(vovworld) - ກ່ອນນີ້, ເວົ້າເຖິງກວາງຈີ້ ແມ່ນເວົ້າເຖິງໜຶ່ງໃນບັນດາເຂດດິນທີ່ທຸກຍາກຂອງພາກກາງຫວຽດນາມ, ແຫ່ງເຄີຍຖືກຜົນສະທ້ອນຢ່າງໜັກໜ່ວງຈາກສົງຄາມ ແລະ ໄພທຳມະຊາດ, ພາຍຸນຳ້ຖ້ວມ. ແຕ່ປະຈຸບັນ, ກວາງຈີ້ ໄດ້ມີການປ່ຽນແປງຫຼາຍຢ່າງ, ພິເສດແມ່ນຢູ່ເຂດຊົນນະບົດ, ດ້ວຍການຮ່ວມແຮງຮ່ວມໃຈຂອງປະຊາຊົນ.
ພໍ່ແມ່ປະຊາຊົນສະຫງວນທີ່ດິນດ້ວຍຄວາມສະໝັກໃຈເພື່ອກໍ່ສ້າງຊົນນະບົດໃໝ່
(ພາບປະກອບ)
ຍ້ອນເງື່ອນໄຂທຳມະຊາດ, ນັບແຕ່ຫຼາຍປີມານີ້, ປະຊາຊົນຢູ່ຕາແສງວິ້ງເຊີນ, ເມືອງວິ້ງລີງ, ແຂວງກວາງຈີ້ ຕ້ອງດຳລົງຊີວິດໃນສະພາບທີ່ຫຍຸ້ງຍາກ, ຢາກຊື້ຂາຍສິນຄ້າຢູ່ຕະຫຼາດໃນເທດສະບານໂຮ່ຊ໋າ, ເຂົາເຈົ້າຕ້ອງຜ່ານເສັ້ນທາງນັບສິບກິໂລແມັດຈຶ່ງໄປຮອດ. ແຕ່ລະມື້, ເມື່ອເຫັນສະພາບປະຊາຊົນຂົນສົ່ງຜະລິດຕະພັນໄປຂາຍຢູ່ຕະຫຼາດຢ່າງລຳບາກຄືແນວນັ້ນ, ນັກຮົບເກົ່າ ຫງວຽນວັນນາມ, ຢູ່ບ້ານຕຽນອານ, ຕາແສງວິ້ງເຊີນ ມີຄວາມປາຖະໜາຢາກກໍ່ສ້າງຕະຫຼາດແຫ່ງໜຶ່ງ ເພື່ອສ້າງເງື່ອນໄຂໃຫ້ປະຊາຊົນຊື້ຂາຍຜະລິດຕະພັນກະເສດຢ່າງສະດວກສະບາຍ. ຄິດແລ້ວ, ທ່ານກໍ່ລົງມືປະຕິບັດ. ທ່ານໄດ້ສະຫງວນທີ່ດິນ 500 ຕາລາງແມັດ ແລະ ບໍລິຈາກເງິນກວ່າ 600 ລ້ານດົ່ງ ເຊິ່ງທ່ານປະຢັດໄດ້ຈາກການລ້ຽງກຸ້ງເພື່ອກໍ່ສ້າງຕະຫຼາດໃຫ້ແກ່ປະຊາຊົນ. ພາຍຫຼັງ 3 ເດືອນແຫ່ງການກໍ່ສ້າງ, ຕະຫຼາດໃໝ່ຕຽນອານ ໄດ້ເປີດສະຫຼອງ, ສ້າງເງື່ອນໄຂໃຫ້ປະຊາຊົນ ປະມານ 100 ຄອບຄົວທຳການຊື້ຂາຍ, ດຳເນີນທຸລະກິດ.. ທ່ານ ຫງວຽນວັນນາມ ໃຫ້ຮູ້ວ່າ:
“ກ່ອນນີ້ປະຊາຊົນໄປຕະຫຼາດລຳບາກທີ່ສຸດ, ຕ້ອງຜ່ານເສັ້ນທາງນັບສິບກິໂລແມັດຈຶ່ງໄປຮອດຕະຫຼາດຢູ່ເທດສະບານໂຮ່ຊ໋າ ຫຼື ຢໍລິງ. ດັ່ງນັ້ນຂ້າພະເຈົ້າໄດ້ພະຍາຍາມກໍ່ສ້າງຕະຫຼາດນີ້ເພື່ອສ້າງຄວາມສະດວກໃຫ້ປະຊາຊົນພັດທະນາເສດຖະກິດ“.
ເມື່ອຕະຫຼາດຕຽນອານ ຖືກນຳເຂົ້າໃຊ້ການ, ປະຊາຊົນຕາແສງວິ້ງເຊີນ ຜູ້ໃດກໍ່ດີໃຈ ຍ້ອນການຈຳໜ່າຍຜະລິດຕະພັນກະເສດ ກໍ່ຄືສິນຄ້າທີ່ຈຳເປັນສະດວກສະບາຍ. ການຄ້າຂາຍໃນຕະຫຼາດກໍ່ຄຶກໂຄມໜາແໜ້ນທີ່ສຸດ. ທ່ານ ຫວໍວັນກວນ, ຢູ່ບ້ານຕຽນອານ, ຕາແສງວິ້ງເຊີນ, ໄດ້ເວົ້າດ້ວຍຄວາມພາກພູມໃຈວ່າ:
“ຕະຫຼາດນີ້ມໍ່ກັບແມ່ນ້ຳ ແລະ ທາງຄົມມະນາຄົມ, ດັ່ງນັ້ນການໄປມາຂອງປະຊາຊົນກໍ່ສະດວກສະບາຍທີ່ສຸດ, ພິເສດແມ່ນສຳລັບຜູ້ເຖົ້າຜູ້ແກ່. ປະຊາຊົນຢູ່ທີ່ນີ້ນິຍົມແນວຄິດປ່ຽນໃໝ່ຂອງອ້າຍ ນາມ ຫຼາຍ“.
ຖ້າຫາກຢູ່ຕາແສງວິ້ງເຊີນ, ເມືອງວິງລີງ, ມີຄົນໃຊ້ເງິນສ່ວນຕົວຂອງຕົນເພື່ອກໍ່ສ້າງຕະຫຼາດຮັບໃຊ້ປະຊາຊົນນັ້ນ, ຢູ່ຕາແສງແທງ, ເມືອງເຮື໋ອງຮ໋ວາ ໃນເຂດພູດອຍກໍ່ມີພໍ່ຕູ້ ໂຮ່ວັນບາ, ຊາວເຜົ່າເວິນກ່ຽວ ສະຫງວນເນື້ອທີດິນສວນເກືອບ 2000 ຕາລາງແມັດຂອງຕົນ ເພື່ອກໍ່ສ້າງໂຮງຮຽນໃຫ້ເດັກນ້ອຍ. ທ່ານ ໂຮ່ວັນບາ ແບ່ງປັນວ່າ, ບ້ານຂອງທ່ານຢູ່ໃກຈາກໃຈກາງ, ບໍ່ມີໂຮງຮຽນ, ຮອດຍາມນຳ້ຖ້ວມນຳ້ແກ່ງ, ມີນັກຮຽນຫຼາຍຄົນຖືກຕາຍດຶກນຳ້ເມື່ອຂ້າມຫ້ວຍໄປຮຽນ. ດັ່ງນັ້ນ, ເມື່ອຕາແສງເຜີຍແຜ່ແຜນນະໂຍບາຍກໍ່ສ້າງຊົນນະບົດໃໝ່, ທ່ານໄດ້ສະຫງວນທີ່ດິນຂອງຕົນເພື່ອກໍ່ສ້າງໂຮງຮຽນ. ປະຈຸບັນ, ໂຮງຮຽນຫຼັງໃໝ່ສອງຊັ້ນໄດ້ຮັບການກໍ່ສ້າງສຳເລັດແລ້ວ, ແຕ່ລະມື້, ເມື່ອຍິນສຽງເດັກນ້ອຍອ່ານບົດຮຽນ, ທ່ານ ບາ ຮູ້ສຶກພາກພູມໃຈເພາະວ່າຕົນເອງເຮັດໄດ້ສິ່ງທີ່ມີປະໂຫຍດໃຫ້ແກ່ປະຊາຊົນ.
“ປະຈຸບັນ, ພວກຫຼານລ້ວນແຕ່ຮຽນແບບເຄິ່ງກິນນອນຢູ່ໂຮງຮຽນຫຼັງນີ້, ໂດຍປະຊາຊົນລ້ຽງເອງ. ຂ້າພະເຈົ້າເຫັນວ່າພວກຫຼານນັກຮຽນມ່ວນຫຼາຍ .“
ຢູ່ບ້ານນ້າຍກືວ, ຕາແສງຈ້ຽວດົງ, ເມືອງຈ້ຽວຟອງ, ບັນດາກິດຈະກຳສະຫວັດດີການສັງຄົມ, ຮັບໃຊ້ການເຄື່ອນໄຫວລວມຂອງທ້ອງຖີ່ນຄື: ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ... ລ້ວນແຕ່ໄດ້ຮັບການກໍ່ສ້າງ ດ້ວຍການປະກອບສ່ວນຫຼາຍພໍສົມຄວນຂອງລູກຫຼານຊາວນ້າຍກືວ ຜູ້ທີ່ໄປທຳມາຫາກິນ, ດຳລົງຊີວິດຢູ່ທຸກແຖບຖີ່ນຂອງປະເທດ. ໃນ 5 ປີຜ່ານມາ, ບ້ານນ້າຍກືວ ໄດ້ຮັບເງິນບໍລິຈາກຂອງປະຊາຊົນກວ່າ 12 ຕື້ດົ່ງ ເພື່ອກໍ່ສ້າງບ້ານເກີດເມືອງນອນ. ທ່ານ ຫວໍວັນບັກ, ຮອງປະທານຄະນະກຳມະການປະຊາຊົນຕາແສງຈ້ຽວດົງ, ໃຫ້ຮູ້ວ່າ:
“ນ້າຍກືວ ແມ່ນໜຶ່ງໃນບັນດາທ້ອງຖີ່ນທີ່ມີຄວາມສາມາດໃນການລະດົມກຳລັງແຮງຂອງປະຊາຊົນເຂົ້າໃນການກໍ່ສ້າງໂຄງລ່າງຄືທາງຄົມມະນາຄົມ, ປະຕູບ້ານ...“.
ກວ່າ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ບັນດາທ້ອງຖີ່ນຢູ່ແຂວງກວາງຈີ້ ໄດ້ມີຫຼາຍວິທີເຮັດຢ່າງມີຫົວຄິດປະດິດສ້າງ. ປະຊາຊົນໄດ້ບໍລິຈາກເງິນນັບຕື້ດົ່ງ, ແຮງງານນັບພັນວັນ ເພື່ອກໍ່ສ້າງຊົນນະບົດໃໝ່. ທ່ານ ຫງວຽນວັນບ່າຍ, ຫົວໜ້າພະແນກກະສີກຳ ແລະ ພັດທະນາຊົນນະບົດແຂວງກວາງຈີ້, ໃຫ້ຮູ້ວ່າ, ຢູ່ທ້ອງຖີ່ນຕ່າງໆ, ບັນດາກິດຈະກຳ ລ້ວນແຕ່ໄດ້ຮັບການກໍ່ສ້າງດ້ວຍການປະກອບສ່ວນຂອງປະຊາຊົນເປັນຕົ້ນ:
“ນີ້ແມ່ນລາຍການໂດຍປະຊາຊົນເປັນເຈົ້າຢ່າງແທ້ຈິງ. ສິ່ງສຳຄັນກວ່ານັ້ນແມ່ນຫົວຄິດປະດິດສ້າງ, ພິເສດແມ່ນປັນຍາຂອງປະຊາຊົນ, ອັນໄດ້ສ້າງກຳລັງໜູນໃຫຍ່ຈາກຮາກຖານ, ສຸມໃສ່ແຂ່ງຂັນ, ອອກແຮງງານທຳການຜະລິດ, ກໍ່ສ້າງຊົນນະບົດໃໝ່.“
ຍ້ອນມີການປະກອບສ່ວນ ແລະ ການສະໜັບສະໜູນຢ່າງສຸດຈິດສຸດໃຈຂອງປະຊາຊົນ, ເຂດຊົນນະບົດຫຼາຍແຫ່ງໃນແຂວງກວາງຈີ້ໄດ້ມີການພັດທະນາຢ່າງເຫັນໄດ້ຊັດ. ຊາວກວາງຈີ້ ຜູ້ໃດກໍ່ເບີກບານມ່ວນຊື່ນເມື່ອເຫັນວ່າບ້ານເກີດຂອງຕົນໄດ້ມີການປ່ຽນແປງ, ຊີວິດຂອງປະຊາຊົນນັບມື້ນັບອິ່ມໜຳສຳລານ ແລະ ມີຄວາມຜາສຸກ