(vovworld) - ໂຄງການກໍ່ສ້າງຊົນນະບົດໃໝ່ຢູ່ຕາແສງແທກທັ໋ງ, ເມືອງວິ້ງແທກ, ນະຄອນເກິ່ນເທີ, ບ່ອນທີ່ຈຳນວນຊາວຄຼິດກວມກວ່າ 99%, ໄດ້ຮັບການສະໜັບສະໜູນຢ່າງສຸດຈິດສຸດໃຈຈາກຊາວຄຼິດ. ວັນທີ 26/12 ຜ່ານມາ, ຕາແສງແທກທັ໋ງ ໄດ້ກາຍເປັນຕາແສງທຳອິດຂອງນະຄອນເກິ່ນເທີ ປະຕິບັດສຳເລັດບັນດາມາດຖານກ່ຽວກັບການກໍ່ສ້າງຊົນນະບົດໃໝ່.
(ພາບປະກອບ)
ແທກທັ໋ງ ແມ່ນໜຶ່ງໃນຈຳນວນ 2 ຕາແສງທີ່ໄດ້ຮັບການເລືອກເຟັ້ນ ປະຕິບັດການກໍ່ສ້າງຊົນນະບົດໃໝ່ຂອງນະຄອນເກິ່ນເທີ. ພາຍຫຼັງ 3 ປີທີ່ມານະພະຍາຍາມຜັນຂະຫຍາຍໂຄງການກໍ່ສ້າງຊົນນະບົດໃໝ່, ແທກທັ໋ງໄດ້ບັນລຸມາດຖານກໍ່ສ້າງຊົນນະບົດໃໝ່ກ່ອນຄາດໝາຍທີ່ໄດ້ວາງອອກເກືອບ 1 ປີ. ພິເສດ, ໃນ 2 ປີ ມໍ່ໆມານີ້, ວິວັດການກໍ່ສ້າງຊົນນະບົດໃໝ່ໄດ້ຮັບການຍູ້ໄວ, ຍ້ອນມີຄວາມເຫັນດີເຫັນພ້ອມ, ຮ່ວມແຮງຮ່ວມໃຈຂອງຊາວຄຼິດ. ດ້ວຍທິດນຳ: ລັດ ແລະ ປະຊາຊົນພ້ອມກັນເຮັດ, ເຂດຊາວຄຼິດ ພ້ອມກັບອຳນາດການປົກຄອງຕາແສງ ໄດ້ປຸກລະດົມຂະບວນການກໍ່ສ້າງຊົນນະບົດໃໝ່ ແລະ ໄດ້ຮັບການສະໜັບສະໜູນຈາກປະຊາຊົນຊາວຄຼິດ ຢ່າງສຸດຈິດສຸດໃຈ. ຄຸນພໍ່, ເຈົ້າອະທິການ ຟ້າມຮົ່ງເຍີດ, ເຂດຊາວຄຼິດຫາຍຮຶງ, ໃຫ້ຮູ້ວ່າ:
“ໜຶ່ງໃນບັນດາວຽກງານເຊິ່ງບັນດາຄຸນພໍ່ ແລະ ອຳນາດການປົກຄອງທ້ອງຖີ່ນໄດ້ສົມທົບກັນ, ນັ້ນແມ່ນປຸກລະດົມຂະບວນການປົກປັກຮັກສາສິ່ງແວດລ້ອມ, ປະຈຸບັນໄດ້ມີທາງເບຕົງ, ແມ່ນຳ້ລຳເຊກໍ່ຖືກແຍກອອກເປັນຫຼາຍສາຍ, ດັ່ງນັ້ນຍາມນຳ້ແກ່ງບໍ່ຖືກນຳ້ຖ້ວມຄືແຕ່ກ່ອນອີກ“.
ໂດຍເຂົ້າໃຈໄດ້ຜົນປະໂຫຍດຈາກວຽກງານກໍ່ສ້າງຊົນນະບົດໃໝ່, ປະຊາຊົນຊາວຄຼິດ ໄດ້ຕັ້ງໜ້າປະກອບເຫື່ອແຮງ, ບໍລິຈາກເງິນເພື່ອກໍ່ສ້າງພື້ນຖານໂຄງລ່າງຊົນນະບົດ. ບັນດາເສັ້ນທາງຄົມມະນາຄົມໃນຕາແສງລວມຄວາມຍາວກວ່າ 38 ກມ, ໂດຍອຳນາດການປົກຄອງ ແລະ ປະຊາຊົນຮ່ວມແຮງຮ່ວມໃຈກໍ່ສ້າງ, ດ້ວຍມູນຄ່າ 54 ລ້ານດົ່ງ. ໃນນັ້ນປະຊາຊົນຊາວຄຼິດບໍລິຈາກກວ່າ 40 ຕື້ດົ່ງ. ມາຮອດປະຈຸບັນ, ລະບົບທາງຄົມມະນາຄົມໄດ້ເຊື່ອມຕໍ່ລະຫວ່າງບ້ານກັບບ້ານແລ້ວ, ສ້າງຄວາມສະດວກໃຫ້ປະຊາຊົນໄປມາແລກປ່ຽນຄ້າຂາຍ. ພ້ອມກັນນັ້ນ, ຊີວິດຂອງປະຊາຊົນນັບມື້ນັບໄດ້ຮັບການປັບປຸງໃຫ້ດີຂຶ້ນ, ອັດຕາສ່ວນຄອບຄົວທຸກຍາກກໍ່ຫຼຸດລົງ. ທ່ານ ໂດວັນຈິກ, ຊາວຄຼິດຢູ່ຕາແສງແທກທັ່ງ, ເມືອງວິ້ງແທກ, ນະຄອນເກິ່ນເທີ, ໃຫ້ຮູ້ວ່າ:
“ກ່ອນນີ້ລົດໃຫຍ່ບໍ່ສາມາດເຂົ້າຕາແສງໄດ້, ແຕ່ປະຈຸບັນລົດໃຫຍ່ໄດ້ເຂົ້າຕາແສງເປັນປະຈຳ, ຍ້ອນມີທາງຄົມມະນາຄົມ, ການໄປມາຄ້າຂາຍ ກໍ່ສະດວກສະບາຍກວ່າ, ປະກອບສ່ວນຍົກສູງຊີວິດການເປັນຢູ່ຂອງປະຊາຊົນຂຶ້ນ, ມີຫຼາຍຄອບຄົວໄດ້ຊື້ລົດຈັກຕື່ມອີກ. “
(ພາບປະກອບ) ປີ 2011, ຕາແສງແທກທັ໋ງ ເລີ່ມກໍ່ສ້າງຊົນນະບົດໃໝ່, ມາຮອດປະຈຸບັນ, ທາງຕາແສງໄດ້ປະຕິບັດສຳເລັດມາດຖານວາງແຜນຜັງຊົນນະບົດໃໝ່, ກໍ່ສ້າງໂຄງລ່າງຊົນນະບົດ, ຕົວຢ່າງຄື: ລະບົບໄຟຟ້າ, ເຮືອນຢູ່, ໄປສະນີ, ສຸກສາລາ, ໂຮງຮຽນ… ພິເສດ, ໃນປີ 2013, ທາງຕາແສງໄດ້ກໍ່ສ້າງສຳເລັດລະບົບຊົນລະປະທານ, ສ້າງເງື່ອນໄຂເປີດກວ້າງທົ່ງນາຂະໜາດໃຫຍ່, ປະຕິບັດການຫັນປ່ຽນຜົນລະປູກ, ຈັດເຂດຜະລິດເຂົ້າທີ່ມີຄຸນນະພາບສູງ. ທ່ານ ເຈິ່ນຕ໋ຽນຢຸ້ງ, ຊາວຄຼິດຢູ່ຕາແສງແທກທັ໋ງ, ໃຫ້ຮູ້ວ່າ:
“ພໍ່ແມ່ປະຊາຊົນກໍ່ຕອບສະໜອງແຜນນະໂຍບາຍຂອງຄະນະກຳມະການປະຊາຊົນຕາແສງ, ຍູ້ແຮງການຜະລິດ, ກ່ອນອື່ນໝົດແມ່ນກໍ່ສ້າງຄັນຄູກັນນຳ້. ອຳນາດການປົກຄອງຕາແສງ ໄດ້ພ້ອມກັບພໍ່ແມ່ປະຊາຊົນພວກຂ້າພະເຈົ້າດຳເນີນການຂູດຄອງເໜືອງ, ກໍ່ສ້າງລະບົບຄັນຄູໃຫ້ສຳເລັດ ແລະ ແນະນຳວິທີປູກເຂົ້າ 3 ລະດູການຕໍ່ປີ“.
ທ່ານ ດ່າວແອງຢຸງ, ຮອງປະທານຄະນະກຳມະການປະຊາຊົນນະຄອນເກິ່ນເທີ, ຮອງຫົວໜ້າຄະນະປະຈຳຄະນະຊີ້ນຳປະຕິບັດໂຄງການກໍ່ສ້າງຊົນນະບົດໃໝ່ນະຄອນເກິ່ນເທີ ໃຫ້ຮູ້ວ່າ, ໄລຍະຜ່ານມາ, ແທກທັ໋ງ ໄດ້ເຮັດວຽກງານໂຄສະນາເປັນຢ່າງດີ, ດັ່ງນັ້ນສາມາດລະດົມປະຊາຊົນກໍ່ສ້າງຄອງເໝືອງ, ລະບົບຊົນລະປະທານໃນເຂດທົ່ງນາຢ່າງຖາວອນ. ນີ້ແມ່ນກິດຈະກຳພື້ນຖານ ເພື່ອແນໃສ່ສ້າງທົ່ງນາຂະໜາດໃຫຍ່, ເປີດກວ້າງການຜະລິດ, ຍົກສູງລາຍຮັບໃຫ້ແກ່ປະຊາຊົນ. ທ່ານ ດ່າວແອງຢຸງ, ໃຫ້ຮູ້ວ່າ:
“ໄລຍະຈະມາເຖິງ, ພວກຂ້າພະເຈົ້າສືບຕໍ່ຂົນຂວາຍປະຊາຊົນເຂົ້າຮ່ວມການກໍ່ສ້າງຊົນນະບົດໃໝ່, ໃນນັ້ນສືບຕໍ່ສຸມໃສ່ການໂຄສະນາກ່ຽວກັບສິ່ງແວດລ້ອມ, ປູກຕົ້ນໄມ້ຕາມເສັ້ນທາງເຂົ້າຕາແສງ. ພວກຂ້າພະເຈົ້າກໍ່ສຸມໃສ່ເຂົ້າໃນການພັດທະນາການຜະລິດ, ເພາະວ່າເມື່ອລາຍຮັບເພີ່ມຂຶ້ນຈະມີເງື່ອນໄຂກໍ່ສ້າງຄອບຄົວ ແລະ ບ້ານເກີດເມືອງນອນຂອງຕົນໃຫ້ນັບມື້ນັບດີຂຶ້ນ“.
ມາຮອດປະຈຸບັນ, ພື້ນຖານໂຄງລ່າງຕາແສງແທກທັ໋ງ ໄດ້ຮັບການບຸລະນະ, ຍົກລະດັບ, ເຮັດໃຫ້ໂສມໜ້າຊົນນະບົດມີການປ່ຽນໃໝ່. ຈາກຜົນງານທີ່ບັນລຸໄດ້ຜ່ານໂຄງການກໍ່ສາງຊົນນະບົດໃໝ່, ປະຊາຊົນຊາວຄຼິດຢູ່ທີ່ນີ້ໄດ້ມີເງື່ອນໄຂພັດທະນາທຸກດ້ານ, ຍົກສູງຊີວິດການເປັນຢູ່, ປະກອບສ່ວນປະຕິບັດສຳເລັດວິວັດການຫັນເປັນອຸດສາຫະກຳ ແລະ ທັນສະໄໝຢູ່ເຂດຊົນນະບົດແຂວງເກິ່ນເທີ ກໍ່ຄືໃນທົ່ວປະເທດ.