(vovworld) - ດ້ວຍບັນດາວິທີການທີ່ມີໄຫວພິບ, ມີຫົວຄິດປະດິດສ້າງຂອງອຳນາດການປົກຄອງ ແລະ ຄວາມຕັດສິນໃຈ, ຮ່ວມແຮງຮ່ວມໃຈຂອງປະຊາຊົນບັນດາເຜົ່າໃນທ້ອງຖີ່ນ, ຕາແສງຊານທ່າງ, ນະຄອນລາຍເຈົາ, ແຂວງລາຍເຈົາ ໄດ້ປະຕິບັດສຳເລັດ 19/19 ມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ຊານທ່າງ ກໍ່ກາຍເປັນທ້ອງຖີ່ນທຳອິດຂອງແຂວງລາຍເຈົາປະຕິບັດສຳເລັດການກໍ່ສ້າງຊົນນະບົດໃໝ່.
ພາບປະກອບ
ນັບແຕ່ຂະບວນການກໍ່ສ້າງຊົນນະບົດໃໝ່ກ້າວເຂົ້າສູ່ຊີວິດ, ຕາແສງຊານທ່າງ, ດ້ວຍ 11 ບ້ານ, 5 ຊົນເຜົ່າ, 1.500 ກວ່າຄອບຄົວ ທີ່ດຳລົງຊີວິດດ້ວຍອາຊີບກະສີກຳເປັນຕົ້ນ, ລາຍຮັບສະເລ່ຍໃນປະຈຸບັນບັນລຸ 18 ລ້ານດົ່ງ/ຄົນ/ປີ. ເຖິງວ່າລາຍຮັບບໍ່ທັນສູງກໍ່ຕາມ, ແຕ່ນີ້ແມ່ນຄວາມມານະພະຍາຍາມຢ່າງໃຫຍ່ຫຼວງຂອງປະຊາຊົນໃນຕາແສງ.
ຕາແສງຊານທ່າງ 2, ມີຊາວເຜົ່າໄຢ໋ ດຳລົງຊີວິດເປັນຈຳນວນຫຼວງຫຼາຍ, ໃນຊຸມປີກ່ອນ, ຊີວິດຂອງປະຊາຊົນປະສົບກັບຄວາມຫຍຸ້ງຍາກຫຼາຍ, ອັດຕາຄອບຄົວທຸກຍາກຍັງສູງຢູ່ຍ້ອນເນື້ອທີ່ຜະລິດກະສີກຳຖືກຈຳກັດ. ແຕ່ເມື່ອປະຕິບັດໂຄງການກໍ່ສ້າງຊນນະບົດໃໝ່, ດ້ວຍການລົງທຶນພື້ນຖານໂຄງລ່າງຂອງລັດ, ປະຊາຊົນບັນດາເຜົ່າຢູ່ທີ່ນີ້ໄດ້ຕັ້ງໜ້າເປີດກວ້າງເນື້ອທີ່ຜະລິດ, ຫັນປ່ຽນຜົນລະປູກ, ນຳໃຊ້ວິທະຍາສາດເຕັກນິກເຂົ້າໃນການຜະລິດ, ຍົກສູງສະມັດຕະພາບ, ປະລິມານຜົນລະປູກຂຶ້ນ. ມີຫຼາຍຄອບຄົວຍັງກູ້ຢືມທຶນ, ລົງທຶນພັດທະນາບັນດາຮູບແບບເຮັດເສດຖະກິດໃໝ່, ນຳມາເຊິ່ງປະສິດທິຜົນທາງດ້ານເສດຖະກິດສູງ. ຕົວຢ່າງຄືຄອບຄົວອ້າຍ ທ່າວວັນຮວານ, ຢູ່ບ້ານຊານທ່າງ 2, ໄດ້ນຳເອົາສາລີມາປູກໃນເນື້ອທີ່ປູກເຂົ້າກ່ອນນີ້. ແຕ່ລະປີອາຍສາມາດເກັບກ່ຽວສາລີໄດ້ 3 ລະດູການ ແລະ ພັດທະນາການລ້ຽງສັດ, ໃຊ້ຕົ້ນສາລີແຫ້ງເພື່ອພັດທະນາຮູບແບບປູກເຫັດ. ມາຮອດປະຈຸບັນ, ຄອບຄົວອ້າຍບໍ່ພຽງແຕ່ຫຼຸດພົ້ນອອກຈາກຄວາມທຸກຍາກເທົ່ານັ້ນ, ຫາກຍັງບືນຕົວຂຶ້ນສ້າງຄວາມຮັ່ງມີ, ສ້າງວຽກເຮັດງານທຳເປັນປະຈຳໃຫ້ຜູ້ອອກແຮງງານໃນບ້ານແຕ່ 3 – 5 ຄົນອີກດ້ວຍ. ອ້າຍ ທ່າວວັນຮວານ, ໃຫ້ຮູ້ວ່າ:
“ກ່ອນນີ້ຄອບຄົວຂ້າພະເຈົ້າເຮັດນາ, ຕໍ່ມາກໍ່ປູກເຫັດ ແລະ ສາລີ. ແຕ່ລະປີສາມາດເກັບກ່ຽວໄດ້ນັບສອງສາມໂຕນ. ເມື່ອທຽບໃສ່ການປູກຝັງອື່ນໆ, ປູກເຫັດບັນລຸປະສິດທິຜົນສູງກວ່າຫຼາຍ, ສາມາດສ້າງຄວາມຮັ່ງມີໃຫ້ຄອບຄົວ ແລະ ໃຫ້ທຸກຄົນໄດ້. “
ສ່ວນຄອບຄົວອ້າຍ ເລວັນຕິງ, ຢູ່ບ້ານຊານທ່າງ 2 ພັດຫັນເນື້ອທີ່ປູກເຂົ້າ 3 ເຮັກຕາມາປູກດອກໄມ້. ພາຍຫຼັງ 2 ປີແຫ່ງການຜັນຂະຫຍາຍ, ດອກໄມ້ພັດທະນາໄດ້ດີ ແລະ ຄອບຄົວອ້າຍໄດ້ເປັນແຫຼ່ງສະໜອງດອກໄມ້ຕົ້ນຕໍ່ໃຫ້ຕະຫຼາດນະຄອນລາຍເຈົາ, ຮ່າໂນ້ຍ ແລະ ບັນດາເຂດອ້ອມຂ້າງ. ປະຈຸບັນ, ລາຍຮັບຂອງຄອບຄົວອ້າຍ ເລວັນຕິງ ບັນລຸນັບຮ້ອຍລ້ານດົ່ງຕໍ່ປີ, ສ້າງວຽກເຮັດງານທຳເປັນປະຈຳໃຫ້ຜູ້ອອກແຮງງານໃນທ້ອງຖີ່ນນັບສິບກວ່າຄົນ. ອ້າຍ ເລວັນຕິງ, ໃຫ້ຮູ້ວ່າ:
“ໃນເບື້ອງຕົ້ນຂ້າພະເຈົ້າກໍ່ປະສົບກັບຄວາມຫຍຸ້ງຍາກຫຼາຍ, ພາຍຫຼັງໄລຍະໜຶ່ງເຫັນວ່າດິນຟ້າອາກາດຢູ່ທີ່ນີ້ເໝາະສົມເພື່ອໃຫ້ດອກໄມ້ພັດທະນາ. ປະຈຸບັນຄອບຄົວຂ້າພະເຈົ້າປູກດອກກຸຫຼາບເປັນຕົ້ນ, ຮອດໂອກາດບຸນປີໃໝ່ຈະປູກດອກໄມ້ຕື່ມອີກບາງຊະນິດ. ປູກດອກກຸຫຼາບສາມາດຫາກຳໄລໄດ້ 100 ລ້ານດົ່ງ/ເຮັກຕາ/ປີ.“
ພາບປະກອບ
ໂດຍເອົາໃຈໃສ່ເປັນພິເສດເຖິງການສ້າງບັນດາແຜນຮ່າງພັດທະນາເຂດຜະລິດ, ປູກຝັງລວມສຸນ, ຫັນປ່ຽນໂຄງປະກອບເສດຖະກິດ, ຕາແສງຊານທ່າງ ໄດ້ລົງທຶນກໍ່ສ້າງບັນດາເຂດຜະລິດເຂົ້າຄຸນນະພາບສູງ, ປູກຊາ, ລ້ຽງສັດ... ທັງສະແຫວງຫາທຸກແຫຼ່ງກຳລັງ, ທັງສົມທົບບັນດາໂຄງການລົງທຶນກໍ່ສ້າງໂຄງລ່າງເສດຖະກິດ, ສັງຄົມ, ຮັບໃຊ້ຊີວິດຂອງປະຊາຊົນ. ທ່ານ ເຈືອງແທງນາມ, ຮອງປະທານຄະນະກຳມະການປະຊາຊົນຕາແສງຊານທ່າງ, ໃຫ້ຮູ້ວ່າ: ມາຮອດປະຈຸບັນ, ຕາແສງກໍ່ສ້າງທາງຄົມມະນາຄົມຊົນນະບົດໄດ້ 16 ກມ, ຫຼຸດຜ່ອນອັດຕາສ່ວນຄອບຄົວທຸກຍາກລົງເຫຼືອພຽງ 2%, ກໍ່ສ້າງຫ້ອງງຮຽນໄດ້ 8 ຫ້ອງ, ຫໍວັດທະນະທຳໄດ້ 1 ແຫ່ງ, ປະກອບສ່ວນຕອບສະໜອງຄວາມຕ້ອງການຮຳ່ຮຽນຂອງລູກຫຼານ ແລະ ບ່ອນເຄື່ອນໄຫວວັດທະນະທຳ, ປະຊຸມຂອງປະຊາຊົນໃນຕາແສງ. ທ່ານ ເຈືອງແທງນາມ, ໃຫ້ຮູ້ວ່າ:
“ນັບແຕ່ປີ 2010 ມາຮອດປະຈຸບັນ, ຊີວິດຂອງປະຊາຊົນຕາແສງໄດ້ຮັບການຫັນປ່ຽນຢ່າງຕັ້ງໜ້າ. ພິເສດແມ່ນການຜະລິດ, ໃນເບື້ອງຕົ້ນເນືອທີ່ຜະລິດເພີ່ມຂຶ້ນພຽງ 75 ເຮັກຕາໃນປີ 2010 ເທົ່ານັ້ນ, ແຕ່ປະຈຸບັນໄດ້ເພີ່ມຂຶ້ນເຖິງກວ່າ 238 ເຮັກຕາ. ໃນຕາແສງພວກຂ້າພະເຈົ້າຍັງມີເນື້ອທີ່ປູກຊາກວ່າ 200 ເຮັກຕາອີກ. ນີ້ກໍ່ແມ່ນຕົ້ນໄມ້ຊະນິດໜຶ່ງເພື່ອລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ ແລະ ສ້າງວຽກເຮັດງານທຳໃຫ້ພໍ່ແມ່ປະຊາຊົນໃນຕາແສງ“.
ໂສມໜ້າຊົນນະບົດຢູ່ຕາແສງຊານທ່າງ ນັບມື້ນັບປ່ຽນໃໝ່, ຊີວິດຂອງປະຊາຊົນພັດທະນາຢ່າງໝັ້ນຄົງ ຍ້ອນບັນດາຜົນງານຈາກການກໍ່ສ້າງຊົນນະບົດໃໝ່. ຍ້ອນເຫດນັ້ນ, ໃນຊຸມປີຕໍ່ໜ້າ, ຕາແສງຊານທ່າງຕັດສິນໃຈຮັກສາບັນດາມາດຖານທີ່ບັນລຸໄດ້, ພ້ອມທັງວາງອອກບັນດາທິດທາງພັດທະນາໃໝ່, ຊ່ວຍປະຊາຊົນພັດທະນາເສດຖະກິດ, ຍົກສູງຊີວິດດ້ານວັດທະນະທຳ, ປັບປຸງພື້ນຖານໂຄງລ່າງໃຫ້ແກ່ການສຶກສາ ແລະ ສາທາລະນະສຸກ.