ເສັ້ນທາງເຂົ້າບ້ານເມື່ອງແຍ໊ 2

 ບ້ານເມື່ອງແຍ໊ 2 ມີປະມານ 20 ຄອບຄົວ, ມີປະຊາກອນ 130 ຄົນ ໃນນັ້ນ ສ່ວນຫຼາຍແມ່ນຊາວເຜົ່າມົ້ງ ແລະ ໄດ້ອົບພະຍົບມາແຕ່ບ່ອນອື່ນ. ອຳນາດການປົກຄອງທ້ອງຖິ່ນ ແລະ ບັນດາຫົວໜ່ວຍເຈົ້າຂອງລົງທຶນ ໄດ້ຈັດສັນບ່ອນຢູ່, ທີ່ດິນທຳການຜະລິດກະສິກຳໃຫ້ບັນດາຄອບຄົວ ທີ່ມາຈາກຕາແສງອື່ນ ໃນເມືອງເມື່ອງແຍ໊ ແລະ ບັນດາຄອບຄົວທີ່ອົບພະຍົບເສລີ ເພື່ອມາສ້າງຊີວິດການເປັນຢູ່ໃຫ້ເປັນປົກກະຕິ. ທ່ານ ວຸ່ຍວັນງວ້ຽນ ປະທານຄະນະກຳມະການປະຊາຊົນ ເມືອງ ເມື່ອງແຍ໊ ໃຫ້ຮູ້ວ່າ:

ແຜນຮ່າງ 79 ໄດ້ຮັບການປະຕິບັດມາເປັນເວລາເກືອບ 10 ປີແລ້ວ, ປະສິດທິຜົນໄດ້ນຳມາໃຫ້ ນັ້ນແມ່ນສ້າງຊີວິດປະຊາຊົນໃຫ້ເປັນປົກກະຕິ, ສ້າງສະຖຽນລະພາບດ້ານການເມືອງ ແລະ ສັງຄົມ. ພວກຂ້າພະເຈົ້າໄດ້ແບ່ງວຽກໃຫ້ແຕ່ລະພະແນກ, ຂະແໜງການ ເພື່ອປະຕິບັດບັນດາບັນຫາຂອງແຜນຮ່າງດັ່ງກ່າວ ແລະ ຕ້ອງຮັບຜິດຊອບເຮັດໃຫ້ສຸດກົກສຸດປາຍ. ເມືອງ ເມື່ອງແຍ໊ ໄດ້ປະຕິບັດບັນດານະໂຍບາຍສະຫວັດດີການສັງຄົມ ໃນບໍລິເວນຢ່າງເດັດຂາດ. ຮຽກຮ້ອງໃຫ້ບັນດານັກລົງທຶນ, ເປັນຕົ້ນແມ່ນບັນດາທະນາຄານທີ່ມີຫຸ້ນສ່ວນ ຜັນຂະຫຍາຍການກໍ່ສ້າງເຮືອນ ດ້ວຍການກຳນົດການໜຼນຊ່ວຍແມ່ນ 50 ລ້ານດົ່ງຕໍ່ເຮືອນຫຼັງ 1.

ພະນັກງານຕຳຫຼວດມາຢ້ຽມຢາມເຮືອນເອື້ອຍ ລໍ່ທິກວຽດ

 ພ້ອມກັບບັນດານະໂຍບາຍໜູນຊ່ວຍຂອງແຜນຮ່າງ 79, ເມື່ອມາດຳລົງຊີວິດຢູ່ເຮືອນຫຼັງໃໝ່, ປະຊາຊົນບ້ານເມື່ອງແຍ໊ 2 ສືບຕໍ່ໄດ້ຮັບຄວາມເອົາໃຈໃສ່, ໜູນຊ່ວຍຈາກບັນດາໂຄງການເປົ້າໝາຍລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ໂຄງການເປົ້າໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ໂຄງການໜູນຊ່ວຍຫລຸດຜ່ອນຄວາມທຸກຍາກໄວ ແລະ ຍືນຍົງ ສຳລັບ 61 ເມືອງທຸກຍາກ. ອຳນາດການປົກຄອງທ້ອງຖິ່ນ ກໍ່ໜູນຊ່ວຍເບັ້ຍໄມ້, ແນວພັນສັດລ້ຽງ, ຈັດການຝຶກອົບຮົມ, ເຜີຍແຜ່ເຕັກນິກການລ້ຽງປູກ ໃຫ້ແກ່ປະຊາຊົນ. ສະຫວັດດີການສັງຄົມໄດ້ຮັບປະກັນ, 100% ລູກຫຼານຂອງປະຊາຊົນໄດ້ໄປໂຮງຮຽນ, ທາງບ້ານກໍ່ມີນ້ຳສະອາດ, ມີໄຟຟ້າໃຊ້.. ຍ້ອນເຫດນັ້ນ, ປະຊາຊົນຈຶ່ງມີຄວາມອຸ່ນອ່ຽນໃຈ ເມື່ອມາຕັ້ງຖິ່ນຖານຄົງທີ່ ແລະ ສ້າງຊີວິດໃໝ່ຢູ່ບ້ານນີ້. ເອື້ອຍລໍ່ທິກວຽດ, ຊາວເຜົ່າຜູ້ໄທ, ບ້ານເມື່ອງແຍ໊ 2 ເລົ່າສູ່ຟັງວ່າ:

ຂ້າພະເຈົ້າແມ່ນຊາວທອ້ງຖິ່ນນີ້, ກ່ອນນີ້ ຊີວິດການເປັນຢູ່ປະສົບກັບຄວາມຫຍຸ້ງຍາກຫຼາຍ, ລັດກໍ່ມີຄວາມເອົາໃຈໃສ່, ກໍ່ສ້າງເຮືອນໃຫ້ຢູ່, ຄອບຄົວກໍ່ມີຄວາມພາກພູມໃຈ, ອຸ່ນອ່ຽນໃຈ ເພື່ອອອກແຮງງານ ທຳການຜະລິດ. ເຮືອນໃໝ່ໄດ້ກໍ່ສ້າງສຳເລັດເມື່ອເດືອນເມສາປີ 2020. ເຮືອນໃໝ່ມີຄວາມແໜ້ນໜາຖາວອນດີ, ສະອາດງາມຕາ, ບໍ່ຢ້ານເປ່ເພອີກແລ້ວ.

ບັນດາເຮືອນໃໝ່ຢູ່ບ້ານເມື່ອແຍ໊ 2

 ກ່ອນນີ້, ປະຊາຊົນໄດ້ດຳລົງຊີວິດແບບເຄື່ອນຍ້າຍຕະຫຼອດ, ທຳການປູກຝັງ ຢູ່ດິນຜິດກົດໝາຍ, ບໍ່ມີທີ່ດິນທຳການຜະລິດເປັນຂອງຕົນເອງ, ຊີວິດຂອງປະຊາຊົນປະສົບກັບຄວາມຫຍຸ້ງຍາກຫຼາຍຢ່າງ. ທັນຍາຫານສ່ວນຫຼາຍແມ່ນໄດ້ມາຈາກການຖາງປ່າເຮັດໄຮ່, ດິນເສື່ອມຄຸນໄວ, ເຂົ້າໄຮ່ ບໍ່ໃຫ້ສະມັດຕະພາບສູງ. ປະຈຸບັນ, ມາດຳລົງຊີວິດຢູ່ບ່ອນໃໝ່, ຊີວິດຂອງປະຊາຊົນ ເມືອງ ເມື່ອງແຍ໊ ໄດ້ປ່ຽນໂສມໜ້າໃໝ່ແລ້ວ. ບັນດາເຮືອນຫຼັງໃໝ່ໄດ້ຮັບການກໍ່ສ້າງຂຶ້ນຢ່າງໃຫ່ຍໂຕ ແລະ ສວຍງາມ, ພ້ອມດ້ວຍເຂດທົ່ງນາ, ສວນຜັກ, ສວນຕົ້ນໄມ້ກິນໝາກນາໆຊະນິດ…. ຈາກສອງຝາມືເປົ່າ, ມາຮອດປະຈຸບັນ, ຄອບຄົວ ທ່ານ ຊຸ່ງອາຈາຍ ຊາວເຜົ່າມົ້ງ ທີ່ອົບພະຍົບຈາກເມືອງມາຍເຊີນ ແຂວງເຊີນລາ ມາຕັ້ງຖິ່ນຖານຢູ່ເຂດດິນແດນແຫ່ງນີ້, ໄດ້ກາຍເປັນ 1 ໃນບັນດາຄອບຄົວຕົວແບບໃນບ້ານເມື່ອງແຍ໊ 2 ເລົ່າຄວາມໃນໃຈສູ່ຟັງວ່າ:

  ໂດຍໄດ້ຮັບຂ່າວວ່າ ຢູ່ບ້ານນີ້ ມີໂຄງການປູກຕົ້ນຢາງພາລາ, ຂ້າພະເຈົ້າ ມາຈາກແຂວງເຊີນລາ ເພື່ອມາສຳຫຼວດເບິ່ງໂຄງການ. ປູກຕົ້ນຢາງພາລາຈະໄດ້ເງິນຫຼາຍກ່ວາປູກເຂົ້າ. ເມື່ອຫາກໍ່ຍ້າຍມາໃໝ່ໆ, ຕ້ອງປຸກຕູບຢູ່ຊົ່ວຄາວໃນປ່າຢາງພາລາ, ແຕ່ຮອດປີ 2013, ໂດຍໄດ້ຮັບຄວາມເອົາໃຈໃສ່ຈາກລັດ ໃນການຜັນຂະຫຍາຍແຜນຮ່າງ 79, ໄດ້ສ້າງຕັ້ງບ້ານເມື່ອງແຍ໊ 2 ຂຶ້ນ, ລັດໄດ້ໜູນຊ່ວຍການກໍ່ສ້າງເຮືອນຢູ່ຖາວອນໃຫ້. ປະຈຸບັນ, ລາຍຮັບຄອບຄົວຂ້າພະເຈົ້າກໍ່ໄດ້ກ່ວາ 10 ລ້ານດົ່ງ/ເດືອນ.

  ເຖິງວ່າ, ໃນສະເພາະໜ້າ ຈະປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ກໍ່ສາມາດເຫັນໄດ້ວ່າ, ຊີວິດການເປັນຢູ່ຂອງປະຊາຊົນຢູ່ບ້ານ ເມື່ອງແຍ໊ 2 ພວມມີການປ່ຽນແປງໄປໃນແຕ່ລະວັນ. ໂສມໜ້າຊົນນະບົດຢູ່ແຫ່ງນີ້ ນັບມື້ນັບພັດທະນາດີກ່ວາເກົ່າ, ໄດ້ນຳມາເຊິ່ງຊີວິດການເປັນຢູ່ ທີ່ນັບມື້ນັບມີຄວາມອີ່ມໜຳສຳລານ, ມີຄວາມຜາສຸກ ຢູ່ເຂດຊາຍແດນຂອງປະເທດຊາດ.