(vovworld) - ນິງທ້ວນ, ຢູ່ທິດໃຕ້ພາກກາງ ແມ່ນເຂດປູກຕົ້ນອະງຸ່ນທີ່ມີຊື່ສຽງຂອງຫວຽດນາມ. ຕົ້ນອະງຸ່ນຢູ່ທີ່ນີ້ ໄດ້ກາຍເປັນຜະລິດຕະພັນກະເສດ, ທີ່ມີຄວາມສາມາດບົ່ມຊ້ອນຫຼາຍຢ່າງເພື່ອພັດທະນາ. ດ້ວຍທ່າສະດວກນີ້, ແຂວງນິງທ້ວນ ກຳນົດຫັນປ່ຽນຜົນລະປູກ, ສຸມໃສ່ພັດທະນາຕົ້ນອະງຸ່ນຢູ່ນິງທ້ວນ ໃຫ້ກາຍເປັນເຂດຜະລິດອະງຸ່ນໃຫຍ່ກວ່າໝູ່ຂອງທົ່ວປະເທດ, ປະກອບສ່ວນປັບປຸງບັນດາມາດຖານກໍ່ສ້າງຊົນນະບົດໃໝ່.
ພາບປະກອບຈາກ baomoi.com
ນັບແຕ່ຫຼາຍປີມານີ້, ອະງຸ່ນແມ່ນຕົ້ນໝາກໄມ້ພິເສດ, ມີມູນຄ່າເສດຖະກິດສູງຢູ່ແຂວງນິງທ້ວນ. ດ້ວຍເນື້ອທີ່ປູກຕົ້ນອະງຸ່ນກວມ 3% ເນື້ອທີ່ດິນກະສີກຳທັງໝົດຂອງແຂວງ. ມູນຄ່າເສດຖະກິດກວມ 13% ຍອດມູນຄ່າຜະລິດກະສີກຳທັງໝົດຂອງແຂວງ. ແຕ່ໃນຫຼາຍປີຜ່ານມາ, ເນື້ອທີ່ປູກຕົ້ນອະງຸ່ນຂອງແຂວງມີແຕ່ພັດທະນາຢ່າງຊັກຊ້າ. ຕໍ່ໜ້າສະພາບການຄືດັ່ງກ່າວ, ພ້ອມກັບວິວັດການກໍ່ສ້າງຊົນນະບົດໃໝ່, ແຂວງນິງທ້ວນ ໄດ້ປະຕິບັດມາດຕະການຕ່າງໆກ່ຽວກັບການວາງແຜນກຳນົດ, ການຫັນປ່ຽນໂຄງປະກອບຜົນລະປູກຢ່າງຄົບຊຸດ, ໂດຍກຳນົດອະງຸ່ນແມ່ນຕົ້ນໝາກໄມ້ຜະລິດເປັນສິນຄ້າຕົ້ນຕໍ, ທາງແຂວງໄດ້ສົ່ງເສີມຊາວກະສີກອນສ້າງບັນດາຟາມໃຫຍ່, ນຳເອົາເຕັກນິກເຂົ້າໃນການຜະລິດ, ພັດທະນາອາຊີບປູກຕົ້ນອະງຸ່ນຕາມທິດປອດໄພ ແລະ ໝັ້ນຄົງ.
ທ່ານ ຫງວຽນວັນມ້ອຍ. ຢູ່ຕາແສງເຟືອກທ້ວນ, ເມືອງນິງເຟືອກ, ແຂວງນິງທ້ວນ, ແມ່ນໜຶ່ງໃນບັນດາຜູ້ທີ່ໄດ້ຕິດພັນກັບອາຊີບປູກຕົ້ນອະງຸ່ນມາເປັນເວລາ 30 ປີ ແລະ ທ່ານກໍ່ເຄີຍຜ່ານຜ່າໄລຍະຫຍຸ້ງຍາກທີ່ສຸດ. ແຕ່ຍ້ອນມີການໜູນຊ່ວຍຂອງອຳນາດການປົກຄອງຕາແສງໃນການນຳໃຊ້ວິທະຍາສາດ, ເຕັກນິກເຂົ້າໃນການຜະລິດ, ມາຮອດປະຈຸບັນ, ທ່ານ ຫງວຽນວັນມ້ອຍ ໄດ້ມີຟາມຜະລິດອະງຸ່ນຂະໜາດໃຫຍ່, ສະໜອງໝາກອະງຸ່ນສົດ ແລະ ບັນດາຜະລິດຕະພັນປຸງແຕ່ງຈາກໝາກອະງຸ່ນໃຫ້ຕະຫຼາດ. ນອກຈາກເນື້ອທີ່ຜະລິດອະງຸ່ນປອດໄພຕາມມາດຕະຖານ VietGAP (ມາດຕະຖານປະຕິບັດການຜະລິດກະສີກຳທີ່ດີຢູ່ຫວຽດນາມ) 1,5 ເຮັກຕາ ແລ້ວ, ທ່ານຍັງມີເນື້ອທີ່ປູກອະງຸ່ນອີກ 10 ເຮັກຕາ. ເຄື່ອງໝາຍ “ໝາກອະງຸ່ນບາມ້ອຍ“ ໄດ້ມີທີ່ຕັ້ງໃນຕະຫຼາດ ແລະ ປະຈຸບັນ, ຟາມປູກຕົ້ນອະງຸ່ນຂອງຄອບຄົວທ່ານໄດ້ກາຍເປັນແຫ່ງຄົ້ນຄ້ວາ, ຊ່ວຍເຫຼືອດ້ານເຕັກນິກ ແລະ ຈຳໜ່າຍຜະລິດຕະພັນໃຫ້ບັນດາຄອບຄົວຊາວກະສີກອນປູກຕົ້ນອະງຸ່ນອື່ນໆ. ທ່ານ ຫງວຽນວັນມ້ອຍ, ໃຫ້ຮູ້ວ່າ:
“ເຂົາເຈົ້າຖືເປັນສຳຄັນຄວາມປອດໄພທີ່ສຸດ. ດັ່ງນັ້ນຂ້າພະເຈົ້າຄິດວ່າທິດທາງຈຳເປັນໃນປະຈຸບັນປະຕິບັດຕາມມາດຕະຖານ VietGAP, ແລະ ເມື່ອເຮັດຕາມມາດຕະຖານ VietGAP, ຈະເຫັນແຈ້ງລັກສະນະໝັ້ນຄົງຂອງເຄື່ອງໝາຍຜະລິດຕະພັນໃນຕະຫຼາດການຄ້າ, ບໍ່ມີເລື່ອງຜະລິດ, ຫຼືລາຄາຂຶ້ນລົງຜິດປົກກະຕິ. ເມື່ອເຮັດຕາມມາດຕະຖານ VietGAP ບໍ່ພຽງແຕ່ຈະຮັບປະກັນໃຫ້ຜູ້ຊົມໃຊ້ເທົ່ານັ້ນ, ຫາກຍັງຮັບປະກັນໃຫ້ແກ່ພວກເຮົາອີກດ້ວຍ.. “
ພາບປະກອບຈາກ zizi.vn ຢູ່ຕາແສງ ເຍິນຫາຍ, ເມືອງນິງຫາຍ, ແຂວງນິງທ້ວນ, ຮູບແບບປູກຕົ້ນອະງຸ່ນຕາມມາດຕະຖານ VietGAP ໄດ້ຮັບການຜັນຂະຫຍາຍນັບແຕ່ຕົ້ນປີ 2014. ເຂົ້າຮ່ວມຮູບແບບນີ້, ບັນດາຄອບຄົວຊາວກະສີກອນ ໄດ້ຮັບການຖ່າຍທອດດ້ານເຕັກນິກປູກຕົ້ນອະງຸ່ນປອດສານພິດ, ໄດ້ຮັບການໜູນຊ່ວຍອຸປະກອນໃນເບື້ອງຕົ້ນ ແລະ ຂັ້ນຕອນກວດຜະລິດຕະພັນກ່ອນຈະເກັບກ່ຽວ. ຜ່ານການປູກຕົ້ນອະງຸ່ນລະດູການໜຶ່ງຕາມມາດຖານ VietGAP, ສວນອະງຸ່ນຂອງບັນດາຄອບຄົວຊາວກະສີກອນລ້ວນແຕ່ໄດ້ຮັບໃບຢັ້ງຢືນປອດສານພິດ ດ້ວຍສະມັດຕະພາບສະເລ່ຍເພີ່ມຂຶ້ນເຖິງ 25% ແລະ ຜົນກຳໄລເພີ່ມຂຶ້ນກວ່າ 30%, ການປູກຕົ້ນອະງຸ່ນຕາມມາດຕະຖານ VietGAP ກໍ່ນຳມາເຊິ່ງປະສິດທິຜົນໃນຫຼາຍດ້ານໃຫ້ແກ່ຊາວກະສີກອນ.
ຕາມແຜນຮ່າງ “ພັດທະນາກະສີກຳ, ຊົນນະບົດ, ຂອງຊາວກະສີກອນແຂວງນິງທ້ວນ ໃນໄລຍະ 2011-2020“ ແລ້ວ, ທາງແຂວງສືບຕໍ່ກຳນົດອະງຸ່ນແມ່ນຕົ້ນໄມ້ຕົ້ນຕໍ, ເນື້ອທີ່ປູກຕົ້ນອະງຸ່ນຈະພັດທະນາຂື້ນ 2.500 ເຮັກຕາ, ປະລິມານການຜະລິດຄາດວ່າບັນລຸ 41.000 ໂຕນໃນປີ 2015 ແລະ 60.000 ໂຕນໃນປີ 2020. ທາງແຂວງກໍ່ໄດ້ສຸມໃສ່ພັດທະນາຕົ້ນອະງຸ່ນຢູ່ເຂດທີ່ເໝາະສົມ, ເພື່ອຮັບປະກັນປີ 2015, ມີ 30% ປະລິມານອະງຸ່ນບັນລຸມາດຕະຖານ VietGAP; ກໍ່ສ້າງເຄື່ອງໝາຍການຄ້າ ແລະ ປະຕິບັດການຮ່ວມສຳພັນ, ຮ່ວມມືຕາມຂະແໜງສິນຄ້າ ລະຫວ່າງຜູ້ປູກຕົ້ນອງຸ່ນ, ຜູ້ຜະລິດ, ຜູ້ຈຳໜ່າຍ ເພື່ອຍົກສູງສະມັດຕະພາບ, ຄຸນນະພາບ, ຕອບສະໜອງຄວາມຕ້ອງການເປີດກວ້າງຕະຫຼາດ. ທ່ານ ເຈົາທັງລອງ, ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງນິງທ້ວນ, ໃຫ້ຮູ້ວ່າ:
“ພວກຂ້າພະເຈົ້າໄດ້ສຳຫຼວດບັນດາເຂດທີ່ດິນເໝາະສົມກັບຕົ້ນອະງຸ່ນ, ເອົາໃຈໃສ່ຄົ້ນຄ້ວາ ນຳໃຊ້ວິທະຍາສາດ, ເຕັກນິກ, ແນວພັນອະງຸ່ນຢ່າງເໝາະສົມ, ຖ່າຍທອດຂັ້ນຕອນເຕັກນິກທີ່ເໝາະສົມກັບດິນແຕ່ລະປະເພດ, ຕິດພັນກັບລາຍການຊົນນະບົດໃໝ່ ເພື່ອລົງທຶນກໍ່ສ້າງພື້ນຖານໂຄງລ່າງ. ເຊື່ອມຕໍ່ກັບວິສາຫະກິດໃນການຈຳໜ່າຍ ແລະ ເອົາໃຈໃສ່ເຖິງການສ້າງເຄື່ອງໝາຍອະງຸ່ນນິງທ້ວນ.“
ການພັດທະນາຕົ້ນອະງຸ່ນນິງທ້ວນ ຢ່າງໝັ້ນຄົງ ພວມເປັນການຢືນຢັນທິດທາງທີ່ຖືກຕ້ອງ, ເຮັດໃຫ້ຜະລິດຕະພັນກະເສດຂອງນິງທ້ວນ ມີທີ່ຕັ້ງຢ່າງໝັ້ນຄົງໃນຕະຫຼາດເທື່ອລະກ້າວ. ເລື່ອງສຸມໃສ່ພັດທະນາຕົ້ນໄມ້ທີ່ມີທ່າແຮງນີ້, ຍັງປະກອບສ່ວນຍົກສູງປະສິດທິຜົນທາງດ້ານເສດຖະກິດໃຫ້ແກ່ຊາວກະສີກອນ, ທັງຊຸກຍູ້ວິວັດການກໍ່ສ້າງຊົນນະບົດໃໝ່.