ຜະລິດຕະພັນເຄື່ອງຈັກສານຂອງ ສະຫະກອນຈັກສານໄມ້ໄຜ່ຫວາຍ ເດີດເຟືອງນາມ

    ຈາກບັນດາວັດຖຸຄື: ຫວາຍ, ໄມ້ໄຜ່, ໄມ້ເຮັ້ຍ, ໄມ້ຊອດ…ຜ່ານສີມືທີ່ຄ່ອງແຄ້ວ, ປຊຊ ຕາແສງ ຝູເຕິນ ໄດ້ເຮັດເປັນບັນດາຜະລິດຕະພັນທີ່ມີຫຼາຍຮູບຫຼາຍແບບ ເພື່ອນຳໃຊ້ໃນການດຳເນີນຊີວິດປະຈຳວັນຄື: ກະບຽນ, ກະຈາດ, ກະທຸ້ງ….ປ້າ ເລີມທິເຟັນ ຊາວ ຕາແສງ ຝູເຕິນ ໃຫ້ຮູ້ວ່າ:

   ອາຊີບຈັກສານຂອງພວກຂ້າພະເຈົ້າ ແມ່ນອາຊີບທີ່ເປັນມູນເຊື້ອ ໂດຍລຸ້ນພໍ່ລຸ້ນອ້າຍປະໄວ້ໃຫ້. ຄອບຄົວຂ້າພະເຈົ້າມີ 3 ລຸ້ນທີ່ໄດ້ເຮັດອາຊີບນີ້ແລ້ວ, ຈາກພໍ່ເຖົ້າ, ພໍ່ ແລະ ຂ້າພະເຈົ້າ. ຄາວຍັງນ້ອຍ, ນັບແຕ່ອາຍຸ 10 ປີ ຂ້າພະເຈົ້າກໍ່ເຮັດເປັນແລ້ວ. ພວກຂ້າພະເຈົ້າມີຄວາມເອກອ້າງທະນົງໃຈ ຍ້ອນວ່າ ໝູ່ບ້ານຂອງຕົນແມ່ນໜຶ່ງໃນບັນດາໝູ່ບ້ານທີ່ມີຊື່ສຽງຢູ່ແຂວງ ຊອກຈັງ. ຂ້າພະເຈົ້າກໍ່ຢາກຖ່າຍທອດອາຊີບນີ້ໃຫ້ແກ່ລູກຫຼານຂອງຕົນ.

  ປະຈຸບັນ, ສະຫະກອນມີກ່ວາ 700 ຜະລິດຕະພັນ. ຜະລິດຕະພັນສະໜອງໃຫ້ແກ່ຕະຫຼາດພາຍໃນ ແລະ ສົ່ງອອກ. ຜະລິດຕະພັນສົ່ງອອກສ່ວນຫຼາຍແມ່ນເຄື່ອງໃຊ້ສອຍ, ກະທໍໃສ່ໂສ້ງເສື້ອຮັບໃຊ້ໃຫ້ແກ່ຮ້ານອາຫານ, ໂຮງແຮມ. ພວກຂ້າພະເຈົ້າຍັງສະໜອງວັດສະດຸກໍ່ສ້າງດ້ວຍຫວາຍ, ໄມ້ໄຜ່ໃຫ້ແກ່ບັນດາ homestay, ເຂດພັກຜ່ອນບຳລຸງສຸຂະພາບ, ເຂດທ່ອງທ່ຽວອີກດ້ວຍ.

   ພວກຂ້າພະເຈົ້າຜະລິດໃຫ້ບໍລິສັດໜຶ່ງເພື່ອສົ່ງອອກໄປຍັງ ຍີ່ປຸ່ນ, ຈີນ, ການາດາ, ໄທ… ສ່ວນຢູ່ພາຍໃນປະເທດແມ່ນສົ່ງໄປຂາຍຢູ່ ຮ່າໂນ້ຍ, ຫາຍຟ່ອງ, ລາວກາຍ, ດ່ານັງ, ນະຄອນ ໂຮ່ຈີມິນ ແລະ ບັນດາແຂວງທາງພາກໃຕ້ ຫວຽດນາມ. ທັງໄດ້ຂາຍສົ່ງ, ຂາຍຍ່ອຍ, ຂາຍເປັນຊຸດກໍ່ມີ. ນອກຈາກຜະລິດຕະພັນທ່ອງທ່ຽວ, ພວກຂ້າພະເຈົ້າຍັງໄດ້ເຮັດບັນດາຜະລິດຕະພັນປະດັບປະດາເຄື່ອງເຟີນີເຈີໃນເຮືອນອີກດ້ວຍ. ພວກຂ້າພະເຈົ້າຍັງໄດ້ເຂົ້າຮ່ວມການກໍ່ສ້າງ ຫຼື ອອກແບບຮ້ານອາຫານ, ໂຮງແຮມ, ບັນດາກິດຈະກຳທີ່ກໍ່ສ້າງດ້ວຍໄມ້ໄຜ່.

 ຜະລິດຕະພັນເຄື່ອງຈັກສານ ຕາແສງ ຝູເຕິນ ນັບມື້ນັບອຸດົມສົມບູນ. ພິເສດ, ປຊຊ ໄດ້ເຮັດບັນດາເຄື່ອງມືອອກແຮງງານທີ່ເປັນມູນເຊື້ອຂອງຊາວກະສິກອນດ້ວຍຂະໜາດນ້ອຍ ເພື່ອເປັນຂອງຕ້ອນຂອງຝາກໃນການທ່ອງທ່ຽວຄື: ເຮືອນ້ອຍ, ເຮືອກາບ, ກະຕ່າໃສ່ໝາກ ເປັນເຄື່ອງຫັດຖະກຳ ຊື່ງໄດ້ຮັບຄວາມນິຍົມທີ່ສຸດຈາກແຂກທ່ອງທ່ຽວ. ເອື້ອຍ ແກວກຕຽວຝຸ້ງ, ແຂກທ່ອງທ່ຽວມາຢ້ຽມຢາມ ຕາແສງ ຝູເຕິນ ແບ່ງປັນວ່າ:

    ຂ້າພະເຈົ້າເຫັນວ່າ ຜະລິດຕະພັນງາມທີ່ສຸດ. ນີ້ແມ່ນອາຊີບມູນເຊື້ອທີ່ຕ້ອງໄດ້ຮັກສາ, ພັດທະນາ. ຜະລິດຕະພັນສົ່ງອອກໄປຕ່າງປະເທດໄດ້ຮັບຄວາມນິຍົມທີ່ສຸດຈາກ ແຂກທ່ອງທ່ຽວ.

   ເພື່ອດຶງດູດແຂກທ່ອງທ່ຽວ, ທາງທ້ອງຖິ່ນໄດ້ເປີດ tour ທ່ອງທ່ຽວສົມທົບກັບການຢ້ຽມຢາມບັນດາວັດ ຂະແມ ຄື: ວັດເຟິດໂນ້ຍ, ວັດໂບນມັດ (4 ໜ້າ), ວັດ ບຶວເຕີມ, ວັດ ຈຳປາ….ຢູ່ ຕາແສງ ຝູເຕິນ.

  ປະຈຸບັນ, ເມື່ອມາຢ້ຽມຢາມຕາແສງ ຝູເຕິນ, ແຂກທ່ອງທ່ຽວບໍ່ພຽງແຕ່ໄດ້ຊອກຮູ້, ສຳຜັດກັບອາຊີບຈັກສານໄມ້ໄຜ່ໄມ້ເຮັ້ຍແບບຫັດຖະກຳເທົ່ານັ້ນ, ຫາກຍັງໄດ້ຮັບຊົມບັນຍາກາດທີ່ເປັນສີລະປະພິເສດສະເພາະ ດ້ວຍບັນດາຜະລິດຕະພັນເຄື່ອງຈັກຈານໄມ້ໄຜ່, ໄມ້ເຮັ້ຍ, ໄມ້ຊອດອີກດ້ວຍ. ຍ້ອນໄດ້ອະນຸລັກຮັກສາ, ເສີມຂະຫຍາຍອາຊີບຈັກສານທີ່ເປັນມູນເຊື້ອ ຕິດພັນກັບການທ່ອງທ່ຽວນັ້ນ, ຜະລິດຕະພັນເຄື່ອງຈັກສານຂອງຕາແສງ ຝູເຕິນ ນັບມື້ນັບໄດ້ເປັນທີ່ຮູ້ຈັກຂອງຫຼາຍຄົນ ແລະ ກາຍເປັນຈຸດພິເສດສະເພາະຂອງຊາວເຜົ່າ ຂະແມ ຢູ່ທີ່ນີ້./.