ່ເຖິງຊີວິດທາງດ້ານວັດທະນະທຳ. ແຕ່ລະຄອບຄົວຕ້ອງແຂ່ງຂັນກັນຮັກສາສິ່ງແວດລ້ອມ, ລ້ຽງດູລູກໃຫ້ມີສຸຂະພາບເຂັ້ມແຂງ, ເປັນຄົນຮູ້ຄວາມ, ມີຄວາມສາມັກຄີ, ມີແບບແຜນດຳລົງຊີວິດທີ່ດີ, ກໍ່ຄືຊ່ວຍເຫຼືອກັນສ້າງເສດຖະກິດຄອບຄົວ. ແຕ່ລະບ້ານລ້ວນແຕ່ມີຫໍວັດທະນະທຳສະເພາະເພື່ອໃຫ້ປະຊາຊົນເຄື່ອນໄຫວວັດທະນະທຳ - ກິລາ“.
ຕາແສງດ້າຍແທ່ງໄດ້ຮັບການຮັບຮອງວ່າເປັນຕາແສງບັນລຸມາດຖານຊົນນະບົດໃໝ່
(ພາບ: ອິນເຕີແນດ) ການເຄືອນໄຫວວັດທະນະທຳ ສິລະປະຖືກຈັດຕັ້ງເປັນປະຈຳ ແລະ ສົມທົບກັບການເຜີຍແຜ່ບົດຮຽນໃນການທຳມາຫາກິນ. ຄຽງຄູ່ກັບການເຄື່ອນໄຫວເປັນປະຈຳແລ້ວ, ແຕ່ລະເທື່ອເມື່ອມີກອງປະຊຸມສຳມະນາກ່ຽວກັບຮູບແບບທີ່ດີເດັ່ນໃນການຜະລິດດຳເນີນທຸລະກິດ, ຫຼືມີງານບຸນ, ງານແຕ່ງດອງ... ປະຊາຊົນກໍ່ເຂົ້າຮ່ວມລາຍການສະແດງສິລະປະ. ທານ ຫງວຽນຮ່ວາງຍຶດ ເລົ່າສູ່ຟັງວ່າ:
“ເວລານັ້ນ, ຂ້າພະເຈົ້າມີອາຍຸພຽງສິບກວ່າປີເທົ່ານັ້ນ ແຕ່ໄດ້ເມົາມົວກັບດົນຕີ ເດີ່ນກາຕ່າຍຕື (ດົນຕີພື້ນເມືອງຂອງພາກໃຕ້ຫວຽດນາມ) ແລ້ວ. ຍ້ອນເຫດນັ້ນຂ້າພະເຈົ້າຈຶ່ງຮຽນດົນຕີຕ່າຍຕືໄດ້ທຸກປະເພດ. ການສະແດງເດີ່ນກາຕ່າຍຕືບໍ່ຄືກັນກັບການສະແດງບົນເວທີ, ຫາກມັນມີຈຸດພິເສດສະເພາະ, ຕ້ອງມີຄວາມເມົາມົວ, ມີພອນສະຫວັນ, ມີຄວາມສຸດຈິດສຸດໃຈຈຶ່ງສາມາດຮຽນໄດ້“.
ເດີ່ນການຕ່າຍຕືແມ່ນໜຶ່ງໃນຮູບການສິລະປະໄດ້ຮັບຄວາມນິຍົມຂອງຊາວພາກໃຕ້ຫວຽດນາມ
ອ້າຍ ຫງວຽນວັນເຍີນ, ພະນັກງານວັດທະນະທຳຕາແສງດ້າຍແທ່ງ ໃຫ້ຮູ້ວ່າຮອດວັນທີ 16 (ໄລ່ຕາມຈັນທະປະຕິທິນ) ຂອງທຸກເດືອນ, ບັນດາສະມາຊິກໃນສະໂມສອນເດີ່ນກາຕ່າຍຕື ກໍ່ເຕົ້າໂຮມກັນຢູ່ເຮືອນຂອງທ່ານ ຫງວຽນຮ່ວາງຍຶດເພື່ອຮຽນດົນຕີ, ຂັບຮ້ອງຢ່າງຟົດຟື້ນມ່ວນຊື່ນ. ອ້າຍ ຫງວຽນວັນເຍີນ, ພະນັກງານວັດທະນະຳຕາແສງດ້າຍແທ່ງ ໃຫ້ຮູ້ວ່າ:
“ຢູ່ຕາແສງດ້າຍແທ່ງ, ນັບແຕ່ການນຳຕະຫຼອດຮອດປະຊາຊົນລ້ວນແຕ່ເມົາມົວກັບເດີ່ນກາຕ່າຍຕື. ດັ່ງນັ້ນທາງແຂວງໄດ້ເປີດຊຸດຮຽນຢູ່ເທດສະບານເພື່ອໃຫ້ປະຊາຊົນເຂົ້າຮ່ວມ. ທຸກຄົນຕ່າງກໍ່ເຂົ້າຮຽນຢ່າງຫ້າວຫັນເພື່ອກຳໄດ້ຈັ່ງຫວະ, ທຳນອງດົນຕີຕ່າຍຕືທຸກປະເພດ ແນໃສ່ປຸກລະດົມຂະບວນການເດີ່ນກາຕ່າຍຕືຢູ່ທ້ອງຖີ່ນ.“
ບັນດາສະມາຊິກໃນສະໂມສອນເດີ່ນກາຕ່າຍຕືມີອາຍຸແຕ່ 30 ເຖິງ 60, 70 ປີ. ເຂົ້າເຈົ້າເຂົ້າຮ່ວມສະໂມສອນດ້ວຍຄວາມເມົາມົວ ແລະ ປາຖະໜາຢາກສ້າງຄວາມມ່ວນຊື່ນໃນຊີວິດປະຊາຄົມ ກໍ່ຄືອະນຸລັກຮັກສາຮູບການວັດທະນະທຳທີ່ເປັນເອກະລັກສະເພາະຂອງທ້ອງຖີ່ນຕົນໄວ້. ບັນດາຮູບການເຄື່ອນໄຫວສິລະປະ ວັດທະນະທຳຢູ່ຕາແສງດ້າຍແທ່ງ ບໍ່ພຽງແຕ່ເຮັດໃຫ້ຊີວິດທາງດ້ານວັດຖຸ, ຈິດໃຈຂອງປະຊາຊົນອຸດົມສົມບຸນຂຶ້ນຕື່ມເທ່ົານັ້ນ, ຫາກຍັງປະກອບສ່ວນຄວາມສະໜິດຕິດພັນ, ເປັນຈິດໜຶ່ງໃຈດຽວຂອງປະຊາຊົນໃນການກໍ່ສ້າງຊົນນະບົດໃໝ່ອີກດ້ວຍ.