(vovworld) - ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ທີ່ພວມຜັນຂະຫຍາຍຢ່າງກວ້າງຂວາງຢູ່ຫວຽດນາມ ໄດ້ ແລະ ພວມປະກອບສ່ວນເຂົ້າໃນການຍູ້ແຮງວິວັດແຫ່ງການຫັນເຂດຊົນນະບົດເປັນເຂດອຸດສາຫະກຳ ແລະ ທັນສະໄໝ. ດ້ວຍທິດທາງ ແລະ ວິທີການປະຕິບັດທີ່ເໝາະສົມ, ຕາແສງ ຫງູຮຸ່ງ, ເມືອງແທງມ້ຽນ, ແຂວງຫາຍເຢືອງ ໄດ້ສ້າງການຫັນປ່ຽນຢ່າງແຮງ, ກາຍເປັນແບບຢ່າງກ່ຽວກັບການກໍ່ສ້າງຊົນນະບົດໃໝ່.
ຫງູຮຸ່ງ ໃນປະຈຸບັນ
(ພາບ: ອິນເຕີແນດ)
ຫງູຮຸ່ງ ແມ່ນຕາແສງທີ່ເຮັດວຽກງານກະສີກຳເປັນຕົ້ນ. ຫງູຮຸ່ງຕັ້ງຢູ່ທິດໃຕ້ເມືອງແທງມ້ຽນ, ຫ່າງຈາກຮ່າໂນ້ຍ ເກືອບ 80 ກມ, ກ່ອນນີ້ ຫງູຮຸ່ງແມ່ນຕາແສງປະສົບກັບຄວາມຫຍຸ້ງຍາກ. ແຕ່ໃນ 2 ກວ່າປີຜ່ານມາ, ໂດຍປະຕິບັດໂຄງການກໍ່ສ້າງຊົນນະບົດໃໝ່. ຫງູຮຸ່ງ ໄດ້ສ້າງການປ່ຽນໃໝ່ຫຼາຍຢ່າງ, ພິເສດແມ່ນພື້ນຖານໂຄງລ່າງຊົນນະບົດ. ເມື່ອມາຢ້ຽມຢາມຕາແສງຫງູຮຸ່ງ, ຄວາມຮູ້ສຶກທຳອິດນັ້ນແມ່ນບັນດາເສັ້ນທາງຊົນນະບົດໄດ້ຮັບການກໍ່ສ້າງຕາມແຜນກຳນົດຢ່າງສວຍງາມ. ບັນດາເສັ້ນທາງລະຫວ່າງບ້ານ, ຕາແສງຖືກກໍ່ສ້າງດ້ວຍເບຕົງທັງກວ້າງຂວາງ ແລະ ສະອາດ. ບັນດາກິດຈະກຳສະຫວັດດີການຄື: ໂຮງຮຽນ, ສຸກສາລາ, ຫໍວັດທະນະທຳ, ຫໍສະໝຸດ ຖືກກໍ່ສ້າງແຄມໜອງນ້ຳທີ່ຂຽວສະອາດ ເຮັດໃຫ້ເຂົດບ້ານນານີ້ຍິ່ງມີຄວາອຸດົມສົມບຸນ ແລະ ມັ່ງຄັ້ງກວ່າອີກ. ເພື່ອໄດ້ຮັບຜົນງານຄືດັ່ງກ່າວ, ອຳນາດການປົກຄອງ ແລະ ປະຊາຊົນຕາແສງຫງູຮຸ່ງໄດ້ເປັນຈິດໜຶ່ງໃຈດຽວ, ສາມັກຄີກັນໃນການປະຕິບັດໂຄງການກໍ່ສ້າງຊົນນະບົດໃໝ່. ມາຮອດປະຈຸບັນ, ຫງູຮຸ່ງ ແມ່ນໜຶ່ງໃນບັນດາຕາແສງດີເດັ່ນໃນການກໍ່ສ້າງຊົນນະບົດໃໝ່ຢູ່ເມືອງແທງມ້ຽນ ເວົ້າສະເພາະ ແລະ ແຂວງຫາຍເຢືອງ ເວົ້າລວມ. ທ່ານ ຫງວຽນຊວນຮ່ວາງ, ຮອງປະທານຄະນະກຳມະການປະຊາຊົນຕາແສງຫງູຮຸ່ງ, ໃຫ້ຮູ້ວ່າ:
“ພວກຂ້າພະເຈົ້າໄດ້ກຳນົດຈຸດໝາຍກໍ່ສ້າງຊົນນະບົດໃໝ່ແມ່ນພັດທະນາເສດຖະກິດທ້ອງຖີ່ນເພື່ອຮັບໃຊ້ປະຊາຊົນ. ຈາກແນວຄິດຄືດັ່ງກ່າວ, ໃນ 2 ປີຜ່ານມາ ດ້ວຍການຊີ້ນຳນຳພາຢ່າງໃກ້ຊິດຈາກອຳນາດການປົກຄອງ, ທ້ອງຖີ່ນໄດ້ຜັນຂະຫຍາຍການປະຕິບັດ, ບັນດາຮູບແບບກໍ່ສ້າງຊົນນະບົດໃໝ່ໄດ້ຮັບຄວາມເຫັນດີເຫັນພ້ອມຈາກປະຊາຊົນ. ມາຮອດປະຈຸບັນ, ຕາແສງບັນລຸໄດ້ 10/19 ມາດຖານ”.
ເສັ້ນທາງລະຫວ່າງບ້ານຢູ່ຫງູຮຸ່ງ
(ພາບ: ອິນເຕີແນດ) ເພື່ອບັນລຸໄດ້ບັນດາມາດຖານກ່ຽວກັບການກໍ່ສ້າງຊົນນະບົດໃໝ່, ທາງທ້ອງຖີ່ນໄດ້ລະດົມທຸກແຫຼ່ງກຳລັງ, ເພື່ອລົງທຶນກໍ່ສ້າງພື້ນຖານໂຄງລ່າງ, ໃນນັ້ນບຸລິມາສິດແກ່ການກໍ່ສ້າງທາງຄົມມະນາຄົມ. ດ້ວຍການຊ່ວຍເຫຼືອຊີມັງຈາກລັດ ແລະ ການປະກອບແຮງງານຂອງປະຊາຊົນ, ໃນໄລຍະເວລາບໍ່ທັນຮອດ 1 ປີ, ຫງຮຸ່ງ ໄດ້ສ້າງສຳເລັດບັນດາເສັ້ນທາງຄົມມະນາຄົມລະຫວ່າງບ້ານ, ຕາແສງ. ປີ 2012, ຫງູຮຸ່ງ ໄດ້ລະດົມ 85 ຄອບຄົວຊາວກະສີກອນອຸທິດທີ່ດິນກວ່າ 575 ຕາລາງແມັດ, ສະໜັບສະໜູນແຮງງານກວ່າ 1.400 ວັນ ແລະ ກໍ່ສ້າງທາງຄົມມະນາຄົມໄດ້ 3,3 ກມ ຕາມມາດຖານກໍ່ສ້າງຊົນນະບົດໃໝ່. ປ້າ ຫງວຽນທິງວຽດ, ຊາວບ້ານຫງູຮຸ່ງ ໃຫ້ຮູ້ວ່າ:
“ລັດຜັນຂະຫຍາຍການກໍ່ສ້າງຊົນນະບົດໃໝ່, ຄອບຄົວຂ້າພະເຈົ້າ ແລະ ຫຼາຍຄອບຄົວອື່ນໆກໍ່ປະຕິບັດຕາມແຜນນະໂຍບາຍນີ້. ຄອບຄົວຂ້າພະເຈົ້າກໍ່ຄືປະຊົນຊົນຢູ່ທີ່ນີ້ບໍ່ພຽງແຕ່ປະກອບແຮງງານເທົ່ານັ້ນ, ຫາກຍັງປະກອບຊັບສິນຫຼາຍຢ່າງອີກ. ຄອບຄົວຂ້າພະເຈົ້າໄດ້ປະກອບທີ່ດິນເກືອບ 60 ຕາລາງແມັດໃຫ້ຕາແສງເພື່ອກໍ່ສ້າງທາງຄົມມະນາຄົມລະຫວ່າງບ້ານ, ຕາແສງໃຫ້ກວ້າງຂວາງ ແລະ ສະອາດ, ສວຍງາມກວ່າ .”
ທ້ອນໂຮມທີ່ດິນເຂົ້າເປັນທົ່ງນາໃຫຍ່ເພື່ອຜະດ້ວຍກົນຈັກ
(ພາບ: ອິນເຕີແນດ) ພ້ອມກັບຂະບວນການກໍ່ສ້າງທາງຄົມມະນາຄົມຊົນນະບົດແລ້ວ, ຫງູຮຸ່ງ ຍັງຂະຫຍາຍບັນດາຂະແໜງອາຊີບອື່ນອີກ. ມາຮອດປະຈຸບັນ, ທົ່ວຕາແສງມີບໍລິສັດ 1 ແຫ່ງ, ວິສາຫະກິດ 2 ແຫ່ງ, ສະຫະກອນບໍລິການກະສີກຳ 1 ແຫ່ງ, ພິເສດແມ່ນມີຟາມກວ່າ 100 ແຫ່ງ ທີ່ໄດ້ຫັນປ່ຽນຜົນລະປູກ ແລະ ສັດລ້ຽງ, ອັນໄດ້ປະກອບສ່ວນຍົກສູງລະດັບຄອງຊີບໃຫ້ແກ່ປະຊາຊົນ. ທ່ານ ຫງວຽນກົງຕຸກ ໄດ້ເວົ້າດ້ວຍຄວາມພາກພູມໃຈວ່າ:
“ໃນເມື່ອກ່ອນການປູກເຂົ້າຢູ່ທີ່ນີ້ບໍ່ໄດ້ຮັບຜົນດີ, ຍ້ອນເຄີຍຖືກນ້ຳຖ້ວມ. ພາຍຫຼັງໄດ້ຮັບການແນະນຳຈາກອຳນາດການປົກຄອງ, ຂ້າພະເຈົ້າໄດ້ຫັນປ່ຽນຜົນລະປູກ ແລະ ສັດລ້ຽງ, ແຕ່ລະປີສ້າງລາຍຮັບນັບສິບລ້ານດົ່ງໃຫ້ແກ່ຄອບຄົວ. ຂ້າພະເຈົ້າພໍໃຈຕໍ່ຮູບແບບການຜະລິດນີ”.
ປະຈຸບັນ, ບັນດາມາດຖານກ່ຽວກັບການກໍ່ສ້າງຊົນນະບົດໃໝ່ຢູ່ຕາແສງຫງູຮຸ່ງ ຄື: ກໍ່ສ້າງລະບົບຊົນລະປະທານ, ພື້ນຖານໂຄງລ່າງວັດທະນະທຳ, ການພັດທະນາຂະແໜງອາຊີບ ທີ່ສ້າງລາຍຮັບໃຫ້ແກ່ຊາວກະສີກອນ… ພວມໄດ້ຮັບການປະຕິບັດ. ດ້ວຍບັນດາຜົນງານໃນເບື້ອງຕົ້ນ, ອຳນາດການປົກຄອງ ແລະ ປະຊາຊົນຫງູຮຸ່ງ ພວມວາງຄາດໝາຍສູ້ຊົນເຖິງປີ 2015 ຈະສ້າງສຳເລັດ 19/19 ມາດຖານໂດຍພື້ນຖານ, ສ້າງປະຖົມປັດໃຈເພື່ອໃຫ້ການກໍ່ສ້າງຊົນນະບົດໃໝ່ຢູ່ທ້ອງຖີ່ນສຳເລັດຜົນ.